მსფოლიოს ჩემპიონატის მერვედფინალში ბელგია იაპონიას დაუპირისპირდა და მეტოქე დაძაბულ ბრძოლაში ანგარიშით, 3-2 დაამარცხა.
საგულისხმოა, რომ შეხვედრის საუკეთესო მოთამაშედ ბელგიელთა კაპიტანი, ედენ აზარი დასახელდა. ის მთელი მატჩის მანძილზე ძალიან აქტიური იყო. მან 74-ე წუთზე ერთი საგოლე გადაცემაც მიითვალა, როცა მარუან ფელაინის თავით გაატანინა ანგარიშის გამათანაბრებელი (2:2) გოლი.
ბელგია მეოთხედფინალში ბრაზილიას დაუპირისპირდება. ეს მატჩი “ყაზან არენაზე” ექვს ივლისს, პარასკევს, 22:00 საათზე აიღებს სტარტს.
ბელგიის ნაკრების მთავარმა მწვრთნელმა რობერტო მარტინესმა ახალი წესების შემოღებით გუნდში დისციპლინა გაამკაცრა.
ვარჯიშზე და ნაკრების ნებისმიერ ღონისძიებაზე დაგვიანებისთვის ფეხბურთელი ათასი ევროთი დაჯარიმდება. გარდა ამისა, მარტინესმა ეროვნული გუნდის წევრებს მოწევა აუკრძალა.
ბელგიის ნაკრების ყოფილი მთავარი მწვრთნელი მარკ ვილმოტსი თავის დროზე გამოტყდა, რომ რაჯა ნაინგოლანი სიგარეტს ეწეოდა, თუმცა ამისთვის მას განსაკუთრებული ყურადღება არ მიუქცევია.
ლილის “პიერ მორუაზე” უელსისა და ბელგიის ნაკრებებს შორის ევროპის ჩემპიონატის მეორე მეოთხედფინალური შეხვედრა შედგა. მატჩი ბელგიელებმა აქტიურად დაიწყეს და მალევე შეეძლოთ დაწინაურება, თუმცა ერთ ეპიზოდში გოლის გატანის სამი შესაძლებლობიდან ვერცერთი ვერ გამოიყენეს. მე-13 წუთზე მარკ ვილმოტსის გუნდმა ანგარიში მაინც გახსნა: რაჯა ნაინგოლანის უძლიერეს გასროლას მეკარე უეინ ჰენესიმ ვერაფერი მოუხერხა. გატანილი გოლის შემდეგ ბელგიელებმა უპირატესობა დათმეს, უელსელები გააქტიურდნენ და ტაიმის შუაწელს ნილ ტეილორს წონასწორობის აღდგენის მშვენიერი შანსი მიეცა, თუმცა ტიბო კურტუამ შესანიშნავი რეაქცია გამოავლინა და გუნდი იხსნა. შეხვედრის 31-ე წუთზე ბრიტანელებმა ანგარიშის გათანაბრება მაინც შეძლეს: გოლი კუთხურს მოყვა, საჯარიმო მოედანზე ეშლი უილიამსი უყურადღებოდ დატოვეს და უელსელთა კაპიტანმა თავური დარტყმით წონასწორობა აღადგინა – 1:1. მატჩის პირველი ნახევარი საყაიმო ანგარიშით დასრულდა.
შეხვედრის მეორე ტაიმის სტარტზე ბელგიელები კვლავ გააქტიურდნენ, თუმცა 55-ე წუთზე უელსელები დაწინაურდნენ: გარეტ ბეილმა მეტოქის საჯარიმოში ბურთი აარონ რემზის ჩაუგდო, ამ უკანასკნელმა კი ჰელ რობსონ-კანუ მოძებნა, უელსელმა ფორვარდმა ბურთი კარისგან ზურგით მდგარმა მიიღო, თუმცა ერთი მოძრაობით შემოტრიალდა, მცველები ჩამოიტოვა და ახლო მანძილიდან მეკარეს აუღებელი დაურტყა – 2:1. ანგარიშის გათანაბრების ყველაზე კარგი შანსი მარუან ფელაინის ჰქონდა, თუმცა მისი თავური დარტყმა მცირე მანძილით ასცდა უელსელთა კარს. ტაიმის მიწურულს კრის კოულმენმა რობსონ-კანუს ნაცვლად მოედანზე სემ ვოუქსი გაიყვანა და 86-ე წუთზე ამ უკანასკნელმა თავური დარტყმით ბრიტანელთა უპირატესობა სამ ბურთამდე გაზარდა. ამრიგად, კოულმენის გუნდმა ბელგია ანგარიშით 3:1 დაამარცხა. უელსის ნაკრები ევროპის ჩემპიონატზე პირველად მონაწილეობს და პირველივე ჯერზე გათამაშების ნახევარფინალში გავიდა, სადაც მეტოქედ პორტუგალია ელის.
ევრო-2016
მეოთხედფინალი
უელსი — ბელგია 3:1 (1:1)
უელსი: ჰენესი; განტერი, ჩესტერი, უილიამსი, დევისი, ტეილორი; ალენი, ლედლი (კინგი 78′); რემზი (კოლინსი 90′), ბეილი; რობსონ-კანუ (ვოუქსი 80′).
მთავარი მწვრთნელი: კრის კოულმენი.
ბელგია: კურტუა; მენიე, ალდერვეირელდი, დენაიე, ჯორდან ლუკაკუ (მერტენსი 75′); ნაინგოლანი, ვიტსელი; კარასკო (ფელაინი 46′), დე ბრეინე, აზარი; რომელუ ლუკაკუ (ბატშუაი 83′).
მთავარი მწვრთნელი: მარკ ვილმოტსი.
გოლები: უილიამსი 31′, რობსონ-კანუ 55′, ვოუქსი 86′ — ნაინგოლანი 13′.
გაფრთხილებები: დევისი 5′, ჩესტერი 16′, განტერი 24′, რემზი 75′ — ფელაინი 58′, ალდერვეირელდი 85′.
მთავარი მსაჯი: დამირ სკომინა (სლოვენია).
უელსი — ბელგია
შეხვედრის ადგილი: ლილი; “პიერ მორუა”
შეხვედრის დრო: პარასკევი, პირველი ივლისი; 23:00 (მატჩის რეპორტაჟს საზოგადოებრივი მაუწყებლის პირველი არხი შემოგთავაზებთ)
მთავარი არბიტრი: დამირ სკომინა (სლოვენია)
დღეს ევროპის ჩემპიონატის მეორე მეოთხედფინალური მატჩი გაიმართება. ლილის “პიერ მორუაზე” ტურნირის ნახევარფინალური ეტაპის საგზურისთვის ერთმანეთს უელსისა და ბელგიის ნაკრებები შეეცილებიან. წყვილში გამარჯვებული გუნდი მომდევნო სტადიაზე პორტუგალიის ნაკრებს შეხვდება.
უელსის ნაკრებში მშვენიერი განწყობა სუფევს, გუნდის კაპიტანმა ეშლი უილიამსმა მხრის ტრავმა მოიშუშა და ვარჯიშიც განაახლა. სემ ვოუქსი, ჰელ რობსონ-კანუ და ჯონი უილიამსი ერთმანეთს ძირითად შემადგენლობაში ადგილს ეცილებიან. რობსონ-კანუმ მიმდინარე ტურნირზე უკვე გაიტანა გოლი და მას სასტარტო განაცხადში მოხვედრის უკეთესი შანსი აქვს.
ბელგიელთა მთავარი პრობლემა დისკვალიფიცირებული ტომას ვერმალენია. მარკ ვილმოტს დაცვაში დიდი არჩევანი არ აქვს. ვარაუდობენ, რომ ვერმალენის ადგილს ან ჯეისონ დენაიე ან ლორან სიმანი დაიკავებს. ვარჯიშზე ტრავმა მიიღო იან ვერტონგენმაც, რომლისთვისაც ტურნირი დასრულებულია. შესაბამისად, დაცვის მარცხენა ფლანგს ჯორდან ლუკაკუს ჩააბარებენ. ედენ აზარს მიკროტრავმა აწუხებდა, თუმცა დღეს მისი თამაში კითხვის ნიშნის ქვეშ არ დგას.
უელსის ნაკრების ბოლო 5 მატჩი:
| 05/06/16 | ამხ. | შვედეთი | უელსი | 3:0 | |
| 11/06/16 | ეჩ. | უელსი | სლოვაკეთი | 2:1 | |
| 16/06/16 | ეჩ. | ინგლისი | უელსი | 2:1 | |
| 20/06/16 | ეჩ. | რუსეთი | უელსი | 0:3 | |
| 25/06/16 | ეჩ. | უელსი | ჩრ. ირლანდია | 1:0 |
ბელგიის ნაკრების ბოლო 5 მატჩი:
| 05/06/16 | ამხ. | ბელგია | ნორვეგია | 3:2 | |
| 13/06/16 | ეჩ. | ბელგია | იტალია | 0:2 | |
| 18/06/16 | ეჩ. | ბელგია | ირლანდია | 3:0 | |
| 22/06/16 | ეჩ. | შვედეთი | ბელგია | 0:1 | |
| 26/06/16 | ეჩ. | უნგრეთი | ბელგია | 0:4 |
ურთიერთშეხვედრები (ბოლო ოთხი მატჩი)
12/06/15 – ევროპის ჩემპიონატის შესარჩევი ეტაპი: უელსი 1:0 ბელგია
16/11/14 – ევროპის ჩემპიონატის შესარჩევი ეტაპი: ბელგია 0:0 უელსი
15/10/13 – მსოფლიოს ჩემპიონატის შესარჩევი ეტაპი: ბელგია 1:1 უელსი
07/09/12 – მსოფლიოს ჩემპიონატის შესარჩევი ეტაპი: უელსი 0:2 ბელგია
კრის კოულმენი (უელსის ნაკრების მთავარი მწვრთნელი): “ამ მატჩის მნიშვნელობა უნდა დავაფასოთ. შეხვედრას მთელი სერიოზულობით მოვეკიდებით, როგორც წინა მატჩებს. ეს კიდევ ერთი რთული გამოცდა იქნება, თუმცა მოხარულნი ვართ, რომ აქ ვიმყოფებით. ისევე უნდა ვითამაშოთ, როგორც წინა შეხვედრებში, რამაც მეოთხედფინალური ეტაპის საგზური მოგვიტანა.
გუნდში ყველას სურს, რომ ასპარეზობა ამავე სულისკვეთებით გავაგრძელოთ. ბელგიის ნაკრები ევროპის ერთ-ერთ საუკეთესო გუნდად სახელდება. ბოლო ორ შესარჩევ ეტაპზე მათთან ოთხი მატჩი ჩავატარეთ, თუმცა ახლა ყველაფერი სხვაგვარადაა, ყველაფერი ჩვენზე და ჩვენს მომზადებაზეა დამოკიდებული. ძლიერი მეტოქე გვყავს, თუმცა ამის გამო სიტუაციის დრამატიზებას არ ვახდენთ.
ნებისმიერ გუნდს სჭირდება ლიდერი, თუმცა გასახდელში საოცარი ატმოსფერო გვაქვს. ეშლი უილიამსი ჩვენი გუნდის კაპიტანია. მხრის ტრავმა ყოველთვის უსიამოვნოა, თუმცა ექიმებმა კარგად იმუშავეს და იგი ფეხზე დააყენეს. კარგია, რომ ეშლი უილიამსი კვლავ დაგვეხმარება”.
მარკ ვილმოტსი (ბელგიის ნაკრების მთავარი მწვრთნელი): “იან ვერტონგენმა ვარჯიშის მიწურულს მარცხენა კოჭის მყესი გაიწყვიტა. ეს მისთვის ნამდვილი ტრაგედიაა. იგი ტურნირის ბოლომდე გამოგვაკლდა, მურნალობას კი ექვსიდან რვა კვირამდე პერიოდი დასჭირდება. სიტუაცია რთულია, თუმცა მისი შემცვლელი გვყავს. ასეთ ტურნირებზე მსგავსი რამ ხდება ხოლმე.
უნგრეთის ნაკრებთან გამართული მატჩი მალევე დავივიწყეთ, ახლა მხოლოდ დამდეგ შეხვედრაზე ვფიქრობთ. უნდა გავაგრძელოთ დასახული გეგმის შესრულება. ჯერ არავინ იცის, როგორი იქნება სასტარტო განაცხადი. ბიჭებს ვთხოვ, რომ მატჩისთვის მაქსიმალურად მზად იყვნენ.
მწვრთნელებს ყოველთვის აშინებთ ტურნირზე დასვენების დღეები. უნგრეთთან კარგად ვითამაშეთ, მაგრამ ახლა მთელი კონცენტრაცია მომდევნო მატჩზე უნდა გადმოვიტანოთ. ადვილ გამარჯვებას ვერ მოვიპივებთ. ეს სულ სხვა მეტოქეა. უელსელებს კარგი, სწრაფი გუნდი ჰყავთ, მათი ბევრი ფეხბურთელი ინგლისში თამაშობს.
უელსის ნაკრები თავს ორგანიზებულად იცავს და კარგად გადადის კონტრშეტევებზე. ეს არ არის შესარჩევი ეტაპის მატჩი, სადაც სამი ქულაა მნიშვნელოვანი, აქ მოგებისთვის საჩუქარი ევროპის ჩემპიონატის ნახევარფინალია. თამასა გაცილებით მაღალია”.
საინტერესო ფაქტები:
– ეს გუნდები ერთმანეთის მეტოქეები იყვნენ ევრო-2016-ის საკვალიფიკაციო ეტაპზეც. უელსმა მაშინ ორ მატჩში ოთხი ქულა აიღო, ერთადერთი გოლი კი გარეტ ბეილმა გაიტანა.
– მატჩი ჩატარდება ქალაქ ლილში, რომელიც ბელგიის საზღვართან ძალზედ ახლოსაა.
უელსის ნაკრების სავარაუდო შემადგენლობა:
ჰენესი; განტერი, ჩესტერი, უილიამსი, დევისი, ტეილორი; ალენი, ლედლი; რემზი, ბეილი; რობსონ-კანუ.
ბელგიის ნაკრების სავარაუდო შემადგენლობა:
კურტუა; მენიე, ალდერვეირელდი, სიმანი, ჯორდან ლუკაკუ; ვიტსელი, ნაინგოლანი; მერტენსი, დე ბრეინე, აზარი; რომელუ ლუკაკუ.
Fanebi.com-ის პროგნოზი
უელსი 1:2 ბელგია
უეფამ ბელგიის სამეფოს ფეხბურთის ფედერაცია ხუთი ათასი ევროთი დააჯარიმა. მიზეზი ბელგიის ნაკრების ქომაგების ქცევა გახდა.
2016 წლის ევროპის ჩემპიონატის ჯგუფურ ეტაპზე ირლანდიის ნაკრების წინააღმდეგ გამართულ მატჩში (3:0) გულშემატკივრებმა მაშხალები დაანთეს და მოედანზე სხვადასხვა საგნები ისროლეს.
შეგახსენებთ, რომ ბელგიის ნაკრები ტურნირის მეოთხედფინალურ ეტაპზე უელსს შეხვდება. მატჩი პირველ ივლისს ჩატარდება.
ბელგიის ნაკრებმა 2016 წლის ევროპის ჩემპიონატზე წასაყვან ფეხბურთელთა განაცხადი გამოაქვეყნა.
მეკარეები: ტიბო კურტუა (“ჩელსი”, ინგლისი), ჟან-ფრანსუა ჟილე (“მეჰელენი”), სიმონ მინიოლე (“ლივერპული”, ინგლისი);
მცველები: ტიბო ალდერვეირელდი (“ტოტენჰემი”, ინგლისი), იან ვერტონგენი (“ტოტენჰემი”, ინგლისი), ჯეისონ დენაიერი (“გალათასარაი”, თურქეთი), ჯორდან ლუკაკუ (“ოსტენდე”), ტომას მენიე (“ბრიუგე”), ტომას ვერმალენი (“ბარსელონა”, ესპანეთი), კრისტიან კაბასელე (“გენკი”), ლორან სიმანი (“სტანდარდი”);
ნახევარმცველები: მუსა დემბელე (“ტოტენჰემი”, ინგლისი), მარუან ფელაინი (“მანჩესტერ იუნაიტედი”, ინგლისი), რაჯა ნაინგოლანი (“რომა”, იტალია), აქსელ ვიტსელი (“ზენიტი”, რუსეთი);
თავდამსხმელები: მიში ბატშუაი (“მარსელი”, საფრანგეთი), კრისტიან ბენტეკე (“ლივერპული”, ინგლისი), დივოკ ორიგი (“ლივერპული”, ინგლისი), იანიკ ფერეირა-კარასკო (“ატლეტიკო”, ესპანეთი), კევინ დე ბრეინე (“მანჩესტერ სიტი”, ინგლისი), ედენ აზარი (“ჩელსი”, ინგლისი), რომელუ ლუკაკუ (“ევერტონი”, ინგლისი), დრის მერტენსი (“ნაპოლი”, იტალია).
შეგახსენებთ, რომ ბელგიელები ევროპის ჩემპიონატის ჯგუფურ ეტაპზე იტალიელების, ირლანდიელებისა და შვედების წინააღმდეგ ითამაშებენ.
ბელგიის ეროვნული ნაკრები ფიფას ნოემბრის თვის რეიტინგში პირველ ადგილზე იქნება. ეს ისტორიული მოვლენაა, რადგან “წითელი ეშმაკები” მსოფლიო ფეხბურთის მმართველი ორგანოს რეიტინგის სათავეში არასდროს მდგარან.
2016 წლის ევროპის ჩემპიონტის საკვალიფიკაციო ეტაპზე ბელგიის ეროვნულმა გუნდმა ისრაელის ნაკრები ანგარიშით 3:1 დაამარცხა და 1440 სარეიტინგო ქულა დააგროვა. რეიტინგის მოქმედ ლიდერ არგენტინის ნაკრებს საუკეთესო შემთხვევაში 1429 ქულა ექნება, გერმანიას კი – 1388. ასე რომ, ბელგიელებს რეიტინგის პირველი ადგილი გარანტირებული აქვთ.
ფიფას განახლებული რეიტინგი 5 ნოემბერს გამოქვეყნდება.
ესპანეთის ეროვნული გუნდი ბელგიის ნაკრებთან ამხანაგურ მატჩს ჩაატარებს.
შეხვედრა ბელგიაში, 17 ნოემბერს გაიმართება.
ეს ვისენტე დელ ბოსკეს გუნდისთვის 2016 წლის ევროპის ჩემპიონატის მოსამზადებელ პერიოდში მეორე მატჩი იქნება. 13 ნოემბერს “ფურია როხა” ინგლისის ნაკრებს გაეჯიბრება.
საფრანგეთის ნაკრებმა პარიზის “სტად დე ფრანსზე” ბელგიის გუნდი მიიღო და ანგარიშით 3:4 დამარცხდა.
50-ე წუთისთვის “წითელი ეშმაკები” უკვე სამბურთიანი უპირატესობით იგებდნენ: დუბლი შეასრულა მარუან ფელაინიმ, ერთი გოლი გაიტანა რაჯა ნაინგოლანმა. 53-ე წუთზე მატიე ვალბუენამ თერთმეტმეტრიანი დარტყმით ერთი ბურთი გაქვითა, თუმცა ერთ წუთში პენალტი საპირისპირო კარის მიმართულებით დაინიშნა, რომლის რეალიზებაც ედენ აზარმა შეძლო. მატჩის მიწურულს ნაბილ ფეკირმა და დიმიტრი პაიემ თითო-თითო ბურთი გაიტანეს და საბოლოო ანგარიში დააფიქსირეს — 3:4.
ამხანაგური მატჩი:
საფრანგეთი — ბელგია 3:4 (0:2)
გოლები: ვალბუენა 53′ (პენ), ფეკირი 89′, პაიე 90+1′ — ფელაინი 17′, 42′, ნაინგოლანი 50′, აზარი 54′ (პენ).
გაფრთხილება: კაბაი 41′.
ლონდონის “ჩელსის” ნახევარმცველი მარკო მარინი, რომელმაც სეზონის პირველი ნახევარი იჯარის წესით იტალიურ “ფიორენტინაში” გაატარა, კარიერას “ანდერლეხტში” გააგრძელებს.
გერმანელი ფეხბურთელი ბელგიურ კლუბში მიმდინარე სეზონის ბოლომდე იჯარის წესით ითამაშებს.
“მოხარული ვარ, რომ ჩემს კარიერას ახალი იმპულსი მიეცა. “ანდერლეხტმა” ევროპაში კარგი სახელი დაიგდო და მეც ძალისხმევას არ დავიშურებ, რომ ამ კლუბს ტიტულების მოგებაში დავეხმარო”, – მარინის სიტყვები “ანდერლეხტის” ოფიციალურ ვებგვერდზე გამოქვეყნდა.
მარკო მარინი “ანდერლეხტში” 11-ნომრიან მაისურს მოირგებს.
“ბარსელონას” ყოფილი თავდამსხმელის, ბოიან კრკიჩის მამამ, რომელიც 2011 წლამდე კატალონიური გუნდის სკაუტად მუშაობდა, განაცხადა, რომ “ბლაუგრანას” თავის დროზე ტიბო კურტუასა და რაფაელ ვარანის დამატება შეეძლო. იმ პერიოდში ბელგიელი მეკარე “გენკში” თამაშობდა, ფრანგი მცველი კი “ლანსის” ღირსებას იცავდა. საბოლოო ჯამში, ისე მოხდა, რომ კურტუა “ჩელსიში” გადავიდა, ვარანმა კი მადრიდის “რეალს” მიაშურა.
“როდესაც კურტუა ბელგიაში თამაშობდა, ჩვენ მისი დამატების შანსი გვქონდა. ეს “ბარსაში” ჩემი მუშაობის უკანასკნელი წელი იყო. 19 წლის ტიბო “გენკის” ძირითადი მეკარე გახდა. ჩვენი ერთ-ერთი აგენტი მასთან მოლაპარაკებას აწარმოებდა. მისი თამაშის ამსახველი ბევრი ვიდეო ვნახეთ და საკმაოდ კარგი შთაბეჭდილებაც შეგვექმნა, თუმცა “ბარსელონამ” აღნიშნულ ტრანსფერში 3 მილიონი ევრო არ გაიღო. ერთი თვის შემდეგ კურტუა “ჩელსიმ” გაიფორმა.
ვარანმა ჩვენი ინტერესი მაშინ მიიქცია, როდესაც ის საყრდენი ნახევარმცველის პოზიციაზე თამაშობდა. მაშინ ვთქვი, რომ ამ ფეხბურთელისთვის ყურადღება უნდა მიგვექცია. ერთ-ერთი აგენტი “ლანსსა” და “მონაკოს” შორის გამართულ მატჩს დაესწრო, თუმცა იქიდან დაბრუნებულმა განაცხადა, რომ ვარანმა მასზე შთაბეჭდილება ვერ მოახდინა. ასე დასრულდა ეს ისტორია”, – ციტირებს კრკიჩის მამის სიტყვებს Cadena SER-ი.
ბრაზილიაში მიმდინარე მსოფლიოს ჩემპიონატის წყალობით 17 წლის ბელგიელი გოგონა აქსელ დესპიგელარი იმდენად პოპულარული გახდა, რომ მას ცნობილი კომპანიები სამოდელოდ იწვევენ.
მუნდიალზე ბელგიის ნაკრების მონაწილეობით გამართულ მატჩებში აქსელ დესპიგელარი არაერთხელ მოხვდა როგორც ფოტო, ასევე ვიდეოობიექტივში. სამშობლოში დაბრუნებულმა კი აღმოაჩინა, რომ სოციალურ ქსელში მეგობრობის ათი ათასამდე თხოვნა ჰქონდა. მისმა თაყვანისმცემლებმა სპეციალური გვერდიც შექმნეს, რომელმაც მალევე მოიპოვა ვერიფიკაცია. გარდა ამისა, ფრანგულმა კოსმეტიკურმა კომპანია „ლორეალმა“ 17 წლის გოგონა სამოდელოდ მიიწვია. ცნობილმა ფირმამ აქსელს ხელსაყრელი კონტრაქტი და კომპანიის სარეკლამო რგოლში მონაწილეობა შესთავაზა, რასაც სოლიდური ანაზღაურებაც მოჰყვება.
