ქუთაისმა ფინალის საგზური მოიპოვა
საკალათბურთო კლუბი “ქუთაისი” სუპერლიგის ფინალში გავიდა, სადაც თბილისის “დინამოს” დაუპირისპირდება. ნახევარფინალური სერიის გადამწყვეტ, მეხუთე შეხვედრაში ქუთაისელებმა თბილისის სპორტის სასახლეში “არმიას” დაძაბულ ბრძოლაში მოუგეს.
შეხვედრის სამი მეთხედი თანაბარ ბრძოლაში წარიმართა. დასაწყისში მცირე უპირატესობას “არმია” ფლობმდა, შემდეგ კი მოედანზე ქუთაისელები დომინირებდნან, თუმცა არმიელები მეტოქეს გაქცევის საშუალებას არ აძლევდნენ.
ბოლო მეოთხედში ლიდერობა “არმიამ” დაიბრუნდა. ტუღუშის გუნდი 7 ქულით უგებდა მეტოქეს, რაშიც დიდი წვლილი შარაბიძემ და ფარღალავამ შეიტანეს. თუმცა, კოხრეიძის დროული წუთშესვენების შემდეგ მოედანზე სულ სხვანაირი “ქუთაისი” ვიხილეთ.
ბოლო 5 წუთში იმერლებმა შესანიშნავი კალათბურთი ითამაშეს და მეტოქეს შანსი არ დაუტოვეს. სტუმართა კლუბის ლიდერებმა დაკისრებულ მოვალეობას თავი შესანიშნავად გაართვეს. ეფექტური და რაც მთავარია შედეგიანი ტყორცნებით “ქუთაისი” ფინალში გაიყვანეს.
ფინალური სერია “ქუთაისსა” და თბილისის “დინამოს” 20 მაისიდან სპორტის სასახლეში დაიწყება.
სამწუხაროდ ამ დაძაბულ და ლამაზ შეხვედრას უსიამოვნო ინციდენტის გარეშე არ ჩაუვლია. მსაჯობით უკმაყოფილო ქუთაისელთა გულშემატკივრები, რომლებიც დღეს თბილისში მრავლად იყვნენ, სპორტის სასახლის დაცვის თანამშრომლებთან არკვევდნენ ურთიერთობას. მატჩის დასრულების შემდეგ კი, “ქუთაისის” ფანებს “არმიას” კალათბურთელებთან მოუვიდათ შელაპარაკება.
სტატისტიკა
მატჩისშემდგომი პრესკონფერენცია
კოტე ტუღუში(,,არმიის’’ მთავარი მწვრთნელი): პირველ რიგში, მივულოცავ ,,ქუთაისს’’ გამარჯვებას და წარმატებებს ვუსურვებ. საინტერესო თამაში იყო, ორივე გუნდის როგორც მოთამაშეებს, ისე მწვრთნელებს გამოადგებათ ეს თამაში. თითოეულ ქულას 5-ვე შეხვედრაში დიდი მნიშვნელობა ჰქონდა, გადამწყვეტ მომენტში დღეს ქუთაისს უფრო გაუმართლა. ჩვენ კი საჭირო შანსები ვერ გამოვიყენეთ და დავმარცხდით კიდეც. სერიის 5 თამაში არ განსხვავდებოდა ერთმანეთისგან, ყველა მატჩი დაძაბული იყო, ორივე გუნდი მაქსიმალურად ცდილობდა, შეცდომებიც იყო. დღეს ქუთაისს გაუმართლა და მოიგეს, ჩვენ კი ვეცდებით მე-3 ადგილისთვის ვიბრძოლოთ, რაც არანაკლებ მნიშვნელოვანია. ,,ბათუმი’’ ძალიან ძლიერი გუნდია და ვფიქრობ, საინტერესო თამაში გველის.
მედეა მხეიძე(,,ქუთაისის’’ მთავარი მწვრთნელი): მივულოცავ ჩემს გუნდს ამ დიდ წარმატებას. მადლობას ვეტყვი ყველა გულშემატკივარს, რომელიც დღეს მოგვეხმარა. საკმაოდ დაძაბული და საინტერესო შეხვედრა გამოვიდა, ბოლო წუთამდე არავინ იცოდა, რით დამთვრდებოდა თამაში. მინდა ჩემი გუნდის მოთამაშეებს დიდი მადლობა ვუთხრა, მაქსიმუმი გაიღეს, რომ არ შედეგისთვის მიეღწიათ. ,,არმიას’’ კი შემდგომში წარმატებებს ვუსურვებ.
ანატოლი ბოისა(,,არმია’’): მივულოცავ ,,ქუთაისს’’ გამარჯვებას, წარამატებებს ვუსურვებ. ძალიან დაძაბული თამაში გამოდგა, ყველაფერს მაყურებელი შეაფასებს. სამწუხაროდ, ბოლო 2წუთში ისეთი შეცდომები დავუშვით, რომლებმაც ჩვენი წარუმატებლობა განაპირობა. დიდი ბრძოლა იყო და ,,ქუთაისმა’’ გაიმარჯვა .
გოგა ცეკვავა(,,ქუთაისი’’): დიდი მადლობა ჩვენს გულშემატკივარს, რომლებიც საგულშემატკივროდ ჩამოვიდნენ, ქუთაისში გამართულ თამაშებზეც დარბაზი სავსე იყო, მადლობა მათ მთელი სეზონი გვერდში დგომისთვის. მადლობას ვეტყვი ჩვენს ბიჭებს, მთელი სეზონი ვვარჯიშობდით და ამისთვის ვიბრძოდით. ,,დინამოს’’ არანაკლებ ბრძოლას გავუმართავთ. დიდი მადლობა ,,არმიას’’ შესანიშნავი სერიისთვის და წარმატებებს ვუსურვებ მომავალში.
მარიამ ნიშნიანიძის ფოტოები
