„სპორტ მედიასეტის“ ცნობით, ლონდონის „არსენალმა“ ზაფხულის მთავარ სატრანსფერო მიზნად „მილანის“ თავდამსხმელი მარიო ბალოტელი დაისახა.
„მეთოფეები“ შეტევითი ხაზის გაძლიერებას გეგმავენ და ერთ-ერთ მთავარ კანდიდატად არსენ ვენგერი სწორედ 23 წლის ფეხბურთელს მოიაზრებს. გავრცელებული ინფორმაციის თანახმად, მიმდინარე სეზონის ბოლოს ლონდონელები უკვე დაიწყებენ იტალიურ მხარესთან მოლაპარაკებას.
შეგახსენებთ, რომ ბალოტელი „მილანში“ გასული წლის იანვარში „მანჩესტერ სიტიდან“ გადავიდა. მაშინ სტარანსფერო თანხამ 22 მილიონი ევრო შეადგინა. „როსონერის“ რიგებში ახალგაზრდა ფეხბურთელმა ერთად იტალიის ჩემპიონატისა და ჩემპიონთა ლიგის 37 მატჩში მიიღო მონაწილეობა, გაიტანა 24 გოლი და გააკეთა 5 საგოლე გადაცემა.
