ხვალ 2014 წლის მსოფლიოს ჩემპიონატის საკვალიფიკაციო ეტაპის მორიგი ტურის მატჩები გაიმართება. „დინამო არენაზე“ საქართველოს ნაკრები ფინეთს უმასპინძლებს და ჯგუფის მესამე ადგილზე გადანაცვლებას შეეცდება. მატჩისწინა პრესკონფერენციაზე ფინელთა მთავარმა მწვრთნელმა მიქსუ პაატელაინენმა განაცხადა, რომ მისი გუნდი თბილისში გოლის გატანას შეეცდება.
– რას ფიქრობთ საქართველოს ნაკრებზე?
– საქართველოს ნაკრები ძლიერი გუნდია, მაღალი ხარისხის თამაშით გამოირჩევა. გუნდში საუკეთესო მეკარეა, რომელიც ხვალ ვერ ითამაშებს, თუმცა ვიცით, რომ სარეზერვო კარის დარაჯიც საკმაოდ მაღალი დონის გოლკიპერია. ნაკრებს ძლიერი დაცვა ჰყავს. გამოსარჩევია ნახევარდაცვის დისციპლინა. ნახევარმცველები ინდიციდუალურად კარგად თამაშობენ, დრიბლინგების განვითარებაც შეუძლიათ. ასე რომ, დაცვაში დიდი სიფრთხილით უნდა ვითამაშოთ.
– რა ტაქტიკით ითამაშებთ ხვალ?
– ჩემი ფილოსოფია მარტივია: ფეხბურთში არსებობს დაცვა და თავდასხმა. აქ მხოლოდ დაცვითი თამაშისთვის არ ჩამოვსულვართ. ჩვენ მხოლოდ სატურნირო ცხრილს არ ვუყურებთ. სათამაშოდ ასეთი რთულ ადგილზე დაცვიდან უნდა ვიმოქმედოთ. სასტარტო განაცხადს ვერ გეტყვით. დაცვითი ტაქტიკით ვითამაშებთ, თუმცა გოლი გასატანი გვქავს.
– ტაემუ პუკი გლაზგოს „სელტიკში“ გადავიდა. არის კიდევ ვინმე, რომელსაც ასეთი მაღალი დონის გუნდში თამაში შეუძლია?
– პუკი ახალგაზრდა, ენერგიული, ტექნიკური მოთამაშეა. შოტლანდიის პრემიერლიგა მისთვის საუკეთესოა. დარწმუნებული ვარ, ის კიდევ უფრო გააუმჯობესებს სათამაშო ხარისხს, რაც ჩვენთვისაც კარგი იქნება.
– საქართველოსა და საფრანგეთის ნაკრებებს შორის გამართულ მატჩს თუ უყურეთ. ექსპერტთა გარკვეული ნაწილის აზრით, საქართველოს ნაკრები მაღალი დონის გუნდებთან უფრო კარგად თამაშობს. რამდენად ეთანხმებით ამ აზრს?
– მსგავს გრანდებთან საქართველოს დონის გუნდები დაცვითი ტაქტიკით თამაშობენ. რთულია, ასეთი მაღალი დონის გუნდის წინააღმდეგ დაცვაში შეუცდომლად ითამაშო, თუმცა საქართველოს ნაკრებმა ეს წინა შეხვედრაში მოახერხა. ქართველები ისევ ითამაშებენ კარგი დაცვით, თუმცა უფრო მეტად შემოგვიტევენ.
მატჩი საქართველოსა და ფინეთის ნაკრებებს შორის, ხვალ, „დინამო არენაზე“, 21:00 საათზე დაიწყება. შეხვედრაზე დასასწრები ბილეთების ფასი 5, 10, 15 და 20 ლარია.
ბექა დოგრაშვილი
