კვირას, 7 დეკემბერს, საფეხბურთო კლუბი ”ზესტაფონი” საქართველოს XXVI ეროვნული ჩემპიონატის პირველი წრის დასკვნით მატჩს გამართავს. ზუგდიდის “ბაიას” ბაზაზე გასამართ ეროვნული პირველობის მეთხუთმეტე ტურის შეხვედრაში იმერლები საფეხბურთო კლუბ “ზუგდიდს” ესტუმრებიან.
ეროვნულ ასპარეზზე მარგველთა და ზუგდიდელთა “გაცნობა” 2005 წლის 23 აგვისტოს მოხდა – ეროვნული თასის გათამაშების პირველ მეთექვსმეტედფინალურ შეხვედრაში, რომელსაც ზესტაფონის ცენტრალურმა სტადიონმა უმასპინძლა, მასპინძლებმა ანგარიშით 3-0 მოუგეს საფეხბურთო კლუბ “ზუგდიდს”. საპასუხო შეხვედრა იმავე წლის 13 სექტემბერს სენაკში გაიმართა და იმერლებმა კიდევ უფრო დიდი სხვაობით დაამარცხეს მეტოქე – 4-0. “ზუგდიდური ბარიერის” გადალახვა ზესტაფონელებს მათთვის ყველაზე დიდი წარმატების მომტან 2007-2008 წლის სათასო გათამაშებაშიც მოუხდათ – 2007 წლის 2 ოქტომბერს გამართულ ჯგუფური ეტაპის მეორე ტურის შეხვედრაში ზესტაფონელებმა მეტოქე 6-3 დაამარცხეს, ხოლო 5 ნოემბერს ზუგდიდს მეორე გუნდით ესტუმრნენ და მატჩი 0-2 დათმეს.
ეროვნულ ჩემპიონატში გამართული პირველი ზესტაფონურ-ზუგდიდური დაპირისპირება 2007 წლის 25 აგვისტოს იმერეთში გაიმართა – მატჩის მიწურულს ზურაბ იონანიძის მიერ შესრულებული “დუბლით” მასპინძლებმა 2-0 იმარჯვეს, ხოლო გულია თუთბერიძის სახელობის სტადინზე გამართული XIX ჩემპიონატის საპასუხო შეხვედრა ფრედ 0-0 დასრულდა.
XX და XXI ეროვნულ ჩემპიონატებში გამართულ შეხვედრებში მხოლოდ ზესტაფონელები იმარჯვებდნენ – 2008-2009 წლის საფეხბურთო სეზონში იმერლებმა ზუგდიდის “მგლები” ორჯერ შინ (1-0 და 3-1) და ერთხელაც სტუმრად (1-0) დაამარცხეს, ხოლო მომდევნო წელს უკვე “ბაიასთან” მატჩებში ზედიზედ 4 გამარჯვებას მოუყარეს თავი – ორჯერ შინ (2-1 და 4-0) და ამდენჯერვე სტუმრად (1-0 და 1-0).
XXII ეროვნულ ჩემპიონატში გამართული პირველივე ზუგდიდურ-ზესტაფონური დუელი აღსანიშნავია იმით, რომ სამეგრელოს წარმომადგენელმა (კერძოდ, “ბაიამ”) პირველად და დღემდე უკანასკნელად მოახერხა საფეხბურთო კლუბ “ზესტაფონის” ძლევა, ის მატჩი 2-1 დასრულდა. ამის შემდეგ, პირველი საჩემპიონო ტიტულის მოსაპოვებლად მომართულმა იმერლებმა ზედიზედ 3 მარცხი აგემეს ოპონენტს – ორჯერ შინ (6-1 და 3-0) და ერთხელ სტუმრად (3-1).
უდავო იყო “ზესტაფონის” უპირატესობა მეორე საჩემპიონო ტიტულის მოპოვებისას – მარგველებმა მოიგეს ზესტაფონში შემდგარი ორივე შეხვედრა (1-0 და 4-1), ხოლო ზუგდიდში გამართული ორი მატჩიდან ერთი მოიგეს ანგარიშით 2-1, ხოლო მეორე დასრულდა ფრედ ანგარიშით 1-1.
XXIV ეროვნულ ჩემპიონატშიც მეტოქეებმა ოთხი მატჩი გამართეს – 2012 წლის 20 ოქტომბერს “დავით აბაშიძეზე” გამართულ შეხვედრაში ზესტაფონელებმა მინიმალური ანგარიშით იმარჯვეს (1-0), ხოლო 19 დეკემბერს განმუხურში ზუგდიდელებს უფრო დამაჯერებლად (3-0) სძლიეს, 2013 წლის 6 აპრილს განმუხურში დაფიქსირდა ფრე (0-0), ხოლო ზესტაფონში 12 მაისს გამართულ შეხვედრაში გამარჯვება (2-0) იმერლებმა იზეიმეს.
განვლილი სეზონის პირველი წრის მატჩი გასული წლის 6 ოქტომბერს განმუხურში გაიმართა და ზესტაფონელთა გამარჯვებით (3-0) დასრულდა. გამარჯვებულთა რიგებში გატანილი გოლებით თავი ლევან შარიქაძემ და საბა ლომიამ (ორჯერ) გამოიჩინეს. მიმდინარე წლის 26 თებერვალს XXIV ეროვნულ ჩემპიონატის მეორე წრის შეხვედრა ზესტაფონში გაიმართა – ნიკა საბანაძის “ჰეთ-თრიკის” წყალობით იმერლებმა ისევ დიდი ანგარიშით 3-0 გაიმარჯვეს.
სულ, საფეხბურთო კლუბმა “ზესტაფონმა” და ზუგდიდელებმა ეროვნული ჩემპიონატის ფარგლებში 23 შეხვედრა გამართეს. ამ მატჩებში 19-ჯერ გაიმარჯვეს იმერლებმა, 3 დასრულდა ფრედ, 1 კი მოიგეს სამეგრელოს წარმომადგენლებმა. არაა გასაკვირი არც გატანილი და გაშვებული ბურთების ბალანსში მარგველთა დიდი უპირატესობა – 48-9.
ზესტაფონელთა რიგებში ზუგდიდელთა კარი ყველაზე ხშირად ნიკოლოზ გელაშვილს დაულაშქრავს, რომლის ანგარიშზე 7 გატანილი გოლია. სამეგრელოს წარმომადგენელთა კარში გატანილი 5 გოლის ავტორი გახლავთ თორნიკე გოგრგიაშვილი, ხოლო ზურაბ იონანიძეს, შოთა გრიგალაშვილსა და ჯაბა დვალს ოპონენტი 4-4-ჯერ დაუმწუხრებიათ.
საფეხბურთო კლუბ “ზუგდიდთან” კვირას გასამართი შეხვედრა, რომელსაც ფიფას არბიტრი ლაშა სილაგავა მოემსახურება, ქალაქ ზუგდიდის საფეხბურთო კლუბ “ბაიას” ბაზის ხელოვნურსაფარიან მოედანზე გაიმართება და 14:00 საათზე დაიწყება.
FCZestafoni.GE
