თიბისი რაგბის სერიები 2017 – წინასამატჩო პრესკონფერენცია
25 ნოემბერს ბორჯღალოსნებსა და ‘არწივებს’ შორის გასამართი მატჩის წინ, გუნდებმა ‘მიხეილ მესხის’ სტადიონზე კაპიტნის ვარჯიში და ტრადიციული პრესკონფერენცია გამართეს.
მილთონ ჰეიგს პირველი კითხვა შემადგენლობაში განხორციელებულ ცვლილებებზე დაუსვეს:
„დატვირთული და რთული ორი კვირა გვქონდა. კანადასა და უელსთან მატჩს თან ახლდა მგზავრობა. ახალი ბიჭები ჩვენს თამაშში დამატებით ენერგიას შემოიტანენ. ცვლილებები გუნდის დასუსტებას არ ნიშნავს, რადგან ყველა მათგანს ზურგს დიდი გამოცდილება უმაგრებს. ჩვენთვის მნიშვნელობა არა აქვს ვის ვეთამაშებით: ‘ოლ ბლექსს’, აშშ-ს თუ ესპანეთს – ყოველთვის ვარჩევთ იმ მომენტისთვის საუკეთესო შემადგენლობას.
აშშ ფიზიკურად ძლიერი გუნდია და მძლავრი ფორვარდები ყავს. მიუხედავად ამისა, ვგეგმავთ, რომ ამ კომპონენტში თამაში ჩვენი კარნახით წარვმართოთ და თადარიგში მორკინალების სიმრავლე ამითაა გამოწვეული“.
მეტოქის დახასიათებისას ახალ ზელანდიელმა სპეციალისტმა რამდენიმე მოთამაშე გამოყო:
„აშშ-ს ძალიან კარგი მეორე-მესამე ხაზის მოთამაშეები ყავს. აღსანიშნავია სამუ მანოა, რომელიც ‘ტულონში’ ჩვენი მამუკა გორგოძისა და ლევან ჩილაჩავას მხარდამხარ თამაშობს. მას ბურთი ძალიან კარგად მოაქვს. ამ გუნდის მთავარი კოზირი სწრაფი თამაში, ბურთის გაშლა და ძლიერი გარემარბებია. ჩვენ მეტოქეს შესაბამისი ტაქტიკა უნდა დავუპირისპიროთ“.
ჰეიგმა გიორგი ჩხაიძეზე და ბორჯღალოსან ცენტურიონებზეც ისაუბრა:
„განსაკუთრებული მიღწევაა, რადგან უკანასკნელ 12 თვეში მესამე ცენტურიონი გვეყოლება. ჩხაიძე შეუერთდება იმ მოთამაშეთა ჯგუფს, რომლებსაც 100 და მეტი საერთაშორისო შეხვედრა აქვთ ჩატარებული. ასეთი მოთამაშეები მსოფლიოში მრავლად არ არიან“.
გუნდის კაპიტანმა მერაბ შარიქაძემ ჩხაიძის ცენტურიონობასთან დაკავშირებით თქვა – „ვეცდებით, რომ მას ცენტურიონობა კარგი თამაშით და გამარჯვებით დავამახსოვროთ“, – ხოლო მომავალი თამაშის მოლოდინზე აღნიშნა:
„ახლა ჩვენზე განსაკუთრებული ზეწოლაა. უელსთან თამაშის შემდეგ, საქართველოშიც და მთელს მსოფლიოშიც ძალიან დიდი მოლოდინია. ყველას აინტერესებს, უელსთან ასეთი თამაში გამოგვივიდა, თუ რეალურად გავიზარდეთ. ჩვენ ხვალ უნდა განვამტკიცოთ ის, რასაც განვლილი ორი თამაშით მივაღწიეთ და მაქსიმალურად მობილიზებულები ვართ“.
შარიქაძეს ახალ მეწყვილეზე, გიორგი კვესელაძეზეც კითხეს:
„კვესელაძე ძალიან კარგი ბიჭია. კანადასთან ერთად რამდენიმე წუთი ვითამაშეთ, ეს კვირა ნაყოფიერად ვივარჯიშეთ და მაქვს იმედი, რომ ის შიდა მხარეს გამიმაგრებს“.
‘არწივების’ მთავარმა მწვრთნელმა დეივ ჰიუიტმა ქართული რაგბის პროგრესზე ისაუბრა და ხვალინდელ შეხვედრაში ბოლომდე ბრძოლას დაგვპირდა:
„ივნისის შემდეგ ჩვენი გუნდი დიდად არ შეცვლილა, თუმცა დაგვიბრუნდა რამდენიმე ისეთი მოთამაშე, რომლებსაც ბოლო 18 თვე არ უთამაშიათ. ამ პერიოდში თავის გამოჩენის შანსი სხვებს მივეცით, ახლა კი, უფრო ძლიერი შემადგენლობა გვყავს.
საქართველო და ქართული რაგბი ბოლო 3 წლის განმავლობაში განსაკუთრებული ტემპით ვითარდება. ვიცით, რომ თქვენ 6 ერში მონაწილეობა გსურთ და ამ პროგრესით შანსს ნამდვილად იმსახურებთ. მილთონ ჰეიგმა და სამწვრთნელო შტაბმა შესანიშნავი სამუშაო გაწია, კიდევ უფრო გააუმჯობესა თქვენი შერკინების და ზოგადად გუნდის თამაში.
თუ საქართველო სათანადოდ არ დააფასე, კარგი დღე არ დაგადგება და ჩვენც მაქსიმალურად მობილიზებულები ვართ. მეტოქეს სრული პატივისცემით ვეპყრობით, თუმცა რაგბი ამერიკაშიც ვითარდება, ჩვენც წინ მივდივართ და დანებებას არ ვაპირებთ. ვეცდებით გამოვიყენოთ ჩვენი კოზირები – სისწრაფე, ბურთის გაშლა, შერკინებაშიც სათანადო წინააღმდეგობა გავწიოთ და სასურველ შედეგს მივაღწიოთ“.
ფიზიკურად რთული მატჩის მოლოდინშია გუნდის კაპიტანი ბლეინ სქალი: „ფიზიკურად რთული მატჩი გველის. თქვენ განსაკუთრებით ძლიერი ფორვარდები გყავთ. კარგად ვნახეთ რა დონემდე მიიყვანეთ გასულ კვირაში უელსი, უფრო ადრე კი კანადა. ვცდილობთ, რომ მეტოქის ძალის გათვალისწინებით, ჩვენი თამაში გავაუმჯობესოთ და ხვალ შესაძლებლობების მაქსიმუმი ვაჩვენოთ“.
Rugby.Ge
