საქართველოს ეროვნული საფეხბურთო ნაკრები 24 მაისს უეფას ერთა ლიგის მატჩებისთვის საწვრთნელ შეკრებას იწყებს. ივნისში დაგეგმილი ოთხი მატჩისთვის ვილი სანიოლმა 29 ფეხბურთელი გამოიძახა.
სავარჯიშო პროცესის დაწყებამდე გამოძახებულთა სიაში დღეს ერთი იძულებითი ცვლილება განხორციელდა. კუნთის ტრავმის გამო ივნისის თამაშებში ჩვენ გუნდს გიორგი ქვილითაია ვერ დაეხმარება. მის ნაცვლად განაცხადში იქნება ავსტრალიური ნიუკასლ ჯეტსის ქართველი ლეგიონერი ბექა მიქელთაძე.
20 მაისს სასტუმრო შერატონში გამართული პრესკონფერენცია ვილი სანიოლმა იძულებითი ცვლილების შესახებ ინფორმაციის გაცნობით დაიწყო. მოგვიანებით საქართველოს ნაკრების მთავარმა მწვრთნელმა ქართული მედიის წარმომადგენელთა შეკითხვებს უპასუხა.
ვილი სანიოლი (საქართველოს ეროვნული ნაკრების მწვრთნელი): “მინდა, მადლობა გადავუხადო გიორგი ქვილითაიას. მან რამდენიმე კვირის წინ მიიღო ტრავმა, თუმცა მისი გამოძახება დიდი რისკი იყო ჩემი მხრიდან, რაზეც დათანხმდა და სამწუხაროდ, ახლა გაუმწვავდა. მას იმდენად უყვარს საქართველოს ეროვნული ნაკრები, რომ მზად იყო საკუთარი ჯანმრთელობა გაერისკა. დარწმუნებული ვარ, რომ მომდევნო მატჩებში კვლავ დაგვეხმარება.
გიორგი ჩაკვეტაძეს ბოლო წლებში არაერთი პრობლემა ჰქონდა ტრავმებთან დაკავშირებით. ბოლო დროს მას სათამაშო დროის ნაკლებობა აქვს, თუმცა მისი გამოძახება გადავწყვიტე, რადგან ახლა ისეთი პერიოდი აქვს, როდესაც მხარდაჭერა და დახმარება სჭირდება. ვიცით, რა აქვს წარსულში ეროვნული ნაკრებისთვის გაკეთებული. ჰამბურგში ვიყავი, ვესაუბრე და მივიღე მისი გამოძახების გადაწყვეტილება, რათა მისთვის მხარდაჭერა მეჩვენებინა. მან იცის, რომ ყველა თამაშის ძირითად შემადგენლობაში ვერ ითამაშებს ან, შესაძლოა, განაცხადს მიღმაც აღმოჩნდეს, რადგან 29 ფეხბურთელი გვყავს, სამატჩო განაცხადში კი 23 იქნება. რასაც მისგან ველი, არის შრომისმოყვარეობა და ასპროცენტიანი პროფესიონალიზმი, რათა დაუბრუნდეს იმ დონეს, რომელზეც იყო.
დავით ვოლკოვმა ნოემბერში ძალიან კარგი შთაბეჭდილება დატოვა შვედეთთან და უზბეკეთთან შეხვედრებში, სადაც გოლიც გაიტანა. ალბანეთთან შეხვედრაში გარკვეული პრობლემები ჰქონდა, რადგან საკუთარ ადგილს ვერ პოულობდა. ბოლო პერიოდში გარკვეული პრობლემები ჰქონდა, ვერ გაჰქონდა გოლები, თუმცა მას პროფესიონალური მიდგომა აქვს და დარწმუნებული ვარ, კვლავ აღიდგენს ძველ ფორმას და ნაკრებს მომავალში დაეხმარება.
მესმის, რომ გულშემატკივარს მოლოდინი აქვს და ეს კარგია, რომ მათ გუნდის წარმატება სურთ. ჩვენს ჯგუფში გიბრალტარი, ალბათ, აუტსაიდერად მიიჩნევა, ბულგარეთს საკმაოდ დიდი ტრადიციები აქვს. ბოლო დროს არ ჰქონდათ კარგი შედეგები, თუმცა ახალი თაობა საკმაოდ დიდ დახმარებას უწევს და მომავალში ეს გუნდი აუცილებლად გაძლიერდება. რაც შეეხება ჩრდილოეთ მაკედონიას, ამ გუნდმა იტალია დაამარცხა და ამ მომენტისთვის ჩვენი ჯგუფის ყველაზე ძლიერ გუნდად მიიჩნევა, თუმცა ბოლო პერიოდში ჩვენც მივაღწიეთ გარკვეულ სტაბილურობას და რამდენად მზად არის გუნდი იმისთვის, რომ გაამართლოს გულშემატკივრის მოლოდინი, შეკრების დაწყების შემდეგ გამოჩნდება.
ოთარ კიტეიშვილი ერთ-ერთი ყველაზე მნიშვნელოვანი, გამოცდილი ფეხბურთელია ჩვენი გუნდისთვის. მას სხვადასხვა პოზიციაზე შეუძლია თამაში და ეს დადებითი მომენტია ჩემთვის. ხანგრძლივი პაუზის შემდეგ მას გარკვეული დრო დასჭირდება, რათა ფორმაში ჩადგეს და სრულყოფილად შეძლოს გუნდის დახმარება. მის პოზიციასთან დაკავშირებით გადაწყვეტილებას მოგვიანებით მივიღებ.
გიორგი მიქაუტაძე მარტში ჩვენთან ერთად არ იმყოფებოდა. არ ვიყავი კმაყოფილი მისი მიდგომით. ის ძალიან ნიჭიერი ფეხბურთელია, რომელსაც შეუძლია დაეხმაროს ნაკრებს. დაველაპარაკე და ავუხსენი, რის გამოც ვიყავი მისი თამაშით უკმაყოფილო. გიორგი ჩაკვეტაძის მსგავსად, მიქაუტაძე ძალიან ნიჭიერი ფეხბურთელია, რომელიც დაგვეხმარება, თუმცა მხოლოდ იმ შემთხვევაში, თუ გააცნობიერებს რას ველოდები მისგან და ყველა დავალებას შეასრულებს. ფეხბურთელმა ბევრი უნდა ირბინოს, ბევრი იშრომოს და მხოლოდ შემდეგაა ტექნიკური მხარე მნიშვნელოვანი.
ჩრდილოეთ მაკედონიამ ითამაშა ევროპის ჩემპიონატზე და დაამარცხა იტალიის ნაკრები და ჩვენი ჯგუფის ფავორიტად მიმაჩნია, თუმცა ეს სტატუსი არაფერს ნიშნავს და მოედანზე შეიძლება შეიცვალოს. ეროვნულ ნაკრებში გამოძახებული 29 ფეხბურთელიდან არაერთმა მოთამაშემ მიიღო ჩრდილოეთ მაკედონიის წინააღდეგ ფინალურ შეხვედრაში მონაწილეობა, თუმცა არ მგონია, რომ ახლა რევანშზე უნდა ვიფიქროთ. თუ ვინმესთვის ეს დამატებითი მოტივაცია იქნება და ამით ისინი დამატებით ენერგიას მიიღებენ, საწინააღმდეგო არაფერი მაქვს.
ჯაბა კანკავას წასვლის შემდეგ, მის პოზიციაზე გარკვეული სიცარიელე შეიქმნა. წინა შეკრებაზე ანზორ მექვაბიშვილი გამოვიძახეთ. ძალიან მომწონს მისი თამაში და აზროვნება მოედანზე. ცენტრალურ ნახევარდაცვაში საკმაოდ დიდი კონკურენციაა. გვყავს კვეკვესკირი, გვილია, აბურჯანია, კიტეიშვილი, მამუჩაშვილი და აქედან გამომდინარე ვერ ხდება ყველა ფეხბურთელის გამოძახება. სანდრო ალთუნაშვილი ეროვნული ნაკრების კანდიდატია, შარშან მას დავაკვირდით და მომავალშიც გავითვალისწინებთ, თუმცა ვიმეორებ, რომ კონკურენცია დიდია და ეს ძალიან კარგია.
ბედნიერი მწვრთნელი ვარ, რადგან ლორიას, მამარდაშვილის და კუპატაძის სახით სამი ძალიან მაღალი დონის მეკარე მყავს. გიორგი ლორიას ძალიან დიდი გამოცდილება აქვს, თუმცა ალბანეთთან შეხვედრაში მამარდაშვილმა უდიდესი პროგრესი გვაჩვენა. ლორიას არასდროს გაუცრუებია იმედი, ხოლო ალბანეთთან ვიხილეთ, რომ მამარდაშვილი სრულად განსხვავებული მეკარე იყო ბულგარეთთან შეხვედრასთან შედარებით. იქნება თუ არა ცვლილებები ამ პოზიციაზე, ამ მომენტისთვის ვერ ვიტყვი. ვნახოთ, როგორ განვითარდება მოვლენები მომავალ თამაშებში.
ხვიჩა კვარაცხელიას მარტში ვესაუბრე და ვფიქრობ, რომ ბათუმის დინამოში თამაში ამ ეტაპზე სწორი გადაწყვეტილება იყო. ნაპოლიში გადასვლა მისთვის დიდი ნაბიჯი და დიდი გამოწვევაა. ბევრი შრომა მოუწევს, თუმცა მჯერა, რომ ამ გუნდში თავის დამკვიდრებას მოახერხებს, რაც ჩვენთვისაც ძალიან კარგი იქნება.
მომდევნო მატჩებში, რა თქმა უნდა, იქნება როტაცია. ყველა ვერ ითამაშებს ოთხივე თამაშს და დიდი იმედი მაქვს, რომ მაღალ დონეზე და სრულყოფილად დაეხმარებიან ჩვენს გუნდს”.
