გიორგი ზაბახიძე: “კლუბებმა მეტი ყურადღება მენეჯმენტს უნდა დაუთმონ”
საქართველოს საკალათბურთო სუპერლიგა გადამწყვეტ ფაზაში შედის. ფინალური სერიის დაწყბვამდე სუპერლიგის აღმასრულებელ დირექტორს გიორგი ზაბახიძესთან ჩავწერთ ინტერვიუ და საუბარი სეზონის შეფასებით დავიწყეთ.
– რეგულარულმა ჩემპიონატმა საინტერესოდ ჩაიარა. არცერთი გუნდი არ იყო დაუმარცხებელი. ფავორიტების ხუთეულიდან ოთხი გუნდი ნახევარფინალში გავიდა.
მეოთხედფინალები საკმაოდ საინტერესო იყო და შედარებით სუსტმა გუნდებმა ფავორიტებს დიდი წინააღმდეგობა გაუწიეს. იგივე ქუთაისი-სოხუმის წყვილი რომ ავიღოთ.
წელს პირველად იყო მეოთხედფინალები სამ მოგებამდე და ვფიქრობ ამან გაამართლა. ჩვენ ყოველთვის ვხვდებით გუნდებს სეზონის დაწყებამდე და ასეთ დეტალებს მათთან ერთად ვწყვეტთ. მიმდინარე სეზონის წინაც უამრავ სიახლეზე შევთანხმდით. შეიცვალა თასის ფორმატი, რამაც გუნდებს თამაშების რაოდენობა გაუზარდა და მეტი დაძაბულობა შესძინა ამ ტურნირს.
სეზონის წინ “არმიამ” ოთხწრიანი რეგულარული ჩემპიონატი შემოგვთავაზა, რაზეც ჩვენ თანხმობა განვაცხადეთ. თუმცა, გუნდები ამ პროექტზე ვერ შეთანხმდნენ.
უკვე ნახევარფინალებამდე მოვედით. მატჩები ძალიან საინტერესოდ მიმდინარეობს და მინდა ყველა გუნდს წარმატება ვუსურვო.
ჩვენი მთავარი მიზანია, რომ კლუბები გაძლიერდნენ და მეტი ყურადღება დაუთმონ მენეჯმენტს, რაც შემდეგ სუპერლიგის დონეზეც აისახება.
– კეთდება ვერის ბაღის დარბაზი. ხომ არ იგეგმება იქ სუპერლიგის მატჩების ნაწილის ჩატარება?
– ვერის ბაღის დარბაზში 2015 წლის ახალგაზრდული ოლიმპიური თამაშები გაიმართება, ამიტომ იქ სარეკონსტრუქციო სამუშაოები მიმდინარეობს. ეს რა თქმა უნდა ჩვენც დაგვეხმარება. თამაშებს უფრო თავისუფლად ჩავატარებთ. სეზონის მანძილზე ყველა ლიგაში ძალიან ბევრი მატჩია და ისე გადავანაწილებთ, რომ თბილისში არსებული ყველა დარბაზი მაქსიმალურად იქნება დატვირთული.
თუმცა, ამ თემას ისევ საკლუბო სისტემის ჩამოყალიბამდე მივყავართ. კლუბები თუ სტრუქტურულად დალაგებულები იქნებიან და ინფრასტრუქტურული პრობლემები მოხსნილი იქნება, ასეთი ტიპის პრობლემები მინიმუმამდე შემცირდება. სამწუხაროდ წარმატებული და შემდეგ დაშლილი გუნდების მაგალითი საქართველოში ბევრი გვაქვს.
აღნიშნული პრობლემა მხოლოდ საქართველოს არ აწუხებს. საკალათბურთო დარბაზის შენახვა საკმაოდ ძვირი სიამოვნებაა და კომერციულად ნაკლებადაა მომგებიანი. ჩვენთან ტურზე თუ 1000-1500 გულშემატკივარია, ევროპაში 3-4 ათასია, რაც კატასტროფული განსხვავება არ არის.
– გასულ სეზონთან შედარებით შეიძლება თუ არა სუპერლიგაში პროგრესზე საუბარი?
– გულშემატკივარმა შეიძლება ცოტა სხვანაირად გაიგოს დადებითად რომ შევაფასო. შარშან 11 გუნდი იყო, წელს 9 არის. ცოტა რთული შესაფასებელია, მაგრამ რაც პირადად ჩემი აზრით ძალიან მნიშვნელოვანია, კლუბის მენეჯმენტის მხრივ არის წინ გადაგმული ნაბიჯები.
თუმცა, პრობლემები არის. იგივე “სოხუმის” კრიზისის მაგალითი ამას ადასტურებს.
– ერთ-ერთი მტკივნეული თემა სუპერლიგაში რეგიონების გუნდების რაოდენობა იყო. ამაზე რას გვეტყვით?
– სუპერლიგაში სამი ძირითადი რეგიონის გუნდი სისტემატურად იღებს მონაწილეობას. ასევე რეგიონები ასაკობრივ ლიგებში საკმაოდ აქტიურად არიან ჩართულები, სადაც ნორმალური შედეგი აქვთ. სისტემატურად ასპარეზობენ ფოთი, გორი, ზესტაფონი, ბოლნისი. მალე ჩაერთვება კასპიც.
ქუთაისში მოედნის პრობლემაა, თუმცა ამის გამოსწორებაც მომდევნო სეზონში გვპირდებიან. ძალიან კარგი პროექტია, რომელიც მთელის ქუთაისს წაადგება. ამ ქალაქს კალათბურთში მდიდარი ისტორია აქვს.
ბათუმი წლების მანძილზე ეროვნული ჩემპიონატის ერთ-ერთი გამორჩეული გუნდი იყო. საბედნიეროდ, წელსაც ასე თუ ისე არის რაღაც პოზიტიური ძვრები. იმედია უფრო მეტი ინვესტიცია განხორციელდება ბავშვთა კალათბურთში.
რუსთავს დიდი რესურსი აქვს მწვრთნელების და მოთამაშეების მხრივაც. მთავარია აქაც მეტი ფინანსები ჩაიდოს განვითარებაში.
კალათბურთის განვითარებისთვის ფედერაციის ახალი ხელმძღვანელობაც საკმაოდ ბევრ კარგ პროექტს ანხორციელებს. მაგალითად მწვრთნელთა ლიცენზირების და 3×3-ზე კალათბურთის ჩემპიონატი და კიდევ სხვა სიახლეები, რომლის პრეზენტაციაც სულ მალე მოხდება.
– გასულ სეზონში სუპერლიგის თითქმის ყველა მატჩი ტელევიზიის მეშვეობით პირდაპირ ეთერში შუქრდებოდა. წელს ამ მხრივ პრობლემებია. რაიმე სიახლეს ხომ არ უნდა ველოდოთ?
– მომავალი სეზონიდან გვინდა, რომ ჩვენი ინტერნეტ-ტელევიზია ჩავრთოთ, სადაც სუპერლიგის გარდა ყველა ასაკობრივი ჩემპიონატის მატჩები იქნება პირდაპირ ეთერში.
– ახალგაზრდული ჩემპიონატებს როგორ შეაფასებდით?
– თამაშები ყველა ასაკში ტარდება. ქვედა ასაკებში ბევრი გუნდია და ასაკის მატებასთან მათი რაოდენობა მცირდება. 20-წლამდელებიდან კი უკვე სუპერლიგაში გადადიან მოთამაშეები.
გვაქვს მოლაპარაკება, რომ საუნივერსიტეტო ლიგას პირველი ლიგის სტატუსი მივანიჭოთ. გუნდების რესურსი საქართველოში მცირეა და მოთამაშეებს ამ ლიგაში ექნებათ თავის გამოჩენის საშუალება.
მომდევნო სეზონში სამოყვარულო ლიგასაც მეტი ყურადღება დაეთმობა.
– მომდევნო სეზონში ლეგიონერებზე ლიმიტი თუ იქნება?
– ამ საკითხს გუნდებთან ერთად გავივლით. იყო მოსაზრება 3 ლეგიონერის შესახებ, თუმცა ჩვენი დებულება ევროთასებზე გასულ ქართულ გუნდზეც მოქმედებს, სადაც ლეგიონერების ფაქტორი საკმაოდ მნიშვნელოვანია.
– გულშემატკივრების წახალისების მიზნით საკმაოდ კარგი კონკურსი წამოიწყეთ. რა გეგმები გაქვთ ამ კუთხით სამომავლოდ?
– ეს ძალიან მნიშვნელოვანი პროექტია, რომელიც მომდევნო სეზონშიც გაგრძელდება და საკმაოდ კარგი პრიზებიც გვექნება.
ასე რომ, მოვუწოდებ გულშემატკივრებს, რომ იარონ სუპერლიგაზე, უგულშემატკივრონ საყვარელ გუნდებს და ჩვენს კონკურსებშიც გაიმარჯვონ.
