Azerbaijan – Fanebi.Com – ფეხბურთი, კალათბურთი, რაგბი, სხვა

“ყარაბაღი” სკანდალში: კლუბის პრესსამსახურის უფროსმა სომხების დახოცვის მოწოდება გააკეთა

Posted on ნოემბერი 5, 2020ნოემბერი 5, 2020 by ბექა დოგრაშვილი

საფეხბურთო კლუბი “ყარაბაღი” სკანდალში გაეხვა. უეფას სადისციპლინო კომიტეტმა სოციალურ ქსელში გამოქვეყნებული პოსტის გამო კლუბის პრესსამსახურის უფროს ნურლან იბრაჰიმოვს დროებით ნებისმიერი საფეხბურთო საქმიანობის განხორციელება აუკრძალა. ევროპული ფეხბურთის მმართველმა ორგანომ 30 წლის აზერბაიჯანელი ჟურნალისტი აღნიშნული განცხადების გაკეთების გამო დასაჯა:

“სომხები უნდა დავხოცოთ. ბავშვები, ქალები, მოხუცები – ყოველგვარი განსხვავების გარეშე. ჩვენ ისინი უნდა დავხოცოთ. არავითარი დანდობა. თუ ამას არ ვიზამთ, ისინი დაგვხოცავენ ჩვენ და ჩვენს შვილებს. ისინი ამას აკეთებენ უკვე 120 წელია”.

მოგვიანებით ნურლან იბრაჰიმოვმა აღნიშნული პოსტი წაშალა, თუმცა სანქციას მაინც ვერ გადაურჩა. “ყარაბაღმა” გამოაქვეყნა განცხადება, რომელშიც ნათქვამია, რომ კლუბი ემიჯნება იბრაჰიმოვის ამ პოსტს და საკუთარ თანამშრომელს დისციპლინურ პასუხისმგებლობას დააკისრებს. სომხეთის ფეხბურთის ფედერაცია სულაც მოითხოვს, რომ “ყარაბაღი” ევროთასებიდან მოიკვეთოს.

უეფას სადისციპლინო კომიტეტი საქმის არსებით განხილვას უახლოეს დღეებში გამართავს და არ არის გამორიცხული, იბრაჰიმოვი ფეხბურთს სამუდამოდ ჩამოაშოროს.

შეგახსენებთ, რომ “ყარაბაღი” ევროპის ლიგის ჯგუფურ ეტაპზე თამაშობს. გუნდმა ორი მატჩი ჩაატარა და ორივე შეხვედრაში დამარცხდა: გასვლაზე თელ-ავივის “მაქაბისთან 0:1, შინ “ვილიარეალთან” 1:3. აზერბაიჯანული გუნდი ხუთშაბათს თურქულ “სივასპორს” ესტუმრება.

აზერბაიჯანის ნაკრების თავკაცის პოსტზე ფერნანდო იეროს კანდიდატურას განიხილავდნენ

Posted on დეკემბერი 26, 2018დეკემბერი 26, 2018 by ბექა დოგრაშვილი

აზერბაიჯანის ნაკრების მთავარი მწვრთნელის პოსტიდან გურბალ გურბანოვის გათავისუფლების შემდეგ ქევყნის ფეხბურთის ფედერაცია ახალი სპეციალისტის ძიებაშია.

კანდიდატთა შორის დასახელებული იყო მადრიდის “რეალის” ყოფილი კაპიტანი ფერნანდო იერო, თუმცა გაურკვეველი მიზეზის გამო აზერბაიჯანელებმა მასზე უარი თქვეს.

შეგახსენებთ, რომ 50 წლის ფერნანდო იერო 2018 წლის მსოფლიოს ჩემპიონატზე ესპანეთის ნაკრებს თავკაცობდა, რომელიც ტურნირს მერვედფინალურ ეტაპზე რუსეთის ნაკრებთან დაპირისპირებისას (1:1, პენ. 3:4) გამოეთიშა.

ყაზახეთის ნაკრებმა აზერბაიჯანი მინიმალური უპირატესობით დაამარცხა (ვიდეო)

Posted on მარტი 26, 2016მარტი 27, 2016 by ბექა დოგრაშვილი

თურქეთის საკურორტო ქალქ ბელეკში დასრულდა აზერბაიჯანისა და ყაზახეთის ნაკრებებს შორის გამართული ამხანაგური მატჩი. შეხვედრა ყაზახების გამარჯვებით, ანგარიშით 1:0 დასრულდა. ეს ერთადერთი გოლი შეხვედრის მე-8 წუთზე ყარაგანდის “შახტარის” ნახევარმცველმა მაკსატ ბაიჟანოვმა თავური დარტყმით გაიტანა. საერთოდაც, ყაზახები უფრო ყოჩაღად გამოიყურებოდნენ და გოლის გატანის შანსი კიდევ არაერთხელ ჰქონდათ, თუმცა ხან შეტევის დამამთავრებელ ფაზაში სცოდავდნენ, ხანაც აზერბაიჯანელთა მეკარე თამაშობდა საიმედოდ, მატჩის ბოლოს კი ერთ ეპიზოდში ბურთი ხარიხასაც ორჯერ გაარტყეს.

როგორც მოგეხსენებათ, ყახაზეთის ნაკრები მომდევნო ამხანაგურ მატჩს თბილისში, საქართველოს ეროვნული გუნდის წინააღმდეგ გამართავს. შეხვედრა 29 მარტს, “დინამო არენაზე” გაიმართება და 21:00 საათზე დაიწყება. მატჩზე დასასწრები ბილეთების რეალიზაცია ორშაბათიდან დაიწყება. ბილეთების შეძენა “დინამო არენას” სალაროებში 28 მარტიდან იქნება შესაძლებელი. 28 მარტს სალაროები 11:00-დან 18:00 საათამდე იმუშავებს, 29 მარტს კი, თამაშის დაწყებამდე. ბილეთის ფასი 5 ლარია.

აზერბაიჯანში მომხდარ ინციდენტს “გაბალა” სპეციალური განცხადებით ეხმაურება

Posted on ივლისი 10, 2015ივლისი 10, 2015 by ბექა დოგრაშვილი

უეფას ევროპის ლიგის პირველ საკვალიფიკაციო ეტაპზე “გაბალასა” და “დინამო თბილისს” შორის გამართული მატჩის მიმდინარეობისას მომხდარ ინციდენტს აზერბაიჯანული კლუბი სპეციალური განცხადებით ეხმაურება. კლუბმა განცხადება ორ ენაზე – აზერბაიჯანულად და ქართულად გამოაქვეყნა.

“გაბალას” განაცხადებას უცვლელად გთავაზობთ:

“უეფას ევროპის ლიგის გათამაშების ფარგლებში 09.07.2015 წელს ჩატარებული მატჩის “გაბალა” – “დინამო თბილისი” დროს მომხდარი შემთხვევის გამო დიდი სინანულის და მწუხარების გრძნობა განვიცადეთ. მატჩის დაწყებამდე უმაღლეს დონეზე იქნა განხორციელებული უსაფრთხოების ზომები, მაგრამ აზერბაიჯანისა და საქართველოს შორის მეგობრული ურთიერთობების მოწინააღმდეგე ძალებმა, როგორც თბილისში ასევე გაბალას ქალაქის სტადიონზე, თავიანთი საქმე გააკეთეს. ერთი პროვოკატორი ჯგუფის მხრიდან საქართველოს სახელმწიფო ატრიბუტების შეურაცხყოფა და პოლიტიკური ლოზუნგების წამოყენება ამ პროვოკაციის ერთ ერთ ნაწილად უნდა მივიჩნიოთ. როგორც ადრე, ასევე ეხლაც ჩვენს ქვეყნებს შორის ახლო თანამშრომლობას, და ჩვენი ხალხის მრავალწლიან მეგობრობაზე ზეგავლენას ეს დასაგმობი ფაქტი ვერ მოახდენენ.
გუშინდელი მატჩის წინ და შემდეგ ორივე კლუბების წარმომადგენლებს შორის მიუხედავად მატჩის შედეგისა არ ყოფილა დაძაბული ურთიერთობები, ეს მოედანზეც ჩანდა ფეხბურთელებს შორის.

ჩვენ გვინდა რომ, ასეთი ქმედებების ჩამდენები ორივე ქვეყანაში დადგინდება და შესაბამის სასჯელს მიიღებენ.

კიდევ ერთხელ ვგმობთ მომხდარს და უდიდეს სინანულს გამოვხატავთ”.

აზერბაიჯანში მომხდარ ინციდენტს “გაბალას” ვიცე-პრეზიდენტი გამოეხმაურა

Posted on ივლისი 10, 2015ივლისი 10, 2015 by ბექა დოგრაშვილი

უეფას ევროპის ლიგის პირველ საკვალიფიკაციო ეტაპზე “გაბალასა” და “დინამო თბილისს” შორის გამართული მატჩის მიმდინარეობისას მომხდარ ინციდენტს აზერბაიჯანული კლუბის ვიცე-პრეზიდენტი ფარიზ ნაჯაფოვი გამოეხმაურა.

“გუშინ სტადიონზე ასეთი ბანერების გამოფენის ფაქტით შეშფოთებულნი ვართ. მე შევხვდი სამართალდამცველი ორგანოს წარმომადგენლებს და დამნაშავეების გამოვლენა ვთხოვე. ასეთი პროვოკაციის დაშვება არ შეიძლება. “დინამოს” სურს, რომ უეფას მიმართოს, ჩვენ ქართული გუნდის ხელმძღვანელობასთან მოლაპარაკებებს ვაწარმოებთ. ამ ყველაფერში ჩვენი კლუბი დამნაშავე არ არის. ეს ბანერები ჩვენი ფანკლუბის ტრიბუნაზე არ გამოუფენიათ. დაინტერესებულნი ვართ, რომ ეს ადამიანები გამოავლინონ და დასაჯონ. პატივი უნდა ვცეთ სხვა ქვეყნების ატრიბუტიკასა და დროშებს, როგორც ამას ჩვენ ვითხოვთ სხვებისგან. რაც არ უნდა მომხდარიყო, სხვა ქვეყნის ატრიბუტიკას პატივი უნდა ვცეთ. პირველ მატჩი ქართველი გულშემატკივრების მიერ გამოვლენილი პროვოკაციული ქმედება არ ასახავს ქართველი ხალხის აზრს. ჩვენ უფრო ტოლერანტული უნდა ვიყოთ”, – ციტირებს “გაბალას” ვიცე-პრეზიდენტის სიტყვებს სპორტული პორტალი azerisport.com

შეგახსენებთ, რომ აღნიშნული მატჩის მიმდინარეობისას აზერბაიჯანელმა გულშემატკივრებმა ტრიბუნაზე გამოფინეს ბანერები, რომლებზედაც საქართველოს ქალაქები აზერბაიჯანის ტერიტორიად იყო მოხსენიებული. გარდა ამისა, მასპინძლებმა საქართველოს დროშა სტადიონზევე დაწვეს. მთელი მატჩის განმავლობაში მათი მხრიდან ქართველი ქომაგების მისამართით შეურაცხმყოფელი შეძახილები ისმოდა.

“დინამო თბილისი” აპირებს, რომ მომხდართან დაკავშირებით უეფას მიმართოს.

“დინამო თბილისი” გაბალაში მომხდარ ინციდენტთან დაკავშირებით უეფას მიმართავს

Posted on ივლისი 10, 2015 by ბექა დოგრაშვილი

უეფას ევროპის ლიგის პირველ საკვალიფიკაციო ეტაპზე “გაბალასა” და “დინამო თბილისს” შორის გამართული მატჩის მიმდინარეობისას მომხდარ ინციდენტს თბილისური კლუბის მმართველი დირექტორი ნიკა ჯღარკავა გამოეხმაურა.

“იქიდან გამომდინარე, რომ ყველანი მატჩზე ვიყავით კონცენტრირებულნი, ფაქტი 100 პროცენტით არ შეგვიმჩნევია. მომხდარი საჭიროებს გაანალიზებას. კლუბის მხრიდან, რა თქმა უნდა, შესაბამისი განცხადება გაკეთდება. მომხდართან დაკავშირებით უეფასაც მივმართავთ”, – განაცხადა ნიკა ჯღარკავამ ტელეკომპანია “რუსთავი 2”-ისთვის მიცემულ ინტერვიუში.

ბრძოლა ბანერებით (ვიდეო)

Posted on ივლისი 10, 2015ივლისი 10, 2015 by ბექა დოგრაშვილი

უეფას ევროპის ლიგის პირველ საკვალიფიკაციო ეტაპზე “გაბალასა” და “დინამო თბილისს” შორის გამართულ მატჩამდე აზერბაიჯანული გუნდის ვიცე-პრეზიდენტი ფარიზ ნაჯაფოვი კი ამბობდა, რომ სტადიონზე პროვოკაციული შინაარსის ბანერებს არ დაუშვებდა, თუმცა აზერბაიჯანელმა ქომაგებმა ტრიბუნიდან პოლიტიკური შინაარსის არაერთი პოსტერი მაინც გადმოფინეს, რომელზედაც მთელი რიგი ქართული ქალაქები აზერბიჯანულად იყო მოხსენიებული.

ერთ-ერთ ბანერზე ბორჩალო უძველეს აზერბაიჯანულ მიწად იყო მიჩნეული. სინამდვილეში ბორჩალო ქვემო ქართლის ერთ-ერთი ისტორიული მხარე იყო, რომელმაც ეს სახელწოდება XVII საუკუნის დასაწყისში მას შემდეგ მიიღო, რაც დებედას ხეობაში თურქმანული ტომი ბორჩალუ ჩამოასახლეს. სხვათა შორის, ბორჩალოელი თურქულენოვანი მოსახლეობა ყოველთვის საქართველოს მოქალაქეებად იაზრებდა საკუთარ თავს და აქტიურ მონაწილეობასაც იღებდა საქართველოში შემოჭრილი მტრების წინააღმდეგ ბრძოლაში. ამის მაგალითად აღა-მაჰმად ხანთან გამართული 1795 წლის კრწანისის ბრძოლაც შეიძლება დავასახელოთ.

მოგვიანებით სამართალდამცველებმა აზერბაიჯანელ ქომაგებს აღნიშნული ბანერები ჩამოართვეს, თუმცა მანამდე პროვოკატორი გულშემატკივრები პოსტერებს დემონსტრაციულად აჩვენებდნენ.

აზერბაიჯანელები წერენ, რომ ეს პროვოკაციული ქმედება პასუხი იყო ერთი კვირის წინათ მომხდარი შემთხვევისა, როდესაც ამავე გუნდების მონაწილეობით გამართულ მატჩში “დინამო არენას” ტრიბუნაზე გულშემატკივრების ნაწილმა გამოკიდა ბანერი, რომელზედაც ეწერა: “ჩვენ გვახსოვს კახი და ზაქათალა. 1921”. “დინამო თბილისმა” აღნიშნულთა დაკავშირებით მეორე დღესვე გაავრცელა განცხადება და მომხდარს გაემიჯნა.

აღსანიშნავია, რომ მსგავსი შინაარსის ბანერი ბაქოს “ნეფთჩისა” და საჩხერის “ჩიხურას” შორის შარშან გამართულ შეხვედრაზეც გამოიფინა. მაშინ ამ ქმედებას საკამოდ დიდი აჟიოტაჟი მოყვა. იმერული კლუბი ბანერის შინაარს გაემიჯნა, თუმცა უეფასგან სანქციას მაინც ვერ ასცდა: მაშინ, უეფას გადაწყვეტილებით, “ჩიხურამ” სტადიონის ორ სექტორზე ანტირასისტული ბანერი გამოფინა.

ფაქტი ერთია, უეფა სტადიონებზე პოლიტიკური შინაარსის ბანერების გამოკიდებას მკაცრად კრძალავს და წესის დამრღვევ გუნდებს სჯის. ვნახოთ, გაატარებს თუ არა უეფა სანქციებს “გაბალას” მიმართ ან მოყვება თუ არა დღევანდელ ინციდენტს რაიმე განმარტება თავად კლუბის მხრიდან.

“დინამო” — “გაბალა”: ბუკმეიკერთა პროგნოზი

Posted on ივლისი 1, 2015 by ბექა დოგრაშვილი

ხვალ უეფას ევროპის ლიგის 2015/16 წლების გათამაშების საკვალიფიკაციო ეტაპი აიღებს სტარტს. თბილისში ადგილობრივი “დინამო” აზერბაიჯანულ “გაბალას” მიიღებს. ეს გუნდები ისტორიაში პირველად შეხვდებიან ერთმანეთს და ბუკმეიკერები მცირე უპირატესობას “დინამოს” ანიჭებენ.

Adjarabet-იც და Europe-bet-იც უფრო დაბალ კოეფიციენტს “დინამო თბილისს” აძლევენ. კოეფიციენტები ასე ნაწილდება:

Adjarabet: “დინამო” — “გაბალა” (2.30 – 3.40 – 2.85)
Europe-bet: “დინამო” — “გაბალა” (2.30 – 3.40 – 2.90)

წამყვანი ბრიტანული საბუკმეიკერო კანტორა Bet365 ნაკლებ კოეფიციენტს ასევე მასპინძელ გუნდს უწერს:

Bet365: “დინამო” — “გაბალა” (2.25 – 3.40 – 2.80)

“დინამომ” საქართველოს ჩემპიონატი მესამე ადგილზე დაასრულა, მოაგროვა იმდენივე ქულა, რამდენიც “დინამო ბათუმმა”, თუმცა ურთიერთშეხვედრებში დაფიქსირებული უარესი შედეგის გამო უკეთესი პოზიცია ბათუმურ კლუბს ერგო. თბილისურმა გუნდმა უმაღლეს ლიგაში 56 გოლი გაიტანა, რაც საუკეთესო მაჩვენებელია, გაუშვა 28 ბურთი. აღსანიშნავია ისიც, რომ “დინამომ” სეზონის ბოლოს ქვეყნის თასის ფინალურ შეხვედრაში “სამტრედია” ანგარიშით 5:0 გაანადგურა. ივნისში გია გეგუჩაძის გუნდმა სლოვენიაში სამი ამხანაგური მატჩი ჩაატარა: მაკედონიურ “შკენდიასთან” ანგარიშით 0:1 დამარცხდა; სლოვენიური “დომჟალე” ანგარიშით 3:1 დაამარცხა და ასევე სლოვენიურ “ზავრჩს” 2:0 მოუგო.

“გაბალამ” აზერბაიჯანის პრემიერლიგაში მესამე ადგილი დაიკავა. გუნდმა 32 მატჩში 54 ქულა მოაგროვა. “გაბალამ” არცთუ ისე შედეგიანი ფეხბურთი აჩვენა — გაიტანა 46 გოლი და გაუშვა 35 ბურთი, რაც ლიდერებს შორის ყველაზე ცუდი მაჩვენებლებია. პრემიერლიგის გათამაშების დასრულების შემდეგ გუნდს მატჩი არ ჩაუტარებია ანუ 28 მაისის შემდეგ “გაბალა” უთამაშებელია.

“დინამოსა” და “გაბალას” შორის შეხვედრა ხუთშაბათს, “დინამო არენაზე”, 20:00 საათზე დაიწყება. მატჩზე დასასწრები ბილეთის ფასი 5 ლარია და მისი გაყიდვა დღეს, დილის 11:00 საათიდან, “დინამო არენას” სალაროებში დაიწყება.

მატჩის პირდაპირ რეპორტაჟს საზოგადოებრივი მაუწყებლის პირველი არხი შემოგთავაზებთ.

ბაქოში მომხდარ ინციდენტს საქართველოს შინაგან საქმეთა სამინისტრო ეხმაურება

Posted on აგვისტო 4, 2014აგვისტო 4, 2014 by ბექა დოგრაშვილი

უეფას ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის გამართულ მატჩში მომხდარ ინციდენტთან დაკავშირებით შინაგან საქმეთა სამინისტრომ სპეციალური განცხადება გამოაქვეყნა, რასაც აქვე გთავაზობთ:

“მიმდინარე წლის 31 ივლისს, აზერბაიჯანის დედაქალაქ ბაქოში გამართული – ბაქოს “ნეფჩთი”-სა და საჩხერის “ჩიხურა”-ს საფეხბურთო მატჩის დროს მომხდარი ინციდენტის შემდეგ, რომელშიც მონაწილეობდნენ “ქართული სპორტის ქომაგების” წარმომადგენლები, ვითარებაში გარკვევის მიზნით შინაგან საქმეთა სამინისტროს წარმომადგენლების მხრიდან მოხდა შეხვედრა და გასაუბრება აღნიშნულ ინციდენტში მონაწილე პირებთან, რომლებმაც განაცხადეს, რომ მათი საქციელი არ იყო პოლიტიკურად მოტივირებული და არ ისახავდა მიზნად არცერთი მეზობელი სახელმწიფოს სუვერენული უფლებების შელახვას ან შეურაცხყოფას.

“ქართული სპორტის ქომაგებმა” გააცნობიერეს თავიანთი ქმედებების პოლიტიკური შედეგები და აღნიშნეს, რომ მომავალში მათი მხრიდან მაქსიმალურად იქნება გააზრებული ყოველი ნაბიჯი, რათა სპორტულ ღონისძიებებზე მათი აქტიურობა არ იქცეს ორ მეგობარ-მეზობელ სახელმწიფოს შორის დაპირისპირების მიზეზად.

მოგეხსენებათ, რომ საფეხბურთო გუნდებს შორის განმეორებითი შეხვედრა მიმდინარე წლის 7 აგვისტოს, 21:00 საათზე, მ. მესხის სახელობის “ლოკომოტივის” სტადიონზე გაიმართება. შინაგან საქმეთა სამინისტრო მოუწოდებს ყველა გულშემატკივარს კორექტულობისაკენ და სტუმარი გუნდის გულშემატკივრების პატივისცემისაკენ. აქვე ხაზგასმით აღვნიშნავთ, რომ ყველა სამართალდამრღვევი პირი კანონის შესაბამისად მკაცრად დაისჯება”.

„ჩიხურამ“ აზერბაიჯანული „ნეფთჩი“ დაამარცხა

Posted on ივნისი 17, 2014 by ბექა დოგრაშვილი

თურქეთში შეკრებაზე მყოფი საჩხერის „ჩიხურა“ ამხანაგურად აზერბაიჯანულ „ნეფთჩის“ გაეჯიბრა და მეტოქე ანგარიშით 3:2 დაამარცხა.

ცნობისთვის, „ნეფთჩიმ“ აზერბაიჯანის ჩემპიონატი მე-4 პოზიციაზე დაასრულა. გუნდმა მოიგო აზერბაიჯანის თასი. ანალოგიური შედეგი აჩვენა „ჩიხურამ“ იმ განსხვავებით, რომ იმერული გუნდი საქართველოს თასის ფინალში დამარცხდა.

რაც შეეხება დღევანდელ ამხანაგურ შეხვედრას, ანგარიში დავით ოდიკაძემ თერთმეტმეტრიანი დარტყმით მე-11 წუთზე გახსნა. მე-19 წუთზე სამირ მასიმოვმა გაათანაბრა. 34-ე წუთზე დენის სილვას გოლის წყალობით აზერბაიჯანელები სულაც დაწინაურდნენ, თუმცა ქართულმა გუნდმა მატჩის საბოლოო შედეგის თავის სასარგებლოდ დასრულება შეძლო. იმავე ოდიკაძემ 83-ე წუთზე ანგარიში გაათანაბრა, შეხვედრის კომპენსირებულ დროში კი თორნიკე მუმლაძემ გამარჯვების გოლი გაიტანა — 3:2.

ბექა დოგრაშვილი

ინგლისური კლუბი აზერბაიჯანელმა ბიზნესმენმა შეიძინა

Posted on ივნისი 11, 2014 by ბექა დოგრაშვილი

ინგლისის რანგით მეორე დივიზიონში მოასპარეზე კლუბი „შეფილდ უენსდეი“ აზერბაიჯანელმა ბიზნესმენმა ჰაფიზ მამედოვმა შეიძინა.

მამედოვი ასევე გახლავთ ბაქოს „ბაკისა“ და ფრანგული „ლანსის“ მფლობელი.

ინგლისის ჩემპიონშიფის 2013-2014 წლების სეზონი „შეფილდმა“ მე-16 პოზიციაზე დაასრულა.

„შეფილდ უენსდეი“ 1867 წელს დაარსდა და მსოფლიოს მასშტაბით ერთ-ერთ უძველეს კლუბად ითვლება.

მეკარე, რომელმაც პენალტი მოიგერია, გააძევეს

Posted on თებერვალი 27, 2014თებერვალი 27, 2014 by ბექა დოგრაშვილი

აზერბაიჯანის პრემიერლიგის ეგიდით „გაბალასა“ და ბაქოს „რევანს“ შორის გამართულ მატჩში (0:0) საინტერესო რამ მოხდა. სტუმართა გუნდის კარის მიმართულებით დანიშნული თერთმეტმეტრიანი დარტყმა პოლონელმა კიპერმა ლუკაშ საპელამ მოიგერია, რის შემდეგაც უცენზურო ჟესტი გააკეთა და მსაჯმა ის მოედნიდან გააძევა.

გთავაზობთ ფაქტის ამსახველ ვიდეომასალას.