“ტელეგრაფის” პროექტმა Babb 2014 წლის საფეხბურთო მოვლენებზე სახალისო ვიდეოკლიპი დაამზადა, რომელშიც თემურ ქეცბაიაც არის შეყვანილი. ქართველს 90-იან წლებში, “ნიუკასლ იუნაიტედში” თამაშის პერიოდში სარეკლამო ბანერებისთვის ფეხის რტყმევას ახსენებენ.
ჭდე: Temuri Ketsbaia
თემურ ქეცბაიამ წლის სიმბოლური გუნდი შეადგინა
საქართველოს ნაკრების ყოფილმა მთავარმა მწვრთნელმა თემურ ქეცბაიამ 2014 წლის სიმბოლური გუნდი შეადგინა.
მეკარე: მანუელ ნოიერი;
— მსოფლიოს ჩემპიონატის შვიდ მატჩში მხოლოდ ოთხი გაშვებული გოლი და ოქროს მედალი ნათლად მიუთითებს ნოიერის საიმედოობაზე. გარდა ამისა, ის სტაბილურია კლუბშიც. ნოიერს ბევრი ძლიერი მხარე აქვს და წელს ის უკონკურენტო იყო.
მცველები: დავიდ ალაბა, მატს ჰუმელსი, ვენსან კომპანი, ფილიპ ლამი;
— ალაბა ერთ-ერთი ყველაზე სწრაფად პროგრესირებადი ფეხბურთელია, რომელსაც “ბაიერნში” საკმაოდ კარგი წელი ჰქონდა. მიუნხენური კლუბის დაცვაში დიდი კონკურენციაა, ამიტომ ალაბას შედეგი დასაფასებელია.
მიუხედავად იმისა, რომ დორტმუნდის “ბორუსია” მიმდინარე სეზონში არასტაბილურად გამოიყურება, ჰუმელსი ცენტრალური მცველის პოზიციაზე ერთ-ერთი საუკეთესოა. მან მსოფლიოს ჩემპიონატზე პორტუგალიისა და საფრანგეთის ნაკრებების კარში გადამწყვეტი გოლები გაიტანა.
ბოლო წლებში ბელგიის ნაკრები ერთ-ერთი ყველაზე საინტერესო გუნდი გახდა, რაშიც კომპანის დამსახურება დიდია. მან “მანჩესტერ სიტისთან” ერთად ერთბაშად ორი ტიტული — ინგლისის ჩემპიონატი და თასი მოიგო.
ლამი “ბაიერნისა” და გერმანიის ნაკრების უნივერსალი ფეხბურთელია. მსოფლიოს ჩემპიონატზე ის ერთ-ერთი საუკეთესო იყო, რაც მაძლევს იმის საშუალებას, რომ წლის სიმბოლურ გუნდში შევიყვანო. მან შესანიშნავად დაასრულა საერთაშორისო კარიერა.
ნახევარმცველები: ტონი კროოსი, პოლ პოგბა, არიენ რობენი;
— მსოფლიოს ჩემპიონატზე ნაჩვენები შესანიშნავი თამაშის შემდეგ კროოსმა მადრიდის “რეალშიც” დაიმკვიდრა თავი. მიუხედავად იმისა, რომ კროოსი ტიპიური გერმანელი ცივსისხლიანია, იგი ტექნიკითაც გამოირჩევა – განსაკუთრებით საგოლე პასებითა და შორეული დარტყმებით.
პოგბა ჩემს გუნდში ყველაზე ახალგაზრდა ფეხბურთელია. მან ყურადღება ჯერ კიდევ საფრანგეთის ახალგაზრდულ ნაკრებში თამაშისას მიიქცია. მასში ვხედავ პოტენციალს, რომელიც საშუალებას მაძლევს, არამხოლოდ შევიყვანო წლის სიმბოლურ გუნდში, არამედ ინდივიდუალური ჯილდოც მივაკუთვნო.
მსოფლიოს ჩემპიონატზე ასეთ რთულ ჯგუფში ჰოლანდიის ნაკრების ბრწყინვალე თამაში ბევრ სპეციალისტს გაუკვირდა. არიენ რობენმა ამაში განსაკუთრებული წვლილი შეიტანა. ის შესანიშნავი დრიბლიორი და ლიდერის თვისებებით დაჯილდოებული მოთამაშეა.
თავდამსხმელები: ზლატან იბრაჰიმოვიჩი, ლიონელ მესი, კრიშტიანუ რონალდუ.
— დღევანდელ ფეხბურთში ბევრი ვარსკვლავია. მათ შორის ღირსეული ადგილი უკავია “პარი სენ-ჟერმენის” თავდამსხმელს. როდესაც იბრაჰიმოვიჩი მოედანზეა, გოლი შესაძლოა, ნებისმიერი წერტილიდან გავიდეს.
მესი და რონალდუ მსოფლიოში ყველაზე პოპულარული ფეხბურთელები არიან. ასეთი აღიარების მოპოვება ძალიან რთულია და ეს ყველაფერზე მეტყველებს. გოლს გოლზე იტანენ და თავიანთი გუნდების ლიდერებად გვევლინებიან. ერთმანეთთან დუელი აქვთ გაჩაღებული, რაც სპორტულ სულისკვეთებას ძალიან უხდება.
ჩემი გუნდის წევრთა უმეტესობა გერმანიის ნაკრების ფეხბურთელია და ეს იმიტომ მოხდა, რომ ბრაზილიაში გამართულ მსოფლიოს ჩემპიონატზე, სადაც ძალზედ სერიოზული კონკურენცია იყო, გერმანელებმა ძალიან კარგი თამაში აჩვენეს.
ოთარ გაბელია ბრიტანული Evening Times-ის წინააღმდეგ ჩივილს აპირებს
ოთარ გაბელია ბრიტანული გამოცემა “ივნინგ თაიმსის” წინააღმდეგ ჩივილს აპირებს.
გაზეთში რამდენიმე დღის წინათ საქართველოს ნაკრების მთავარი მწვრთნელის, თემურ ქეცბაიას შესახებ სტატია დაიბეჭდა, რომელშიც გაბელიას ციტატაც იყო მოხმობილი, თუმცა, როგორც ირკვევა, ეს გაბელიას სიტყვები არ ყოფილა.
“თამაშის მოსაგებად უნდა შეუტიო, თუმცა ქეცბაიას თავკაცობით ამას ვერ ვახერხებთ. ის ჯიუტი მწვრთნელია, რომელიც კრიტიკას ვერ იღებს. მესმის, დაცვით ფეხბურთი ითამაშო ესპანეთისა და გერმანიის ნაკრებების წინააღმდეგ, მაგრამ შინ ირლანდიასთანაც? ჩემი აზრით, ქეცბაია ამ მატჩებამდე უნდა გადამდგარიყო”, – “ივნინგ თაიმსში” სწორედ ეს კომენტარი არის გაბელიას სიტყვებად გასაღებული.
“სასამართლოში უნდა ვუჩივლო ამ გაზეთს. ბრიტანულ გაზეთთან კი არა, ჟურნალისტთანაც კი კავშირი არ მქონია “ვესტ ჰემთან” მატჩის შემდეგ. რატომ მოიგონეს ასეთი რამ?! რატომ ვიტყოდი ნაკრებზე და თემურ ქეცბაიაზე იმას, რის საპირისპიროც რამდენმე დღის წინათ ქართველ ჟურნალისტებს ვუთხარი?! ქეცბაიას წასვლაზე კი არა, ვთქვი, რომ ეს შესარჩევი ციკლი მან უნდა ჩაამთავროს და საქმე ბოლომდე მიიყვანოს. ვთქვი ისიც, რომ საქართველოს ნაკრებს მაღალი კლასის ფეხბურთელები არ ჰყავს და ასეთ პირობებში ძნელია, მწვრთნელს მაღალი შედეგი რომ მოსთხოვო. ფეხბურთელების საწყენად არ ვამბობ, მაგრამ ფაქტია, საქართველოს ნაკრებს დღეს ჰყავს კარგი მოთამაშეები, მაგრამ ვერც ერთი დააკმაყოფილებს, მაგალითად ესპანეთისა და საფრანგეთის დონეს. ან კიდევ, რატომ უნდა წავიდეს მწვრთნელი შუა გზიდან?! კარგი იქნება, თუ ქეცბაია ნაკრებში შესარჩევი ეტაპის ბოლომდე დარჩება. ისეთი სიტყვები, რაც იმ სტატიაშია მოყვანილი, ჟურნალისტისთვის კი არა, შინაურ წრეშიც არსად მითქვამს და ვინც მიცნობს, კარგად იცის, რისი მთქმელი ვარ და რისი – არა”, – ციტირებს ოთარ გაბელიას სიტყვებს “ჩვენი თამაში”.
თემურ ქეცბაია: “მეტი უნდა გაგვეტანა”
ევროპის 2016 წლის ჩემპონატის საკვალიფიკაციო ეტაპზე საქართველოს ეროვნულმა გუნდმა მესამე ტურის შეხვედრა სამხრეთ პორტუგალიაში ჩაატარა, სადაც გიბრალტარის ნაკრებს დაუპირისპირდა და მეტოქე ანგარიშით 3:0 დაამარცხა.
მატჩის შემდეგ “ჯვაროსნების” მთავარი მწვრთნელი უკმაყოფილო იყო იმით, რომ მისმა გუნდმა მეტი გოლი ვერ გაიტანა.
“გავიმარჯვეთ, თუმცა ჩემი გუნდის მოქმედებებით კმაყოფილი არ ვარ. პირველ ნახევარ საათში კარგად ვითამაშეთ. გასახდელში ფეხბურთელებს ვუთხარი, რომ მხოლოდ 30 წუთით კი არა, 95 წუთის განმავლობაში უნდა გვეთამაშა. მეტი უნდა გაგვეტანა, რადგან ჯერ კიდევ არ ვიცით, როგორ გადანაწილდება ამ ჯგუფში ადგილები.
გიბრალტარის ნაკრების პატივისცემის მიუხედავად, შესაძლოა, ბურთებს შორის სხვაობამ ჯგუფში ბევრი რამ გადაწყვიტოს. ვფქრობ, ჩემი ფეხბურთელები მატჩს არასწორად მიუდგნენ. ასეთ მეტოქეს მაქსიმალურად ბევრი გოლი უნდა გაუტანო. სამი ქულა ავიღეთ, რაც ჩვენი მთავარ მიზანი იყო. გიბრალტარისა და პოლონეთის ნაკრებებს შორის გამართულ მატჩს ვუყურე და ვფიქრობ, გიბრალტარელებმა დღეს უკეთ ითამაშეს.
მომდევნო შეხვედრას პოლონეთის ნაკრების წინააღმდეგ გავმართავთ და გვინდა, დადებით შედეგს მივაღწიოთ. თუ გუნდი მოედანზე ისეთივე განწყობით გავა, როგორიც შოტლანდიის ნაკრების წინააღმდეგ გამართულ მატჩში ჰქონდა, კარგ შედეგს ვაჩვენებთ. ტექნიკური თვალსაზრისით ძალიან კარგი ფეხბურთელები მყავს, თუმცა ფსიქოლოგიური კუთხთ სამუშაო გვაქვს”, – განაცხადა ქეცბაიამ.
საქართველოს ეროვნული გუნდი მომდევნო შეხვედრას 14 ნოემბერს, თბილისში, პოლონეთის ნაკრების წინააღმდეგ გამართავს.
ქეცბაია: “რთულია თქმა, რა სხვაობით შეიძლება, გიბრალტარის ნაკრები დავამარცხოთ”
ევროპის 2016 წლის ჩემპიონატის საკვალიფიკაციო ეტაპის მესამე მატჩს საქართველოს ეროვნულ გუნდი სამხრეთ პორტუგალიაში ჩაატარებს, სადაც ჯგუფის გამოკვეთილ აუტსაიდერ გიბრალტარის ნაკრებს დაუპრისპირდება. ყველა ფეხბურთელი, რომელიც თემურ ქეცბაიამ ამ შეხვედრისთვის გამოიძახა ჯანმრთელადაა. ქეცბაიამ და ნაკრების დებიუტანტმა ლაშა დვალმა მედიის წარმომადგენელთა შეკითხვებს უპასუხეს.
“გიბრალტართან აუცილებლად მოსაგები თამაშია და ეს ყველამ კარგად იცის, – ციტირებს ქეცბაიას სიტყვებს ფეხბურთის ფედერაციის ოფიციალური ვებგვერდი. – სამწუხარო ის არის, რომ უშუალო კონკურენტებთან ირლანდიასთან და შოტლანდიასთან ქულების აღება ვერ მოვახერხეთ და მინიმალური სხვაობით დავმარცხდით. თქვენს შეკითხვას, რა სხვაობით შეიძლება მოიგოს საქართველოს ნაკრებმა, რთულია – ვუპასუხო წინასწარ, ეს ყველაფერი თამაშის მიმდინარეობის დროს გამოჩნდება. ყველამ იცის, რომ ეს მატჩი წარმატებით უნდა დავასრულოთ და ამ შეხვედრიდან დაიწყოს მოგებები”.
ლაშა დვალი: “მადლობა მინდა გადავუხადო სამწვრთნელო შტაბს, ნდობისთვის და ნაკრებში გამოძახებისთვის. ჩემი ასაკის ფეხბურთელებისთვის უდიდესი სტიმულია ეროვნულ გუნდში მოხვედრა. სამწუხაროდ ორი თამაში წაგებული გვაქვს, გიბრალტართან კი აუცილებლად უნდა მოვიგოთ ამას ელოდება მთელი გუნდი და ყველა გულშემატკივარი”.
გიბრალტარისა და საქართველოს ნაკრებებს შორის გასამართი მატჩი დღეს, თბილისის დროით 22:45 წუთზე დაიწყება, შეხვედრის პირდაპირ რეპორტაჟს საზოგადოებრივი მაუწყებლის პირველი არხი შემოგთავაზებთ. მატჩს 32 წლის ავსტრიელი არბიტრი ჰარალდ ლეხნერი მოემსახურება.