ტურინის “იუვენტუსი” ჩემპიონთა ლიგის მიმდინარე სეზონში ბრწყინვალედ ასპარეზობს.
ტურნირის ნახევარფინალურ ეტაპზე “მონაკოსთან” ჩატარებული შეხვედრა (2:0) “ბებერი სინიორასთვის” მიჯრით მეექვსე მატჩი გამოდგა, რომელშიც გოლი არ გაუშვია. “იუვენტუსმა” პლეიოფის ყველა შეხვედრაში მშრალად დაიცვა კარი, ასევე გოლი არ გაუშვა ჯგუფური ეტაპის ბოლო ტურში ზაგრების “დინამოს” წინააღმდეგ გამართულ მატჩში.
ტურინის “იუვენტუსმა” ჩემპიონთა ლიგაზე მიჯრით ექვსი “მშრალი” შეხვედრა პირველად ჩაატარა.
ჩემპიონთა ლიგის მეოთხედფინალურ ეტაპზე ტურინის “იუვენტუსსა” და “ბარსელონას” შორის გამართული პირველი მატჩი “ბებერი სინიორას” გამარჯვებით, ანგარიშით 3:0 დასრულდა.
ტურინელთა კიპერმა ჯანლუიჯი ბუფონმა ჩემპიონთა ლიგაზე 112-ე მატჩი ჩაატარა. ამ მაჩვენებლით იტალიელმა პეტრ ჩეხს გადაუსწრო და ახლა მეკარეებს შორის მეორე ადგილი უკავია.
ჩემპიონთა ლიგაზე მეკარეებს შორის ყველაზე მეტი მატჩი იკერ კასილასს აქვს ჩატარებული. ესპანელმა კიპერმა ტურნირზე 168 შეხვედრა ჩაატარა.
იტალიის სერია A-ს 30-ე ტურში “ნაპოლისა” და ტურინის “იუვენტუსს” შორის გამართული მატჩი (1:1) “ბებერი სინიორას” კიპერ ჯანლუიჯი ბუფონისთვის ქვეყნის უმაღლეს დივიზიონში ჩატარებული 615-ე შეხვედრა გამოდგა.
ამ მაჩვენებლით 39 წლის მეკარე მილანის “ინტერის” ყოფილ კაპიტან ხავიერ ძანეტის გაუთანაბრდა და მეორე ადგილზე გადაინაცვლა. სერია A-ში ჩატარებული მატჩების რაოდენობით ბუფონსა და ძანეტის მხოლოდ “მილანის” ყოფილი კაპიტანი პაოლო მალდინი სჯობნის, რომელმაც კარიერის განმავლობაში ქვეყნის უმაღლეს დივიზიონში 647 მატჩი ჩაატარა.
იტალიის სერია A-ს 28-ე ტურში ტურინის “იუვენტუსსა” და “მილანს” შორის მიმდინარე მატჩი “ბებერი სინიორას” კიპერ ჯანლუიჯი ბუფონისთვის ქვეყნის უმაღლეს დივიზიონში ჩატარებული 613-ე შეხვედრა გამოდგა.
ამ მაჩვენებლით 39 წლის მეკარემ “რომას” კაპიტნის, ფრანჩესკო ტოტის (612) შედეგი გააუმჯობესა. სერია A-ში ჩატარებული მატჩების რაოდენობით ბუფონმა მესამე ადგილზე გადაინაცვლა და ახლა მხოლოდ “ინტერისა” და “მილანის” ყოფილ კაპიტნებს – ხავიერ ძანეტისა (615 მატჩი) და პაოლო მალდინის (647 მატჩი) ჩამორჩება.
იტალიის სერია A-ს 27-ე ტურში “უდინეზესა” და ტურინის “იუვენტუსს” შორის გამართული მატჩი (1:1) “ბებერი სინიორას” კიპერ ჯანლუიჯი ბუფონისთვის ქვეყნის უმაღლეს დივიზიონში ჩატარებული 612-ე შეხვედრა გამოდგა.
ამ მაჩვენებლით 39 წლის მეკარე “რომას” კაპიტან ფრანჩესკო ტოტის გაუთანაბრდა. სერია A-ში ჩატარებული მატჩების რაოდენობით ბუფონსა და ტოტის მხოლოდ “ინტერისა” და “მილანის” ყოფილი კაპიტნები – ხავიერ ძანეტი (615 მატჩი) და პაოლო მალდინი (647 მატჩი) სჯობიან.
25 თებერვალს “მილანის” კიპერ ჯანლუიჯი დონარუმას 18 წელი შეუსრულდა. ახალგაზრდა მეკარეს იუბილე ტურინის “იუვენტუსისა” და იტალიის ნაკრების მეკარე ჯანლუიჯი ბუფონმა მიულოცა.
“დაბადების დღეს გილოცავ. უკვე ზრდასრული ბიჭების რიგებში ჩაეწერე, მაგრამ მანამდეც ასეთად ითვლებოდი. მაქსიმალურად დატკბი შენი წლოვანებით, სიმწიფის ასაკი გაქვს.
იცი, რომ ზრდასრულ ასაკში ყველაფერი რთულია, მაგრამ შენ ყველა საჭირო მორალური და ადამიანური თვისება გაქვს იმისთვის, რომ იყო ბედნიერი და ჩაეწერო ისტორიაში”, – ასე მიმართა ბუფონმა დონარუმას.
ჯანლუიჯი დონარუმას “მილანში” უკვე 55 მატჩი აქვს ჩატარებული, იტალიის ეროვნულ ნაკრების რიგებში კი ორ შეხვედრაში ითამაშა.
უეფას ჩემპიონთა ლიგის მერვედფინალურ ეტაპზე “პორტუსა” და ტურინის “იუვენტუსს” შორის პირველი შეხვედრა გაიმართა, რომელიც იტალიელთა გამარჯვებით, ანგარიშით 2:0 დასრულდა. მატჩის შემდეგ გუნდების მეკარეები – იკერ კასილასი და ჯანლუიჯი ბუფონი ერთმანეთს გულთბილად დაემშვიდობნენ. ჟურნალისტები დაინტერესდნენ, თუ რა უთხრეს ერთმანეთს იტალიელმა და ესპანელმა.
“ბუფონმა მითხრა, რომ წითელმა ბარათმა მათ საქმე გაუიოლა. ვეცადეთ, რომ სამუშაო კარგად შეგვესრულებინა, მაგრამ იმ ორმა წუთმა ყველაფერი შეცვალა.”იუვენტუსთან” სხვაგვარად ვერ ვიბრძოლებდით. საპასუხო მატჩში კარგი იქნება, თუ მეტოქე გუნდის რომელიმე ფეხბურთელს შეხვედრის დებიუტშივე გააძევებენ. ბევრი უნდა ვიმუშაოთ და რწმენა არ დავკარგოთ. რთული იქნება, მაგრამ ტურინში ძალებს არ დავზოგავთ”, – ციტირებს კასილასის სიტყვებს Football Italia.
წყვილის საპასუხო მატჩი 14 მარტს, ტურინში ჩატარდება.
2018 წლის მსოფლიოს ჩემპიონატის საკვალიფიკაციო ეტაპზე ლიხტენშტაინისა და იტალიის ნაკრებებს შორის გამართული მატჩის (0:4) მიმდინარეობისას “სკუადრა აძურას” მეკარე ჯანლუიჯი ბუფონი კურიოზული და ამავდროულად სასიამოვნო ეპიზოდის მთავარ მონაწილედ მოგვევლინა.
იტალიის ნაკრებმა თითქმის მთელი შეხვედრა მეტოქის ნახევარზე გაატარა, უსაქმოდ დარჩენილმა ბუფონმა კი ცოტა მოიწყინა. მატჩის მიმდინარეობისას მოედანზე გულშემატკივარი შეიპარა და იტალიელ კიპერს ავტოგრაფი სთხოვა, არც ბუფონმა თქვა თხოვნაზე უარი და ტრიბუნაზე მყოფი ფანებისგან გულმხურვალე ოვაციაც დაიმსახურა.
მოედანზე ქომაგის შესვლის გამო ლიხტენშტაინის ფეხბურთის ფედერაციამ ფიფასგან შესაძლოა, ჯარიმა მიიღოს.
Buffon autografa la maglia dell’invasore mentre ancora si gioca #respect #legend #LiechtensteinItalia pic.twitter.com/ktIixfYePp
— delinquentweet (@delinquentweet) 12 November 2016
იტალიის სერია A-ს მე-12 ტურში “კიევოსა” და ტურინის “იუვენტუსს” შორის გამართული მატჩი (1:2) “ბებერი სინიორას” კიპერ ჯანლუიჯი ბუფონისთვის ჩემპიონატში ჩატარებული მე-600 შეხვედრა გამოდგა.
ბუფონზე მეტი რაოდენობის მატჩი სერია A-ში მხოლოდ სამ ფეხბურთელს აქვს ჩატარებული: პაოლო მალდინი (“მილანი”; 647 მატჩი), ხავიერ ძანეტი (“ინტერი”; 615 მატჩი), ფრანჩესკო ტოტი (“რომა”; 607 მატჩი).
ჩატარებული მატჩების რაოდენობით ბუფონმა ისეთ მეკარეებს გადაუსწრო, როგორებიც დინო ძოფი, ჯანლუკა პალიუკა და ენრიკო ალბერტოზი არიან. მათ გარდა ზედა ათეულში პიეტრო ვერხოვოდი, რობერტო მანჩინი და სილვიო პიოლა შედიან.
ტურინის “იუვენტუსის” მთავარი მწვრთნელი მასიმილიანო ალეგრი გუნდის კიპერ ჯანლუიჯი ბუფონს გამოექომაგა.
“კი ბატონო, ჯიჯიმ ესპანეთის ნაკრებთან გამართულ მატჩში შეცდომა დაუშვა, მაგრამ მას უზარმაზარი გამოცდილება უმაგრებს ზურგს. საფეხბურთო სფეროში შეძენილი ცოდნა მას ამ სიტუაციის სწორად გარკვევაში დაეხმარება. 20 წლის განმავლობაში უმაღლეს დონეზე თამაში იოლი არ არის. ბუფონის კრიტიკა მკრეხელობაა. ჯიჯი კიპერია, უმეტესწილად ხელით თამაშობს და თანაგუნდელს ბურთი ფეხით კარგად ვერ მიაწოდა. ეს მეკარისთვის კრიმინალი არ არის. ასეთი ფეხბურთელის გაკრიტიკება გონივრულ საქციელად არ მიმაჩნია”, – ალეგრის კომენტარი “კორიერე დელო სპორტმა” გამოაქვეყნა.
ტურინის “იუვენტუსის” ექს-ნახევარმცველმა, 2003 წლის “ოქროს ბურთის” გამარჯვებულმა პაველ ნედვედმა ორი ყოფილი თანაგუნდელი გამოარჩია.
“თუ მხოლოდ ერთი დიდი ფეხბურთელი უნდა დავასახელო, ვისთანაც ერთადაც მითამაშია, მაშინ ზლატან იბრაჰიმოვიჩს ვიტყვი. მას აქვს უდიდესი ძალა, სიმაღლე, ბრწყინვალე ტექნიკა, რის ხარჯზეც დაცვის ხაზის გარღვევა შეუძლია.
თუმცა, როდესაც ზლატანი “იუვენტუსში” გადმოვიდა, გოლებს ვერ იტანდა. ფაბიო კაპელო მას ვარჯიშების შემდეგ 30 წუთით მინდორზე ტოვებდა და დარტყმებში ავარჯიშებდა”, – ციტირებს ნედვედის სიტყვებს ESPN.
პაველ ნედვედმა ჯანლუიჯი ბუფონის შესახებაც ისაუბრა.
“როდესაც ბუფონს ვარჯიშებზე ვუყურებ, მიჩნდება სურვილი, რომ მან 50 წლამდე ითამაშოს. ჯიჯი ყოველთვის პირველი მოდიოდა ვარჯიშებზე, იგი ნამდვილი პროფესიონალია. მან ცოტა ხნის წინ მითხრა, რომ 2018 წლის მსოფლიოს ჩემპიონატის შემდეგ კარიერას დაასრულებს”, – აღნიშნა ნედვედმა.
დღეს 2016 წლის ევროპის ჩემპიონატის მერვედფინალურ ეტაპზე ერთმანეთის წინააღმდეგ იტალიისა და ესპანეთის ნაკრებები ითამაშებენ. “სკუადრა აძურას” კიპერმა ჯანლუიჯი ბუფონმა “ფურია როხას” ფორვარდ ალვარო მორატას შესახებ ისაუბრა. როგორც მოგეხსენებათ, ისინი ბოლო ორი სეზონის განმავლობაში ტურინის “იუვენტუსში” ერთად თამაშობდნენ.
“მორატას შესაძლებლობების შესახებ ჯერ ყველამ ყველაფერი არ იცის. იგი ძალიან ძლიერია, უმაღლესი დონის ფეხბურთელის თვისებები აქვს. მორატა მატჩების უმეტესობაში ამას ადასტურებს, ბევრს იტანს. ალვარო გოლეადორია, თუმცა ესპანეთის ნაკრები მხოლოდ ამ ფეხბურთელით არ შემოიფარგლება. როდესაც მორატას კრიტიკოსები გააქტიურდნენ, მე მას ვუთხარი, რომ კვლავ გახდება ფეხბურთელი, რომელსაც მატჩის ბედის გადაწყვეტა შეუძლია. იგი ჭკვიანი ბიჭია”, – ციტირებს ბუფონის სიტყვებს Lequipe.fr
იტალიასა და ესპანეთს შორის მატჩი დღეს, თბილისის დროით 20:00 საათზე დაიწყება.
