რიკარდო კაკამ „მილანი“ დატოვა. ინფორმაციას ამის შესახებ „როსონერის“ ოფიციალური ვებ-გვერდი აქვეყნებს.
კონტრაქტი ურთიერთშეთანხმების საფუძველზე გაწყდა.
32 წლის ბრაზილიელმა ფეხბურთელმა იტალიის სერია A-ს გასულ სეზონში 30 მატჩი ჩაატარა და 7 გოლი გაიტანა.
გავრცელებული ინფორმაციის თანახმად, კაკა „ორლანდო სიტისთან“ გააფორმებს ხელშეკრულებას, თუმცა იჯარის წესით მშობლიურ „სან პაულოში“ ითამაშებს.
„მილანმა“ ნახევარმცველ სალი მუნტარისთან კონტრაქტი ერთი წლით გაახანგრძლივა.
ახალი ხელშეკრულება ძალაში 2016 წლის 30 ივნისამდე იქნება.
განელი ფეხბურთელი „როსონერის“ ღირსებას 2012 წლიდან იცავს.
სალი მუნტარიმ იტალიის სერია A-ს გასულ სეზონში 26 მატჩი ჩაატარა და 5 გოლი გაიტანა.
როგორც მოსალოდნელი იყო, ფრანგი ნახევარმცველი ჟერემი მენეზი „მილანში“ გადაბარგდა. 27 წლის ფეხბურთელმა „როსონერისთან“ 2017 წლის 30 ივნისამდე გააფორმა კონტრაქტი.
მენეზი „მილანს“ თავისუფალი აგენტის სტატუსით შეუერთდა.
საფრანგეთის ჩემპიონატის გასულ გათამაშებაში მენეზმა 20 მატჩი ჩაატარა და ორი გოლი გაიტანა.
როგორც მოსალოდნელი იყო, „მილანმა“ კლუბის მთავარი მწვრთნელის პოსტიდან კლარენს ზეედორფი გაათავისუფლა.
„როსონერის“ თავკაცის თანამდებობაზე ფილიპო ინძაგი დაინიშნა. მხარეებს შორის კონტრაქტი 2016 წლის 30 ივნისამდე გაფორმდა.
შეგახსენებთ, რომ ინძაგი მანამდე კლუბის ახალგაზრდულ შემადგენლობას თავკაცობდა. აღნიშნულ პოსტზე ის 2012 წლიდან მუშაობდა. 40 წლის მწვრთნელი მოთამაშის რანგში „მილანის“ ღირსებას 2001-2012 წლებში იცავდა. მან გუნდთან ერთად ორ-ორჯერ მოიგო სერია A და ჩემპიონთა ლიგა. პიპომ კლუბის რიგებში ჩატარებულ 202 მატჩში 73 გოლი გაიტანა.
ბექა დოგრაშვილი
„მილანის“ პრეზიდენტი სილვიო ბერლუსკონი დარწმუნებულია ფილიპო ინძაგი კლუბის მთავარი მწვრთნელის პოსტზე მუშაობას თავს წარმატებით გაართმევს.
მოგახსენებთ, რომ ფეხბურთის 40 წლის სპეციალისტი უახლოეს საათებში ოფიციალურად უნდა გამოცხადდეს კლარენს ზეედორფის შემცვლელად.
„ინძაგიმ დიდი სამუშაო გასწია. ვხედავ, რომ მას გამარჯვება სწყურია. ამასთანავე, კარგად ესმის, რომ მისგან გამარჯვებებსა და გულშემატკივრების გახარებას ელიან“, – განაცხადა ბერლუსკონიმ.
ფრანგული „პარი სენ-ჟერმენის“ მცველი ალექსი „მილანში“ გადავიდა. ბრაზილიელმა ფეხბურთელმა იტალიურ კლუბში დღეს სამედიცინო შემოწმება გაიარა და ორწლიან კონტრაქტსაც მოაწერა ხელი.
ალექსი პარიზული კლუბის ღირსებას 2012 წლის იანვრიდან 2014 წლის ივნისამდე იცავდა. ამ დროის განმავლობაში მან საფრანგეთის ჩემპიონატი, ქვეყნის თასი და სუპერთასი მოიგო. 17 ივნისს ფეხბურთელს 32 წელი შეუსრულდება.
„მილანის“ თავდამსხმელ კეისუკე ჰონდას კლუბში დარჩენის საკითხი კითხვის ნიშნის ქვეშ დადგა.
თუ „როსონერის“ მთავარი მწვრთნელის პოსტზე ფილიპო ინძაგი დაინიშნება, 27 წლის იაპონელ ფეხბურთელს კლუბიდან აბარგება მოუწევს. ინძაგი ჰონდას „მილანში“ დარჩენის საჭიროებას ვერ ხედავს. ამ ინფორმაციას ავტორიტეტული იტალიური გამოცემა „კორიერე დელო სპორტი“ აქვეყნებს.
შეგახსენებთ, რომ ჰონდას „მილანთან“ მოქმედი კონტრაქტი 2017 წელს ეწურება, თუმცა არ არის გამორიცხული, ხელშეკრულება მიმდინარე ზაფხულში გაწყდეს.
შეგახსენებთ, რომ იაპონელმა ნახევარმცველმა იანვრის თვეში მოსკოვის ცსკა თავისუფალი აგენტის სტატუსით დატოვა და „მილანს“ მიაშურა. ჰონდამ „როსონერის“ რიგებში 14 მატჩი ჩაატარა და ერთი გოლი გაიტანა.
ბექა დოგრაშვილი
„ფრანს ფუტბოლის“ ცნობით, „პარი სენ-ჟერმენის“ ნახევარმცველი ჟერემი მენეზი საკუთარ აგენტთან ერთად იბიცას ერთ-ერთ რესტორანში „მილანის“ ვიცე-პრეზიდენტ ადრიანო გალიანისა და „როსონერის“ შესაძლო მომავალ მთავარ მწვრთნელ ფილიპო ინძაგის შეხვდა.
საუბრისას იტალიურმა მხარემ ფრანგი ფეხბურთელის მიმართ ინტერესი გამოხატა. წყაროს თანახმად, მენეზი „მილანის“ შემოთავაზებით მოიხიბლა და ლომბარდიაში გადასასვლელადაც დაიწყო მზადება. მოგეხსენებათ, მისთვის იტალია უცხო არ არის, 2008–2011 წლებში „რომას“ ღირსებას იცავდა.
„როსონერის“ გარდა, 27 წლის ნახევარმცველის მიმართ ინტერესს ტურინის „იუვენტუსი“, მადრიდის „ატლეტიკო“, „მონაკო“, „რომა“ და „ვალენსია“ იჩენენ.
შეგახსენებთ, რომ ჟერემი მენეზს „პარი სენ-ჟერმენთან“ მოქმედი კონტრაქტი ამა წლის 30 ივნისს ეწურება. შესაბამისად, ის ახალ კლუბში თავისუფალი აგენტის სტატუსით გადავა.
ბექა დოგრაშვილი
Goal.com-ის ცნობით, „მილანის“ მთავარი მწვრთნელის პოსტზე ახალგაზრდული გუნდის თავკაცის, ფილიპო ინძაგის კანდიდატურას განიხილავენ. შეგახსენებთ, რომ „როსონერის“ ამჟამად კლარენს ზეედორფი ხელმძღვანელობს.
ახალგაზრდა ჰოლანდიელ სპეციალისტს კლუბი მას შემდეგ ჩააბარეს, რაც მთავარი მწვრთნელის პოსტიდან მასიმილიანო ალეგრი გაათავისუფლეს.
მანამდე გავრცელებული ინფორმაციის თანახმად, „მილანის“ ხელმძღვანელობა კლუბის თავკაცის პოსტზე „სევილიას“ თავკაცის, უნაი ემერის კანდიდატურას განიხილავდა, თუმცა მხარეებს შორის კონტრაქტის დეტალებზე შეთანხმება არ შედგა.
შეგახსენებთ, რომ ინძაგი „მილანის“ ახალგაზრდულ გუნდს 2012 წლიდან თავკაცობს. 40 წლის მწვრთნელი მოთამაშის რანგში „მილანის“ ღირსებას 2001-2012 წლებში იცავდა. მან გუნდთან ერთად ორ-ორჯერ მოიგო სერია A და ჩემპიონთა ლიგა.
ბექა დოგრაშვილი
„მილანის“ ვიცე-პრეზიდენტი ადრიანო გალიანი გუშინ კლუბის ბაზას ეწვია, სადაც ფეხბურთელებს მათი ახალი თანაგუნდელი – 15 წლის ჰაშიმ მასტური წარუდგინა.
ამიერიდან ახალგაზრდა ფეხბურთელი „როსონერის“ პირველ გუნდში ივარჯიშებს. მასტური თავის პირველ პროფესიულ კონტრაქტს 15 ივნისს გააფორმებს, როდესაც მას 16 წელი შეუსრულდება.
შეგახსენებთ, რომ ჰაშიმ მასტური მსოფლიოს მასშტაბით ყველაზე ნიჭიერ ახალგაზრდა ფეხბურთელად არის დასახელებული.
აქვე გთავაზობთ მისი თამაშის ამსახველ ვიდეომასალას.
იტალიის სერია A-ს ცენტრალური შეხვედრა „ჯუზეპე მეაზაზე“ გაიმართა, სადაც „მილანი“ თანაქალაქელ „ინტერს“ დაუპირისპირდა. მატჩის ბედი ერთადერთმა გოლმა გადაწყვიტა, რომელიც 65-ე წუთზე ნაიჯელ დე იონგმა თავური დარტყმით გაიტანა. დარჩენილ დროში ბევრი საინტერესო არც არაფერი მომხდარა და „მილანმა“ „დერბი დელა მადონინა“ ანგარიშით 1:0 გაიმარჯვა.
ამ გამარჯვებით „მილანმა“ 54 ქულას მოუყარა თავი და მე-8 პოზიციაზე აღზევდა. „ინტერი“ 57 ქულით მე-5 ადგილზე დარჩა.
იტალიის სერია A
36-ე ტური
„მილანი“ — „ინტერი“ 1:0 (0:0)
გოლი: დე იონგი 65′.
გაფრთხილებები: მექსესი 16′, დე იონგი 89′, აბიატი 90+2′ —კამბიასო 39′, სამუელი 75′, რანოკია 80′.
„მილანის“ ნახევარმცველი კაკა იმედს გამოთქვამს, რომ კლუბის ფეხბურთელები იტალიის ჩემპიონატის სატურნირო ცხრილში მდგომარეობას გამოასწორებენ. „როსონერი“ სერია А-ს ბოლო სამ მატჩში სამჯერ დამარცხდა და ცხრილში მე-12 პოზიციამდე დაქვეითდა.
„მილანში“ დაბრუნება არასდროს მინანია, სირთულეები ცხოვრების ნაწილია. „როსონერი“ ჯერ კიდევ რჩება დიად კლუბად, რომელსაც ყველანაირი სიძნელის გადალახვა შეუძლია.
თქმა არ უნდა იმას, რომ ჩვენი შედეგები არც მე და არც ჩემს თანაგუნდელებს არ აკმაყოფილებთ. სიტუაცია თავად იმ ფეხბურთელებმა უნდა გამოასწორონ, რომლებიც მოედანზე სათამაშოდ გადიან“, – ციტირებს კაკას სიტყვებს „სპორტ მედიასეტი“.
შეგახსენებთ, რომ „მილანი“ დამდეგ მატჩს დღეს, სტუმრად რომის „ლაციოსთან“ გამართავს. შეხვედრა თბილისის დროით 23:45 საათზე დაიწყება.
ბექა დოგრაშვილი
