18-წლამდელთა ნაკრებმა ლატვიაში ადგილობრივ გუნდს მოუგო

ლატვიაში საწვრთნელ შეკრებაზე გამართულმა საქართველოს 18-წლამდელთა ნაკრებმა გამარჯვება მოიპოვა. არჩილ ჟღენტის გუნდმა ლატვიის მეორე ლიგის გუნდი – ტურიბას უნივერსიტეტი 63:55 დაამარცხა.

ქართველებისთვის ეს იყო მეორე ამხანაგური მატჩი ლატვიაში. პირველად ჟღენტის გუნდი ადგილობრივ 18-წლამდელთა ნაკრებს შეხვდა და დიდი სხვაობით წააგო. დღეს კი ქართველებმა რიგის უნივერსიტეტის გუნდის ძლევით ხასიათი გამოიკეთეს.

საქართველოს 18-წლამდელთა ნაკრები ლატვიაში 17 ივლისამდე დარჩება, 1 ამხანაგურ მატჩს კიდევ გამართავს და შემდეგ ფინეთში გადაინაცვლებს. სკანდინავიაში 2 სპარინგ მატჩის ჩატარების შემდეგ ქართველები გეზს ბულგარეთისკენ აიღებენ, სადაც 21 ივლისს ადგილობრივ ნაკრებს ამხანაგურად გაეჯიბრება, ხოლო 24-იდან ევროპის ჩემპიონატში ჩაებმება.

საქართველოს 18-წლამდელთა ნაკრები 24 ივლისიდან 3 აგვისტოს ჩათვლით, ბულგარეთის დედაქალაქ სოფიაში ევროპის ჩემპიონატის „ბ“ დივიზიონში იასპარეზებს. არჩილ ჟღენტის გუნდი D ჯგუფშია ავსტრიასთან, ესტონეთთან, ისლანდიასთან, გერმანიასა და ისრაელთან.

gbf.ge