8 თებერვალს, კოკა-კოლას ორგანიზებით, თბილისს მსოფლიო თასი ეწვია. საფეხბურთო სამყაროს ყველაზე მნიშვნელოვანი ჯილდო თბილისის საერთაშორისო აეროპორტში საფრანგეთის ეროვნული ნაკრების ყოფილმა, ფეხბურთელმა და 1998 წლის მსოფლიოს ჩემპიონმა, კრისტიან კარამბემ ჩამოიტანა. თასის დახვედრის საზეიმო ღონისძიებას ორგანიზატორებთან ერთად, საქართველოს ფეხბურთის ფედერაციის ხელმძღვანელები დაესწრნენ.
ტურის მნიშვნელობაზე ისაუბრა ალექსანდრა აკიმანმა, კოკა-კოლას საზოგადოებასთან ურთიერთობის და კომუნიკაციის მენეჯერმა კავკასიისა და ცენტრალური აზიის რეგიონებში: „FIFA-ს მსოფლიო თასის ტური, რომლის ორგანიზატორი კოკა-კოლაა, მილიონობით ადამიანს უნიკალურ შანსს აძლევს მსოფლიოს უდიდესი სპორტული ღონისძიების მონაწილე გახდეს. კოკა-კოლა და FIFA გულშემატკივარებს იწვევს რათა საკუთარი თვალით იხილონ მსოფლიო ჩემპიოტანის თასი. ეს გახლავთ შესაძლებლობა, რომელიც ცხოვრებაში მხოლოდ ერთხელ შეიძლება მიეცეს ადამიანს. ჩვენ კოკა-კოლაში მხარს ვუჭერთ მსოფლიოს მილიონობით ადამიანის გატაცებას ყველაზე პოპულარული სპორტით. მსოფლიო საფეხბურთო ჩემპიონატის მხარდაჭერის გარდა, კოკა-კოლას პარტნიორული ურთიერთობა აკავშირებს ფეხბურთის ფედერაციასთან, რითაც ეხმარება ათასობით მოზარდს.”
საზოგადოებას სიტყვით მიმართა დავით მუჯირმა. მან მადლობა გადაუხადა ორგანიზატორებს საქართველოში სტუმრობისთვის და ფიფას და კოკა-კოლას თასის ტურის ორგანიზებისათვის, რომელიც ქართველ გულშემატკივრებს საშუალებას აძლევს საფეხბურთო სამყაროს ყველაზე მნიშვნელოვანი ჯილდო იხილონ.
თბილისის საერთაშორისო აეროპორტიდან მსოფლიო თასის ტურის ფარგლებში, ჯილდო „თბილისი მოლში“ გადაინაცვლებს და 13:00 საათიდან 18:00 საათამდე ქართველ გულშემატკივარს მისი ხილვა შეეძლება. მსოფლიო თასის ტური 9 თებერვალს თბილისიდან ბაქოში გაგრძელდება. საბოლოოდ კი, თასის მოგზაურობა 30 აპრილს იაპონიის ქალაქ ოსაკაში დასრულდება.
Gff.Ge
