დინამო ფინალში შსს-აკადემიას შეუწყვილდა
სუპერლიგის ორივე ფინალისტი ცნობილია. საჩემპიონო სერიაში გასულ „შსს-აკადემიას“ დღეს „დინამო“ შეუერთდა. ირაკლი ხოშტარიას გაწვრთნილმა დინამოელებმა რუსთავში, ნახევარფინალური სერიის მე-4 მატჩი დაძაბულ, ოვერტაიმიან ბრძოლაში მოუგეს მასპინძლებს და ფინალში გავიდნენ.
დინამოელთათვის გადამწყვეტი შეხვედრა ძალიან დააბული გამოდგა. შეხვედრა გარდამავალი უპირატესობით მიმდინარეობდა. რუსთაველები ჯერ იგებდნენ, შემდეგ 10 ქულით ჩამორჩნენ, მესამე პერიოდში კი 13 ქულითაც დაწინაურდნენ. ბოლო პერიოდში ისევ დინამოელებმა იძალეს და თამაშის გადარჩენა მასპინძლებს მოუხდათ.
მატჩის დასრულებამდე 1 წუთით ადრე მასპინძლები 70:74 აგებდნენ, თუმცა დაცვის ხარჯზე მოახერხეს დნამოელთა შეტევების მოგერიება და ჯერ ცეკვავამ საჯარიმო სროლებით ჩამორჩენა 2 ქულამდე შეამცირა, შემდეგ კი ფორსირებული ეტევით მასპინძელთა ცენტრმა გიორგი ყველაშვილმა ძირითადი დროის დასრულებამდე 1,5 წამით ადრე ანგარიშის გათანაბრება მოახერხა.
ძირითადი დრო 74:74 დასრულდა და ოვერტაიმში კიდევ უფრო დაძაბული ბრძოლა გაჩაღდა. ორმხრივი შეტევები წარუმატებლად, შეცდომებით სრულდებოდა და „დინამომ“ დამატებითი დროის პირველსავე წუთზე რომ ჩააგდო 3-ქულიანი, მისი საოვერტაიმო მონაგარიც ეს იყო. სამაგიროდ, დინამოელები დაცვაში ირჯებოდნენ კარგად და რუსთაველებს ექსტრახუთწუთეულში მხოლოდ 2 ქულა ჩააგდებინეს.
საბოლოოდ „დინამომ“ 1 ქულით – 77“76 იმარჯვა და სერიაში მესამე, ფინალის საგზურის ტოლფასი გამარჯვება მოიპოვა. გამარჯვებულთაგან 16 ქულითა და 11 მოხსნით საუკეთესო ილია ლონდარიძე გახლდათ, 15 ქულა მიითვალა ბესო ლეჟავამ, ხოლო გიორგი გამყრელიძემ სამმაგი დუბლის ზღვარზე 13 ქულით, 9 მოხსნით და 9 პასით გაიარა.
ფინალური სერია, რომელშიც მოქმედი ჩემპიონი „დინამო“ „შსს-აკადემიას“ შეხვდება, 22 მაისს დაიწყება.
რუსთავი – დინამო 76:77
მატჩისშემდგომი კომენტარები
მიხეილ ბერუაშვილი, „რუსთავის“ მთავარი მწვრთნელი:
„ძალიან დაძაბული მატჩი იყო, რომელიც 1 ქულის სხვაობით დასრულდა. სამწუხაროდ, ჩვენ დავმარცხდით და სერია დავთმეთ“.
ირაკლი ხოშტარია, „დინამოს“ მთავარი მწვრთნელი:
„ეხლა შემიძლია დინამოს თითოეულ მოთამაშეს ფინალში გასვლა მივულოცო. მადლობა მათ, ბიჭებმა ძალიან მაგრად ითამაშეს, ბოლომდე იბრძოლეს და მართლაც საამაყო გამარჯვება მოიპოვეს. რუსთავში ზედიზედ 2 გამარჯვების მოპოვება ძალიან ძნელია და ეს ჩვენ შევძელით. ეხლა ვეცდებით, დავისვენოთ და ფინალურ სერიას მობილიზებით შევხვდეთ“.
