“დინამოს” ზედიზედ მეორე მარცხი
საკალათბურთო სუპერლიგის რეგულარული ჩემპიონატის ერთ-ერთ ცენტრალურ შეხვედრას დღეს სპორტის სასახლემ უმასპინძლა. ქვეყნის მთავარ სპორტულ არენაზე ერთმანეთის წინააღმდეგ შსს-აკადემია და თბილისის დინამო წარსდგნენ.
შეხვედრა პირველივე წუთებიდან ტუჩუშის გუნდის უპირატესობით წარიმართა. აკადემიელებმა საკმაოდ სოლიდური უპირატესობის მოპოვება პირველივე მეოთხედში შეძლეს, თუმცა ბოლო წამზე “დინამოს” 4-ქულიანი შეტევის შემდეგ სხვაობა 5 ქულამდე შემცირდა – 23-18.
მეორე მეოთხედში ტუღუშის გუნდის დომინირება კიდევ უფრო თვალსაჩინო გახდა. გადამწყვეტ უპირატესობას კი შსს მესამე მეოთხედში დაეუფლა. საბოლოოდ ტუღუშის შეგირდებმა გამანადგურებელი გამარჯვება 91-63 მოიპოვეს, “დინამო” კი ზედიზედ მეორე ტურში დამარცხდა.
მატჩის ყველაზე შედეგიანი მოთამაშე 27 ქულით აკაკი ლომოური გახდა, რომელმაც 7 სამიანის ჩაგდება მოახერხა. მასპინძელთა შემადგენლობაში ერთ-ერთი გამორჩეული ნიკა მეტრეველიც გახლდათ (20 ქულა). “დინამოდან” ყველაზე შედეგიანები 15 ქულით ამყრელიძე და 16 ქულით შერმანი იყვნენ.
შსს აკადემია 91-63 დინამო თბილისი
