ჭდე: u 19

19-წლამდელთა ელიტრაუნდამდე ორი დღე დარჩა და რა თქმა უნდა, მღელვარება მატულობს. გიორგი დევდარიანის გუნდი სფფ-ის ტექნიკურ ცენტრ „ბასაზე“ უკვე სრული შემადგენლობით ემზადება. იტალიიდან ჩამოვიდა რომან ჭანტურია; საქართველოს თასის ფინალის გუშინდელი გამარჯვებული – „დინამოელი“ ოთარ კიტეიშვილი გუნდს გუშინ საღამოსვე შეუერთდა.

დღეს, 19-წლამდელთა რიგებში ბოლო ვარჯიშს ჩაატარებს ბექა ქურდაძე. „საბურთალოსა“ და საქართველოს ნაკრების გოლკიპერი, ხვალიდან 21-წლამდე ნაკრების შეკრებაზე გადაინაცვლებს და სან მარინოსთან ევროპის ჩემპიონატის საკვალიფიკაციო ეტაპის მატჩისთვის ალექსანდრე ჩივაძის გუნდთან ერთად მოემზადება.

ხვალ, 28 მაისს, 16:00 საათზე, „მიხეილ მესხის“ სტადიონის მედიაცენტრში ტურნირისწინა ოფიციალური პრესკონფერენცია გაიმართება, სადაც ჟურნალისტების შეკითხვებს ელიტრაუნდის ოთხივე მონაწილე გუნდის – საქართველოს, ესპანეთის, პორტუგალიისა და თურქეთის ნაკრებების მთავარი მწვრთნელები უპასუხებენ. მედიის წარმომადგენლები იქვე შეძლებენ ტურნირზე დასასწრები აკრედიტაციების აღებას.

საქართველოს 19-წლამდე ნაკრების მატჩისწინა ოფიციალური ვარჯიში კი, 16:30 წუთიდან, „მიხეილ მესხის“ სტადიონზე დაიწყება და მედიისთვის, ტრადიციულად, საწყისი 15 წუთით იქნება ღია. ამავე სტადიონზე, 18:00 საათიდან ესპანეთის ნაკრები ივარჯიშებს.

ელიტრაუნდის სრული კალენდარი კი, ასე გამოიყურება:

29 მაისი

14:00 – პორტუგალია vs თურქეთი („მიხეილ მესხი 2“)

17:00 – ესპანეთი vs საქართველო („მიხეილ მესხი“)

31 მაისი

14:00 – ესპანეთი vs თურქეთი („მიხეილ მესხი 2“)

17:00 – საქართველო vs პორტუგალია („მიხეილ მესხი“)

3 ივნისი

17:00 – პორტუგალია vs ესპანეთი („მიხეილ მესხი 2“)

17:00 – თურქეთი vs საქართველო („მიხეილ მესხი“)

19-წლამდელთა ელიტრაუნდში, ეს ბოლო ჯგუფია, სადაც გამარჯვებული ჯერ არ გამოვლენილა. ევროპის ჩემპიონატზე მონაწილეობის უფლება უკვე მოიპოვეს გერმანიამ, რუსეთმა, ჰოლანდიამ, ავსტრიამ, საფრანგეთმა და უკრაინამ. ფინალური ეტაპის მასპინძელი კი, წელს საბერძნეთია და მასპინძელთა ნაკრები ტურნირზე საკვალიფიკაციო ეტაპების გავლის გარეშეა დაშვებული.

29 მაისიდან, საქართველოს ნაკრების სამივე მატჩს საზოგადოებრივი მაუწყებლის პირველი არხი პირდაპირ ეთერში შემოგთავაზებთ.

სფფ-ის პრესსამსახური    

დღეს, საქართველოს 19-წლამდე ნაკრებმა უკრაინელ თანატოლებთან გამართული ამხანაგური მატჩი ფრედ – 0:0 დაასრულა. მატჩი ბანიკოვის სახელობის სტადიონზე გაიმართა და ადგილობრივ ქომაგთან ერთად, ტრიბუნაზე თავი კიევში მცხოვრებმა ქართველებმაც მოიყარეს. მატჩს უკრაინის ფეხბურთის ფედერაციის წარმომადგენლები და უკრაინის ეროვნული ნაკრების მთავარი მწვრთნელიც ადევნებდა თვალს.

საქართველოს ნაკრებს მოედანზე ჯიმი ტაბიძე გამოუძღვა, ახალგაზრდა მცველმა ამ მატჩში ნაკრებს პირველად უკაპიტნა. ნაკრების შემადგენლობაში ითამაშა დებიუტანტმა ზაურ გოგუაძემ, რომელიც თამაშში მეორე ტაიმის ბოლოს ჩაერთო.

საერთო ჯამში, პირველ ტაიმში ქართველთა სათამაშო უპირატესობა აშკარა იყო. დევდარიანის ნაკრები მწყობრად და შეთანხმებულად თამაშობდა. იმის მიუხედავად, რომ ნაკრებს ძირითადი ბირთვის მოთამაშეების მთელი „არმია“ აკლდა, გუნდმა კარგი შთაბეჭდილება დატოვა და ჩვენი უკრაინელი კოლეგებისგანაც არაერთი კომპლიმენტი მივიღეთ.

მეორე ტაიმში, ტემპი ცოტა დავარდა, თუმცა, ჩვენი შემტევი ხაზი მაინც სწრაფად და გამიზნულად უტევდა. შეტევები გაამწვავა მეორე ტაიმში შესულმა ბექა ჭკუასელმა, რომელიც კარგად ჩაერთო თამაშში და ასევე კარგად აუბა მხარი გიორგი ბერიძეს, რომელმაც მთელი მატჩი თავდაუზოგავად იბრძოდა. თუმცა, ასპროცენტიან საგოლე მომენტებამდე საქმე არ მისულა. მეორე ტაიმში გოშაძის კარს უკრაინელებიც რამდენჯერმე დაემუქრნენ, თუმცა, უშედეგოდ. ერთ-ერთი ყველაზე აქტიური იყო უკრაინის ნაკრებში მოთამაშე ბექა ვაჩიბერაძე, რომელსაც ქართველი გულშემატკივარი კარგად იცნობს. კარგად გამოიყურებოდა ჩვენი დაცვის ხაზიც და შეიძლება ითქვას, რომ მათ უხეში შეცდომა არ დაუშვიათ.

ხვალ, საქართველოს ნაკრებს მცირე აღდგენითი ვარჯიში ექნება და დანარჩენ დროს, დევდარიანი ფეხბურთელებს დაასვენებს. 30 აპრილს კი, იმავე სტადიონზე ამ გუნდების მეორე ამხანაგური მატჩი გაიმართება, რომელიც თბილისის დროით 13:00 საათზე დაიწყება.

 

უკრაინაU19 vs საქართველოU19 0:0 (ამხ.)

უკრაინაU19: მოზილი, ოსმანი, მატვიენკო, კირიუხანცევი, შებეტუნი (ბელოუსოვი 63), ვაჩიბერაძე, ზოტკო, კვიჩი (ზუბკოვი 46), ლუკიანჩუკი, მისიკი (შვედი 46), ტრეტიაკოვი

მთ.მწვრთნელი – ოლექსანდრ გოლოვკა

საქართველოU19: გოშაძე, ჩაბრაძე, მალანია, მარგველაშვილი, ტაბიძე, მოხევიშვილი (მამუჩაშვილი 83), შულაია, გოშთელიანი (გოგუაძე 75), ბერიძე, ხარაიშვილი, კვირკვია (ჭკუასელი 63)

მთ.მწვრთნელი – გიორგი დევდარიანი

გაფრთხილება: ვაჩიბერაძე, მატვიენკო, შულაია

 

სფფ-ის პრესსამსახური

კიევი, უკრაინა

კვირას, 26 აპრილს, კიევში მიემგზავრება საქართველოს 19-წლამდე ნაკრები. გიორგი დევდარიანის გუნდი, დღეს სფფ-ის ტექნიკურ ცენტრ „ბასაზე“ შემდეგი შემადგენლობით შეიკრიბა.

მეკარეები: ბექა ქურდაძე („საბურთალო“), ოთო გოშაძე („ქასიმფაშა“, თურქეთი)

მცველები: ჯიმი ტაბიძე, გაგი მარგველაშვილი, გრიგოლ ჩაბრაძე (ყველა „საბურთალო“), ზურაბ მალანია („შუქურა“, ქობულეთი), ზურა ჯაფიაშვილი („დინამო“ თბილისი), გიორგი დუმბაძე („ლოკომოტივი“, თბილისი)

ნახევარმცველები: გიორგი ხარაიშვილი, გურამ გოშთელიანი, ლადო მამუჩაშვილი (ყველა „საბურთალო“), გიორგი ბერიძე („ზესტაფონი“), ლადო მოხევიშვილი („ლევანტე“, ესპანეთი), ზაურ გოგუაძე („ტორპედო“, ქუთაისი)

თავდამსხმელები: გიორგი ხორხელი („საბურთალო“), ბექა ჭკუასელი („დინამო“, ბათუმი), მათე კვირკვია („ზესტაფონი“), აკაკი შულაია („მერანი“, მარტვილი)

გუნდთან ერთად ვერ იქნება ლუკა ზარანდია, რომელიც ტრავმას იშუშებს. ასევე, სხვადასხვა მიზეზის გამო, ამ შეკრებაზე ვერ იქნებიან ნაკრების ძირითადი ბირთვის ფეხბურთელები – გიორგი თევზაძე, ილია კერძევაძე, რომან ჭანტურია, ოთარ კიტეიშვილი, გიორგი კილასონია…

უკრაინულ შეკრებაზე ნაკრებს დებიუტანტი ეყოლება – ქუთაისის „ტორპედოს“ ახალგაზრდა ნახევარმცველი – ზაურ გოგუაძე, რომელსაც გიორგი დევდარიანი ამხანაგურ მატჩებში დააკვირდება.

19-წლამდელები უკრაინის დედაქალაქში 2 მაისამდე დარჩებიან და საწვრთნელ შეკრებასთან ერთად, ორ ამხანაგურ მატჩს გამართავენ უკრაინის 19-წლამდე ნაკრებთან. პირველი მატჩი 28 აპრილს გაიმართება. განმეორებითი კი – 30 აპრილს.

19-წლამდე ნაკრების უკრაინული საწვრთნელი შეკრებისა და ამხანაგური მატჩების შესახებ ვიდეო, ფოტო და ტექსტურ ინფორმაციას, ტრადიციულად, სფფ-ის ოფიციალურ ვებ-გვერდსა და ფეისბუქის ოფიციალურ გვერდზე გაეცნობით.

 

სფფ-ის პრესსამსახური 

დღეს გამართულ ამხანაგურ შეხვედრაში საქართველოსა და პოლონეთის 19 წლამდე ნაკრებები კარის აღების ბევრი მცდელობის მიუხედავად ერთმაენთს უგოლოდ დაშორდნენ. შეგახენებთ, რომ ეს ნაკრებები 28 მარტსაც გაეჯიბრნენ ერთმანეთს, მაშინ პოლონელებმა 4:1 იმარჯვეს.

ამ მატჩით 19-წლამდელთა ნაკრებმა თურქული შეკრება დაასრულა და ხვალ საღამოს სამშობლოში დაბრუნდება.

შემადგენლობა: კუპატაძე, დუმბაძე, მალანია, მარგველაშვილი, ტაბიძე, თევზაძე, მოხევიშვილი, ქიტეიშვილი, ბერაძე, შულაია, კერძევაძე.
ცვლილებაზე შევიდნენ: კვირკვია, ჩიხლაძე, ჭკუასელი, კილასონია.

21 თებერვალს, საწვრთნელ შეკრებას იწყებს საქართველოს 19-წლამდე ნაკრები. ნაკრების თავკაცი – გიორგი დევდარიანი გუნდს სასტუმრო „ბომონდ გარდენში“ შეკრებს.

22 თებერვალს, გუნდს მხოლოდ აღდგენითი ვარჯიში იქნება. 23 თებერვლის დილას კი, ნაკრები იტალიაში გაემგზავრება და რომთან ახლომდებარე ქალაქ გენზანოში დაბინავდება. იქვე იქნება შეკრება და საწვრთნელი პროცესი.

25 თებერვალს, ადგილობრივი დროით 14:30 წუთზე, საერთაშორისო ამხანაგურ შეხვედრაში, იტალიის 19-წლამდე ნაკრები ქართველ თანატოლებს უმასპინძლებს. აღსანიშნავია, რომ ამხანაგური მატჩის ფორმატში, იტალიის ნაკრებს პირველად ვხვდებით.

გიორგი დევდარიანმა ამ მატჩისთვის შეკრებაზე 18 ფეხბურთელი გამოიძახა.

მეკარეები: ოთო გოშაძე („ქასიმფაშა“, თურქეთი), ბექა ქურდაძე („საბურთალო“)

მცველები: ზურაბ მალანია („შუქურა“, ქობულეთი), ჯიმი ტაბიძე, გაგი მარგველაშვილი, გრიგოლ ჩაბრაძე (ყველა „საბურთალო“), გიორგი თევზაძე („სამტრედია“), გიორგი დუმბაძე („ლოკომოტივი“, თბილისი), აკაკი შულაია („მერანი“, მარტვილი)

ნახევარმცველები: გიორგი კილასონია („მეტალურგი“, რუსთავი), გიორგი ხარაიშვილი („საბურთალო“), დემურ ჩიხლაძე („ლოკომოტივი“, თბილისი), ცოტნე მესხი („შუქურა“, ქობულეთი), გიორგი ბერიძე („ზესტაფონი“), ლუკა ზარანდია („გენკი“, ბელგია)

თავდამსხმელები: რომან ჭანტურია („ემპოლი“, იტალია), ილია კერძევაძე (სამტრედია)

რაც შეეხებათ ნაკრების ლეგიონერებს – რომან ჭანტურიასა და ლუკა ზარანდიას, ისინი გუნდს იტალიაში შეუერთდებიან.

სფფ-ის პრესსამსახური