ზაზა ფაჩულია: “ამ ზაფხულს დიდი მიზნები მაქვს”

ზაზა ფაჩულია ეროვნულ ნაკრებს შეუერთდა. „გოლდენ სტეიტ უორიორზის“ ცენტრი, რომელიც ჩვენი ეროვნული გუნდის ლიდერი და უცვლლი კაპიტანია, შეთანხმებისამებრ, მოსკოვიდან თბილისში დაბრუნებულ ნაკრებს შეუერთდა და დღეს ილიას ზუროსის ხელმძღვანელობით პირველი ვარჯიში გამართა.

ზაზა ფაჩულიას კომენტარებს წერილის ბოლოს შემოგთავაზებთ, მანამდე კი გეტყვით, რომ ეროვნულ ნაკრებს დღეს საკმაოდ დატვირთული გრაფიკი ჰქონდა. მოსკოვიდან 8 აგვისტოს, გამთენიისას ჩამოსვლის შემდეგ, ნაკრების წევრებმა გუშინ და დღეს, საღამომდე დაისვენეს და 18:00 საათიდან ვარჯიშს შეუდგნენ. მოთამაშეები ფიტნეს-კლუბ „სნეპ-ჯორჯიას“ ერთ-ერთ, ვაკეში მდებარე ფილიალში შეიკრიბნენ და ტრენაჟორებზე ივარჯიშეს. „სნეპ-ჯორჯიაში“ ნაკრების წევრებს ყველანაირი პირობა ჰქონდათ, ფიტნესის კუთხით ევარჯიშათ.

სწორედ ფიტნეს-დარბაზში შეუერთდა ეროვნულ ნაკრებს ზაზა ფაჩულია, რომელმაც გუნდთან ერთად დაახლოებით ერთ საათს ივარჯიშა და შემდეგ ნაკრების ავტობუსით სპორტის სასახლეს მიაშურა. ილიას ზუროსმა სპორტის სასახლეში ბიჭები დაახლოებით 2 საათის განმავლობაში, ძირითადად სათამაშო კომპონენტებზე ავარჯიშა. ორმხივი კალათბურთი და კომბინაციების გათამაშება – ეს იყო საღამოს ვარჯიშის ძირითადი ლაიტმოტივი.

ხვალ, 10 აგვისტოს ნაკრები ორჯერ ივარჯიშებს. საღამოს ვარჯიშის დასკვნითი ნაწილი ჟურნალისტებისთვის ღია იქნება.

ახლა კი გთავაზობთ ნაკრების კაპიტნის, ზაზა ფაჩულიას კომენტარს…

– საკმაოდ გრძელი ზაფხული იყო, რომლის განმავლობაშიც ვემზადებოდი ინდივიდუალურად და ვემზადებოდი სწორედ ამ მომენტისთვის, რომ შევერთებოდი ეროვნულ ნაკრებს.  კარგია, რომ ნაკრებს შევუერთდი, ინდივიდუალური კალათბურთიდან რომ გუნდურზე გადავინაცვლე.  ამ ზაფხულში დიდი მიზნები გვაქვს როგორც მე პირადად, ისე კოლექტიურად, ეროვნულ ნაკრებს. ძალიან მნიშვნელოვანი ზაფხულია. არ იქნება ადვილი, თუმცა ასე შრომით და თავდადებით უნდა მივაღწიოთ იმ მიზანს, რასაც ჰქვია ევროპის ჩემპიონატზე ზედიზედ მეოთხედ გასვლა.

– თითოეული დღე უნდა გამოიყენო იმისთვის, რომ წინ წაიწიო. ეს იქნება როგორც ერთჯერადი, ისე ორჯერადი ვარჯიშები თუ დასვენება. ყველაფერი იმაზე უნდა იყოს აწყობილი და იმას უნდა ემსახურებოდეს, რომ გუნდი ოპტიმალურად მომზადებული შეხვდეს გადამწყვეტ მატჩებს. რაც მთავარი, ტრავმები არაა და იმის იმედიც მაქვს, რომ მანუჩარ მარკოიშვილიც შემოგვიერთდება. არ გვაქვს იმის ფუფუნება, რომ ერთი მოთამაშეც კი დავგარგოთ. იმედი მაქვს, ტრავმების გარეშე ჩაივლის მოსამზადებელი პერიოდი და მაქსიმალურად, ყველა გვეყოლება, რადგან ეს კოლექტიური, გუნდური თამაშია და ესეთი დატვირთვით როცა ვარჯიშობ და თამაშობ, ყველა მოთამაშე საჭიროა.

– მოსამზადებელ პერიოდში ჩატარებული 3 მატჩის შემდეგ სახლში ვითამაშებთ. სამშობლოში როცა თამაშობ, თუნდაც ამხანაგური მატჩი იყოს, მაინც განსაუთრებული გრძობაა. ეხლა მომზადების შუა პერიოდში ვართ. კარგი შანსია, რომ გუნდმა კიდევ ერთი ნაბიჯი გადადგას წინ, მით უმეტეს, რომ ახლა უკვე მეც შემოვუერთდი ნაკრებს. ჩემთვის პირადად ძალიან მნიშვნელოვანია, რომ რაც შეიძლება მალე შევიდე გუნდურ სიტუაციაში. ბევრი ახალი რამ დამხვდა როგორც დაცვაში, ისე შეტევაში. ახალი მწვრთნელი გვყავს და არაერთი მისი ასისტენტი. ამიტომ, ძალიან მნიშვნელოვანია, რომ ყველა ერთნაირად ფიქრობდეს, ყველა შევთამაშდეთ და შევეწყოთ ამ ახალ სისტემას. მიზანი 31 აგვისტოა, მთავარია, გუნდი ამ დღისთვის იყოს მზად და ყველა თამაში, რომელიც მანამდე გაიმართება, ოფიციალური მატჩებისთვის მოსამზადებლად მაქსიმალურად გამოვიყენოთ.

საქართველოს კალათბურთის ფედერაცია