ტურინის “იუვენტუსისა” და საფრანგეთის ეროვნული ნაკრების ფეხბურთელი პოლ პოგბა აცხადებს, რომ მსოფლიოს ჩემპიონატზე თამაში კარგია, მაგრამ ამ ტურნირის მოგება უკეთესია.
“ჩემი ოცნება უკვე ახდა. ძალიან გახარებული ვარ, მაგრამ ეს დასასრული არ არის. მსოფლიოს ჩემპიონატზე თამაში კარგია, მაგრამ ამ ტურნირის მოგება უკეთესია. იმედი მაქვს, რომ ჩვენ თასის მოპოვებას შევძლებთ”, – ამბობს პოგბა.
წარმოგიდგენთ ვიდეოს, რომელშიც ასახულია, თუ როგორ ჩავიდა საფრანგეთის ნაკრები ბრაზილიაში, სადაც ორ დღეში მსოფლიოს ჩემპიონატი დაიწყება.
საფრანგეთის ნაკრების თავდამსხმელი ოლივიე ჟირუ იმედს გამოთქვამს, რომ „მამლები“ 2010 წელს გამართულ მსოფლიოს ჩემპიონატზე განცდილი კრახის რეაბილიტაციას წლევანდელ მუნდიალზე შეძლებენ. შეგახსენებთ, რომ სამხრეთ აფრიკაში გამართულ მსოფლიოს ჩემპიონატზე ფრანგები ჯგუფში ჩარჩნენ.
„ხალხს ჯერ კიდევ კარგად ახსოვს 1998 წლის გამარჯვება. ამიტომ, მათ კვლავ დიდი მოლოდინი აქვთ. კი ბატონო, ჩვენი გუნდი მეტწილად შეიცვალა, თუმცა სამხრეთ აფრიკაში განცდილი იმედგაცრუების შეცვლა წელს შეგვიძლია. ვეცდებით, რომ ეს შანსი გამოვიყენოთ“, – ჟირუს სიტყვებს „ტუტომერკატო“ აქვეყნებს.
მსოფლიოს ჩემპიონატის ჯგუფურ ეტაპზე საფრანგეთს მეტოქეებად ეკვადორის, ჰონდურასისა და შვეიცარიის ნაკრებები ჰყავს. ფრანგები სასტარტო შეხვედრას 15 ივნისს ჰონდურასის ნაკრების წინააღმდეგ ჩაატარებენ.
ბექა დოგრაშვილი
საფრანგეთის ნაკრებმა მოახლოებული მსოფლიოს ჩემპიონატისთვის თავისი საბოლოო განაცხადი დაასახელა.
მეკარეები: ლიორისი („ტოტენჰემი“), რუფიე („სენტ-ეტიენი“), ლანდრო („ბასტია“)
მცველები: ვარანი (მადრიდის „რეალი“), სახო („ლივერპული“), დებუში („ნიუკასლი“), კოშელნი („არსენალი“), დინი (პსჟ), მანგალა („პორტუ“), სანია (“არსენალი“), ევრა („მანჩესტერ იუნაიტედი“)
ნახევარმცველები: კაბაიე (პსჟ), პოგბა („იუვენტუსი“), მატუიდი (პსჟ), სისოკო („ნიუკასლი“), გრენიე („ლიონი“), მავუბა („ლილი“), ვალბუენა („მარსელი“), რიბერი (მიუნხენის „ბაიერნი“)
თავდამსხმელები: ბენზემა (მადრიდის „რეალი“), გრიზმანი („რეალ სოსიედადი“), ჟირუ („არსენალი“), რემი („ნიუკასლი“)
ინტერნეტ-სივრცეში გავრცელდა ვიდეო, რომელშიც აღბეჭდილია, თუ რას აკეთებს საფრანგეთის ნაკრების ვარჯიშზე პოლ პოგბა.
27 მაისს, საფრანგეთისა და ნორვეგიის ეროვნულ ნაკრებებს შორის ამხანაგური მატჩი გაიმართა, რომელიც ფრანგთა გამარჯვებით 4:0 დასრულდა.
აღნიშნულ შეხვედრაში ოლივიე ჟირუს მიერ გატანილი გოლი საკმაოდ ლამაზი გამოდგა.
საფრანგეთის ნაკრების მთავარმა მწვრთნელმა დიდიე დეშამმა განაცხადა, რომ ნახევარმცველი ფრანკ რიბერი, დიდი ალბათობით, ხვალინდელ ამხანაგურ მატჩს გამოტოვებს, რომელშიც მისი გუნდი ნორვეგიას შეხვდება.
„ფრანკს რამდენიმე კვირის განმავლობაში ზურგის პრობლემები აწუხებს. ამის გამო გარისკვა არ მსურს“, – განაცხადა „მამალთა“ თავკაცმა.
ნორვეგიასთან მატჩი იმ სამი ამხანაგური შეხვედრის შორისაა, რომელსაც ფრანგები მსოფლიოს ჩემპიოანტის წინ გამართავენ.
ალექსანდრე მატევოსოვი
ტურინის “იუვენტუსისა” და საფრანგეთის ეროვნული ნაკრების ფეხბურთელი პოლ პოგბა აცხადებს, რომ მას მსოფლიოს ჩემპიონატზე თამაში ბავშვობიდან სურდა.
შეგახსენებთ, რომ ახალგაზრდა ნახევარმცველმა გასულ წელს მსოფლიოს 20-წლამდელთა მსოფლიოს ჩემპიონატზეც ითამაშა, სადაც ტურნირის საუკეთესო ფეხბურთელად დაასახელეს.
“რა თქმა უნდა, მსოფლიოს ჩემპიონატზე თამაში ბავშვობიდან მსურდა, ეს ჩემი ოცნება იყო. იმედი მაქვს, რომ მუნდიალზე კარგად ვიასპარეზებთ და მის მოგებასაც მოვახერხებთ”, – ამბობს პოგბა.
საფრანგეთის ეროვნული ნაკრები მსოფლიოს 2014 წლის ჩემპიონატისათვის მზადებას განაგრძობს. ინტერნეტ-სივრცეში კი გავრცელდა ვიდეო, რომელშიც ვალბუენასა და რემის მიერ გატანილი ლამაზი გოლებია აღბეჭდილია.
საფრანგეთის ნაკრების მთავარმა მწვრთნელმა დიდიე დეშამმა განაცხადა, რომ ფეხბურთელთა მხრიდან სოციალური ქსელის მოხმარებას ლიბერალურად უყურებს, თუმცა ფეხბურთის ფრანგი სპეციალისტი იქვე დასძენს, მსოფლიოს ჩემპიონატის მიმდინარეობისას გუნდის წევრების მიერ ქსელის ხშირ გამოყენებას არ დავუშვებო.
„ჯერ არ იციან, რა წესებით ვიმოქმედებთ ბრაზილიაში. ყველაფერს მე განვსაზღვრავ. სოციალური ქსელები თითოეული ადამიანის პირადი თავისუფლების ნაწილია, მაგრამ იმედი მაქვს, რომ საღი აზრი გაიმარჯვებს. ქსელში შეიძლება ვინმეს მიესალმო, გამოემშვიდობო, ეს კარგია და არ მაღელვებს, თუმცა არ დავუშვებ არაფრისმომცემ მიმოწერას, რაც გუნდის ინტერესებს ეწინააღმდეგება. ეს იქნება უპირველესი წესი“, – დეშამის სიტყვებს L’Equipe-ი აქვეყნებს.
შეგახსენებთ, რომ საფრანგეთს მსოფლიოს ჩემპიონატის ჯგუფურ ეტაპზე მეტოქეებად შვეიცარიის, ეკვადორისა და ჰონდურასის ნაკრებები ჰყავს. მუნდიალის დაწყებამდე 23 დღე დარჩა.
ბექა დოგრაშვილი
17 მაისს, საფრანგეთის ჩემპიონატში “რემსა” და “რენსს” შორის გამართულ მატჩში, “რენის” თავდამსხმელმა პოლ-ჟორჟ ნტეპმა საკმაოდ ორიგინალური გოლი გაიტანა.
როგორც მოგეხსენებათ, საფრანგეთის ეროვნული ნაკრების მთავარმა მწვრთნელმა დიდიე დეშამმა მსოფლიოს 2014 წლის ჩემპიონატისათვის 23-კაციანი განაცხადი წარადგინა, რომელშიც ვერ მოხვდა „მანჩესტერ სიტის“ ნახევარმცველი სამირ ნასრი. „მამალთა“ დამრიგებელმა მოგვიანებით ამ გადაწყვეტილების მიზეზებზე ისაუბრა.
„ნასრი შესანიშნავი ფეხბურთელია, მაგრამ ის არ აკმაყოფილებს იმ კრიტერიუმებს, რაც საფრანგეთის ნაკრებში სათამაშოდ არის საჭირო. მას არ მოსწონს, როცა ცვლიან და ამას ღიად გამოხატავს, რაც ნეგატიურად აისახება გუნდის ატმოსფეროზე. ჩვენ ფეხბურთელებს ვაფასებთ არამხოლოდ პროფესიული თვალსაზრისით, არამედ პიროვნული თვისებებითაც. დამიჯერეთ, ეს განაცხადი სამ დღეში არ შემიდგენია“, – დეშამის სიტყვებს „ტუტომერკატო“ ციტირებს.
ბექა დოგრაშვილი
