შარაბიძის გუნდმა უნგრეთის ჩემპიონატში 1 ქულით წააგო

გიორგი შარაბიძის გუნდის დასანანი მარცხების სერია უნგრეთის ჩემპიონატში გრძელდება. პირველი ტურის მატჩში ქართველი ცენტრის „კიორმენდმა“ კეჩკემეტში „აშფალტთან“ დამატებით დროში წააგო, ახლა კი, მეორე ტურის შეხვედრაში 1 ქულის სხვაობით დამარცხდა.

კიორმენდელები ისევ სტუმრად თამაშობდნენ – ამჯერად „NYKK მარსოსთან“  და შეხვედრა 72:73 დათმეს. ბოლო მეოთხედის წინ სტუმრები 3 ქულით იგებდნენ, თუმცა ლიდერობის შენარჩუნება ვერ მოახერხეს.

შარაბიძემ 19 წუთი ითამაშა და პირად ანგარიშზე 6 ქულა და 3 მოხსნა ჩაიწერა. ქართველმა ცენტრმა 3-დან 2 ორქულიანი და 2-დან 2 საჯარიმო ჩააგდო. გიორგიმ 2 ჯარიმა მიიღო, მეტოქეები კი მასზე ერთხელ დაჯარიმდნენ.

2-დან 2 წაგებით „კიორმენდი“ ცხრილის ქვედა ნაწილშია და მომდევნო მატჩი შინ, „ალბასთან“, 22 ოქტომბერს ელის.

gbf.ge