კალათბურთის ეროვნული ფედერაციის გამგეობის სპეციალური განცხადება
საქართველოს კალათბურთის ეროვნული ფედერაციიის ოფისში ფედერაციის გამგეობის სხდომა გაიმართა, რომელზეც გამგეობის წევრებმა სხვადასხვა საკითხზე იმსჯელეს. მათ შორის განიხილეს ფედერაციის ბოლო არჩევნების შემდგომ დანერგილი სიახლეები, რომელთა შორის სუპერლიგის ახალი ფორმატის დანერგვა, „ა“ ლიგის დაფუძნება, ეროვნული ნაკრების სარეზერვო გუნდის (ბ ნაკრების) ჩამოყალიბება, სუპერლიგის კლუბების ფინანსური მხარდაჭერის პროგრამა, ევროპის ახალგაზრდულ საკალათბურთო ლიგის ორ ასაკობრივ ჯგუფში მონაწილეობა, პროექტი NBA Junior, ქალ კალათბურთელთა 2 ასაკობრივი ნაკრების ევროპის ჩემპიოანტზე თამაში, 18-წლამდელების ევროპის ჩემპიონატის მასპინძლობა, მწვრთნელთა გადამზადებისა და ლიცენზირების პროგრამა, უცხოელი სპეციალისტების მოწვევა, FIBA-ს სტრუქტურაში საქართველოს კალათბურთის ეროვნული ფედერაციის 3 თანამშრომლის გაწევრიანება და 3×3-ზე კალათბურთში საქართველოს ჩემპიონატის ჩატარებაა.
გარდა ამისა, ფედერაციის გამგეობამ სფე-სა და „სასკი ბასკონიას“ შორის გაფორმებულ ურთიერთთანამშრომლობის ხელშეკრულებაზეც იმსჯელა და პროექტი ერთ-ერთ საუკეთესოდ და წარმატებულად შეფასდა.
სხდომის შემდეგ გამგეობის წევრებმა პრესკონფერენცია გამართეს. კალათბურთის ეროვნული ფედერაციის პრეზიდენტმა მიხეილ გაბრიჩიძემ კომისიის სპეციალური განცხადება წაიკითხა, რომელსაც უცვლელად გთავაზობთ:
„ფედერაციის გამგეობამ კიდევ ერთხელ იმსჯელა სკეფ-სა და „სასკი ბასკონიას“ შორის გაფორმებული ურთიერთანამშრომლობის ხელშეკრულებაზე. გამგეობის წევრთა საერთო მოსაზრებით პროექტი კიდევ ერთხელ შეფასებულია როგორც ერთერთ წარმატებულ და დიდი იმედების მომცემ წამოწყებად, გამომდინარე მისი ფინანსური რისკების მინიმუმამდე შემცირებისა და იმ მოსალოდნელი შედეგების გათვალისწინებით, რომლებიც შეუწყობს ხელს ქართული კალათბურთისათვის მაღალი ევროპული დონის მოთამაშეების აღზდასა და მათ შემდგომ განვითარებას.
ფედერაციის გამგეობამ განიხილა თემურ დათიკაშვილისა და კახა შენგელიას მედია საშუალებებში გამოქვეყნებული ინფორმაცია, მისი ეთიკური და სამართლებრივი ასპექტები.
მიუხედავად იმისა, რომ ბატონები თემურ დათიკაშვილი და კახა შენგელია ითვლებოდნენ საქართველოს კალათბურთის ეროვნული ფედერაციის არჩევნებში გამარჯვებული გუნდის წევრებად, სრულყოფილად ჰქონდათ გააზრებული გუნდის მიზნები და ამოცანები, მხარი დაუჭირეს საარჩევნო პროგრამას, ისინი სისტემატიურად ცდილობდნენ ფედერაციის სტრუქტურებში, მათი სტატუსიდან გამომდინარე, მოეხდინათ პირადად თავიანთი ინტერესების გატარება, რაც დაკავშირებული გახლდათ საკალათბურთო ინფრასტრუქტურის (დიდუბისა და ვერის ბაღის საკალათბურთო კომპლექსების) მათ პირად განკარგულებაში გადაცემის და მათ მიერ დაფუძნებული საკალათბურთო კლუბ „ვითას“ არამართლზომიერ ლობირებაში. რასაც, რა თქმა უნდა, საქართველოს კალათბურთის ეროვნული ფედერაცია ვერ გაიზიარებდა.
იმავდროულად კახა შენგელია, როგორც ფედერაციის ვიცე-პრეზიდენტი ესწრებოდა როგორც „სასკი ბასკონიასთან“ მიმდინარე წინასახელშეკრულებო მოლაპარაკებებს აგრეთვე ხელშეკრულების ხელისმოწერასაც, მისთვის ცნობილი იყო ხელშეკრულების ყველა დეტალი და საერთო დადებით აზრსაც ეთანხმებოდა. აქტიურ მონაწილეობას იღებდა შარშან თბილისში ჩატარებული კემპის ორგანიზებასა და მსვლელობაში.
ყოველივე ზემოთაღნიშნულიდან გამომდინარე საქართველოს კალათბურთის ეროვნული ფედერაციის გამგეობისათვის სრულიად გასაგებია თუ რატომ ახდენენ ხსენებული ბატონები ერთერთ ყველაზე წარმატებული პროექტის დისკრედიტაციას. გამგეობისათვის მიუღებელია მისი ყოფილი წევრების მიერ მედია საშუალებებში გავრცელებული, ფედერაციის საქმიანი რეპუტაციის შემლახავი, შეგნებულად არასწორად მიწოდებული და შეურაცხმყოფელი ინფორმაცია.
გამგეობა მოუწოდებს კახა შენგელიასა და თემურ დათიკაშვილს შეწყვიტონ საზოგადოებისათვის არასწორი ინფორმაციის მიწოდება და მოახდიონონ მათ მიერ მედიაში გავრცელებული ცრუ ინფორმაციის უარყოფა“, – ნათქვამია კალათბურთის ეროვნული ფედერაციის განცხადებაში.
