ჭდე: საქართველოს ფეხბურთის ფედერაცია

25 ნოემბერს საქართველოს ფეხბურთის ფედერაციის ტექნიკურმა ცენტრმა ლაგოდეხში 13-წლამდე რეგიონთა თასის გათამაშების ფინალს უმასპინძლა. ტურნირის ჩემპიონის გამოსავლენად ერთმანეთს იმერეთისა და თბილისის 2004 წლამდე დაბადებული ფეხბურთელებით დაკომპლექტებული რეგიონული ნაკრებები დაუპირისპირდნენ. დაძაბულ ბრძოლაში თბილისელებმა იმერლები დამაჯერებლად დაამარცხეს და “რეგიონთა თასის” 2017 წლის გამარჯვებულის ტიტულიც მოიპოვეს. მესამე და მეოთხე ადგილებზე, შესაბამისად აფხაზეთისა და იმერეთის რეგიონული ნაკრებები გავიდნენ.

“რეგიონთა თასი” საქართველოს ფეხბურთის ფედერაციის ორგანიზებითა და ფიფას მხარდაჭერით, უკვე მეორე წელია ხორციელდება და მისი მთავარი მიზანი ახალგაზრდა ფეხბურთელთა სელექციისთვის მნიშვნელოვანი და საჭირო პლატფორმის შექმნაა. 13 წლამდე რეგიონულმა ნაკრებებმა პირველად 2016 წელს იასპარეზეს. წელს 13-წლამდე გათამაშებაში ქვეყნის 13 რეგიონული ნაკრები მონაწილეობდა.

ფინალური დაპირსპირების შემდეგ გამარჯვებული გუნდი, ფინალისტი და 3-4 ადგილის მფლობელი გუნდები, ასევე გამორჩეული ფეხბურთელები საქართველოს ფეხბურთის ფედერაციის პრეზიდენტმა ლევან კობიაშვილმა და ვიცე-პრეზიდენტებმა კახა ჭუმბურიძემ და ნიკა ჯღარკავამ დააჯილდოვეს.

Gff.Ge

11 ნოემბერს საქართველოს ფეხბურთის ფედერაციის აღმასრულებელი კომიტეტის სხდომა გაიმართა. სხვადასხვა საკითხებთან ერთად, აღმასკომის წევრებმა სამი თემა განიხილეს.

აღმასკომმა იმსჯელა საფეხბურთო კლუბ „ზესტაფონის“ ეროვნულ ჩემპიონატში შესაძლო რეინტეგრაციის საკითხზე. წევრები შეთანხმდნენ, რომ აღმასკომის მომდევნო სხდომაზე მოწვეული იქნება კლუბის მფლობელი ილია კოკაია.

ასევე განხილულ იქნა უეფას ახალგაზრდული ფეხბურთის განვითარებისთვის გამოყოფილი თანხის კლუბებზე გადანაწილების პრინციპი და კლუბების ლიცენზირების დებულებაში შესატანი ცვლილებები.

GFF.GE

15 ოქტომბერს საქართველოს ფეხბურთის ფედერაციის ლაგოდეხის ბაზამ ვახტანგ რეხვიაშვილის სახელობის ბავშვთა საფეხბურთო ტურნირს უმასპინძლა, რომელშიც კახეთის რეგიონის საფეხბურთო სკოლების ბავშვთა გუნდები მონაწილეობდნენ.

გათამაშებაში 200-ზე მეტი ახალგაზრდა ფეხბურთელი ჩაერთო. ტურნირს საქართველოს ფეხბურთის ფედერაციის პრეზიდენტი ლევან კობიაშვილი, გენერალური მდივანი დავით მუჯირი და პირველი ვიცე-პრეზიდენტი კახა ჭუმბურიძე დაესწრნენ. ფინალში გამარჯვება ლაგოდეხის ბავშვთა საფეხბურთო გუნდმა – „რანმა“ მოიპოვა.
გამარჯვებული და ფინალისტები ფეხბურთის ფედერაციის ხელმძღვანელებმა დააჯილდოვეს. სპეციალური პრიზებით დაჯილდოვდნენ გათამაშების გამორჩეული მოთამაშეებიც.

საქართველოს ფეხბურთის ფედერაციის პრესსამსახური.

საქართველოს ფეხბურთის ფედერაციის დელეგაცია, მასობრივი ფეხბურთის კვირეულის ფარგლებში, ქვეყნის სხვადახვა რეგიონების სოფლებს ესტუმრა, სადაც ადგილობრივებთან ერთად სოფლის სტადიონები განაახლეს და ახლა უკვე სამი რეგიონის სამ სოფელში ადგილობრივ მოყვარულ ფეხბურთელებს და ბავშვთა გუნდებს უკვე გამართულ მოედანზე შეუძლიათ ეთამაშონ მეზობელ სოფლებს მათი საყვარელი სპორტის სახეობა. თითოეულ სოფელში ფეხბურთის ფედერაციის სამუშაო ვიზიტი როგორც მოედნების შეკეთებას, ბალახის გაკრეჭას, კარის დადგმასა და ბადეების დაკიდებას, სათადარიგო სკამების ჩადგმასა და ტაბლოს დამონტაჟებას, ისე ადგილობრივ გუნდებთან საფეხბურთო მატჩების ჩატარებას მოიცავდა.

მასობრივი ფეხბურთის კვირეული საქართველოში 30 სექტემბერს, თბილისში გამართული მამებისა და შვილების საფეხბურთო ჩემპიონატით – „მამების თასით“ დასრულდა. აღნიშნული ჩემპიონატი გაეროს მოსახლეობის ფონდის (UNFPA) საქართველოს ოფისის, არასამთავრობო ორგანიზაცია We Care-ისა და საქართველოს ფეხბურთის ფედერაციის ინიციატივით, კამპანია „კაცები ზრუნავენ“ ფარგლებში გაიმართა. ჩემპიონატში 16-მა მწვრთნელმა მამამ 4 ბავშვისგან დაკომპლექტებული გუნდი წარმოადგინა. გუნდში გოგონათა ჩართვა ჩემპიონატში მონაწილეობის აუცილებელი პირობა იყო. გამარჯვება გორიდან სპეციალურად ჩემპიონატისთვის ჩამოსულმა გუნდმა მოიპოვა.

საქართველოს ფეხბურთის ფედერაციის გადაწყვეტილებით, სტადიონის ტურები სხვადასხვა რეგიონში მომავალშიც გაგრძელდება, რაც ფეხბურთის მასობრიობის განვითარებას შეუწყობს ხელს.