დღეს დინამო თბილისის გულშემატკივრებმა, ადგილობრივმა მაცხოვრებლებმა და საზოგადოების წარმომადგენლებმა ანდრო ჟორდანიას სახელობის დიღმის საწვრთნელ ბაზასთან, მიქელაძის 9ა ნომერში საცხოვრებელი კორპუსის მშენებლობა გააპროტესტეს. გამაფრთხილებელი აქციის მონაწილეების მოთხოვნით მშენებლობა უნდა შეჩერდეს, რადგან ამ ადგილზე კორპუსის არსებობა ხელს შეუშლის საწვრთნელი ბაზის სრულყოფილად ფუნქციონირებას.
წყარო: Fcdinamo.Ge
დღეს, სოფელ დვანში, საქართველოს ფეხბურთის ფედერაციისა და ქართული სპორტის ქომაგების ერთობლივი აქცია გაიმართა.
აქციის სლოგანი იყო – „გამოექომაგე საქართველოს“. მონაწილეებმა სოფელ დვანში გაბმულ მავთულხლართებთან მდუმარე აქცია მოაწყვეს. შემდეგ კი, სოფლის სტადიონზე გადაინაცვლეს და სიმბოლური საფეხბურთო მატჩი გამართეს.
ამ აქციის ჩატარების იდეა სფფ-ის პრეზიდენტისა და ქომაგების ერთ-ერთი შეხვედრისას გაჩნდა. დვანში თავად ზვიად სიჭინავაც იმყოფებოდა. მგზავრობის ხარჯები და აქციის მონაწილეების სხვადასხვა საჭირო ატრიბუტიკით აღჭურვა ფეხბურთის ფედერაციამ თავის თავზე აიღო. ქომაგებმა კი, გულშემატკივართა მობილიზება მოახდინეს. სასიამოვნოა, რომ მათი ძალისხმევით, დღევანდელ აქციაში რუსთაველი, ქუთაისელი, ზუგდიდელი, გორელი და ლანჩხუთელი ქომაგებიც მონაწილეობდნენ.
საფეხბურთო მატჩის დასრულების შემდეგ კი, აქციის მონაწილეებმა დროშები, ბურთები და მაისურები ადგილობრივ მოსახლეობას საჩუქრად გადასცეს.
საქართველოს ფეხბურთის ფედერაციის ინიციატივით, 6 ოქტომბერს, საქართველოს ეროვნული ჩემპიონატის მე-8 ტურის მატჩები, სწორედ, დიცისა და დვანის მოსახლეობის მხარდამჭერი სლოგანით გაიმართა.
„საქართველოს ფეხბურთის ფედერაცია ყოველთვის მზადაა გვერდში დაუდგეს ყველა შემოთავაზებას, რომლებიც ამ სოფლებისა და ჩვენი ქვეყნის გვერდში დგომას ეხება. ჩვენი პოზიცია საქართველოს მხარდაჭერაა“, – განაცხადა სფფ-ის პრეზიდენტმა ზვიად სიჭინავამ.
სფფ-ის პრესსამსახური
რომის „ლაციოს“ ქომაგებმა იტალიის სერია A-ს მესამე ტურში, „კიევოს“ წინააღმდეგ გამართული მატჩის დასაწყისს, პროტესტის ნიშნად არ დაესწრნენ. „როიტერის“ ინფორმაციით, „ლაციოს“ ტიფოზები ზაფხულის სატრანსფერო პერიოდში კლუბის მონაგარით უკმაყოფილონი არიან და სწორედ ამიტომაც გაატარეს შეხვედრის პირველი 15 წუთი სტადიონის გარეთ, ტრიბუნაზე კი ბანერი გამოკიდეს, რომელზეც ეწერა: „მორიგი სატრანსფერო ფანჯარა – მორიგი კრახი“.
„ქომაგები კლუბთან ერთად უნდა იყვნენ. პროტესტანტი გულშემატკივრები უმცირესობას წარმოადგენენ. მე მხოლოდ კონსტრუქციულ კრიტიკას მივიღებ“, – განაცხადა „ლაციოს“ პრეზიდენტმა კლაუდიო ლოტიტომ.
ცნობისთვის, „ლაციოსა“ და „კიევოს“ შორის გამართული მატჩი რომაელთა დამაჯერებელი გამარჯვებით, ანგარიშით 3:0 დასრულდა.
ბექა დოგრაშვილი
