5 ოქტომბერს, დანიის სუპერლიგაში მე-11 ტურის მატჩები გაიმართა. “რანდერსმა” საკუთარ მოედანზე “ორჰუსი” მიიღო და ფრედ, 2:2 ითამაშა.
მატჩში ანგარიში მეცხრე წუთზე, სტუმართა მოთამაშემ, პეტრი პასანენმა გახსნა, რასაც მე-13 და 40-ე წუთებზე, მასპინძელი ფეხბურთელის გოლები მოჰყვა. ჯერ ანგარიში ვიქტორ ლუნდბერგმა გაათანაბრა, ხოლო თავისი გუნდი წინ ჯონას ბორინგმა გაიყვანა. შეხვედრის საბოლოო შედეგი 90-ე წუთზე დაფიქსირდა – გოლი ქართველმა თავდამსხმელმა, მათე ვაწაძემ გაიტანა, რომელმაც “ორჰუსს” ქულა მოუპოვა.
აღსანიშნავია, რომ ვაწაძე მოედანზე 59-ე წუთზე გამოჩნდა. “ორჰუსის” სათადარიგოებში იყო კიდევ ერთი ქართველი – დავით სხირტლაძემ 72-ე წუთზე ერთ-ერთი გოლის ავტორი, პეტრი პასანენი შეცვალა. რაც შეეხება დავით დევდარიანს, ის განაცხადში არ ყოფილა.