ჭდე: სოხუმი

თბილისის სპორტის სასახლეში “სოხუმსა” და “შსს-აკადემიას” შორის სუპერლიგის მეოთხედფინალური სერიის მეოთხე მატჩი შედგა, რომელიც “სოხუმის” გამარჯვებით დასრულდა, რაც იმას ნიშნავს, რომ წყვილში გამარჯვებულს მეხუთე მატჩი გამოავლენს.

დღევანდელ ეხვერაში სოხუმელებმა დებიუტშივე აქტიურად დაიწყეს და მცირე უპირატესობაც მოიპოვეს, თუმცა “აკადემია” მეტოქეს მალევე წამოეწია და მეოთხედის მოგება 6 ქულიანი უპირატესობით შეძლო. მეორე პერიოდიც პირველის მსგავსად დაიწყო, მაგრამ ამჯერად უკვე “სოხუმმა” უპირატესობა შეინარჩნა და შესვენებაზე 7 ქულანი ჰანდიკაპით გავიდა – 45:38.

მესამე პერიოდში “სოხუმმა” უპირატესობა 10 ქულამდე გაზარდა და საბოლოოდ შეხვედრა დამაჯერებელ გამარჯვებამდეც მიიყვანა. მართალია, ტუღუშის შეგირდებმა გაიბრძოლეს და სხვაობა 4 ქულამდეც შეამცირეს, თუმცა სოხუმელებმა შორეული ტყორნცებით მეტოქეს შანსი არ დაუტოვეს.

„სოხუმში“ 22 ქულით ბომბარდირი გახდა პელე პეილეი. 20 ქულით და 10 მოხსნით ორმაგი დუბლი მიითვალა გრიგოლ შვანგირაძემ, რომელმაც 9 ცდიდან 6 სამქულიანი ჩააგდო. 18 ქულა დააგროვა ირაკლი ჩლაიძემ, ხოლო ვატო ბააკაშვილმა – 11. „შსს-აკადემიაში“ 17 ქულით და 10 მოხსნით ორმაგი დუბლი გიორგი შარაბიძემ მიითვალა, ბომბარდირი კი 22 ქულით გიორგი ცინცაძე გახდა.

სერიის მე-5, გადამწყვეტი შეხვედრა 11 მაისს, სპორტის სასახლეში, 14:00 საათზე გაიმართება.

სოხუმი 86 – 77 შსს-აკადემი

პრესკონფერენცია: ვაჟა კვარაცხელია, კოტე ტუღუში

შინაგან საქმეთა სამინისტროს აკადემიის გუნდმა მეოთხედფინალის მესამე მატჩი 103:77 მოუგო „სოხუმს“ და სერიაში 2:1 დაწინაურდა.

მატჩის პირველი ნახევარი საკმაოდ თანაბარ და უკომპრომის ბრძოლაში წარიმართა, თუმცა შესვენების შემდეგ კოტე ტუღუშის შეგირდებმა დიდი უპირატესობა მოიპოვეს, რაც გამარჯვების საწინდარიც გახდა.

შსს-მ განსაკუთრებით კარგად მესამე მეოთხედში ითამაშა, რომელიც 38-18 მოიგო, რის შემდეგაც სოხუმელებმა დაშვებული შეცდომების გამოსწორება ვეღარ მოახერხეს.

„შსს-აკადემიაში“ 22 ქულით საუკეთესო იყო გიორგი შარაბიძე, 17 ქულა მიითვალა ბექა წივწივაძემ, ხოლო ნიკა მეტრეველის ანგარიშზე 16 ქულა და 14 მოხსნა დაგროვდა. სოხუმელთაგან 17 ქულით და 15 მოხსნით ორმაგი დუბლი მიითვალა გიორგი ჯგერენაიამ, 16 ქულით დაასრულა მატჩი გრიგოლ შვანგირაძემ.

სერიის მე-4 მატჩი, რომელიც შესაძლოა გადამწყვეტის აღმოჩნდეს, ხვალ, 9 მაისს, სპორტის სასახლეში 14:00 საათზე გაიმართება.

“შსს-აკადემია” – “სოხუმის” შეხვედრის დასრულების შემდეგ კომენტარი გუნდების კალათბურთელებმა, გიროგი შარაბიძემ და გრიგოლ შვანგირაძემ გააკეთეს.

 

გიორგი შარაბიძე: “გუშინდელი მარცხის შემდეგ დასკვნები გამოვიტანეთ და დღეს გამარჯვება მოვიპოვეთ. სოხუმი ძლიერი გუნდია და მომდევნო შეხვედრებში უფრო მეტად დავიხარჯებით დადებით შედეგის მოსაპოვებლად.” 

გრიგოლ შვანგირაძე: “შსს ძლიერი გუნდია. ამიტომ, გადაღლილობის ფონზე და ტრავმირებული მოთამაშეებით მათთან მოგება რთულია. იმედი გვაქვს, მომდევნო შეხვედრაში უკეთესი სურათი იქნება” 

საკალათბურთო სუპერლიგის პლეიოფების მეორე დღის მეორე შეხვედრაში ერთმანეთს პირველი დღის ყველაზე დაძაბული და სანახაობრივი მატჩის მონაწილეები, „შსს-აკადემია“ და „სოხუმი“ შეხვდნენ. შეგახსენებთ, რომ გუშინდელ დაპირისპირებაში სოხუმელებმა გაცილებით გამოცდილ მეტოქეს მატჩის ბოლოს აჯობეს და სერია გამარჯვებით დაიწყეს.

შეხვედრა შსს-მ აქტიურად დაიწყო და დაწინაურება მალევე მოახერხა, რაშიც დიდი როლი გუნდის ლიდერმა, გიორგი ცინცაძემ ითამაშა. თუმცა, ვაჟა კვარაცხელიას საკმაოდ ემოციური წუთშესვენების შემდეგ სოხუმელებმა თამაშში მათი მთავარი იარაღი, შორეული ტყორცნები ჩართეს და მეოთხედის დასრულებამდე სხვაობა 5 ქულამდე შეამცირეს – 28:23. მეორე პერიოდში თამაში კიდევ უფრო მეტად დაიძაბა და სხვაობაც 1 ქულამდე შემცირდა, თუმცა ამის შემდეგ „შსს“ წინ გაიჭრა და საბოლოოდ დიდ შესვენებაზე უკვე 12 ქულით იგებდა.

გარდამტეხი მესამე მეოთხედი აღმოჩნდა, რომელიც მასპინძლებმა 30 ქულიანი სხვაობით დაასრულეს და საბოლოოდ ამ ჰანდიკაპის შენარჩნებაც უპრობლემოდ მოახერხეს. ამრიგად, სერიაში ანგარიში გათანაბრდა და ამ გუნდების შემდეგ მატჩს სპორტის სასახლე 8 მაისს უმასპინძებს.

მატჩის ყველაზე შედეგიანი მოთამაშეები 21 ქულით ცინცაძე და შარაბაიძე გახდნენ, „სოხუმელთა“ მხრიდან კი ყველაზე მეტი, 18 ქულა პელემ მოაგროვა.

 

შსს-აკადემია 105-75 სოხუმი

პრესკონფერენცია – მწვრთნელები ; მოთამაშეები 

სპორკომპლექს არენაში დასრულდა საკალათბურთო სუპერლიგის მეორე წრის მე-5 ტურის მორიგი შეხვედრა, რომელშიც ერთმანეთის წინააღმდეგ “სოხუმი” და “მგზავრები-არმია” წარსდგნენ.

შეხვედრა პირველივე მეოთხედიდან სოხუმელთა უპირატესობით წარიმართა და საბოლოოდ მათი დამაჯერებელი გამარჯვებითაც დასრულდა. ვაჟა კვარაცხელიას გუნდმა ოთხივე პერიოდში აჯობა მეტოქეს და 90-73-ით იმარჯვა.

მატჩის ყველაზე შედეგიანი მოთამაშე სოხუმელთა ლეგიონერი, პელე პეილეი გახდა, რომელმაც საკუთარ გუნდს 22 ქულა შესძინა. ბექა ბექაურმა კი 19 ქულითა და 16 მოხსნით ორმაგი დუბლი შეასრულა. “მგზავრებიდან” 17 ქულით საუკეთესო მერაბ ბოქოლიშვილი გახდა.

სოხუმი 90 – 73 მგზავრები-არმია

მატჩის შემდეგ:

მატჩისშემდგომი პრესკონფერენცია

ბუბა ბერიშვილი(,,მგზავრები-არმიის’’ მთავარი მწვრთნელი): პირველ რიგში, მივულოცავ მოწინააღმდეგეს გამარჯვებას. როგორც თამაშის წინ აღვნიშნე, ,,სოხუმი’’ ფავორიტი იყო. გამოცდილი მოთამაშეებითაა დაკომპლექტებული. ჩვენ რთული დღეები გვქონდა, 3 კვირის განმავლობასი 7-8 კაცი ვვარჯიშობდით ტრავმების გამო. დღეს არ ვიყავით ისეთი მომზადებულები, როგორც საჭირო იყო და შედეგიც სახეზეა.

ვაჟა კვარაცხელია(,,სოხუმის’’ მთავარი მწვრთნელი): მადლობა ბუბას მოლოცვისთვის, ის ჩემი მოსწავლე იყო და ვამაყობ, რომ მთავარი მწვრთნელია, მინდა კიდევ უფრო დიდი წარმატებები ვუსურვო. რაც შეგვეხება ჩვენ, ფინანსური კრიზისი, რომელიც გუნდს ჰქონდა, ჩვენმა სპონროსმა ‘’საქართველოს რკინიგზამ’’ მოგვიგვარა და ბიჭებმა ამოისუნთქეს. გუნდი ნელ-ნელა ლაგდება და მოვემზადებით ‘’ბათუმთან’’ თამაშისთვის. შევეცდებით, კარგი თამაში ვაჩვენოთ.

რეგიონებში საინტერესოდ დაწყებული ტური დღეს თბილისში არანაკლები სიმძაფრით გაგრძელდა. სპორტკომპლექს „არენაში“ გამართული 2 მატჩიდან პირველში ერთმანეთს „შსს-აკადემია“ და „სოხუმი“ შეხვდნენ. მიუხედავად ამ გუნდებს შორის ცხრილში არსებული დაშორებისა, მატჩი ძალიან დაძაბული გამოდგა.

შეხვედრის ბედი ბოლო წამებამდე გაურკვეველი იყო. საფინალო სირენამდე 2,7 წამით ადრე სოხუმელთა ფორვარდი გრიგოლ შვანგირაძე საჯარიმოს ხაზზე დადგა და სამივე საჯარიმო რომ ჩაეგდო, ანგარიშს გაათანაბრებდა. შვანგირაძემ პირველი სროლა ჩააგდო, მეორე ააცილა და ამასთან ერთად „სოხუმის“ შანსიც, ანგარიში გაეთანაბრებინა, დაიკარგა.

რაც შეეხება თამაშის მსვლელობას, პირველიდან ბოლო წუთამდე ანგარიში თითქმის თანაბრად იზრდებოდა. აკადემიელები უმეტესწილად ლიდერობდნენ, მაგრამ საიმედო უპირატესობის მოპოვებას ვერ ახერხებდნენ. ამაში ფავორიტად მიჩნეულ „შსს-აკადემიას“ ხელს სოხუმელთა შეუპოვარი თამაში უშლიდა. გიორგი ჯგერენაია ფარქვეშ და პერიმეტრზეც კარგად თამაშობდა.

საბოლოოდ, ერთიანი ძალისხმევით აკადემიელებმა მოახერხეს გამარჯვების მოპოვება და დაუგეგმავი მარცხი თავიდან აიცილეს. „შსს-აკადემიის“ შეტევებს კარგად ხელმძღვანელობდა გიორგი ცინცაძე, რომელმაც საბოლოოდ 14 შედეგიანი გადაცემა მიითვალა.  14 ქულით ბომბარდირი ნიკა მეტრეველი გახდა, 13 ქულა მიხეილ ბერიშვილმა მოაგროვა, გიორგი შარაბიძის ანგარიშზე კი 11 ქულა დაგროვა. „სოხუმში“ 22 ქულით საუკეთესო ჯგერენაია იყო, 12 ქულა ირაკლი ჩლაიძის ანგარიშზეა, ლიბერიელმა ლეგიონერმა პელე პეილეიმ კი 11 დააგროვა.

მე-10 ტურის დასკვნით მატჩში ერთმანეთს „დინამო“ და „ოლიმპი“ შეხვდებიან.

 

მატჩისშემდგომი პრესკონფერენცია

ვაჟა კვარაცხელია(,,სოხუმის’’ მთავარი მწვრთნელი): ვულოცავ ,,შსს აკადემიას’’ ამ გამარჯვებას. ძალიან ძლიერი გუნდია, ეროვნული ნაკრების 6 მოთამაშე ჰყავთ, კოტეც ნაკრების მწვრთნელია და ისინი ფავორიტებად ითვლებოდნენ. მინდა მადლობა გადავუხადო ჩემს ბიჭებს, მათ ძალიან კარგად ითამაშეს, ეს წაგება ჩემი შეცდომების ბრალია და ჩემს თავზე ვიღებ ამ მარცხს. შევეცდებით, გამოვასწოროთ ხარვეზები და ,,ქუთაისის’’ წინააღმდეგ წარმატებას მივაღწიოთ.

კოტე ტუღუში(,,შსს აკადემიის’’ მთავარი მწვრთნელი): ყველაზე მთავარია, რომ მოვიგეთ. ჩემთვის მოულოდნელი არ ყოფილა ასეთი დაძაბული თამაში, ,,სოხუმი’’ ძალიან მებრძოლი გუნდია, ყველაფერს აკეთებს მოგებისთვის როგორც მთავარი მწვრთნელი, ისე გუნდის თითოეული წევრი. ველოდით დაძაბულ შეხვედრას და ასეც გამოვიდა. ბევრი შეცდომა დავუშვით, ეს ჩვენი ბრალიც იყო და მოწინააღმდეგის კარგი თამაშისაც. კიდევ ერთხელ, მთავარია, რომ მოვიგეთ. თითოეულ თამაშს დიდი მნიშვნელობა აქვს და ბედნიერი ვარ, რომ გავიმარჯვეთ. მართალია ,,სოხუმი’’ სატურნირო ცხრილის ბოლოშია, თუმცა დარწმუნებული ვარ, ყველა თამაშს მაღალ დონეზე ჩაატარებენ და მოსაგებად გამოვლენ მოედანზე. საინტერესო მეორე წრე გველის და წარმატებებს ვუსურვებ ,,სოხუმს’’. მინდა აღვნიშნო გიორგი ჯგერენაიას ძალიან კარგი თამაში, ის წლების განმავლობაში ჩემთან თამაშობდა და მიხარია მისი წარმატებები.

ნიკა მეტრეველი(,,შსს აკადემია’’): ვიცოდით, რომ რთული მატჩი იქნებოდა, ,,სოხუმი’’ არც ერთ თამაშზე არ ნებდება, ყოველთვის ბოლომდე იბრძვის და ვცდილობდით, მობილიზებულები ვყოფილიყავით. გვქონდა შეცდომები, შეგვეძლო უკეთ გვეთამაშა, თუმცა ,,სოხუმი’’ ახალი მოთამაშეებით გაძლიერდა და საკმაოდ ბრძოლისუნარიანი გუნდია. ბოლო წუთებამდე იბრძოლეს და ძლიერი მატჩი ჩაატარეს.

superleauge.ge