სანაძე მოედანს 12 ქულით და მეოთხედფინალში გასვლით დაუბრუნდა
ამერიკის სტუდენტურ ლიგაში ასპარეზობის დასრულების შემდეგ დუდა სანაძის “სან დიეგომ” სხვა ტურნირში გადაინაცვლა.Collegeinsider.com – ასე ეწოდება ტურნირს, რომელშიც კალიფორნიული გუნდი ასპარეზობს. სანდიეგოელები აღნიშნული შეჯიბრის მეოთხედფინალში გავიდნენ. გუშინ მათ რთული ბრძოლა გადაიტანეს ტეხასურ ჰანტსვილში, სადაც ჰიუსტონ სტეიტის უნივერსიტეტი77:72 დაამარცხეს.
“სან დიეგოსთვის” ეს იყო მეორე მატჩი. პირველ შეხვედრაში კალიფორნიელებმა “პორტლენდ ვიკინგსი” 87:65 გაანადგურეს და იმ მატჩში მონაწილეობა არ მიუღია ქართველ ლეგიონერს. სანაძე ტრავმირებული იყო და მისი ასპარეზობა “ჰიუსტონ სტეიტთანაც” სათუო გახლდათ, მაგრამ სანაძემ მაინც ითამაშა და არცთუ ურიგოდ.
საქართველოს ეროვნული ნაკრების წევრი სათადარიგოთა სკამიდან ჩაერთო მატჩში და მოედანზე მთლიანობაში 18 წუთი გაატარა. სანაძემ 2-დან 2 ორქულიანი 4-დან 2 სამიანი და 2-დან 2 საჯარიმო ჩააგდო. ჯაში დუდას 12 ქულა და 2 მოხსნა დაუგროვდა. ბომბარდირი კრისტოფერ ანდერსონი გახდა 19 ქულით, ჯონი დიმ კი სანდიეგოელებს 15 ქულა მიაშველა.
მეოთხედფინალში, 26 მარტს, “სან დიეგო” “პასიფიკს” შეხვდება. ეს გუნდები სტუდენტური ლიგის “ვესტ ქოუსტის” დივიზიონში ერთად იყვნენ და გასულ სეზონში მოგებები გაცვალეს. ამჯერად ვინც მოიგებს, Collegeinsider.com-იხ ნახევარფინალში გავა.
gbf.ge
