საქართველოს ეროვნული ნაკრების ყოფილი ფეხბურთელი ლევან კობიაშვილი სტიქიისგან დაზარალებულთა დასახმარებლად ათი ათასს ლარს გამოყოფს.
კობიაშვილი სოციალური ქსელის მეშვეობით სპეციალურ განცხადებას ავრცელებს:
“ლევან კობიაშვილის საერთაშორისო ფონდი “კობი და მეგობრები” ღრმა მწუხარებას გამოთქვამს და უსამძიმრებს 13 ივნისს თბილისში მომხდარი სტიქიური უბედურების დროს დაღუპულთა ოჯახებს. გვსურს, ჩვენი მოქალაქეობრივი წვლილი შევიტანოთ და დაზარალებულთა დასახმარებლად გადავრიცხოთ 10 000 ლარი”.
საქართველოს ეროვნული ნაკრების ყოფილმა ფეხბურთელმა, ლევან კობიაშვილმა 30 აპრილს, საქართველოს შეიარაღებული ძალების დღე ქართველ ჯარისკაცებსა და საქართველოს მოქალაქეებს ფეისბუქის მეშვეობით მიულოცა და გერმანიაში მყოფი ქართველი ჯარისკაცები მოინახულა.
დღეს ქართული შეიარაღებული ძალების დაარსების დღეა. მსურს, თითოეულ ჯარისკაცს და საქართველოს მოქალაქეს გულითადად მივულოცო ეს განსაკუთრებული დღე. ჩვენი გმირები საკუთარი სიცოცხლის ფასად დგანან სამშობლოს და ჩვენი უსაფრთხოების სადარაჯოზე. ვისაც როგორ შეგვიძლია ვალდებული ვართ გამოვხატოთ ჩვენი თანადგომა და ვაგრძნობინოთ რომ ვაფასებთ მათ ღვაწლს.
გუშინ საფეხბურთო კლუბი ჰერტას სხვა წარმომადგენლებთან ერთად პატივი მქონდა ასეულობით ასეთი ვაჟკაცი მომენახულებინა და 16 მაისს ბერლინში, ბუნდესლიგის თამაშზე, ჰერტა ფრანქფურტის წინააღმდეგ, ოლიმპიურ სტადიონზე მომეწვია. მინდა მადლობა გადავუხადო მათ ასეთი გულითადი დახვედრისათვის!
ქვეითი ბრიგადის 32-ე ბატალიონი გადასროლის წინა წვრთნებს გადის გერმანიაში, რის შემდეგადაც ისინი ავღანეთში გაემგზავრებიან.
ამ რთული მისიის წარმატებით ჩატარებას და სამშობლოში მშვიდობიანად დაბრუნებას ვუსურვებ მათ!
ბერლინში გამართულ ვეტერანთა საერთაშორისო ტურნირზე გამარჯვება ადგილობრივმა “ჰერტამ” მოიპოვა, რომლის რიგებში ლევან კობიაშვილმაც ითამაშა.
ქართველი ტურნირის ერთ-ერთი საუკეთესო მოთამაშე გახდა და თავისი გუნდის გამარჯვებაში საკუთარი წვლილიც შეიტანა.
კობიაშვილმა ოთხიდან სამ შეხვედრაში შეძლო გოლების გატანა. პრაღის “სპარტასთან” ფინალურ შეხვედრაში, რომელიც ბერლინელებმა 10:5 მოიგეს, კობიმ ორჯერ დალაშქრა მეტოქის კარი.
საქართველოს ეროვნული ნაკრების ყოფილმა ნახევარმცველმა ლევან კობიაშვილმა დღეს გადაცემა „არენას“ ეთერში განაცხადა, რომ საქართველოს ფეხბურთის ფედერაციის პრეზიდენტის არჩევნებში მონაწილეობის მიღებას გეგმავს.
„იქ, სადაც ვარ, თავს კარგად ვგრძნობ, თუმცა ჩემთვის ქართული ფეხბურთი უფრო პრიორიტეტულია. აუცილებლად დავბრუნდები საქართველოში და მივიღებ მონაწილეობას არჩევნებში“, – განაცხადა კობიაშვილმა.
სრული ინტერვიუ იხილეთ საზოგადოებრივი მაუწყებლის გადაცემის ვიდეოში:
საქართველოს ეროვნლი ნაკრების ყოფილმა ფეხბურთელმა ლევან კობიაშვილი თემურ ქეცბიას ბოლო განცახდებებს ერთ-ერთი სოციალური ქსელის მეშვეობით გამოეხმაურა.
“საქართველოს ეროვნული ნაკრების მთავარი მწვრთნელი რომ იტყვის ქართული ფეხბურთი მოკვდაო, ქართულ ფეხბურთს გაპარტახებულს უწოდებს, თავის ქვეყანას და ქართველ ხალხს ეუბნება აქ სად ჩამომიყვანეთო,იმ წამსვე უნდა დატოვოს ნაკრები და წავიდეს.სხვა შემთხვევაში ფეხბურთის ფედერაცის ხელმძღვანელობამ უნდა მიიღოს გადაწყვეტილება და გაათავისუფლოს. თუ ასე არ მოიქცევა ფეხბურთის ფედერაცის ხელმძღვანელობა, ესეიგი ისინიც იზიარებენ ნაკრების მთავარი მწვრთნელის მოსაზრებას.” – წერს კობიაშვილი.
ბერლინის “ჰერტამ” შაბათს ლევან კობიაშვილი ღირსეულად გააცილა. ქართველ ფეხბურთელს გერმანიაში მართლაც შესანიშნავი კარიერა ჰქონდა, რაც ადგილობრივებმა დაუფასეს კიდეც.
თუმცა, კობიაშვილს საქართველოსთვისაც ბევრი უშრომია და მისი გამოსამშვიდობებელი მატჩის ჩატარების მოთხოვნით გულშემატკივრებმა 10 მაისიდან ხელმოწერების შეგორვება დაიწყეს.
სამწუხაროდ, ამ ეტაპზე აქტივობა დიდი არ არის, თუმცა იმედი გვაქვს, რომ წლების მანძილზე, საქართველოს ნაკრების ერთ-ერთ ლიდერს ქართველებიც დავაფასებთ.
საქართველოს ეროვნული ნაკრების ფეხბურთელის, რუსთავის ოლიმპის, დინამო თბილისის, ფრაიბურგის, შალკესა და ბერლინის ჰერტას მარცხენაფლანგელის – ლევან კობიაშვილი ქართველმა გულშემატკივარმა სათანადოდ უნდა დააფასოს და გააცილოს საფეხბურთო მოედნიდან. ფეხბურთელი, რომელმაც დამოუკიდებელი ქართული ფეხბურთის ისტორიაში რამდენიმე მნიშვნელოვანი გოლი გაიტანა, ევროპის ჩემპიონთა ლიგაზე შესრულებული ჰეთთრიქი ჰოლანდიური პსვ ეინდჰოვენის კარში, უდიდესი სიხარულის მომტანო გოლი საქართველო 1:0 ხორვატია. გოლი ოლივერ კანის კარში და კიდევ მრავალი… ლევან კობიაშვილი გერმანიაში დააფასეს. სათანადოდ გააცილეს საფეხბურთო კარიერიდან და იგი იმსახურებს ქართველი ხალხისგან სათანადო გულთბილ და ემოციურ გაცილებას. გავუზიაროთ თითოეულ ჩვენს მეგობარსა და ნაცნობს აღნიშნული პეტიცია. ერთად გადავუხადოთ მადლობა ლევან კობიაშვილს
თქვენი ხელმოწერის დასაფიქსირებლად გადადით ბმულზე
ქართველმა ნახევარმცველმა ლევან კობიაშვილმა, რომელმაც შაბათს მოთამაშის კარიერა დაასრულა, თანადგომისთვის გულშემატკივრებს, თანაგუნდელებს და სხვებს მადლობა გადაუხადა.
„დიდი მადლობა მინდა გადაგიხადოთ გამოხატული სიყვარულისა და გულშემატკივრობისათვის. მთელი კარიერის მანძილზე ვგრძნობდი თქვენს თანადგომას, რაც ჩემთვის დიდ სტიმულს წარმოადგენდა და მეხმარებოდა სირთულეების დაძლევაში“, – დაწერა კობიმ თავისი ფეისბუქის გვერდზე.
“ჰამბურგი” ბრძოლა გადარჩენისთვის, “ვოლფსბურგის” საჩემპიონთალიგო იმედები და ლევან კობიაშვილი ბოლო მატჩში ბუნდესლიგის უკანასკნელ ტურში.
ვის შეხვდება გროიტერ ფიურტი?
ბუნდესლიგის სამივე აუტსაიდერს საქმე ნამდვილად ცუდად აქვთ. სამიდან ორი ქვეყნის მთავარი დივიზიონს აუცილებლად დაემშვიდობება, მესამე გუნდი კი პლეი-აუტის მატჩს ითამაშებს მეორე ბუნდესლიგის წარმომადგენელ “გროიტერ ფირტთან”.
შანსის მომცემ მე-16 პოზიციისთვის “ჰამბურგი”, “ნიურნბერგი” და “ბრაუნშვაიგი” იბრძვიან.
უკანასკნელ ტურში ყველაზე რთული მეტოქე ჰამბურგელებს ყავთ. სლომკას გუნდი “მაინცს” ესტუმრება, რომელიც “აუგსბურგთან” ევროპა ლიგის საგზურისთვის იბრძვის და აღნიშნულ მატჩში გამარჯვება ძალიან სჭირდება. ჰამბურგში პიერ-მიშელ ლასოგას იმედი აქვთ. ფორვარდი 28-ე ტურის შემდეგ არ გამოსულა მოედანზე. მისი არყოფნის პერიოდში გუნდმა მხოლოდ სამი ქულა მოიპოვა.
ჩრდილოელებს საკუთარი კონკურენტების იმედი უფრო უნდა ჰქონდეთ. “ნიურნბერგი” 34-ე ტურში გელზენკირხენში დისკვალიფიკაციების გამო შესუსტებული შემადგენლობით მიემგზავრება. იოსიპ დრმიჩი კი, თავის უკანასკნელ მატჩს ატარებს გუნდში. მომავალი სეზონიდან ფეხბურთელი “ბაიერის” ღირსებას დაიცავს.
მესამე აუტსაიდერი “ბრაუნშვაიგი” სტუმრად ცხრილის შუა ნაწილში უმოტივაციოდ დარჩენილ “ჰოფენჰაიმს” შეხვდება.
ჩემპიონთა ლიგის შესახებ
რომ არა 32-ე ტურში “ფრაიბურგთან” ფრედ დასრულებული შეხვედრა, “ვოლფსბურგი” მეოთხე პოზიციაზე იქნებოდა და ჩემპიონთა ლიგის საგზურისთვის ბრძოლაში ფავორიტის სტატუსით შეხვდებოდა უკანასკნელ ტურს, რომელშიც “მგლები” კიდევ ერთ კონკურენტს, გლადბახის “ბორუსიას” მიიღებენ საკუთარ მეოდანზე. თეორიულად ფავრის გუნდსაც აქვს მეოთხე პოზიციის დაკავების საშუალება. “ვოლფსბურგის” ძლევის და ლევერკუზენელების “ვერდერთან” მარცხის შემთხვევაში, ჩემპიონთა ლიგაში მომავალ წერს სწორედ მიონხენგლადბახელები იასპარეზებენ.
თუმცა, ამის ალბათობა დიდი არ არის. საშა ლევანდოვსკის მოსვლის შემდეგ “ბაიერი” საკმაოდ დამაჯერებლად გამოიყურება და არც ბოლო ტურში აპირებს ქულების დაკარგვას.
კობიაშვილის ბოლო მატჩში
ჩვენთვის განსაკუთრებით საინტერესო ბერლინში გასამართი შეხვედრა იქნება, სადაც ადგილობრივი “ჰერტა” დორტმუნდის “ბორუსიას” მიიღებს.
სატურნირო თვალსაზრისით ამ მატჩს არანაირი მნიშვნელობა არ აქვს, თუმცა სწორედ ამ შეხვედრაში ფეხბურთს საქართველოს ერთ-ერთი ყველაზე წარმატებული სპორტსმენი, ლევან კობიაშვილი დაემშვიდობება.
კობიაშვილმა გერმანელ და ქართველ გულშემატკივარს უამრავი ლამაზი და დასამსახოვრებელი მომენტი აჩუქა. უკანასკნელი 5 სეზონი კობიმ სწორედ ბერლინურ კლუბში გაატარა და ორჯერ დაემხარა გუნდს ბუნდესლიგაში დაბრუნებაში.
10/05/14
10 მაისს ლევან კობიაშვილი მრავალწლიანი საფეხბურთო კარიერის უკანასკნელ მატჩს ჩაატარებს. ლევანს გერმანიაში დავუკავშირდით და რამდენიმე საინტერესო საკითხზე გავესაუბრეთ.
– კარიერის უკანასკნელი მატჩის ჩატარებამდე ერთ კვირაზე ოდნავ მეტია დარჩენილი. რას გრძნობთ?
– სიმართლე გითხრათ, ბოლომდე არ მაქვს გათვიცნობიერებული. წლების მანძილზე ჩემი ცხოვრება ყოველდღიური ვარჯიშებით და კვირის ბოლოს გასამართი მატჩით იყო დატვირთული. იმის დაჯერება, რომ სულ მალე ეს დასრულდება ცოტა რთულია. ვცდილობ ამაზე არ ვიფიქრო.
– რა იყო ყველაზე დასამახსოვრებელი ამ ხანგრძლივი კარიერის განმავლობაში?
– რთულია ერთი ეპიზოდის გამორჩევა. საკმაოდ ბევრი პოზიტივიც იყო და სამწუხაროდ ნეგატიური მომენტებიც.
ბავშვობიდან დაწყებული ყოველთვის ვცდილობდი, რომ ნებისმიერი თამაშიდან მაქსიმალური სიამოვნება მიმეღო. მოედანზე გატარებული ყოველი წუთი ჩემთვის ბედნიერებაა.
– საკმაოდ ბევრი ცნობილი ფეხბურთელი კარიერას მშობლიურ კლუბში ასრულებს. გქონდათ თუ არა შემოთავაზება რომელიმე ქართული გუნდიდან?
– შემოთავაზება ნამდვილად არ ყოფილა და ჩემი ინიციატივით ვერსად ვერ მივიდოდი. თუმცა, შემოთავაზების შემთხვევაშიც კი, ასეთ გადაწყვეტილებას იოლად ვერ მივიღებდი.
– სანაკრებო თემასაც შევეხოთ. ეროვნული გუნდიდან არც თუ ისე სასიამოვნო სიტუაციაში წახვედით… ნაკრების დღევანდელ მდგომარეობას როგორ შეაფასებდით?
– ნაკრებიდან წასვლაზე უკვე საკმაოდ ბევრი ვისაუბრე და ამ თემაზე ყველამ ყველაფერი ძალიან კარგად იცის…
ეროვნული გუნდი ერთ-ერთი ყველაზე დიდი ტკივილია ჩემს ცხოვრებაში. ფეხბურთელმა, შეიძლება საკლუბო დონეზე ყველაფერს მიაღწიოს, მაგრამ ეროვნულ გუნდთან ერთად მოპოვებულ გამარჯვებას სულ სხვა გემო აქვს.
ნაკრები ჩემთვის ყოველთვის პრიორიტეტულია და ძალიან მწყდება გული, რომ ევროპის ან მსოფლიო ჩემპიონატზე ასპარეზობა ვერ მოვახერხე. იმედია, ამ სიხარულს გულშემატკივრის სტატუსში მაინც განვიცდი.
– სამომავლო გეგმებზე რას გვეტყვით?
– ჩემს თავს ქართულ ფეხბურთში ვხედავ. რა თქმა უდნა, მაქვს გარკვეული გეგმები და იდეები ქართულ ფეხბურთან დაკავშირებით, თუმცა ამას ჩამოსვლის შემდეგ გავახმაურებ.
ფეხბურთელობის სულ ცოტა დრო დამრჩა და მინდა ამ დღეებით ბოლომდე დავტკბე.
– ევროპის თასის საკვალიფიკაციო ეტაპს როგორ შეფასებდით? ეს ტურნირი თქვენი ორგანიზებით ჩატარდა…
– კომპანია, რომელიც აღნიშნულ ტურნირს ატარებს დამიკავშირდა და მთხოვა, რომ გათამაშებაში საქართველოდანაც ყოფილიყო ჩართული ერთი გუნდი.
მეგობრებთან ერთად გადავწყვიტეთ, რომ ყველა გუნდი თანაბარ მდგომარეობაში ჩაგვეყენებინდა და საქართველოს მასშტაბით შესარჩევი ეტაპს გავუწიეთ ორგანიზება. როგორც მოგეხსენებთ, გამარჯვებული გუნდი ბერლინში გასამართ ტურნირზე გაემგზავრება.
– და ბოლოს საინტერესო იქნებოდა თქვენი მოსაზრება ქართულ ფეხბურში არსებულ მდგომარეობაზე. რა არის დღეს ჩვენი მთავარი პრობლემა?
– ძალიან ბევრი პრობლემა გვაქვს და ყველა ძალიან მნიშვნელოვანია. ამაზე მოკლედ საუბარი რთულია. საქართველოში დაბრუნების შემდეგ ყველაფერზე დაწვრილებით ვისაუბრებ.
Fanebi.com-ის სახელით გვინდა ლევანს მის სამომავლო საქმიანობაში წარმატება ვუსურვოთ და დიდი მადლობა ვუთხრათ ქართული ფეხბურთის განვითარებაში შეტანილი წვლილისთვის.
რუმინეთში გადასვლის შემდეგ გიორგი ჭანტურია “კლუჟის” ძირითადში პირველად მოხვდა. ქართველის გუნდმა საკუთარ მოედანზე “პეტროლულთან” ფრედ, 1:1 ითამაშა. ჭანტურიამ მოედანზე 67 წუთი დაჰყო.
პორტუგალიური პრიმეირას 26-ე ტურში ავთო ებრალიძის “ჟილ ვისენტემ” “ბელენენსეშს” უმასპინძლა და მინიმალური ანგარიშით დამარცხდა. ებრალიძემ შეხვედრა ძირითადში დაიწყო და მოედანზე 56-ე წუთი გაატარა.
პოლონეთის უმაღლესი ლიგის 29-ე ტურის მატჩში ვარშავის “ლეგიამ” “ზავიშჩას” 3:0 აჯობა. სამწუხაროდ, ლადო დვალიშვილი 18 კაციან განაცხადშიც კი ვერ მოხვდა. ისევე როგორც ლევან კობიაშვილი, რომლის “ჰერტამ” საკუთარ მოედანზე “ჰოფენჰაიმთან” 1:1 ითამაშა.
ანალოგიური ანგარიშით დასრულდა ჰოლანდიის ჩემპიონატის ცენტრალური შეხვედრა “ვიტესსა” და “აიაქსს” შორის. არნემელთა კაპიტანმა გურამ კაშიამ ტრადიციულად 90 წუთი ითამაშა და ყვითელი ბარათიც მიიღო. ვაკო ყაზაიშივლი მოედანზე 69-ე წუთზე შევიდა.
ლევან კობიაშვილს ბერლინის „ჰერტას“ ოფიციალურმა ვებ-გვერდმა ინტერვიუ ჩამოართვა. ჟურნალისტმა ქართველ ფეხბურთელს 2016 წლის ევროპის ჩემპიონატის საკვალიფიკაციო ეტაპის წილისყრის შედეგების შეფასებაც სთხოვა. კობიაშვილის თქმით, საკმაოდ რთულ ჯგუფში მოვხვდით, თუმცა შეუძლებელი არაფერია.
„ჩემი დიდი სურვილია, რომ საქართველოს ნაკრებმა დიდ ტურნირზე ითამაშოს. ისეთი პატარა ქვეყნისთვის, როგორიც საქართველოა, ეს განსაკუთრებული რამ იქნება. ევრო-2016-ის საკვალიფიკაციო ეტაპის ქვეჯგუფში ევროპის უმაღლესი დონის გუნდებთან ერთად მოხვდით და ძალიან მძიმე მატჩები გველის, თუმცა შეუძლებელი არაფერია.
ჩემს ქვეყანაში ფეხბურთი ბევრს უყვარს, ქართული ფეხბურთი გულთან ახლოს მყავს. მომავალში მინდა, რომ ჩემი გამოცდილებით ფედერაციას სტრუქტურების განვითარებაში დავეხმარო. ადრე თუ გვიან, საქართველოში დავბრუნდები და ჩემს წვლილს შევიტან იმაში, რომ ქართულმა ფეხბურთმა ნაბიჯ-ნაბიჯ წინ წაიწიოს და უფრო კონკურენტუნარიანი გახდეს“, – ციტირებს კობიაშვილის სიტყვებს კლუბის ოფიციალური ვებ-გვერდი.
ბექა დოგრაშვილი
გერმანიის ბუნდესლიგის 22-ე ტურში ლევან კობიაშვილის „ჰერტა“ „შტუტგარტს“ ესტუმრა და მეტოქე ანგარიშით 2:1 დაამარცხა, რაშიც ლომის წილი დაიდო ქართველმა ფეხბურთელმა. ანგარიში მე-5 წუთზე სწორედ კობიმ გახსნა, ქართველმა ფეხბურთელმა კუთხურის მოწოდების შემდეგ მასპინძელთა საჯარიმოში შექმნილი არეულობით ისარგებლა და დახლობით 11 მეტრის მანძილიდან გაიტანა. მე-40 წუთზე „შტუტგარტის“ კოტ დივუარელმა მცველმა არტურ ბოკამ წონასწორობა აღადგინა, თუმცა ბერლინელებმა გამარჯვების გოლის გატანა მაინც მოახერხეს: 87-ე წუთზე სანდრო ვაგნერმა გაიტანა, რომელიც მოედანზე შვიდი წუთის შესული იყო და „ჰერტას“ გამარჯვება მოუტანა – 1:2.
კობიაშვილი კვლავაც ცენტრალური მცველის პოზიციაზე ირჯებოდა, თუმცა 85-ე წუთზე მოედანზე ჯონ ბრუქსი შევიდა და ქართველმა ფეხბურთელმაც ნახევარდაცვაში გადაინაცვლა, შეხვედრა კი სრულად ჩაატარა.
ამრიგად, ქართველმა ფეხბურთელმა ბუნდესლიგაში ჩატარებულ 344-ე შეხვედრაში 32-ე გოლი მიითვალა.
„ჰერტა“ სატურნირო ცხრილში 32 ქულით მეშვიდე ადგილს იკავებს.
ბექა დოგრაშვილი
