საქართველოს 18-წლამდელთა ნაკრებმა ესტონეთთან ვერაფერი გააწყო
საქართველოს 18-წლამდელთა ნაკრებმა ევროპის ჩემპიონატის „ბ“ დივიზიონში მორიგი მარცხი განიცადა. გუშინ, ავსტრიასთან სადებიუტო მატჩში ბოლო წამებზე წაგებული შეხვედრის შემდეგ, დღეს ქართველები ესტონეთთან დიდი სხვაობით – 59:89 დამარცხდნენ.
არადა, თამაში ისე დაიწყო, საქართველოს ქომაგებს წარმატების იმედი ჩაესახათ. ლევან მასხულიას, ლუკა ზაქრაძის და ვილი ისიანის შედეგიანი თამაშის წყალობით არჩილ ჟღენტის გუნდი 11:2 დაწინაურდა. მატჩის მე-6 წუთისთვის ქართველები 17:8 იგებდნენ, თუმცა პერიოდის ბოლო წუთები 4:10 წააგეს და პირველ შესვენებაზე მხოლოდ 3-ქულიანი ლიდერობა შერჩათ.
მეორე პერიოდიდან ესტონელებმა საქმეს ხელი მეტი სერიოზულობით მოჰკიდეს, ქართველების დაცვას და სათამაშო მანერას ალღო აუღეს და შედეგმაც არ დააყოვნა – ბალტიისპირელებმა ლიდერობა მოიპოვეს და მიუხედავად ქართველების წინააღმდეგობისა, დიდი შესვენებისთვის ლიდერობა 8 ქულამდე გაზარდეს – 44:36.
მეორე ტაიმში საქართველოს ნაკრები დემორალიზებული იყო. ესტონელებმა უპირატესობის პერმანენტულად გაზრდას მიჰყვეს ხელი და მატჩის ბოლოსთვის 30-ქულიან ლიდერობაზე ავიდნენ, რაშიც ლომის წილი ივო ტამმა დაიდო – 22 ქულა. 18 ქულა მიითვალა კარლ იურჟენსმა, ხოლო ნორმან კაბინმა ორმაგი დუბლი – 10 ქულა და 11 პასი დააგროვა.
საქართველოს ნაკრებში წინა მატჩის დარად ბომბარდირმა 13 ქულა მიითვალა, თუმცა განსხვავებით ავსტრიასთან შეხვედრისა, ამჯერად ბომბარდირი ლუკა ზაქრაძე გახდა. რაც შეეხება გუშინდელი მატჩის მთავარ მექულეს, მაიზერ რევაზაშვილი ესტონეთთან 2 ქულას დასჯერდა. 9 ქულა და ამდენივე მოხსნა მიითვალა ვილი ისიანმა, ხოლო ლევან მასხულიამ შეხვედრა 7 ქულით დაასრულა.
ქართველები ხვალ ისრაელს ხვდებიან, რომელიც გუშინ გერმანიასთან 36 ქულით დამარცხდნენ.
ევროპის ჩემპიონატი. „ბ“ დივიზიონი. ბულგარეთი. სოფია. 25 ივლისი
ესტონეთი 89:59 საქართველო
18:21, 26:15, 22:15, 23:8
საქართველო: ზაქრაძე (13), ლომიძე (2), გუგეშაშვილი (6), ისიანი (9ქ, 9მ), ტურძელაძე (6); მაჭავარიანი (6), კუტალაძე (2), მასხულია (7), გოგობერიშვილი, რევაზაშვილი (2), გაგუა (6)
სრული სტატისტიკა: http://live.fibaeurope.com/www/Game.aspx?acc=1&gameID=42646
24 ივლისი საქართველო – ავსტრია 54:57
25 ივლისი ესტონეთი – საქართველო 89:59
———————————————————-
26 ივლისი ისრაელი – საქართველო 20:15
27 ივლისი საქართველო – ისლანდია 17:00
28 ივლისი გერმანია – საქართველო 22:30
gbf.ge
