18 წლამდე გოგონათა ნაკრებმა მოლდოვა გაანადგურა
საქართველოს 18 წლამდე გოგონათა ნაკრებმა ირლანდიაში მიმდინარე ევროპის ჩემპიონატზე საკვალიფიკაციო მატჩში მოლდოვის ნაკრები დაამარცხა და B დივიზიონში, რომელშიც წლეულს პირველად ასპარეზობს, ადგილი შეინარჩუნა.
ნინო ყიფშიძისა და ზვიად დიდბარიძის გაწვრთნილმა გუნდმა ჯგუფური ეტაპის დასრულების შემდეგ დაწყებულ 17-24 ადგილებისთვის ბრძოლის პირველ მატჩში მოლდოველებს 33 ქულით – 66:30 სძლია და იმ ითხეულში მოხვდა, რომლებიც 17-20 ადგილებს გაინაწილებენ.
მოლდოვასთან ქართველ გოგონებს ტრადიციულად ნატალია ოთხმეზურმა ულიდერა, რომელმაც 31 წუთში 23 ქულა, 8 ჩაჭრა, 7 მოხსნა და 3 პასი მიითვალა. ასევე ტრადიციულად მოწოდების სიმაღლეზე გახლდათ ვიქტორია გეგეშიძე, რომელმაც 19 ქულა და 6 მოხსნა მოაგროვა.
საქართველოს ნაკრების მორიგი მეტოქე ესტონეთია, რომლის დამარცხების შემთხვევაშიც ქართველებები მე-17 ადგილისთვის მატჩში მონაწილეობის მიღების უფლებას მოიპოვებენ და შვეიცარია – ლუქსემბურგს შორის გამარჯვებულს შეხვდებიან.
საქართელოსა და ესტონეთის თამაში 12 აგვისტოს, თბილისის დროით 23:30 საათზე დაიწყება.
საქართველო – მოლდოვა 66:30 (სტატისტიკა)
GBF.GE
