გადაწყვეტილია და დადასტურებულია, რომ ხვიჩა კვარაცხელია ბათუმის “დინამოს” ჩემპიონთა ლიგის საკვალიფიკაციო ეტაპზე ვერ დაეხმარება და “ნაპოლის” ივლისის დასაწყისში შეუერთდება.
“დინამოს” განსაკუთრებით დიდი ძალა დააკლდება და გია გეგუჩაძეს ეროვნული ლიგის მომდევნო 4 მატჩში მისი შემცვლელის ძებნა მოუწევს.
არსებული შემადგენლობიდან 2 გამოკვეთილი ვარიანტია: ჯაბა ჯიღაური და ჯოვინო ფლამარიონი. თუ ფლამარიონი მარჯვენა ფლანგზე დადგება, მაშინ ცენტრალურ თავდამსხმელი ფანცულაია ან ლობჯანიძე იქნება.
არის კიდევ ერთი ნაკლებად მოსალოდნელი ვარიანტი. ბათუმის “დინამოს” ფანები გიორგი ჩაკვეტაძის დამატებას ითხოვენ. ჩაკვე სათანადო ფორმაში არ იმყოფება, მაგრამ ტრავმა არ აქვს, მზად არის და ვილი სანიოლის განცხადებით, ბოლო 2 კვირაში სწორ გზას ადგას.
რეალურად, ერთადერთი, ვისაც ხვიჩას შეცვლა სრულად შეუძლია, ფორმაში მყოფი გიორგია, რომელსაც დღეს კონკრეტული შეთავაზება არ აქვს და “გენტში” დაბრუნებაც არ სურს.
ჯერჯერობით, გულშემატკივრის მოთხოვნაზე “დინამოს” ხელმძღვანელობას კომენტარი არ გაუკეთებია.
