“ბარსელონას” მცველი ჟერარ პიკე საფეხბურთო კლუბ “ანდორას” მფლობელი გახდა, რომელიც ესპანეთის ჩემპიონატის რანგით მეხუთე დივიზიონში ასპარეზობს.
პიკეს კომპანია Kosmos-მა “ანდორას” 200 ათასი ევროს ღირებულების ვალდებულება დაფარა. დღეს გამართულ ასამბლეაზე კლუბის წევრებმა ჟერარ პიკე ხმათა 99,9 პროცენტით “ანდორას” ხელმძღვანელად დაამტკიცეს.
თურქი ფეხბურთელი “შატალოზე” წავიდა. “გალათასარაის” მცველმა სერდარ აზიზმა ავადმყოფობა მოიმიზეზა და კლუბის ხელმძღვანელობას სატელეფონო კავშირით ამცნო, რომ “სივასპორთან” გასამართ მატჩზე ვერ გამოცხადდებოდა.
სინამდვილეში აზიზი მალდივის კუნძულებზე ისვენებდა, თუმცა ფეხბურთელს მეუღლის გაფრთხილება დაავიწყდა, რომელმაც სოციალურ ქსელში ამის ამსახველი ფოტო გამოაქვეყნა.
კლუბში სერდარ აზიზის საქციელით ძალზედ აღშფოთებულან და მის წინააღმდეგ დაუყოვნებლივ მიუღიათ სანქცია – “გალათასარაიმ” 28 წლის ფეხბურთელი ტრანსფერზე დააყენა.
ლონდონის “არსენლმა” ზამთრის სატრანსფერო პერიოდში შესაძლოა, “სევილიადან” ევერ ბანეგა გადმოიბაროს.
“თოქსპორტის” ცნობით, “მეთოფეთა” მთავარ მწვრთნელ უნაი ემერის ძალიან სურს საკუთარ გუნდში არგენტინელი ფეხბურთელის ხილვა, რომელსაც “ვალენსიასა” და “სევილიაში” მუშაობის პერიოდში თავკაცობდა.
ლონდონელები ევერ ბანეგას ტრანსფერის გაჩარხვას ჯერ კიდევ ზაფხულში ცდილობდნენ, თუმცა მაშინ გარიგება ჩაიშალა. 30 წლის ნახევარმცველის კონტრაქტის გამოსასყიდი თანხა 20 მილიონი ევროა.
ევერ ბანეგამ ესპანეთის პრიმერადივიზიონის მიმდინარე გათამაშებაში ჩატარებულ 16 მატჩში სამი გოლი გაიტანა და ორი საგოლე გადაცემა მიითვალა.
გიორგი არაბიძე შესაძლოა, უკრაინის ჩემპიონატში დაბრუნდეს. ახალგაზრდა ქართველი ფეხბურთელით ჩერნიგოვის “დესნა” გახლავთ დაინტერესებული, რომელიც ზამთარში გუნდის გაძლიერებას აპირებს.
გიორგი არაბიძემ პროფესიული კარიერა თბილისის “ლოკომოტივში” დაიწყო, რომლის რიგებშიც ჩატარებულ 33 შეხვედრაში 21 გოლი გაიტანა და რამდენიმე უცხოური კლუბის ყურადღება მიიპყრო. არაბიძემ 2015 წელს კარიერა დონეცკის “შახტარში” გააგრძელა, თუმცა უკრაინული კლუბის მთავარ გუნდში მხოლოდ სამი მატჩი ჩაატარა. 2017 წელს არაბიძეს საქართველოს ეროვნული ნაკრების შემადგენლობაში დებიუტი ჰქონდა. მას “ჯვაროსანთა” რიგებში ჩატარებულ ოთხ შეხვედრაში სამი ბურთი აქვს გატანილი.
2018 წლის ზაფხულში გიორგი არაბიძე “შახტარიდან” პორტუგალიურ “ნასიონალში” გადაბარგდა”, თუმცა პირინეის ნახევარკუნზულზე ქართველმა ფეხბურთელმა ფეხი ვერ მოიკიდა. მას მიმდინარე სეზონში მხოლოდ ხუთი შეხვედრა აქვს ჩატარებული.
“დესნას” უკრაინის ჩემპიონატის სატურნირო ცხრილში მე-6 პოზიცია უკავია.
რამდენიმე კვირის წინ ტურინის “იუვენტუსის” თავდამსხმელმა კრიშტიანუ რონალდუმ იტალიის სერია A-ში ლიონელ მესის გადმოსვლა ისურვა:
“კარგი იქნებოდა, თუ მესი ჩემ მსგავსად მოიქცეოდა და ახალ გამოწვევას მიიღებდა, თუმცა თუ ის “ბარსელონაში” ბედნიერია, მის არჩევანს პატივს ვცემ”.
ლეო მესიმ რონალდუს ამ მოწვევაზე კომენტარი “მარკასთვის” მიცემულ ინტერვიუში გააკეთა:
“არანაირი ცვლილება არ მჭიდება. მე მსოფლიოს საუკეთესო გუნდში ვთამაშობ, სადაც ახალი გამოწვევები ყოველწლიურად ჩნდება. ახალი მიზნებისთვის გუნდის ან ლიგის გამოცვლა არ მჭიდება. სახლში ვარ, საუკეთესო გუნდში ვთამაშობ და რაიმეს შეცვლის სურვილი არ მაქვს.
რონალდუსთან პრიმერადივიზიონში პაექრობა სასიამოვნო იყო. კრიშტიანუს დარი ფეხბურთელი ნებისმიერ გუნდს დააკლდებოდა. ჩვენი ორთაბრძოლა საინტერესო იყო, მაგრამ მე მოედანზეც და მოედნის მიღმაც ჩემს გუნდზე ვარ ფოკუსირებული”.
მიუნხენის “ბაიერნის” აღმასრულებელი დირექტორი კარლ-ჰაინც რუმენიგე იმედოვნებს, რომ ჩაბი ალონსო გუნდში მწვრთნელის რანგში დაბრუნდება. შეგახსენებთ, რომ ესპანელმა ნახევარმცველმა 2017 წელს პროფესიული კარიერა დაასრულა და ბავარიული გუნდი დატოვა. დღესდღეობით ის მადრიდის “რეალის” ბავშვთა გუნდს წვრთნის.
“მინდა, რომ ოდესღაც ჩაბი ალონსო “ბაიერნში” დაბრუნდეს. დღეს ის მწვრთნელის რანგში ვითარდება. ვფიქრობ, რომ მისგან კარგი სპეციალისტი დადგება. ალონსო ბუნებრივი ავტორიტეტით გამოირჩევა და კარიერის განმავლობაში საუკეთესო მწვრთნელებთან მოუწია მუშაობა”, – ციტირებს რუმენიგეს სიტყვებს “კიკერი”.
ჩაბი ალონსო მიუნხენის “ბაიერნის” ღირსებას 2014-დან 2017 წლამდე იცავდა.
გერმანიის ბუნდესლიგის მე-11 ტურის ცენტრალური შეხვედრა “სიგნალ იდუნა პარკზე” შედგა, სადაც დორტმუნდის “ბორუსიამ” მიუნხენის “ბაიერნი” მიიღო. მატჩის ბედი მე-11 წუთზე გატანილმა ერთადერთმა გოლმა გადაწყვიტა. ბურთი მასპინძელთა მთავარმა მეგოლემ პიერ-ემერიკ ობამეიანგმა ახლო მანძილიდან გაიტანა.
“ბაიერნმა” ბუნდესლიგაში პირველი მარცხი იწვნია და სატურნირო ცხრილის ერთპიროვნული ლიდერობა გათამაშების დებიუტანტ “ლაიფციგს” გადაულოცა. “დორტმუნმა” ამ გამარჯვებით აქტივში 21 ქულა მოაგროვა და მესამე პოზიციაზე გადაინაცვლა.
გერმანიის ბუნდესლიგა
XI ტური
“დორტმუნდი” — “ბაიერნი” 1:0 (1:0)
გოლი: ობამეიანგი 11′.
მიუნხენის “ბაიერნის” აღმასრულებელი დირექტორი კარლ-ჰაინც რუმენიგე გაერთიანებული ევროპული სუპერლიგის შექმნის იდეას ემხრობა. ევროპის ტოპგუნდები არაერთხელ გამოვიდნენ ასეთი ტურნირის შექმნის ინიციატივით, რაც ძველი კონტინენტის წამყვან კლუბებს მეტი თანხის მოზიდვის საშუალებას მისცემს.
“სუპერლიგის შექმნა არ უნდა გამოვრიცხოთ. შესაძლოა, ეს ტურნირი იტალიის, გერმანიის, ინგლისის, ესპანეთისა და საფრანგეთის ტოპკლუბებით დავაკომპლექტოთ და უეფას ან სხვა ორგანიზაციის ეგიდით ჩავატაროთ. ტურნირზე უნდა ითამაშოს ოცმა კლუბმა, ზოგიერთი მატჩი კი ამერიკასა და აზიაშიც გაიმართება. ევროპის საუკეთესო გუნდების შეხვედრები ყველას ყურადღებას მიიქცევს და ფეხბურთის განვითარებას ახალ ბიძგს მისცემს”, – ციტირებს რუმენიგეს სიტყვებს “ლეკიპი”.
მიუნხენის “ბაიერნის” ყოფილი მთავარი მწვრთნელი ოტმარ ჰიტცფელდი თვლის, რომ სეზონის ბოლოს კლუბის თავკაცის პოსტიდან ხოსეპ გვარდიოლას წასვლა გუნდისთვის არავითარ პრობლემას არ წარმოშობს, რადგან ესპანელი სპეციალისტი საქმეს არასწორად უდგება.
“გვარდიოლა მხოლოდ ტაქტიკაზე ფიქრობს. მას ტაქტიკა აქვს აჩემებული და მასზე ფიქრობს დღე და ღამე. რაც შეეხება ფეხბურთელებთან დამოკიდებულებას, მისთვის ეს მთავარი არ არის. იგი მოთამაშეებთან თითქმის არც ურთიერთობს. გვარდიოლა თვით პრესასთან კონტაქტსაც გაურბის.
ასე რომ, გუნდიდან პეპ გვარდიოლას წასვლა სულაც არ იქნება პრობლემა. რუმენიგემ სწორად თქვა, ერთი კაცის წასვლით მსოფლიო არ გადატრიალდებაო”, – ჰიტცფელდის კომენტარი “ბილდმა” გამოაქვეყნა.
მიუნხენის “ბაიერნის” მთავარმა მწვრთნელმა ხოსეპ გვარდიოლამ გუნდის მცველ დავიდ ალაბას შესახებ მცირე კომენტარი გააკეთა და მის უნივერსალურობას გაუსვა ხაზი.
“ალაბა ჩვენი ღმერთია. მას თითქმის ყველა შესაძლო პოზიციაზე უთამაშია”, – ციტირებს გვარდიოლას კომენტარს L’ Equipe-ი.
შეგახსენებთ, რომ დავიდ ალაბა ავსტრიის ნაკრების ღირსებას იცავს, რომელიც 2018 წლის მსოფლიოს ჩემპიონატის შესარჩევ ეტაპზე საქართველოს ეროვნული გუნდის მეტოქე იქნება.
ცნობილი იტალიელი სპეციალისტი კარლო ანჩელოტი დამდეგ ზაფხულს შესაძლოა, მიუნხენის “ბაიერნის” მთავარი მწვრთნელის პოსტზე დაინიშნოს.
ბავარიული კლუბი უკვე დაუკავშირდა იტალიელს და შესაძლო თანამშრომლობა შესთავაზა.
გერმანული წყაროების ცნობით, “ბაიერნის” პრიორიტეტად კვლავ ხოსეპ გვარდიოლა რჩება, რომელსაც საკმაოდ სარფიან კონტრაქტს უმზადებენ. თუ ესპანელი სპეციალისტი მაინც მოისურვებს მიუნხენიდან აბარგებას, მეორე ვარიანტად სწორედ ანჩელოტის კანდიდატურა განიხილება. იტალიელ სპეციალისტთან კავშირზე სწორედ ის აგენტი გავიდა, რომელიც 2012 წელს გვარდიოლასთან აწარმოებდა მოლაპარაკებებს.
ჩემპიონთა ლიგის ჯგუფურ ეტაპზე ლონდონის “არსენალის” წინააღმდეგ გამართულ მატჩამდე მიუნხენის “ბაიერნის” ავტობუსს ავარია შეემთხვა.
ბავარიელთა ავტობუსი მსუბუქ ავტომობილს დაეჯახა. ინციდენტის შედეგად არავინ დაშავებულა.
