უეფას ევროპის ლიგის პირველ საკვალიფიკაციო ეტაპზე “გაბალასა” და “დინამო თბილისს” შორის გამართულ მატჩამდე აზერბაიჯანული გუნდის ვიცე-პრეზიდენტი ფარიზ ნაჯაფოვი კი ამბობდა, რომ სტადიონზე პროვოკაციული შინაარსის ბანერებს არ დაუშვებდა, თუმცა აზერბაიჯანელმა ქომაგებმა ტრიბუნიდან პოლიტიკური შინაარსის არაერთი პოსტერი მაინც გადმოფინეს, რომელზედაც მთელი რიგი ქართული ქალაქები აზერბიჯანულად იყო მოხსენიებული.
ერთ-ერთ ბანერზე ბორჩალო უძველეს აზერბაიჯანულ მიწად იყო მიჩნეული. სინამდვილეში ბორჩალო ქვემო ქართლის ერთ-ერთი ისტორიული მხარე იყო, რომელმაც ეს სახელწოდება XVII საუკუნის დასაწყისში მას შემდეგ მიიღო, რაც დებედას ხეობაში თურქმანული ტომი ბორჩალუ ჩამოასახლეს. სხვათა შორის, ბორჩალოელი თურქულენოვანი მოსახლეობა ყოველთვის საქართველოს მოქალაქეებად იაზრებდა საკუთარ თავს და აქტიურ მონაწილეობასაც იღებდა საქართველოში შემოჭრილი მტრების წინააღმდეგ ბრძოლაში. ამის მაგალითად აღა-მაჰმად ხანთან გამართული 1795 წლის კრწანისის ბრძოლაც შეიძლება დავასახელოთ.
მოგვიანებით სამართალდამცველებმა აზერბაიჯანელ ქომაგებს აღნიშნული ბანერები ჩამოართვეს, თუმცა მანამდე პროვოკატორი გულშემატკივრები პოსტერებს დემონსტრაციულად აჩვენებდნენ.
აზერბაიჯანელები წერენ, რომ ეს პროვოკაციული ქმედება პასუხი იყო ერთი კვირის წინათ მომხდარი შემთხვევისა, როდესაც ამავე გუნდების მონაწილეობით გამართულ მატჩში “დინამო არენას” ტრიბუნაზე გულშემატკივრების ნაწილმა გამოკიდა ბანერი, რომელზედაც ეწერა: “ჩვენ გვახსოვს კახი და ზაქათალა. 1921”. “დინამო თბილისმა” აღნიშნულთა დაკავშირებით მეორე დღესვე გაავრცელა განცხადება და მომხდარს გაემიჯნა.
აღსანიშნავია, რომ მსგავსი შინაარსის ბანერი ბაქოს “ნეფთჩისა” და საჩხერის “ჩიხურას” შორის შარშან გამართულ შეხვედრაზეც გამოიფინა. მაშინ ამ ქმედებას საკამოდ დიდი აჟიოტაჟი მოყვა. იმერული კლუბი ბანერის შინაარს გაემიჯნა, თუმცა უეფასგან სანქციას მაინც ვერ ასცდა: მაშინ, უეფას გადაწყვეტილებით, “ჩიხურამ” სტადიონის ორ სექტორზე ანტირასისტული ბანერი გამოფინა.
ფაქტი ერთია, უეფა სტადიონებზე პოლიტიკური შინაარსის ბანერების გამოკიდებას მკაცრად კრძალავს და წესის დამრღვევ გუნდებს სჯის. ვნახოთ, გაატარებს თუ არა უეფა სანქციებს “გაბალას” მიმართ ან მოყვება თუ არა დღევანდელ ინციდენტს რაიმე განმარტება თავად კლუბის მხრიდან.
ცნობილია იმ არბიტრთა ვინაობა, რომლებიც უეფას ევროპის ლიგის პირველ საკვალიფიკაციო ეტაპზე ქართული გუნდების მონაწილეობით გასამართ საპასუხო მატჩებს მოემსახურებიან.
“გაბალასა” და “დინამო თბილისს” გასამართ შეხვედრას ამორი დელერიუს ხელმძღვანელობით ფრანგ მსაჯთა ბრიგადა განსჯის.
“ცხინვალსა” და რუმინულ “ბოტოშანის” შორის “მიხეილ მესხზე” გასამართ მატჩში ბულგარელი არბიტრები იმუშავებენ, მთავარი მსაჯი ნიკოლაი იორდანოვი იქნება.
ნიქოზიის “ომონიასა” და “დინამო ბათუმს” შორის მატჩს ფაბიუ ვერიშიმუს ხელმძღვანელობით პორტუგალიელ მსაჯთა ბრიგადა მოემსახურება.
სამივე შეხვედრა ხუთშაბათს, თბილისის დროით 20:00 საათზე დაიწყება.
ხვალ უეფას ევროპის ლიგის 2015/16 წლების გათამაშების საკვალიფიკაციო ეტაპი აიღებს სტარტს. თბილისში ადგილობრივი “დინამო” აზერბაიჯანულ “გაბალას” მიიღებს. ეს გუნდები ისტორიაში პირველად შეხვდებიან ერთმანეთს და ბუკმეიკერები მცირე უპირატესობას “დინამოს” ანიჭებენ.
Adjarabet-იც და Europe-bet-იც უფრო დაბალ კოეფიციენტს “დინამო თბილისს” აძლევენ. კოეფიციენტები ასე ნაწილდება:
წამყვანი ბრიტანული საბუკმეიკერო კანტორა Bet365 ნაკლებ კოეფიციენტს ასევე მასპინძელ გუნდს უწერს:
Bet365: “დინამო” — “გაბალა” (2.25 – 3.40 – 2.80)
“დინამომ” საქართველოს ჩემპიონატი მესამე ადგილზე დაასრულა, მოაგროვა იმდენივე ქულა, რამდენიც “დინამო ბათუმმა”, თუმცა ურთიერთშეხვედრებში დაფიქსირებული უარესი შედეგის გამო უკეთესი პოზიცია ბათუმურ კლუბს ერგო. თბილისურმა გუნდმა უმაღლეს ლიგაში 56 გოლი გაიტანა, რაც საუკეთესო მაჩვენებელია, გაუშვა 28 ბურთი. აღსანიშნავია ისიც, რომ “დინამომ” სეზონის ბოლოს ქვეყნის თასის ფინალურ შეხვედრაში “სამტრედია” ანგარიშით 5:0 გაანადგურა. ივნისში გია გეგუჩაძის გუნდმა სლოვენიაში სამი ამხანაგური მატჩი ჩაატარა: მაკედონიურ “შკენდიასთან” ანგარიშით 0:1 დამარცხდა; სლოვენიური “დომჟალე” ანგარიშით 3:1 დაამარცხა და ასევე სლოვენიურ “ზავრჩს” 2:0 მოუგო.
“გაბალამ” აზერბაიჯანის პრემიერლიგაში მესამე ადგილი დაიკავა. გუნდმა 32 მატჩში 54 ქულა მოაგროვა. “გაბალამ” არცთუ ისე შედეგიანი ფეხბურთი აჩვენა — გაიტანა 46 გოლი და გაუშვა 35 ბურთი, რაც ლიდერებს შორის ყველაზე ცუდი მაჩვენებლებია. პრემიერლიგის გათამაშების დასრულების შემდეგ გუნდს მატჩი არ ჩაუტარებია ანუ 28 მაისის შემდეგ “გაბალა” უთამაშებელია.
“დინამოსა” და “გაბალას” შორის შეხვედრა ხუთშაბათს, “დინამო არენაზე”, 20:00 საათზე დაიწყება. მატჩზე დასასწრები ბილეთის ფასი 5 ლარია და მისი გაყიდვა დღეს, დილის 11:00 საათიდან, “დინამო არენას” სალაროებში დაიწყება.
მატჩის პირდაპირ რეპორტაჟს საზოგადოებრივი მაუწყებლის პირველი არხი შემოგთავაზებთ.
შვეიცარიის ქალაქ ნიონში უეფას ევროპის ლიგის 2015/16 წლების გათამაშების საკვალიფიკაციო ეტაპის პირველი და მეორე რაუნდების წილისყრა ჩატარდა.
როგორც მოგეხსენებათ, ამ ტურნირზე საქართველოს “დინამო თბილისი”, “დინამო ბათუმი” და “ცხინვალი” წარადგენენ. სამივე გუნდი გათამაშებაში პირველი საკვალიფიკაციო ეტაპიდან ჩაერთვება.
წილისყრამ ქართულ კლუბებს მეტოქეებად შემდეგი გუნდები არგუნა:
ალექსანდრე იაშვილი 18 წლიანი განშორების შემდეგ საფეხბურთო კლუბ “დინამო თბილისში” დაბრუნა. თბილისური გუნდის ვეტერანი დინამოს ღირსებას 1993-97 წლებში იცავდა. “იაშკას” დინამოს მაისურით 89 მატჩი აქვს ჩაატარებული და გატანილი აქვს 84 გოლი. მოგებული 3 ჩემპიონატის, 3 საქართველოს თასის და 2 სუპერთასის შემდეგ ალექსანდრე იაშვილმა კარიერა 1998 წელს გერმანულ “ფრაიბურგში” განაგრძო, ხოლო მანამდე კი მცირეხნით “ლიუბეკში” ასპარეზობდა.
“ფრაიბურგში” გატარებული 9 წლიანი პერიოდის შემდეგ იაშვილი “კარლსრუეს” შეუერთდა. 2012-13 წლების სეზონი “ბოხუმში” გაატარა და შემდეგ ბაქოს “ინტერში” გამოდიოდა. “დინამომდე” ბოლო კლუბი კი “სამტრედია” გამოდგა, სადაც განვილილი სეზონის მეორე ნახევარი გაატარა.
სულ ცოტა დრო რჩება დავით ყიფიანის სახელობის თასის ფინალური მატჩის დაწყებამდე. ქვეყნის თასისთვის ერთმანეთს “დინამო თბილისი” და “სამტრედია” შეეცილებიან. შეხვედრა მიხეილ მესხის სახელობის სტადიონზე, 19:00 საათზე დაიწყება. მატჩზე დასწრება თავისუფალია. შეხვედრის პირდაპირ რეპორტაჟს საზოგადოებრივი მაუწყებლის მეორე არხი შემოგთავაზებთ.
გთავაზოიბთ გუნდების შედარებით მონაცემებს.
დავით ყიფიანის სახელობის თასის ფინალი
26 მაისი
19:00 სთ.
„დინამო თბილისი“ —„სამტრედია“
Fanebi.com-ის მომხმარებელთა 87 პროცენტი თვლის, რომ მატჩს მოიგებს “დინამო”.
Fanebi.com-ის მომხმარებელთა 5 პროცენტი თვლის, რომ მატჩის ძირითადი დრო ფრედ დასრულდება.
Fanebi.com-ის მომხმარებელთა 8 პროცენტი თვლის, რომ მატჩს მოიგებს “სამტრედია”.
მსაჯები: მარკო ფრიტცი, კრისტიან დიცი, დომენიკ შაალი (გერმანია)
13 მაისი ქართული ფეხბურთისა და თბილისის „დინამოს“ ისტორიაში განსაკუთრებული თარიღია. სწორედ ამ დღეს „დინამოელებმა“ ისტორიაში ყველაზე დიდ წარმატებას მიაღწიეს – „ლურჯ-თეთრებმა“ ევროპის თასების მფლობელთა თასი მოიგეს. 1981 წლის ტრიუმფი თბილისური კლუბის გულშემატკივართა გულებში სამუდამოდ დარჩა, ძველი თაობის მაყურებლებს კი განუმეორებელი შთაბეჭდილება და სიხარული აჩუქა.
როტერდამში ადგილობრივ „ფეინოორდთან“ ანგარიშით 0:2 მარცხისა და ორი მატჩის ჯამში ანგარიშით 3:2 მოგების შემდეგ, თბილისის „დინამოელებმა“ ფინალში მეტოქედ აღმოსავლეთ გერმანული იენის „კარლ ცეისი“ მიიღეს. გერმანიის დემოკრატიული რესპუბლიკის წარმომადგენლები ევროპაში პირველ პლანზე არასდროს ყოფილან. ეს როგორც საკლუბო, ასევე სანაკრებო დონეს ეხება. ამის მიუხედავად, 1980/81 წლების ევროპის თასების მფლობელთა თასზე გუნდი მეტად ღირსეულად გამოვიდა. კონკრეტულად – „კარლ ცეისმა“ ლისაბონის „ბენფიკა“ და წინა სეზონის ტრიუმფატორი „ვალენსია“ დაამარცხა (რომლის შემადგენლობაში, სხვათა შორის, 1978 წლის მსოფლიო ჩემპიონი მარიო კემპესი თამაშობდა). ასე რომ, დიუსელდორფის „რაინშტადიონზე“ თბილისელებს ადვილი გასეირნება არ ელოდათ.
თამაშის დებიუტშივე „დინამომ“ აჩვენა, რომ მეტოქის სიძლიერე სულაც არ აშინებდა. უკვე მეოთხე წუთზე „მტკვრისპირელებს“ საჯარიმო დარტყმის შემდეგ საკმაოდ კარგი მომენტი ჰქონდათ. მეტოქემ „დინამოს“ სწრაფადვე უპასუხა – მე-7 წუთზე ლუტს ლინდემანმა მეკარისგან შორეულ კუთხეში დაარტყა – ნოდარ ახალკაცის გუნდი გაშვებული გოლისგან ოთარ გაბელიას ოსტატობამ იხსნა. სხვათაშორის, გაბელიას ამ ლეგენდარულ მატჩში სხვა გუნდის ფორმაში თამაში მოუწია, რადგან მისი ჩანთა ფრანკფურტიდან დიუსელდორფში გადაფრენისას დაიკარგა.
იენელებს კიდევ ერთი შანსი მე-9 წუთზე ჰქონდათ, მაგრამ შნუპხაზემ საჯარიმო დარტყმის შესრულებისას ბურთი ცოცხალ კედელს გაარტყა, რის შემდეგაც საინტერესო ეპიზოდი მოხდა – მსაჯმა თამაში გააჩერა და ფეხბურთელებთან ერთად უეფა-ს ერთ-ერთი გარდაცვლილ ფუნქციონერს პატივი მიაგო.
პირველი რეალური საგოლე მომენტი „დინამოს“ მე-11 წუთზე შეექმნა, თუმცა ვიტალი დარასელის დარტყმულს მეკარე გაუმკლავდა. მაშინვე საქართველოდან ჩასული გულშემატკივრების ტრიბუნაც გააქტიურა. გარკვეული პერიოდით „რაინშტადიონზე“ „დინამო, დინამოს“ გარდა არაფერი ისმოდა. ამის მიუხედავად, მე-13 წუთზე რააბმა მარცხენა ფლანგიდან შეუტია, შეტევა კი ცენტრიდან ოდნაც არაზუსტი დარტყმით დაასრულა. გუნდები მომენტს მომენტზე ქმნიდნენ – ამჯერად „დინამოს“ ჯერი დადგა – გუცაევმა მეკარისგან დაბალ კუთხეში დაარტყა, დამატებაზე კი გოლკიპერი დავით ყიფიანის დარტყმულსაც გამოეხმაურა.
მე-20 წუთი საკამათო ეპიზოდით გამოირჩა, როდესაც ხსენებული რააბი თბილისელ მცველთან კონტაქტის შედეგად მეტოქის საჯარიმოსთან წაიქცა. 30 წლის წინანდელი ჩანაწერიდან გამომდინარე, ზუსტი პასუხის გაცემა რთულია, მაგრამ მსაჯს თამაშის წესის დარღვევა არ დაუფიქსირებია.
პირველი ტაიმის შუა ნაწილში თამაშის ტემპი დაეცა, თუმცა შეტევები გრძელდებოდა. „დინამო“ აშკარად დომინირებდა, მაგრამ სერიოზული და სახიფათო მომენტები არ შეუქმნია.
გუნდები კვლავ ტაიმის ბოლოსკენ ათამაშდნენ. 36-ე წუთზე ლინდემანმა ახლო კუთხეში სახიფათოდ დაარტყა – თამაშში კვლავ ოთარ გაბელია ჩაერთო. ერთ წუთში კი დაძაბულობამ პიკს უკვე მეტოქის საჯარიმოში მიაღწია – ჩივაძე მარჯვენა ფლანდიან ჩაწოდებულ ბურთს მიწვდა, ამჯერად თავი „კარლ ცეისის“ მეკარემაც გამოიჩინა. მე-40 წუთზე გიორგი თავაძემ შორიდან დაარტყა, მაგრამ გრაპენტინმა ამჯერადაც ივარგა.
შესვენება გერმანელებს აშკარად გამოადგათ. მეორე ტაიმის უკვე პირველ წუთზე მათ, წესით, ანგარიში უნდა გაეხსნათ. ბილაუმ თავით იმდენად კარგად დაარტყა, რომ ამ დარტყმულს გაბელიაც ვერ მოიგერიებდა. საბედნიეროდ, ბურთი „დინამოს“ კარს მცირე მანძილით ასცდა.
თბილისელებმა მეტოქეს არც ისე ცუდი შეტევით უპასუხეს, რომელიც, სამწუხაროდ არაფრით დასრულდა – მარცხენა ფლანგზე გუცაევს გერმანელმა მცველმა აჯობა. არადა, ბურთის მიღებისას „დინამოს“ მოთამაშეს ხელს არავინ უშლიდა. ერთ წუთში გაბელიას თამაშში ჩართვა კიდევ ერთხელ მოუწია, თბილისური კლუბის კიპერმა „კარლ ცეისის“ კაპიტნის კურბიუვაიტის დარტყმა მოიგერია. ორ წუთში ყიფიანმა მეტოქის საჯარიმოში ჩააწოდა, მაგრამ რამაზ შენგელია თამაშგარე მდგომარეობაში აღმოჩნდა.
როგორც ჩანდა, თამაში „დინამოს“ უპირატესობით მიმდინარეობდა. 57-ე წუთზე ახალკაცის გუნდი გოლის გატანასთან ახლოს იყო – გუცაევმა შილინგს ბურთი ფეხებს შორის გაუტარა, ახლო კუთხეში დარტყმული კი მეკარემ მოიგერია. კუთხურის შედეგად ყიფიანის თავურ დარტყმას გოლამდე სულ ცოტა დააკლდა.
63-ე წუთზე შენგელიამ მეტოქის საჯარიმოსთან ბურთი დაკარგა, რასაც მისი კარის მიმართულებით კონტრშეტევა მოჰყვა. კურბიუვაიტმა მარცხენა ფლანგზე შეტევაში კრაუზე ჩართო, ამ უკანასკნელმა მეტოქის საჯარიმოში ჩააწოდა, სადაც ხოპემ ეფექტურად დაარტყა და ანგარიშიც გახსნა – 0:1.
საბედნიეროდ, „დინამომ“ წონასწორობა მალევე აღადგინა. შენგელია ბურთით მეტოქის საჯარიმომდე მივიდა და გუცაევი შესანიშნავი პასით მოამარაგა, რომელმაც გრაპენტინს ახლო კუთხეში დაურტყა, „კარლ ცეისის“ მეკარე დარტყმულს ამჯერად ვერ გაუკლავდა!
ამის შემდეგ „დინამომ“ შეტევას კიდევ უფრო მოუმატა. „კარლ ცეისის“ მცველებს თბილისური კლუბის შეტევებთან გამკლავება სულ უფრო და უფრო უჭირდათ. მე-80 წუთზე დარასელის არც ისე ცუდი მომენტი ჰქონდა, რომელიც მან ვერ გამოიყენა. შვიდ წუთში ვიტალი არამხოლოდ მატჩის, არამედ მთელი საქართველოს გმირი გახდა, მან ყიფიანის პასი მიიღო, საჯარიმოსთან ორი მეტოქე მოატყუა და ახლო „ექვსიანში“ ზუსტად დაარტყა – 2:1!
დარჩენილ დროში „კარლ ცეისმა“ ღირებული ვერაფერი შექმნა, მსაჯის სასტავენს კი თბილისური გუნდის ფეხბურთელების, სამწვრთნელო შტაბის, ექიმებისა და გულშემატკივრების სიხარული მოჰყვა. ერთ-ერთი დასამახსოვრებელი კი კომენტატორ კოტე მახარაძის სიტყვებია, რომელიც ისტორიაში სამუდამოდ დარჩა – „წარმომიდგენია, რა ხდება ახლა თბილისში! ზეიმობს საქართველოს დედაქალაქი, ზეიმობს მთელი ჩვენი ქვეყანა!“
13 მაისი, 1981 წელი. დიუსელდორფი. „რაინშტადიონი“. 9000 მაყურებელი
ახლაც, დიდი გამარჯვებიდან 34 წლის შემდეგ,„დინამოს“ წარმატებას დიდი სიამოვნებით ვიხსენებთ. „ოქროს ბიჭები“, რომელთა თითოეულმა წარმომადგენელმა ისტორიაში თავისი სახელი სამუდამოდ დატოვა. გუნდი, რომელიც დღემდე ახსოვთ და რომლის თამაშითაც მოხიბლბი არიან. ჩვენ კი, ახალ თაობას, ამ კადრების ნახვის შემდეგ ღიმილისა და სიამაყის მიზეზი გვეძლევა!
ძველი თაობისთვის საამაყრო და დასამახსოვრებელი მოგონება კი ახალი ისტორიიდან ერთ-ერთი ფაქტის გახსენებით დავასრულოთ. 2011 წლის უეფა-ს ჩემპიონთა ლიგის ფინალის დაჯილდოების ცერმეონიალის წაყვანის დროს რუსული „ნტვ პლუსის“ კომენტატორმა ვასილი უტკინმა 1981 წლის „დინამო“ და მისი ხსენებული წარმატება გაიხსენა და ლეგენდარული გუნდის თამაში „ბარსელონას“ თამაშს შეადარა.
Fanebi.com საქართველოს უმაღლესი საფეხბურთო ლიგის პირველი ნახევრის შეჯამებას ასრულებს. დღეს გათამაშების ცხრილის ამჟამინდელ ლიდერ თბილისის „დინამოზე“ ვისაუბრებთ.
თავიდანვე „დინამოელთა“ სტარტი საინტერესო უნდა ყოფილიყო. შეიძლება ითქვას, ზაფხულში კლუბში რევოლუციური ცვლილებები განხორციელდა – „აკტობესთან“ უეფა-ს ჩემპიონთა ლიგის მეორე საკვალიფიკაციო რაუნდიდან გავარდნის შემდეგ გუნდი ბევრმა ფეხბურთელმა დატოვა, მათ შორის გიორგი ლორია, გიორგი მერებაშვილი და ელგუჯა გრიგალაშვილი იყვნენ. წასული მოთამაშეების ადგილი კი ახალგაზრდა ფეხბურთელებმა დაიკავეს. შეიცვალა გუნდის მთავარი მწვრთნელიც, მიხაელ ბილეკი კახა გოგიჩაიშვილმა შეცვალა. როგორც „მტკვრისპირელთა“ პრეზიდენტმა, რომან ფიფიამ განაცხადა, ყველა ეს ცვლილება ახალ გეგმას ემსახურება, რომელიც კლუბის გაახალგაზრდავებაზეა გათვლილი.
ჩემპიონატი თბილესელებმა საკმაოდ კარგად დაიწყეს. საწყის სამ ტურში „დინამომ“ „სამტრედია“, „სიონი“ და „ზესტაფონი“ დაამარცხა. დედაქალაქელთა წაუგებელი სერია რუსთავში შეწყდა, სადაც „დინამომ“ „მეტალურგთან“ ანგარიშით 3:0 წააგო. თუმცა, ამას შვიდმატჩიანი წაუგებელი სერიაც მოჰყვა, რომლის დროსაც „დინამომ“ ხუთჯერ გაიმარჯვა, ორი შეხვედრა კი გატანილი გოლების გარეშე დაასრულა – თბილისელებს გორის „დილა“ და მარტვილის „მერანი“ დაუზავდნენ. აღსანიშნავი იყო ცხინვალის „სპარტაკთან“ ანგარიშით 6:1 მოგებული მატჩი, გუნდთან, რომელიც ამჟამად მეოთხე ადგილს იკავებს. საინტერესო გამოდგა თბილისელთა მატჩში პრინციპულ მეტოქე ქუთაისის „ტორპედოსთან“, რომელიც გოგიჩაიშვილის ფეხბურთელებმა გასვლაზე ანგარიშით 2:1 დაამარცხეს.
სამწუხაროდ, თბილისელებს პირველი წრის მეორე ნახევარი არც თუ ისე წარმატებული გამოუვიდათ, რაც სატურნირო ცხრილში არსებულ ვითარებაზეც აისახა. „ტორპედოსთან“ გამარჯვების შემდეგ დედაქალაქელები შინ ბათუმის „დინამოსთან“ მინიმალური ანგარიშით 0:1 დამარცხდნენ. ერთადერთი გოლი იმ მატჩში უკვე მესამე წუთზე გელა გოგიტიძემ გაიტანა. ჩემპიონატში ამის შემდეგ „დინამო“ გასვლაზე „ზუგდიდს“ შეხვდა და რთულ მატჩში 70-ე და 87-ე წუთებზე პარუნაშვილისა და ჩისკოს გოლებით მეტოქეს ანგარიშით 2:1 სძლია. თითქოს, ამის შემდეგ თბილისურ კლუბს დარჩენილ ორ მატჩში უკეთესად უნდა ეთამაშა, მაგრამ „დინამოელებმა“ ჯერ შინ „გურიასთან“ 1:2 წააგეს, შემდგომ კი გასვლაზე „ჩიხურასთან“ 0:1 დამარცხდნენ.
„გურიასთან“ მატჩში „ლურჯ-თეთრები“ საგრნობ უპირატესობას ფლობდნენ, თუმცა ამის მიუხედავად, აქტივში ქულის მომატება ვერ შეძლეს. იმ შეხვედრაში ანგარიში 42-ე წუთზე „დინამოს“ ექს-კაპიტანმა, დღეს კი „გურიას“ მოთამაშემ, ალექსანდრე კოშკაძემ გახსნა. თუმცა, ტაიმის ბოლო წუთზე მარცხენა ფლანგიდან ლაშა შერგელაშვილმა ძლიერად დაარტყა და მეტოქის კარში ლამაზი გოლი გაიტანა. მეორე ნახევრის მეორე წუთზევე მასპინძლებმა მეორე გოლი გაუშვეს – თავი კობა შალამბერიძემ გამოიჩნა, რომელიც ამ მატჩში თავისი გუნდის რიგებში საუკეთესო იყო.
გაცილებით რთული გამოდგა „ჩიხურასთან“ გასვლითი მატჩი, რომლის ერთადერთი გოლი 44-ე წუთზე თორნიკე მუმლაძემ გაიტანა. აღსანიშნავია, რომ იმ შეხვედრის მეორე ნახევარში ჩისკომ გოლი გაიტანა, რომელიც მსაჯმა საეჭვო თამაშგარიდან არ ჩათვალა.
რამდენიმე დღის შემდეგ „დინამო“ „ჩიხურას“ სუპერთასზეც შეხვდა და იმ მატჩში ერთადერთი გოლი დამატებით დროში ჩისკომ გაიტანა, რომლისთვისაც „ლურჯ-თეთრთა“ რიგებში ეს ბოლო მატჩი აღმოჩნდა. მოგვიანებით, ესპანელი სამშობლოში დაბრუნდა, სადაც რანგით მესამე ლიგაში მოასპარეზე „ჰიმნასტიკში“ გადაბარგდა. კლუბი ასევე ირაკლი ძარიამ, ომარ მიგინეიშვილმა და ნიკა საბანაძემ დატოვეს.
გატანილი გოლების მაჩვენებლით, საუკეთესო გიორგი პაპუნაშვილი იყო, რომელმაც პირვერ წრეში მეტოქეთა კარი შვიდჯერ აიღო.
პირველი წრის შემდეგ „დინამოს“ მონაგარი 29 ქულას შეადგენს. ამჟამად თბილისელები უახლოეს მდევარ გორის „დილას“ მხოლოდ 1 ქულით უსწრებენ.
სათქმელია, რომ მიმდინარე სატრანფერო ფანჯრის დროს კლუბმა სლოვენიელი მეკარე ლიბორ ჰრდლიჩკა დაიმატა, რომელიც აქამდე უკრაინულ ზაპოროჟიეს „მეტალურგში“ თამაშობდა. სულ მალე თბილისელები თურქეთში გაემგზავრებიან, სადაც სეზონის მეორე ნახევრისთვის მზადებას გააგრძელებენ და რამდენიმე ამხანაგურ მატჩსაც ჩაატარებენ.
გუშინ მინსკის „დინამომ“ ახალი მთავარი მწვრთნელი წარადგინა.
ამიერიდან ბელორუსულ კლუბს თბილისის „დინამოს“ ყოფილი დამრიგებელი დუშან უჰრინ-უმცროსი უხელმძღვანელებს. ჩეხ სპეციალისტთან მინსკელებმა ერთწლიანი კონტრაქტი გააფორმეს.
შეგახსენებთ, რომ დუშან უჰრინ-უმცროსი თბილისის „დინამოს“ სათავეში 2012 წლის ზაფხულში ჩაუდგა. საქართველოში მუშაობის პერიოდში „მტკვრისპირელებთან“ ერთად მან საქართველოს ჩემპიონატი და საქართველოს თასი მოიგო. 2013 წლის მიწურულს უჰრინი სათავეში „ვიქტორია პლზენს“ ჩაუდგა, საიდანაც მიმდინარე წლის აგვისტოში გაუშვეს.
თბილისის „დინამოს“ უკვე ყოფილი ნახევარმცველი ჩისკო მუნიოსი ესპანეთის სეგუნდა B-ს მესამე ჯგუფში მოასპარეზე ტარაგონას „ჰიმნასტიკში“ გადაბარგდა.
როგორც კლუბის ოფიციალური საიტი წერს, მხარეებმა კონტრაქტი 2016 წლამდე გააფორმეს. ოფიციალურად ჩისკოს ახალ კლუბში სამშაბათს, ადგილობრივი დროით, 12 საათსა და 30 წუთზე წარადგნენ.
ამჟამად „ჰიმნასტიკი“ 29 ქულით გათამაშების ცხრილის მესამე ადგილზე იმყოფება და პირველ ადგილზე მყოფ „ჰერკულესს“ მხოლოდ ერთი ქულით ჩამორჩება.
შეგახსენებთ, რომ ჩისკო „დინამოში“ 2011 წლის ზაფხულში გადაბარგდა და ამ პერიოდში თბილისურ კლუბთან ერთარ ორჯერ საქართველოს ჩემპიონი, ორჯერ საქართველოს თასისა და ერთხელ ქვეყნის სუპერთასის გამარჯვებული გახდა. „ლურჯ-თეთრების“ მაისურით თავისი ბოლო მატჩი ესპანელმა 11 დეკემბერს ჩაატარა, როდესაც „დინამო“ სუპერთასის შეხვედრაში საჩხერის „ჩიხურას“ შეხვდა. აღსანიშნავია, რომ ერთადერთი გოლი ხსენებულ თამაშში 90-ე წუთზე სწორედ ჩისკომ გაიტანა.
…ისეთი შეგრძნება მაქვს თითქოს აქ გუშინ ჩამოვედი. გუშინდელი დღესავით მახსოვს, თუ როგორ მაფიქრებდა ოჯახისგან მოშორებით ყოფნა, პირველ დღეებში. თავიდან მაფიქრებდა ენის ბარიერიც, უცხო კულტურა, უცხო მხარე და ადამიანები- რამდენად კარგად შევეწყობოდი მე მათ და რამდენად ადვილად მიმიღებდნენ ისინი მე. მაგრამ ამ სამ ნახევარმა წელიწადმა აქაურობა ჩემს სახლად აქცია. ზუსტად არც კი მახსოვს, როგორ გაქრა ყველა კითხვის ნიშანი და როგორ ვიგრძენი აქ თავი შინაურად, მაგრამ ფაქტია, რომ დღეს ეს ჩემი სახლიცაა.
მინდა მადლობა გადავუხადო დინამოს თითოეულ თანამშრომელს, რომლებმაც თავი განსაკუთრებულ ადამიანად მაგრძნობინეს და მეტწილად მათი დამსახურებაცაა ის, რომ დღეს ასე მასევდიანებს თბილისიდან წასვლა.
დინამოში გატარებული ყოველი დღე, კლუბის წევრებთან თუ თანამშრომლებთან შეხვედრა განსაკუთრებული იყო ჩემთვის. მადლობა მინდა ვუთხრა ყველას იმის დამტკიცებისათვის, რომ დინამო ერთი დიდი ოჯახია. განსაკუთრებული მადლობა მათ ვინც ჩრდილში აკეთებენ დინამოს საქმეს, ვინც არც მოედანზე და არც ტელევიზორის ეკრანებზე არ ჩანან, მაგრამ მუხლჩაუხრელად შრომობენ დინამოს უკეთეს გუნდად ჩამოყალიბებისათვის და მისი ყოველდღიურობის გასალამაზებლად. მადლობა იმ ბიჭებს ვის გვერდითაც ამდენი შეხვედრა ჩავატარე, ვისთან ერთადაც განვიცდიდი და მიხაროდა. მადლობა მწვრთნელებს და გუნდის პერსონალს, ყველა მათგანს ერთი რამ აერთიანებდა – ეს იყო დინამო და სურვილი ის უკეთეს გუნდად ექციათ. უღრმესი მადლობა დინამოს ქომაგებს, რომელთა მხარდაჭერა და სიყვარულიც ყოველთვის დამატებითი მოტივაცია იყო ჩემთვის.
ცალკე მინდა მადლობა ვუთხრა გუნდის პრეზიდენტს, რომელმაც ყველანაირი წინაპირობა შექმნა, დინამოს ძველი დიდების დასაბრუნებლად და მჯერა, შორს არ არის ის დღე, როცა მისი და დინამოს გულშემატკივრის ოცნება ასრულდება.
მივდივარ, მაგრამ არ გემშვიდობებით. მე ხომ ამ წლებმა დინამოს განუყოფელ ნაწილად მაქცია.
მოგეხსენებათ, ხუთშაბათს „დინამო არენაზე“ თბილისის „დინამოსა“ და საჩხერის „ჩიხურას“ შორის საქართველოს სუპერთასის მატჩი გაიმართა, რომელიც დინამოელთა გამარჯვებით 1:0 დასრულდა. ერთადერთი გოლი 90-ე წუთზე ჩისკომ გაიტანა, რომელმაც ამით თავისი პროფესიული კარიერა დაასრულა.
„დინამოს“ შემადგენლობას 26 წლის ნახევარმცველი ირაკლი ძარიაც ტოვებს, რომელიც კარიერას უცხოეთში გააგრძელებს. აღსანიშნავია, რომ თბილისურ კლუბს ირაკლიმ ფანკლუბ „გლადიატორებთან“ ერთად 90 წუთის განმავლობაში უქომაგა, მატჩის დასრულების შემდეგ კი, გამარჯვებაც აღნიშნა.
