ინტერვიუ არმიას ახალგაზრდა კალათბურთელებთან – გიორგი ქავთარაძე და თორნიკე გაგუა

 Fanebi.com აგრძელებს ახალგაზრდა სპორტსმენების წარდგენას. დღეს ჩვენ „არმიას“ კალათბურთელებს გიორგი ქავთარაძეს და თორნიკე გაგუას გაგაცნობთ. გიორგიმ და თორნიკემ უკვე მოასწრეს სუპერლიგაში სადებიუტო შეხვედრის ჩატარება და საქართველოს 18-წლამდელთა ნაკრების კანდიდატებიც არიან. სპორტსმენებს „არმიას“ ბაზაზე ვესტუმრეთ, სადაც მათ ყველანაირი პირობა აქვთ სრულფასოვანი მომზადებისთვის.

თამაში სად და რა ასაკში დაიწყეთ?

გიორგი ქავთარაძე: კალათბურთის თამაში რუსთავში 12 წლის ასაკში დავიწყე ოთარ ხმელიძესთან, სადაც 3 წელი გავატარე.

თორნიკე გაგუა: სპორტის სასახლეში დავით ბერიშვილთან დავიწყე თამაში, შემდეგ გი ვერის ბაღში გია ტეტელაშვილთან გავაგრძელე.

პირველი მიღწევა?

ქავთარაძე: პირველივე წელს რუსთავში ჩატარებული კალათბურთის ფესტივალი მოვიგეთ. მერე საქართველოს ჩემპიონებიც გავხდით. საკმაოდ დაძაბული ტურნირი იყო და მოგებაც ორმაგად სასიხარულო გახლდათ.

გაგუა: ჩემს გუნდს არ ჰქონდა იმის საშუალება, რომ ფინალში გვეთამაშა. მაგრამ, პირადად ჩემთვის  დასამახოსოვრებელი იყო 16-წლამდელებში ერთ-ერთ გამორჩეული მატჩი, როდესაც 44 ქულა ჩავაგდე.

არმიაში როგორ აღმოჩნდით?

ქავთარაძე: არმიაში კემპიდან მოვხვდით. არც ვფიქრობდი, რომ ამირჩევდნენ, თუმცა გამიმართლა და საკმაოდ დიდი კონკურენციის პირობებში მოვახერხე დარჩენა.

გაგუა: 120 კალათბურთელი იყო პირველ ეტპაზე, შემდეგ კი ნელ-ნელა აკლდებოდა და დაახლოებით ორ კვირაში გუნდიც შეიკრა და 14 დავრჩით.

18-წლამდელთა ნაკრების გაფართოებულ სიაში მოხვდით. რა გრძნობაა?

ქავთარაძე: ნაკრებში პირველად ვარ და გამოძახებით ძალიან გახარებული ვარ.

გაგუა: ჩემთვისაც პირველი გამოძახებაა.  16-წლამდელებში არ მითამაშია. თუმცა, ახლა გამომიძახეს და პირველ რიგში ეს ჩემი შრომის დაფასებაა. 

თუნდაც ნაკრების ფაქტორის გათვალისწინებით, ჩანს, რომ სერიოზული პროგრესი განიცადეთ. გამოცდილ მოთამაშეებთან კონტაქტმა რამდენად იქონია ამაზე გავლენა? 

ქავთარაძე:  ჩვენთვის ძალიან დიდი სტიმული იყო პირველ გუნდთან თამაში. უფრო მონდომებულები გავხდით და საქმესაც მეტი სერიოზულობით ვეკიდებით. დიდებთან კონტაქტი ძალიან კარგია, ბევრ სასარგებლო რჩევას გვაძლევენ.  

გაგუა: თავიდან გაგვიჭირდა, ფიზიკურადაც და ფსიქოლოგიური მომენტიც იყო. თუმცა, მერე ავუღეთ ალღო.

გიორგი ქავთარაძე

სუპერლიგაში დებიუტს როგორ გაიხსენებდით?

ქავთარაძე: ჩვეულებრივი ვარჯიშის შემდეგ მწვრთნელმა დაგვტოვა და გავიგეთ, რომ სუპერლიგის განაცხადში მოვხვდით. ძალიან გაგვიხარდა.

გაგუა: დიდ დროს თუ დაგვითმობდნენ არ გვეგონა, თუმცა 1-2 წუთის თამაშის იმედი მაინც გვქონდა. საკმაოდ ვნერვიულობდით, მაგრამ მერე გადავლახეთ ეს ბარიერი, რაშიც გამოცდილი მოთამაშეები დაგვეხმარნენ.

თორნიკე გაგუა

თქვენს სუსტ და ძიერ მხარეებზე რომ ისაუბროთ

ქავთარაძე:  პირველ რიგში დრიბლინგი მაქვს დასახვეწი. კალათბურთში მცირე დეტალებსაც აქვს მნიშვნელობა. ასე რომ, სამუშაო ბევრია. მთავარი, მაინც მოედანზე აზროვნება არის.

გაგუა: სამუშაო სროლაზე მაქვს, 3-ქულიანები უნდა გამოვასწორო. თამაშის დროს უპირატესობას სწრაფ შეტევას ვანიჭებ.

რის გამო გადაწყვიტეთ კალათბურთის თამაში?

ქავთარაძე: შეიძლება ითქვას, რომ კალათბურთი ჩვენი ოჯახური სპორტია. თავიდან, როგორც გულშემატკივარი დავდიოდი და რუსთავის არცერთი თამაში არ გამომიტოვებია. შემდეგ კი მეც დავიწყე თამაში.

გაგუა: კალათბურთზე შესვლა განაპირობა საქართველოს ნაკრების მატჩმა. სიმართლე გითხრათ, ზუსტად არ მახსოვს ვის ვხვდებოდით, მაგრამ ჩვენი ბიჭების თამაში ძალიან მომეწონა. დიდი როლი ბაბუამ ითამაშა. მისი დიდი დამსახურებაა, რომ კალათბურთზე შევედი.

მისაბაძი ან საყვარელი მოთამაშე თუ გყავთ?

ქავთარაძე: ჩემთვის ეს მაიკლ ჯორდანია. ვისაც მისი თამაში აქვს ნანახი, ყველა ცდილობს, რომ მიბაძოს მას. ჯორდანი განსაკუთრებული მოთამაშე იყო.

გაგუა: მე ლებრონ ჯეიმსს გამოვარჩევდი, ასევე როუზს. ჩემთვის ეს ორი კალათბურთელი მისაბაძი მაგალითია.

ოცნების გუნდი?

ქავთარაძე: ყველა კალათბურთელი ოცნებობს ნბა-ში მოხვედრაზე. მეც მათ შორის ვარ. ეს ნამდვილი სანახაობაა.

გაგუა: მეც იგივეს ვიტყოდი. ნბა-ში მოხვედრა ალბათ მთავარი მიზანია, გუნდს არც აქვს ამ ეტაპზე გადამწყვეტი მნიშვნელობა.

და ბოლოს რჩევა მათ, ვინც თამაშს ახლა იწყებს

ქავთარაძე: პირველ რიგში დაუღალავი შრომა. ეს ძალიან ბევრ რამეს განაპირობებს. შეიძლება დღეს ვიღაც გჯობდეს, მაგრამ არ უნდა დანებდე და ეს აუცილებლად დაგიფასდება.

გაგუა: დავეთანხმები გიორგის. მთავარი შრომა და მონდომებაა.