“მილუოკი”-“ჩიკაგოს” საგამოფენო მატჩში ფაჩულიამ და პაუ გასოლმა ორმაგი დუბლები გაიყვეს

სეზონის საწყის ორ საგამოფენო მატჩში მოთელვის შემდეგ ზაზა ფაჩულიამ ორმაგი დუბლი მიითვალა. „მილუოკი ბაქსმა“ მიმდინარე სეზონის მესამე საგამოფენო შეხვედრაში „ჩიკაგო ბულსს“ უმასპინძლა და დაძაბულ ბრძოლაში – 85:91 დამარცხდა.

მატჩში 2 ორმაგი დუბლი დაფიქსირდა – ქართველ ცენტრთან ერთად დაბლ-დაბლი ჩიკაგოელთა ესპანელმა ახალწვეულმა, პაუ გასოლმა მიითვალა. ამ უკანასკნელმა 30 წუთი ითამაშა და თავი 20 ქულას და 11 მოხსნას მოუყარა.

ფაჩულია სათადარიგო იყო და მოედანზე 19:20 წუთით გამოჩნდა. ზაზამ 9-დან 3 ორქულიანი და 6-დან 6 საჯარიმო ჩააგდო. მილუოკელთა ქართველმა ცენტრმა მთლიანობაში თავი 12 ქულას, 11 მოხსნას და 1 დაფარებას მოუყარა. ფაჩულიამ ბურთი 1-ჯერ დაკარგა და 3 პერსონალური მიიღო.

„მილუოკის“ სასტარტო ხუთეულში ცენტრის პოზიციაზე გამწესებულ ლარი სანდერსმაც იყოჩაღა. მან თავისიანთაგან უმეტესი 14 ქულა მოაგროვა, რასაც 8 მოხსნა და 2 ჩაჭრა მოაყოლა. 11-11 ქულით დაასრულეს ასპარეზობა მილუოკელთა ახალბედა ჯაბარი პარკერმა და ფერადკანიანმა ბერძენმა გიანის ანტეტოკოუმპომ.

მომდევნო საგამოფენო მატჩს ფაჩულიას „მილუოკი“ 14 ოქტომბერს, კლივლენდში, ლებრონ ჯეიმსის „კავალერსთან“ გამართავს.

gbf.ge