ჭდე: ბათუმი

დინამომ ბათუმთან სერია მოგებით გახსნა

Posted on by Levan

გამარჯვებით დაიწყო ნახევარფინალური სერია თბილისის “დინამომ”, რომელმაც ლეგიონერებით გაძლიერებულ “ბათუმს” 68:57 სძლია. აჭარულმა გუნდმა  თამაში მძლავრად დაიწყო და პირველი ტაიმის შემდეგ მოგების რეალურ შანსსაც ფლობდა, თუმცა მესამე პერიოდი ჩააგდო და შემდეგ ვითარება ვეღარ გამოასწორა.

რომ არა აჭარულ გუნდში მომხდარი უსიამოვნო ინციდენტი, შესაძლოა, ბათუმელებს გამარჯვებაც მიეთვალათ. მეორე მეოთხედის შუაწელში სტუმართა გუნდის წევრებს შორის ფიზიკური დაპირისპირება მოხდა, რის გამოც ბათუმელთა ამერიკელი ფორვარდი ჯეიმი ჯექსონი თამაშიდან გააძევეს. ჯექსონმა ფიზიკური შეურაცხყოფა მიაყენა გუნდის მთავარი მწვრთნელის თანაშემწე ივანე მაისურაძეს. ამის შემდეგ ბათუმელებმა პირველი ტაიმი ჩაამთავრეს, დიდ შესვენებაზე 4-ქულიანი ლიდერობით გავიდნენ და გასახდელიდან დაბრუნებულებმა მანამდელი შემართებით ვეღარ ითამაშეს.

“დინამოს” ცენტრალურმა თავდამსხმელმა, ჩერნოგორიელმა სტევან მილოშევიჩმა თბილისელთა წარმატებაში დიდი წილი დაიდო. მესამე პერიოდი დინამოელებმა 23:8 მოიგეს, 11 ქულით დაწინაურდნენ და ბოლო პერიოდიც ისე ჩაამთავრეს, პრობლემა არ შექმნიათ.

გამარჯვებულებს მილოშევიჩმა 18 ქულითა და 21 მოხსნით ულიდერა. 14 ქულა და 10 მოხსნა მიითვალა ქიან კარტერმა, ხოლო ბესო ლეჟავას ანგარიშზე 13 ქულა დაგროვდა. “ბათუმში: 14 ქულით ბომბარდირი ჯუნიორ ქედუგინი გახდა, 13 ქულა დააგროვა კემერონ მაკკეფრიმ, ნემანია მიშკოვიჩის ანგარიშზე კი 11 მოხსნა და 4 ქულა დაგროვდა.

ამ გუნდებს შორის მეოთხედფინალური სერიის მე-2 შეხვედრა ხვალ, 10 მაისს, თბილისის სპორტის სასახლეში, 16:00 საათზე გაიმართება.

მატჩისშემდგომი პრესკონფერენცია

ირაკლი ხოშტარია(,,დინამოს’’ მთავარი მწვრთნელი): სერიაში 1:0 დავწინაურდით. რთული თამაში იყო და ამას ველოდით, ნახევარფინალებში ყოველთვის საინტერესო და დაძაბული მატჩებია. უკვე ვფიქრობთ ხვალინდელ თამაშზე, ვეცდებით, ძალები აღვიდგინოთ და იმავე შემართებით გავიდეთ, როგორც დღეს. მეტოქე საკმაოდ ძლიერია როგორც ინდივიდუალურ, ისე სხვა ასპექტებში. თუმცა ჩვენ ყველაფერს გავაკეთებთ ხვალაც სასურველი შედეგის მისაღწევად.

მიხეილ კობეშავიძე(,,ბათუმის’’ მთავარი მწვრთნელი): მივულოცავ ,,დინამოს’’ გამარჯვებას. რაც შეეხება თამაშს, პირველი ტაიმის შემდეგ არაფერი გამოგვივიდა. ეს იმის ბრალია, რომ მეტოქე ძალიან ძლიერია. შევეცდებით, მომდევნო მატჩებში ვიბრძოლოთ და მაქსიმალურად დავიხარჯოთ.

ნიკა რამიშვილი(,,ბათუმი’’): პირველ რიგში, მივულოცავ ,,დინამოს’’ ღირსეულ გამარჯვებას. რაც შეგვეხება ჩვენ, მესამე პერიოდის დასაწყისიდან დაგვეწყო ჩავარდნა და ვერაფერი გავაკეთეთ ვერც დაცვაში და ვერც შეტევაში. შედეგიც სახეზეა.

superleague.ge

ბათუმმა შსს-ს სერია 3:1 მოუგო

Posted on by Levan

“ბათუმი” ნახევარფინალშია. მიხეილ კობეშავიძის გაწვრთნილმა აჭარულმა გუნდმა მეოთხედფინალური სერიის მე-4 მატჩში 84:69 დაამარცხა “შსს-აკადემია” და საერთო ანგარიშით 3:1 გაიმარჯვა.

თბილისში აკადემიელთა ორჯერ დამარცხების შემდეგ “ბათუმი” აჭარაში იმ იმედით დაბრუნდა, რომ ორიდან ერთ შეხვედრას მაინც მოუგებდა მეტოქეს და ასეც მოხდა. ბათუმელებმა საწადელს მეორე მატჩში მიაღწიე. გუშინ შსს-ელებთან 72:78 დმარცხების შემდეგ დღეს უფრო მობილიზებულად ითამაშეს და დამსახურებული გამარჯვება მოიპოვეს.

მატჩის პირველი ტაიმი მეტ-ნაკლებად თანაბარი იყო. მასპინძლები მცირედით ლიდერობდნენ, შსს-ელები ბათუმელებს წინ გაჭრის საშუალებას არ აძლევდნენ, თუმდა დიდი შესვენების შემდეგ კვანძი გაიხსნა. “ბათუმის”კალათბურთელებმა შედეგიანად ითამაშეს – კემერონ მაკკევრის, ჯუნიორ ქედუგინის და ჯერემი სეფოლდის ქულებით მესამე მეოთხედი 24:13 მოიგეს და ბოლო პერიოდის წინ 16 ქულით – 61:45 დაწინაურდნენ.

გადამწყვეტი ათწუთეული კვლავ ბათუმელთა უპირატესობით განახლდა და ნიკა რამიშვილის მიერ ზედიზედ ჩაგდებული 4 ქულის შემდეგ მასპინძელთა უპირატესობამ 24 ქულას მიაღწია – 70:46. თამაშის დასრულებამდე 7:45 წუთი რჩებოდა და ამ დროში ამხელა ჩამორჩენის აღმოფხვრა არარეალური იყო.

საბოლოოდ “ბათუმი” მშვიდად მივიდა გამარჯვებამდე და ნახევარფინალის საგზური მოიპოვა. მასპინძლებს 23 ქულით და 7 პასით ქედუგინმა ულიდერა, 16-16 ქულა დააგროვეს რამიშვილმა და მაკკევრიმ, ხოლო ჯერემი სეფოლდის ანგარიშზე 12 ქულა დაგროვდა. ფარქვეშ აქტიურობდა ავთანდილ ელიაშვილი, რომელმაც ბურთი 13-ჯერ მოხსნა. აკადემიელთგან 22 ქულით პერიშ ბრაუნი გამოირჩა, 13-13 ქულა კი ლევან ფაცაციამ და მილე ილიჩმა დააგროვეს. ამ უკანასკნელმა ორმაგი დუბლი შეასრულა – 13 ქულას 14 მოხსნაც დაამატა.

მაშ ასე, 4-დან 3 ნახევარფინალისტი ცნობილია. ფინალში გასასვლელ სერიაში, რომელიც 9 მაისს დაიწყება, “ბათუმი” “დინამოს” დაუპირისპირდება. “არმია” კი მეტოქეს “ქუთაისისა” და “სოხუმის” დაპირისპირებიდან ელის. სერიაში ანგარიში 2:2-ია და გადამწყვეტ მატჩს 6 მაისს ქუთაისი უმასპინძლებს.

 

მატჩიშემდგომი კომენტარები

მიხეილ კობეშავიძე („ბათუმის“ მთავარი მწვრთნელი): რაც გუშინ ვერ გააკეთეს ბიჭებმა, დღეს შეძლეს.  დიდი ბრძოლა იყო და შეიძლება ითქვას, რომ ეს იყო ჩვენი გუნდის იდეალური თამაში  სერიის პირველი მატჩის შემდეგ. ქართველმა კალათბურთელებმა  ჩინებულად იასპარეზეს და ყველამ კარგად გააკეთა თავისი საქმე. მადლობა ჩემს გუნდს და გულშემატკივარს, რომელმაც დარბაზში შესანიშნავი ატმოსფერო შეგვიქმნა და თამაში გაგვილამაზა.

არჩილ ჟღენტი (შსს  აკადემიას მთავარი მწვრთნელი): გუშინდელი თამაშის შემდეგ 4 მოთამაშე გვყავდა ტრავმირებული – პერიშ ბრაუნი, რევაზ როგავა,  ლევან ფაცაცია და ილია ლონდარიძე. ჩვენი გუნდის ექიმებმა ყველაფერი  გააკეთეს, მაგრამ სამწუხაროდ უშედეგოდ.

რაც შეეხება თამაშს, მე პირადად ასლან აბაშიძის დროს „ბასკოს“ თამაშები გამახსენდა, იმდენად  ცუდი მსაჯობა იყო (ეს არ ეხება მაკა კუპატაძეს).  მივულოცავ „ბათუმს“ და წარმატებებს ვუსურვებ.

superleague.ge

შსს აკადემიამ ბათუმს ჩამორჩენა შეუმცირა

Posted on by Levan

თბილისში ზედიზედ 2 მატჩის წამგებმა “შსს-აკადემიამ” ბათუმში დღეს 78:72 მოიგო და სერიაში ჩამორჩენა მინიმუმამდე შეამცირა. შედეგიანად ჩატარებული ბოლო მეოთხედის წყალობით არჩილ ჟღენტის გუნდმა გამარჯვება მოიპოვა და მეოთხედფინალურ სერიაში ანგარიში 2:1 გახდა ბათუმელთა სასარგებლოდ.

“შსს-აკადემიას” წაგების უფლება არ ჰქონდა – წინააღმდეგ შემთხვევაში სერიას მშრალი ანგარიშით წააგებდა და მოქმედი ჩემპიონი 5-8 ადგილებისთვის ბრძოლაში გადაერთვებოდა. ბოლო მეოთხედის წინ 4 ქულით ჩამორჩენილმა აკადემიელებმა ეს არ დაუშვეს და 20:10 მოგებული პერიოდის შემდეგ ღირსეული გამარჯვება მოიპოვეს.

გამარჯვებაში ლომის წილი მილე ილიჩმა დაიდო, რომელმაც 27 ქულა და 19 მოხსნა მიითვალა. აკადემიელებმა ფარზე გვარიანად დაჩაგრეს მასპინძლები და მოხსნებში 52:21 აჯობეს. 15 ქულა, 13 მოხსნა და 5 პასი მიითვალა რეზო როგავამ, ხოლო ლევან ფაცაციამ 13 ქულა მიითვალა. “ბათუმში 19-19 ქულა კემერონ მაკკეფრიმ და ჯუნიორ ქედუგინმა მიითვალეს.

ხვალ, 4 მაისს, 17:00 საათზე,  ბათუმი სერიის მე-4 მატჩს უმასპინძლებს.

 სტატისტიკა

მატჩისშემდგომი კომენტარები

არჩილ ჟღენტი (შსს აკადემიის მთავარი მწვრთნელი):  მადლობა ჩემს გუნდს და ბიჭებს ბრძოლისთვის. სერიაში ანგარიში ჯერ 1:2-ია. სხვას  ვერაფერს გეტყვით.

 

მიხეილ კობეშავიძე („ბათუმის“ მთავარი მწვრთნელი): შსს აკადემიამ 20 ბურთით მეტი მოგვიხსნა, ფარი მთლიანად წავაგეთ. სამწუხაროა, მაგრამ ძალა არ გვეყო. ხვალ კიდევ უფრო დიდი ბრძოლაა და ყველაფერს გავაკეთებთ, ვნახოთ რა იქნება.

superleague.ge

ბათუმმა შსს კვლავ დაამარცხა და ნახევარფინალს მიუახლოვდა

Posted on by Levan

მიხეილ კობეშავიძის გაწვრთნილმა “ბათუმმა” თბილისში მეორე მატჩიც მოუგო “შსს-აკადემიას” და ნახევარფინალში გასვლაზე სოლიდური განაცხადი გააკეთა. პირველად, ქართული კალათურთის ისტორიაში, მეოთხედფინალური სერია 3 მოგებამდე გრძელდება და ეს “შსს-აკადემიისთვის” ნახევარფინალში გასვლის შანსია.

სხვა თემაა, ამ შანსს როგორ გმოიყენებენ შსს-ელები, დღესდღეობით კი ნახევარფინალში გასვლის უპირობო ფავორიტები ბათუმელები არიან. კობეშავიძის გუნდს სერიის მოგებამდე 1 გამარჯვება აკლია, მომდევნო მატჩები კი ბათუმშია დაგეგმილი. თუკი აჭარლებმა 3 მაისს მშობლიურ არენაზე იმარჯვეს, ნახევარფინალში გავლენ, არადა, 4 მაისს ბათუმი კიდევ 1 მატჩს უმასპინძლებს.

გამარჯვების შემოქმედნი ბათუმელთა მთლიანი გუნდია, თუმცა განსაკუთრებით გამოსარჩევია ჯუნიორ ქედუგინისა და ჯერემი სეფოლდის გარჯა, რომლებმაც ტაიმები გაიყვეს – პირველ ნახევარში ქედუგინი დომინირებდა, მეორეში კი “შსს-აკადემიას” წარმატების ყველა მცდელობა სეფოლდმა ჩაუხშო.

ბათუმელებმა თავიდანვე მწყობრი დაცვა დააყენეს და სწრაფი შეტევებით ხეირობდნენ. მასპინძელთა დაცვა კი ვერ იყო ეფექტური, რითაც ბათუმელი ლეგიონერები სარგებლობდნენ დ ქულას ქულაზე იხვეჭდნენ. გამოსარჩევია ქედუგინის შედეგიანობა, რომელმაც პირველ ტაიმში 18 ქულა ჩააგდო. სტუმართა უპირატესობაც შესაბამისად იზრდებოდა და პირველი მეოთხედის ბოლოს 6, ხოლო დიდი შესვენებისთვის 13 ქულა შეადგინა.

მესამე პერიოდში აკადემიელებმა თამაში გამოასწორეს და ჩამორჩენაც მინიმუმამდე შეამცირეს. პერიშ ბრაუნმა ზედიზედ 3 სამქულიანი ჩააგდო და როცა მისი სროლის შემდეგ ანგარიში 53:54 გახდა, ბათუმელებისთვის ყველაფერი თავიდან დაიწყო. ლიდერობა ჯერემი სეფოლდმა იტვირთა, რომელმაც დარჩენილ დროში 4 სამქულიანი და ამაზე მეტი ორიანი ჩაადო.

ბოლო პერიოდი ბათუმელთა 5-ქულიანი ლიდერობით დაიწყო, მაგრამ თამაში ისე ჩამთავრდა, რომ სიტუაცია არ დაძაბულა. სეფოლდის, ქედუგინის ქულებმა და მისი თანაგუნდელების საიმედო დაცვამ აჭარულ გუნდს უმნიშვნელოვანესი გამარჯვება მოუტანა – 89:82.

ბათუმელთაგან 27-27 ქულით საუკეთესონი სეფოლდი და ქედუგინი იყვნენ. ამ უკანასკნელმა 7 მოხსნა და 8 პასიც მიითვალა. 13 ქულითა და 9 მოხსნით დაასრულა შეხვედრა ჯეიმი ჯექსონმა, ნიკა რამიშვილის ანგარიშზე კი 10 ქულა დაგროვდა. აკადემიელებში 21 ქულით პერიშ ბრაუნი გამოირჩა, ხოლო მილე ილიჩმა შეხვედრა 15 ქულითა და 12 მოხსნით დაასრულა.

მომდევნო მატჩი 3 მაისს, ბათუმში გაიმართება და მასპინძლეთა გამარჯვების შემთხვევაში სერია დასრულდება. “შსს-აკადემია” რომ ნახევარფინალში გავიდეს, ზედიზედ 3 მატჩი უნდა მოიგოს.

 სტატისტიკა

მატჩისშემდგომი პრესკონფერენცია

არჩილ ჟღენტი (შსს აკადემიის მთავარი მწვრთნელი): მივულოცავ „ბათუმს“ ღირსეულ გამარჯვებას, ორივე შეხვედრაში საკუთარ კედლებში დავმარცხდით.  მიზეზს თამაშის გაანალიზების შემდეგ გავარკვევთ. სერია სამ მოგებამდე გრძელდება და თუ პირველი წრის შემდეგ გუნდმა მოახერხა და უკეთესად ითამაშა, იმედი მაქვს ახლაც შევძლებთ თამაშის გაუმჯობესებას და ბათუმში წავალთ საბრძოლველად. მე მჯერა ჩემი გუნდის და ვნახოთ რა იქნება.

მიხეილ კობეშავიძე (ბათუმის მთავარი მწვრთნელი): ყველაფერი  თავიდან იწყება, ჯერ არაფერი დამთავრებულა  და კიდევ ვიმეორებ რომ მე ვიწყებ დღეიდან. ჩემთვის სერიაში 0:0-ია და ბათუმში მივდივარ სათამაშოდ, საკუთარ მოედანზე, ჩვენს მაყურებელთან. ეს გამარჯვება დავიწყებულია ჩვენი გუნდისთვის და სერიაში დაწინაურდება ჩვენთვის არ არსებობს.

პერიშ ბრაუნი (შსს აკადემია): ვულოცავ ბათუმს. თავისი საქმე გააკეთა. არაჩვეულებრივი გუნდია. ბიჭებმა იბრძოლეს და მოიგეს.

 

ნიკა რამიშვილი (ბათუმი): რისთვისაც ჩამოვედით თბილისში,  ყველაფერი იდეალურად გავაკეთეთ. 2-დან 2-ვე მატჩი მოვიგეთ.  ბათუმში ორი  შეხვედრიდან  ერთიც რომ მოვიგოთ მიზანი მიღწეული იქნება და ნახევარფინალში გადავალთ. დავეთანხემი მწვრთნელს, რომ სერია ჩვენთვის ახლა იწყება. წინ ძალიან დაძაბული თამაშები გველოდება და აუცილებლად უნდა გავიმარჯვოთ.

superleague.ge

ბათუმი შსს-სთან სერიაში დაწინაურდა

Posted on by Levan

დღეს, თბილისის სპორტის სასახლეში სუპერლიგის პლეი ოფების შეხვედრებმა აიღო სტარტი. პირველ მატჩში ერთმანეთის წინააღმდეგ რეგულარულ ჩემპიონატში მე-4 და მე-5 პოზიციებზე გასული “შსს” და “ბათუმი” წარსდგნენ.

მატჩი მასპინძელთა დომინირებით დაიწყო. ჟღენტის გუნდმა პირველივე წუთებიდან მოახერხა უპირატესობის მოპოვება და მეტოქეს 12-2 უგებდა. საბოლოოდ, პირველი მეოთხედი აკადემიალთა გამარჯვებით, 19-10 დასრულდა.

მეორე პერიოდში “ბათუმმა” თამაში მნიშნველოვნად გამოასწორა, რაც ლეგიონერების და ლაშა კეშელავას ზუსტი სამიანების დამსახურება იყო.პირველი ნახევარი ფრედ, 31-31 მთავრდებოდა, თუმცა ბათუმელთა ახალგაზრდა მოთამაშე ნიკა რამიშვილმა საკუთარი ნახევრიდან სირენასთან ერთად ჩააგდო ულამაზესი სამიანი და დიდ შესვენებაზე სტუმრები მცირე უპირატესობით გავიდნენ.

მატჩის მეორე ნახევარში “ბათუმმა” მოპოვებული უპირატესობის განვითარება შესძლეს. მეოთხე პერიოდი კობეშავიძის გუნდისთვის შეხვედრაში საუკეთესო იყო. ბათუმელებმა 15 ქულიანი უპირატესობა მოიპოვეს და შეხვედრაც მშვიდად მიიყვანეს გამარჯვებამდე.

საინტერესო დაპირისპირების მეორე სერია ხვალ თბილისის სპორტის სასახლეში 14:00 საათზე დაიწყება.

სტატისტიკა

მატჩისშემდგომი პრესკონფერენცია

გიორგი ნიკოლაძე(,,შსს აკადემიის’’ მწვრთნელი): პირველ რიგში, მივულოცავ ,,ბათუმის’’ გუნდს, კარგად ითამაშეს და ღირსეული გამარჯვება მოიპოვეს. რაც შეგვეხება ჩვენ, იმ პერიოდში, რაც არჩილ ჟღენტი გუნდის მთავარი მწვრთნელია, ასეთი ცუდი თამაში ჯერ არ ჩაგვიტარებია – არანაირი გუნდურობა, არაზუსტი შორი სროლები, არაფერი გამოგვივიდა. თუმცა, გავარჩევთ დღევანდელ მატჩს, ვიდეოანალიზს გავაკეთებთ და ვეცდებით, გამოვასწოროთ შეცდომები. კარგია, რომ პლეი ოფები 3 მოგებამდე გრძელდება და ნამდვილად უძლიერესი და ღირსეული გაიმარჯვებს. შანსი გვაქვს და ვეცდებით, ხვალ სხვა თამაში ვაჩვენოთ.

მიხეილ კობეშავიძე(,,ბათუმის’’ მთავარი მწვრთნელი):  შანსებზე ვერაფერს ვიტყვი და პროგნოზსაც ვერ გავაკეთებ. დღეს ვიბრძოლეთ და ასე იქნება ყველა თამაშზე, თბილისშიც და ბათუმშიც. ბიჭებს ვულოცავ ამ გამარჯვებას, თუმცა მთავარი ბრძოლა ჩვენთვის ხვალ იწყება. დღევანდელი დღე უკვე ჩავლილია და ყველაფერი წინაა.

ლერი კვანტალიანი(,,შსს აკადემია’’): მივულოცავ მეტოქეს გამარჯვებას. დავეთანხმები მწვრთნელს, ბევრი ხარვეზი გქვონდა და იმედია, ხვალ სხვანაირ თამაშს ვაჩვენებთ

ნიკა რამიშვილი(,,ბათუმი’’): მივულოცავ ჩვენს გუნდს და გულშემატკივარს ამ წარმატებას. კარგი შეხვედრა გამოვიდა. ეს გამარჯვება ყველანაირი თვალსაზრისით ძალიან გვჭირდებოდა. თავიდან გაგვიჭირდა, თუმცა შემდეგ გამოვასწორეთ თამაში და სასურველ შედეგს მივაღწიეთ. პლეი ოფების სერია 3 მოგებამდე გრძელდება და დარწმუნებული ვარ, საინტერესო თამაშები გველოდება. წარმატებებს ვუსურვებ მეტოქესაც და ჩვენს გუნდსაც.

 

IMG_1995IMG_1994IMG_1984IMG_1952IMG_1938IMG_1921IMG_1914IMG_1893IMG_1881IMG_1868IMG_1861IMG_1854IMG_1843IMG_1837IMG_1832IMG_1794IMG_1783IMG_1781IMG_1777IMG_1763IMG_1757IMG_1714IMG_2019

მარიამ ნიშნიანიძის ფოტოები

ტექნიკური წაგება “ბათუმს”

Posted on by Levan

სუპერლიგის რეგულარული ჩემპიონატის ბოლო ტურის პირველი მატჩი, რომელშიც ერთმანეთს “ბათუმი” და “შსს-აკადემია” ხვდებოდნენ, მაყურებელთა არაკორექტული საქციელის გამო ჩაიშალა. ბათუმში გამართულ მატჩზე მისულმა გულშემატკივრებმა პიტარდები აანთეს, რის შედეგადაც დარბაზი კვამლით გაივსო და მატჩის გამართვა შეუძლებელი გახდა.

გთავაზობთ აღნიშნული მატჩის მთავარი მსაჯის, მაკა კუპატაძისა და კომისრის, მერაბ რატიშვილის ანგარიშს, რომელიც მათ შეხვედრის ოფიციალურ ოქმში ჩაწერეს:

“მატჩის მე-3 პერიოდის დამთავრებამდე 5:37 წუთით ადრე ტრიბუნაზე გულშემატკივართა ჯგუფის მიერ გაშვებულ იქნა მბოლავი ჩირაღდნები, რის გამოც სათამაშო დარბაზის მთელ ტერიტორიაზე ჩამოწვა ბოლი და შეუძლებელი გახდა თამაშის გაგრძელება.

თამაში შეწყდა 18 საათსა და 03 წუთზე. ერთი საათის შემდეგ, 19 საათსა და 03 წუთზე, დარბაზში ჩამოწოლილი ბოლის გამო თამაშის გაგრძელება კვლავ შეუძლებელი იყო.

თამაში შეწყდა ანგარიშზე 52:41 შსს-ს სასარგებლოდ”.

მთავარი მსაჯი: მაკა კუპატაძე

კომისარი: მერაბ რატიშვილი

აღნიშნული ოქმისა და სუპერლიგის დებულების საფუძველზე სუპერლიგის ხელმძღვანელობამ იმსჯელა ს/კ ბათუმთან ერთად და მიიღო შემდეგი გადაწყვეტილება:

ვინაიდან  ბათუმის გუნდი ფინანსურად ვერ უზრუნველყოფს შსს აკადემიის ხელმეორედ მასპინძლობას და შეხვედრის  გაგრძელებას იმ მომენტიდან, რა დროსაც თამაში შეწყდა,  ბათუმის გუნდს  ჩაეთვალოს ტექნიკური წაგება და ჩამოერთვას წაგებისთვის განკუთვნილი ქულები.

ბათუმის დარბაზში მომხდარ გულშემატკივართა არაკორექტულ საქციელზე კალათბურთის ეროვნული ფედერაციის სადისციპლინო კომიტეტი და სუპერლიგის ხელმძღვანელობა იმსჯელებენ და შესაბამის სანქციას გამოიტანენ.

superleague.ge

რევაზაშვილის 44 ქულა და ბათუმის იოლი გამარჯვება

Posted on by Levan

სუპერლიგის მეორე წრის მე-7 ტურს სპორტკომპლექსი “არენა” მასპინძლობს. ძიუდოში მსოფლიო გრან პრის გამო სპორტის სასახლემ აღნიშნულ ტურს ვერ უმასპინძლა. პირველი მატჩი უკვე დასრულდა და მასში რეკორდი დაფიქსირდა.

ერთმანეთს “მაკაბი” და “ბათუმი” ხვდებოდნენ და მატჩის ბედი წინასწარ იყო ცნობილი. ჯამლეტ ხუხაშვილის გუნდი სუპერლიგის გამოკვეთილი აუტსაიდერია და დიდი ამბიციების მქონე “ბათუმს” რომ ვერ დაამარცხებდა, ყველამ კარგად იცოდა.

მარცხთან შეგუებულმა მაკაბელებმა აქცენტი გიორგი რევაზაშვილის რეკორდზე აიღეს, რასაც ახალგაზრდა, პერსპექტიულმა კალათბურთელმა თავი მშვენივრად გაართვა.მიმდინარე სეზონის რეკორდი 34 ქულა იყო, რომელიც “ოლიმპის” ცენტრ რიჩარდ მათიაშვილს ეკუთვნოდა, რევაზაშვილმა კი “ბათუმთან” დღევანდელ მატჩში 44 ქულა დააგროვა.

რაც შეეხება შედეგს, მატჩი ბათუმელებმა იოლად, 130:74 მოიგეს. ზღვისპირელთაგან 6-მა კალათბურთელმა 10-ქულიან ზღვარს გადააჭარბა, რომელთაგანაც 27 ქულით საუკეთესო ნიკა რამიშვილი იყო. 19 ქულა და 10 მოხსნა ჰქონდა ჯერემი სეფოლდს, ხოლო ლაშა კეშელავამ და ქემერონ მაკკეფრიმ 17-17 ქულა დააგროვეს. “მაკაბიში” გიორგი რევაზაშვილის 44 ქულის  კვალზე ორმაგი დუბლი მისმა უმცროსმა ძმამ, მაიზერმა მოაგროვა – 10 ქულა, 13 მოხსნა.

მორიგ მატჩში ერთმანეთს სუპერლიგის 2 ლიდერი – “დინამო” და “მაკაბი” შეხვდებიან და გამარჯვებული ფაქტობრივად გაინაღდებს რეგულარული ჩემპიონატის პირველ ადგილს.

სტატისტიკა

მატჩისშემდგომი პრესკონფერენცია

მიხეილ კობეშავიძე(,,ბათუმის’’ მთავარი მწვრთნელი): ,,მაქაბი’’ ძალიან პერსპექტიული კალათბურთელებით დაკომპლექტებული გუნდი, ერთ-ერთი ყველაზე გამორჩეულია ლევან რევაზაშვილი, რომელსაც არაჩვეულებრივი მონაცემები აქვს. ეს ახალგაზრდული გუნდი ბოლომდე იბრძვის, რაც მისასალმებელია. ჩვენთვის ეს რეგულარულის ბოლოსწინა შეხვედრა იყო, 2 კვირაში გვაქვს თამაში ,,შსს აკადემიასთან’’ და პლეი ოფებამდე მეტი თამაში არ გვაქვს. ამიტომ, მინდოდა ყველას ეთამაშა, გუნდს შეთამაშება აკლია და დღევანდელი შეხვედრა ამის გასაუმჯობესებლად გამოვიყენეთ.

ჯამლეტ ხუხაშვილი(,,მაქაბის’’ მთავარი მწვრთნელი): მივულოცავ ,,ბათუმს’’ გამარჯვებას, ძალიან ძლიერი გუნდია და მათი გამარჯვება მოულოდნელი არ ყოფილა. ამ გუნდს სულ სხვა პერსპექტივა და მიზნები აქვთ და წარმატებას ვუსურვებ მათ.  კეშელავას 5-მა 3-ქულიანმა სხვაობა საკმაოდ სოლიდური გახადა, თუმცა ჩვენთვის ამას არ აქვს გადამწყვეტი მნიშვნელობა. 14 3-ქულიანი ჩაგვიგდეს და დიდი ანგარიშით დაგვამარცხეს. დღეს ფერიაშვილისგან მეტს ველოდით, რაც შეეხებათ რევაზაშვილებს, გიორგი, რომელიც ნაოპერაციები იყო,  ნელ-ნელა შედის ფორმაში. სასიხარულოა, რომ სეზონის რეკორდი დაამყარა და მხოლოდ ერთი მოხსნა დააკლდა ორმაგ დუბლამდე. სამაგიეროდ, ორმაგი დუბლი შეასრულა მაიზერ რევაზაშვილმა, რომელიც ასევე სარეკორდო შედეგებს აჩვენებს 18-წლამდელთა ჩემპიონატში. მივულოცავ კიდევ ერთხელ მეტოქეს და წარმატებებს ვუსურვებ.

ნიკოლოზ რამიშვილი(,,ბათუმი’’): ანგარიშის მიუხედავად, კარგი თამაში გამოვიდა, დღეს ახალი რეკორდი დამყარდა და მივულოცავ გიორგის წარმატებას. ჩვენს ბიჭებსაც მივულოცავ გამარჯვებას, გარკვეული ჩავარდნა გვქონდა,  თუმცა ბოლო 3 შეხვედრაში გავიმარჯვეთ და ეს ჩვენთვის საკმაოდ მნიშვნელოვანი იყო როგორც ფსიქოლოგიური, ისე სატურნირო ცხრილის თვალსაზრისით. იმედია, გავაგრძელებთ წარმატებულ ასპარეზობას.

გიორგი რევაზაშვილი(,,მაქაბი’’): მართალია წავაგეთ, თუმცა კარგი თამაში გამოვიდა. მადლობა მოწინააღმეგეს ამ შეხვედრისთვის. მივულოცავ მათ გამარჯვებას და წარმატებებს ვუსურვებ. ჩვენ ერთი თამაში დაგვრჩა და შევეცდებით, მაქსიმალურად გამოვავლინოთ ჩვენი შესაძლებლობები.

“ბათუმმა” რუსთავში მოიგო

Posted on by Levan

სუპერლიგის მეორე წრის მე-6 ტური დღეს რუსთავში დაიწყო, სადაც ადგილობრივმა კლუბმა “ბათუმს” უმასპინძლა და შეხვედრა 85:62 დათმეს. თანაბარი პირველი ტაიმის შემდეგ „ზღვისპირელებმა“ შესანიშნავი მესამე მეოთხედი ჩაატარეს, რომელშიც გადაწყდა კიდეც მატჩის ბედი.

პირველი მეოთხედის 11:22 წაგების შემდეგ მასპინძლებმა თამაში გამოასწორეს და 5-წუთიანი მონაკვეთში14:2 გაქცევის შემდეგ 25:24 დაწინაურდნენ, თუმცა “ბათუმი” დროულად გამოფხიზლდა და პირველ რიგში დაცვის კარგი თამაშის ხარჯზე გამოასწორეს მდგომარეობა.

პირველი ტაიმის დასრულებამდე ბათუმელებმა ძირითადად ლეგიონერთა ძალისხმევის ხარჯზე შესძლეს რუსთაველთა შემტევების შეცერება.

პირველი ტაიმის დასრულებამდე აჭარულმა გუნდმა უპირატესობა 7 ქულამდე გაზარდა, დიდი შესვენების შემდეგ კი სტუმრებმა გაილაღეს. პერიოდი 33:10 მოიგეს, 30 ქულით დაწინაურდნენ და ბოლო პერიოდს ინტრიგა დაუკარგეს. “ბათუმმა” საბოლოოდ 85:62 მოიგო და ჩემპიონატში გამარჯვებათა რიცხვი 8-მდე გაზარდა.

ბათუმელებს 18 ქულა-11 მოხსნით ჯერემი სეფოლდმა ულიდერა. 19 ქულით ბომბარდირი ჯუნიორ ქედუგინი გახდა, ლაშა კეშელავამ კი 4 სამქულიანი ჩააგდო და შეხვედრა 12 ქულითა და 8 მოხსნით დაასრულა. მასპინძელთაგან 21 ქულით საუკეთესო რეზო ჩაჩანიძე იყო, გიორგი ყველაშვილს კი ორმაგ ქუბლამდე 1 ქულა დააკლდა – 9 ქულა და 11 მოხსნა მიითვალა.

სუპერლიგის მიმდინარე ტური ხვალ, თბილისის სპორტის სასახლეში გასამართი 3 მატჩით დასრულდება.

  სტატისტიკა

 

მატჩისშემდგომი კომენტარები:

 

მიხეილ კობეშავიძე, “ბათუმის” მთავარი მწვრთნელი:

ანგარიში რეალურად არ ასახავს გუნდების ძალთა თანაბარდობას. “რუსთავი” არაა ისეთი გუნდი, რომ შინ ასე იოლად დამაცხდეს, მაგრამ დღეს ასე მოხდა, მასპინძლებს თამაში ჩაუვარდათ, ჩვენ კი პირიქით, კარგად ვითამაშეთ. რამდენიმე წაგების შემდეგ როგორც იქნა გავიმარჯვეთ, გუნდში ჯერაც მიმდინარეობს ლეგიონერთა შეთამაშების პროცესი და ამ მხრივ გარკვეულ წარმატებებს ვაღწევთ.

ოთარ ხმელიძე, “რუსთავის” მთავარი მწვრთნელი:

“ჩვენ არ გვყავს ისეთი ძლიერი მოთამაშეები, როგორც “ბათუმს”. მიუხედავად ამისა, წარმატების მიღწევა შეიძლებოდა, მაგრამ მეორე მესამე მეოთხედში თამაში ჩაგვივარდა, ვერც გარედან ჩავაგდეთ და ვერც ფარქვეშ შევძელით მეტოქის შეჩერება. ჩვენი გუნდი მეორე წრეში უკეთ თამაშობს, თუმცა სერგო ათუაშვილის გამოკლების შემდეგ რეალურ წარმატებაზე ფიქრი ზედმეტია.

პირველი ლიგის ცენტრალური მატჩი “სამტრედიამ” მოიგო

Posted on by Levan

დღეს ქობულეთის “ჩელე არენაზე” პირველი ლიგის “ბ” ჯფუდის ცენტრალური მატჩი გაიმართა. ერთმანეთს გათამაშების ლიდერები, ბათუმის “დინამო” და “სამტრედია” დაუპირისპირდნენ.

მატჩი ბათუმელთა ტერიტორიული უპირატესობით წარიმართა, თუმცა სტუმრებმა კონტრშეტევებზე შესანიშნავად ითამაშეს და მასპინძლებს ორი უპასუხო ბურთი გაუტანეს. სამტრედიელთა მხრიდან გოლები გედენიძემ და მელქაძემ გაიტანეს.

აღნიშნული მატჩის შემდეგ, “სამტრედია” 37 ქულით ლიდერობს გათამაშებას. მეორე ადგილზე “მაჭახელაა” და მას აქტივში 34 ქულა აქვს, ხოლო ბათუმის “დინამო” 31 ქულით ჯერ-ჯერობით მესამე პოზიციაზე იმყოფება.

გუნდებმა შემდეგი შემადგენლობებით ითამაშეს:

დინამო (ბათუმი): ალავიძე, ქორიძე, გავაშელიშვილი, სუხიაშვილი, ჟვანია, მუჯირი, კიკნაველიძე, ვარშანიძე, ჭკუასელი, ფიფია, სიხარულიძე.

მთ.მწვრთნელი: კობა ჟორჟიკაშვილი

სამტრედია: მუჯირიშვილი, შალიკაშვილი, გედენიძე, დვალიშვილი, კაკუშაძე, კიკაბიძე, მელქაძე, ბაკურაძე, კერძევაძე, ქანთარია, პავლიაშვილი.

მწ.მწვრთნელი: გელა სანაია

დინამომ ბათუმი დაამარცხა

Posted on by Levan

საკალათბურთო სუპერლიგის მორიგი ტური დღეს ბათუმში დაიწყო. აჭარის მთავარ ქალაქში თბილისის “დინამო” ჩავიდა და ადგილობრივი გუნდი ზედმეტი გართულებების გარეშე – 72:59 დაამარცხა.

ამ გუნდების პირველი წრის შეხვედრა თბილისში დაძაბულ ბრძოლაში წარიმართა. მაშინ ბათუმელებმა გაცილებით უკეთ ითამაშეს და მოგებასთანაც ახლოს იყვნენ, თუმცა ბოლო წუთზე დაშვებული შეცდომების გამო 93:95 დამარცხდნენ. დღეს კი, მიუხედავად იმისა, რომ “ბათუმი” შინაურ დარბაზში თამაშობდა, “დინამოს” სათანადო წინააღმდეგობა ვერ გაუწია და შეიძლება ითქვას, უბრძოლველად დამარცხდა.

დინამოელებმა თამაში შედეგიანად დაიწყეს და პირველივე მეოთხედში ცხადი გახდა რომ სტუმრები გამარჯვებას ხელიდან არ გაუშვებდნენ. სტევან მილოშევიჩი, ქიენ კარტერის და მის თანაგუნდელთა სიზუსტის წყალობით “დინამომ” საწყისი პერიოდი 25:9 მოიგო. 14-ქულიანი  ლიდერობა თბილისელებმა ტაიმის ბოლოსთვის 1-ით გაზარდეს და დიდ შესვენებაზე დაარხეინებულნი გავიდნენ.

მასპინძლებმა მესამე პერიოდში თამაში გამოაკეთეს. ლეგიონერების წყალობით ჩამორჩნის შემცირებას შეუდგნენ და მეოთხედის შუაწელში მეტოქეს 5 ქულამდე მიუახლოვდნენ – 37:42. ეს იყო მაქსიმუმი, რასაც ბათუმელებმა მიაღწიეს. დინამოელებმა ათწუთეულის ბოლომდე ლიდერობა 9 ქულამდე გაზარდეს და დარჩენილ პერიოდში მასპინძლები ახლოს აღარ გაიკარეს.

დინამოელებს მეფარეთა ტანდემმა ულიდერა – ქიენ კარტერმა 15 ქულა და 16 მოხსნა მიითვალა, ხოლო სტევამ მილოშევიჩმა ანგარიშზე 14-14 ქულა-მოხსნა ჩაიწერა. 13 ქულა, 7 მოხსნა და 7 პასი მიაშველა გამარჯვებულებს გიორგი გამყრელიძემ. ბათუმელებში კანადელი ლეგიონერი ჯუნიორ ქედუგინი 19 ქულით გამოირჩა, ჯეიმი ჯექსონმა თავი 14 ქულასა და 8 მოხსნას მოუყარა.

ტურის დარჩენილი 3 შეხვედრა ხვალ, 15 თებერვალს, თბილისის სპორტის სასახლეში გაიმართება.

მატჩისშემდგომი კომენტარები:

ივანე მაისურაძე(,,ბათუმის” მოთამაშე-მწვრთნელი): დღეს სრული შემადგენლობით ვიასპარეზეთ, დიდი შემართებით გავედით მოედანზე, მაგრამ ,,დინამო”, როგორც ყოველთვის, დღესაც მოწოდების სიმაღლეზე იყო. ხოშტარიას გუნდს ეტყობოდა, რომ კარგად იყო მომზადებული და კონკრეტულად დღევანდელი თამაშისთვისაც სათანადო ფორმაში იყვნენ, ეს შედეგზეც აისახა. მცირე შანსი გვქონდა, მაგრამ ვერ გამოვიყეთ და იმედი გვაქვს, ,,ქუთაისთან” მოვიპოვებთ გამარჯვებას.

 

ირაკლი ხოშტარია(,,დინამოს” მთავარი მწვრთნელი): კარგად დავიწყეთ თამაში, თავიდანვე მოვიპოვეთ უპირატესობა, ბიჭებმა დავალება ზუსტად შეასრულეს. გვქონდა ჩავარდნა მესამე მეოთხედში, თუმცა მალევე გამოვასწორეთ თამაში და მოვახერხეთ უპირატესობის შენარჩუნება.

superleague.ge

არმიამ ბათუმი დაამარცხა

Posted on by Levan

თბილისის სპორტის სასახლემ დღეს სუპერლიგის მორიგი ტურის ცენტრალურ თამაშს უმასპინძლა. ერთმანეთს მოწინავე ჯგუფში მყოფი “არმია” და “ბათუმი” დაუპირისპირდნენ. თამაში არმიელებმა კარგად დაიწყეს. თბილისელთა რიგებში პიველ წუთებში ბაბუნაშვილი და შარაბიძე გამოირჩეოდნენ. მაგრა, სტუმრებმა “არმიას” დიდი გაქცევის საშუალება არ მისცეს, რაც ძირითადად ქედუგინის დამსახურებაა. სხვათა შორის, ბათუმელთა ლეგიონერი 27 ქულით მატჩის საუკეთესო მექულე გახდა. ბათუმეთლებს თამაში რომ წაუვიდათ, კოტე ტუღუშს არ გამოეპარა და მწვრთნელმაც დროული წუთშესვენება აიღო, რომლის შემდეგ “არმიელები” 10 ქულით დაწინაურდნენ.
მეორე მეოთხედში თამაშის საერთო სურათი არ შეცვლილა. “არმია” მოპოვებული უპირატესობი გაზრდას ცდილობდა, მაგრამ ბათუმელები ბოლომდე იბრძოდნენ. გადამწყვეტი მომენტი, მეორე პერიოდის ბოლოს მოხდა. როდესაც “ბათუმის” სათადარიგო სკამმა ტექნიკური ჯარიმა მიიღო. ზღვისპირელებმა გადამეტებულად გააპროტესტეს მსაჯთა გადაწყვეტილებები, რაც შეხვედრის არბიტრებს არ გამოპარვიათ. ტექნიკურს ქედუგინის ტრავმაც დაემატა (მაგრამ ლეგიონერი მოგვიანებით მაინც დაუბრუნდა პარკეტს) და “არმიელებიც” დიდ შესვენებაზე 17-ქულიანი უპირატესობით გავიდნენ.
მესამე პერიოდში არმიამ მოპოვებული უპირატესობის შენარჩუნებაზე გააკეთა აქცენტი. თუმცა, სტუმებმა მაინც გაიბრძოლეს. “ბათუმმა” პრესინგს მიმართა და არმიელებმაც შეცდომებს უმატეს, მაგრამ ბერიშვილის დროულმა სამიანმა წერტილი დასვა ამ მატჩში. ბერიშვილს შარაბიძემაც მიბაძა და პერიმეტრიდან ზუსტად მოათავს ბურთი კალათში.
უკანასკნელი მეოთხედი სიტუაცია აღარ შეცვლილა და “არმიამ” მეტად პრინციპულ მატჩში ძალზედ მნიშნვნელოვანი გამარჯვება მოიპოვა. საბოლოო ჯამში 93-65 მასპინძელთა სასარგებლოდ.

 სტატისტიკა

მატჩისშემდგომი პრესკონფერენცია

კოტე ტუღუში(,,არმიის’’ მთავარი მწვრთნელი): როგორც წინასამატჩო პრესკონფერენციაზე აღვნიშნე, დღევანდელი დღისთვის მაქსიმალურად მომზადებულები ვიყავით. ბათუმს ძალიან კარგი გუნდი და შემადგენლობა ჰყავს, ამიტომ სიფრთხილით მივუდეგით, არც ერთი წუთით არ მოვდუნებულვართ. მესამე პერიოდში, როცა 14 ქულამდე დაიყვანეს სხვაობა, დროზე მოვასწარით მობილიზება, საჭირო ბურთები ჩავაგდეთ და საკმაოდ მნიშვნელოვანი გამარჯვება მოპოვეთ. წარმატებებს ვუსურვებ ,,ბათუმს’’ და ჩემს მეგობარს, ივანე მაისურაძეს მომავალში.

ივანე მაისურაძე(,,ბათუმის’’ მწვრთნელი, მოთამაშე): მივულოცავ ,,არმიას’’ გამარჯვებას, ნამდვილად შესანიშნავი თამაში აჩვენეს. ჩვენ კი, ვარჯიშებიდან გამომდინარე, უკეთესის მოლოდინი გვქონდა, თუმცა საპირისპირო თამაში ვაჩვენეთ. ცუდად ვიასპარეზეთ, ძალიან ბევრი ნიუანსი გამოჩნდა, რაც დასახვეწი გვაქვს. პირველ რიგში კი, ჩემი გუნდისგან ბრძოლისუნარიანობას მოვითხოვ.

მიხეილ ბერიშვილი(,,არმია’’): ამ თამაშისთვის სერიოზულად ვემზადებოდით და სასიხარულოა, რომ გავიმარჯვეთ. კარგი დაცვა ვითამაშეთ და ვფიქრობ, სწორედ ამის ხარჯზე მოვიგეთ.
ლევან ელიაძე(,,ბათუმი’’): ძალიან ცუდად ვითამაშეთ დაცვაშიც და შეტევაშიც. შევეცდებით, დღევანდელი შეცდომები მაქსიმალურად გამოვასწოროთ და მომდევნო შეხვედრებში წარმატებას მივაღწიოთ.

ბათუმის გამარჯვება ოლიმპთან

Posted on by Levan

სტატისტიკა 

თვენახევრიანი შესვენების შემდეგ საქართველოს ეროვნული ჩემპიონატი განახლდა. მეორე წრის პირველი ტური დღეს და ხვალ, ოთხ ქალაქში გაიმართება. უკვე ჩატარდა შეხვედრა ბათუმში, სადაც ადგილობრივმა გუნდმა “ოლიმპს” უმასპინძლა და 10 ქულის სხვაობით – 71:61 დაამარცხა.

სუპერლიგაში კიდევ 2 ახალი ლეგიონერის დებიუტი სწორედ ამ მატჩში შედგა. ბათუმელებმა სერბი ნემანია მიშკოვიჩი და ამერიკელი კემერონ მაკკევრი დაიმატეს, რომლებმაც აჭარელთა დღევანდელ გამარჯვებაში დიდი როლი შეასრულეს.

აღსანიშნავია, რომ “ბათუმს” აკლდა 2 ამერიკელი ლეგიონერი – ჯეიმი ჯექსონი და ჯერემი სეფოლდი, რომლებიც 25 იანვარს, რუსთავში გამართულ “ყველა ვარსკვლავის” მატჩზე არ გამოცხადდნენ. ჯექსონს და სეფოლდს ამის გამო 3-მატჩიანი დისკვალიფიკაცია აქვთ.

ახალ ლეგიონერებს ურიგოდ არ უთამაშიათ, მიშკოვიჩმა და მაკკევრიმ ჯუნიორ ქედუგინთან და ნიკა რამიშვილთან ერთად მასპინძლების გამარჯვება განსაზღვრეს. “ოლიმპმა” შესანიშნავად ითამაშა პირველი მეოთხედი, რომელიც 18:10 მოიგო და ლიდერობას პირველი ტაიმის შემდეგაც ინარჩუნებდა – 30:27.

მესამე პერიოდში მასპინძლებმა მატჩზე სრული კონტროლი დაამყარეს და სოლიდურ ლიდერობას დაეპატრონნენ. ქედუგინი შეტევაში ეფექტური იყო, მიშკოვიჩი ფარქვეშ მარჯვობდა, მაკკევრი და რამიშვილი სწრაფი გარღვევებით გამოირჩეოდნენ. მესამე ათწუთეული ბათუმელებმა 27:8 მოიგეს და გადამწყვეტ პერიოდს 16-ქულიანი ლიდერობით შეხვდნენ.

ოლიმპელებმა ძალების მოკრება მოახერხეს, თუმცა დასკვნითი მეოთხედის მოგებით ჩამორჩენა მხოლოდ 10 ქულამდე შეამცირეს. ბათუმელებმა დაგეგმილი გამარჯვება მოიპოვეს, რაშიც ლომის წილი 25 ქულის მომგროვებელ ჯუნიორ ქედუგინს მიუძღვის. 17 ქულა დააგროვა ნიკა რამიშვილმა, 14 – მაკკევრიმ, ხოლო მიშკოვიჩმა 8 ქულა და 13 მოხსნა მიითვალა. ოლიმპელთა შორის 26 ქულითა და 11 მოხსნით ორმაგი დუბლი რიჩარდ მათიაშვილმა მოაგროვა, ირაკლი გულისაბედაშვილის ანგარიშზე კი 11 ქულა დაგროვდა.

მატჩისშემდგომი კომენტარები:

ივანე მაისურაძე (”ბათუმის” მოთამაშე-მწვრთნელი): ჩვენი ორი ლეგიონერი, ჯეიმი ჯექსონი და ჯერემი სეფოლდი დისკვალიფიცირებულნი არიან ოლ სტარის მატჩში გამოუცხადებლობის გამო. ამას გარდა გუნდში ორი ახალი ლეგიონერი გვყავს, რომლებიც სულ 2 დღეა რაც შემოგვიერთდნენ, ამიტომ  ჯერ შეთამაშებულნი არ ვართ. მეტოქემ დიდი წინააღმდეგობა გაგვიწია და მატჩი ჩვენზე მობილიზებულად  დაიწყო. საბედნიეროდ მესამე მეოთხედიდან თამაშში გარადატეხის შეტანა მოვახერხეთ და  შეხვედრა ჩვენს სასარგებლოდ დავასრულეთ. მეტი ანგარიშითაც შეგვეძლო გამარჯვება, მაგრამ როგორც აღვნიშნე ჯერ შეთამაშება გვაკლია.

დავით თორთლაძე (”ოლიმპის” მთავარი მწვრთნელი): ვიცოდით რომ ბათუმს ორი ძლიერი ლეგიონერი არ ეყოლებოდა და გარკვეული იმედით ვიყავით განწყობილნი, მაგრამ აღმოჩნდა რომ სხვა ახალი ლეგიონერებით იყვნენ გაძლიერებულნი და ფაქტიურად იგივე გუნდს შევხვდით. მიუხედავად წაგებისა, ვთვლი რომ კარგი თამაში ჩავატარეთ და პირველ წრეში ნათამაშები მატჩისგან განსხვავებით უშანსოდ არ დავმარცხებულვართ. მხოლოდ მესამე მეოთხედში გვქონდა ჩავარდნა და ვეცდებით  მეორე წრეში მსგავსი შეცდომები აღარ გავიმეოროთ.

superleague.ge