ესპანეთის ფეხბურთის ფედერაციის პრესსამსახურის ცნობით, „ფურია როხა“ მსოფლიოს ჩემპიონატის დაწყებამდე ამერიკის შეერთებული შტატების პრეზიდენტ ბარაკ ობამას შეხვდება. დღეს ვისენტე დელ ბოსკეს გუნდი ვაშინგტონში გაემგზავრა, სადაც ხუთ დღეს დაჰყოფს. ფეხბურთელები თეთრ სახლს ეწვევიან და პრეზიდენტ ობამას შეხვდებიან.
შეგახსენებთ, რომ 7 ივნისს ესპანელები ვაშიგტონში სალვადორის ნაკრებს ამხანაგურად გაეჯიბრებიან.
მსოფლიოს ჩემპიონატზე ესპანეთს B ჯგუფში მეტოქეებად ავსტრალიის, ჩილესა და ჰოლანდიის ნაკრებები ჰყავს.
„მარკას“ ცნობით, მადრიდის „რეალისა“ და ესპანეთის ნაკრების ნახევარმცველმა ჩაბი ალონსომ გადაწყვიტა, რომ 2014 წლის მსოფლიოს ჩემპიონატის შემდეგ საერთაშორისო კარიერა დაასრულოს. შეგახსენებთ, რომ 32 წლის ფეხბურთელი ესპანეთის ნაკრების საბოლოო სამუნდიალო განაცხადში მოხვდა.
ჩაბი ალონსოს „ფურია როხას“ რიგებში 109 მატჩი აქვს ჩატარებული. ბასკი ნახევარმცველი ესპანეთის ეროვნულ ნაკრებში 2003 წლიდან გამოდის.
შეგახსენებთ, რომ მიმდინარე წელს ალონსომ „რეალთან“ ორწლიანი კონტრაქტი გაფორმა. ასე რომ, წლევანდელი მუნდიალის შემდეგ ბასკი ფეხბურთელი მთლიანად საკლუბო ფეხბურთეზე გააკეთებს აქცენტს.
პორტუგალიის ნაკრების ყოფილ ნახევარმცველ ლუიშ ფიგუს ეჭვი ეპარება იმაში, რომ ესპანელები მსოფლიოს ჩემპიონის ტიტულს დაიცავენ. პორტუგალიელის თქმით, 2014 წლის მუნდიალის მთავარი ფავორიტი ბრაზილიის ნაკრებია.
„არა მგონია, ესპანეთის ნაკრებმა მსოფლიოს ჩემპიონატის მოგება მოახერხოს. ამ გუნდს გამარჯვებისთვის საჭირო ხარისხი არ გააჩნია. ესპანელებისთვის მუნდიალის მოგება რთული იქნება, თუმც არა შეუძლებელი.
ვფიქრობ, რომ ტურნირის მასპინძელ ბრაზილიას ჩემპიონობის ყველაზე დიდი შანსი აქვს. ლუიშ ფელიპე სკოლარის კარგად ვიცნობ. ის ამ ტიტულის მოსაპოვებლად ზედგამოჭრილი მწვრთნელია. ბრაზილიელ ფეხბურთელებს გულშემატკივართა მხრიდან გამხნევება გარანტირებული აქვთ. ბრაზილიის ნაკრების წინააღმდეგ თამაში ყველას გაუჭირდება.
რთული გზა აქვს პორტუგალიის ნაკრებსაც. ჩემს ქვეყანაში 11 მილიონი ადამიანი ცხოვრობს და ადვილია არ არის, იპოვო 18-20 პორტუგალიელი, რომელსაც მსოფლიოს ჩემპიონატის მოგება შეეძლება. ამასთან ერთად, გუნდი მნიშვნელოვნად არის დამოკიდებული კრიშტიანუ რონალდუზე“, – ფიგუს სიტყვებს goal.com-ი ციტირებს.
პორტუგალიელმა ჩემპიონთა ლიგის ფინალის შესახებაც ისაუბრა და აღნიშნა, რომ ფავორიტად მადრიდის „რეალს“ თვლის.
„ჩემი აზრით, ჩემპიონთა ლიგას „რეალი“ მოიგებს, რადგან კლუბმა ეს ტიტული უკანასკნელად 2002 წელს დაისაკუთრა, როცა ამ გუნდის ნაწილი მეც გახლდით. ასე რომ, ეს მატჩი მეტად მნიშვნელოვანია. იმედი მაქვს, „რეალი“ გაიმარჯვებს, თუმცა კარგად მოგეხსენებათ, რომ ფინალში ყველაფერი შესაძლებელია“, – განაცხადა ლუიშ ფიგუმ.
აქვე შეგახსენებთ, რომ „რეალსა“ და მადრიდის „ატლეტიკოს“ შორის ჩემპიონთა ლიგის ფინალური მატჩი 24 მაისს, თბილისის დროით 22:45 საათზე დაიწყება.
მადრიდის „ატლეტიკოს“ თავდამსხმელი დავიდ ვილია იმედოვნებს, რომ ესპანეთის ნაკრების სამუნდიალო განაცხადში მოხვდება.
„მწვრთნელი საუკეთესო გადაწყვეტილებას მიიღებს. უკვე რამდენიმე წელია, ესპანეთის ნაკრებს საკმაოდ ძლიერი ფეხბურთელები ჰყავს, რაც ვისენტე დელ ბოსკეს ამოცანას ართულებს. რა თქმა უნდა, მინდა, რომ მსოფლიოს ჩემპიონატზე თამაშის შესაძლებლობა კიდევ მომეცეს. ძალისხმევას არ დავიშურებ, რომ 2010 წელს მოგებული ტიტული დავიცვა. იმედი მაქვს, განაცხადში მოვხვდები. ვფიქრობ, ჩემი გამოცდილება ნაკრებს დაეხმარება. ვგრძნობ, რომ კვლავ შემიძლია, გუნდს სარგებელი მოვუტანო“, – ვილიას სიტყვებს „ტუტომერკატო“ ციტირებს.
აქვე შეგახსენებთ, რომ დელ ბოსკე 25 მაისს სამუნდიალო განაცხადის გაფართოებულ ვერსიას გამოაქვეყნებს, რომელშიც 30 ფეხბურთელი იქნება შეყვანილი. საბოლოოდ, მსოფლიოს ჩემპიონატზე 23 ესპანელი მოთამაშე გაემგზავრება, რომელთა ვინაობაც 2 ივნისს გაირკვევა.
წინა კვირის ერთ-ერთ მთავარ თემად „ელ მადრიგალზე“ მომხდარი ამბავი იქცა, როდესაც „ბარსელონას“ მცველ დანი ალვესს „ვილიარეალის“ გულშემატკივარმა ტრიბუნიდან ბანანი ესროლა. ბრაზილიელმა ფეხბურთელმა გადმოგდებული ხილი აიღო და მიირთვა, მეორე დღეს კი მთელი მსოფლიოს მასშტაბით ანტირასისტული კამპანია აგორდა. როგორც ირკვევა, ალვესის ქმედება სპონტანური არ ყოფილა, მან მიზანმიმართულად შეჭამა ბანანი, რადგან ანტირასისტული აქცია სახელწოდებით „ჩვენ ყველანი მაიმუნები ვართ“ – წინასწარ დაგეგმილი იყო.
ესპანური გაზეთი „ასი“ წერს, რომ მსგავსი ინციდენტი „ესპანიოლსა“ და „ბარსელონას“ შორის რამდენიმე კვირის წინათ გამართულ მატჩშიც მოხდა. იმ შეხვედრაში ნეიმარი და დანი ალვესი რასისტული შეძახილებით „შეამკეს“ და ტრიბუნიდან ბანანიც ისროლეს. მომხდარ ინციდენტს ბრაზილიელმა პიარსპეციალისტებმა ყურადღება მიაქციეს და მსგავსი ინციდენტის სათავისოდ გამოყენება გადაწყვიტეს.
ამ საშვილიშვილო საქმეს სააგენტო Loducca-მ მოჰკიდა ხელი, რომელმაც მიიღო გადაწყვეტილება, რომ ბანანის სროლის შემთხვევაში, ფეხბურთელს ის უნდა შეეჭამა. თავდაპირველად ჩაფიქრებული იყო, რომ ამას ნეიმარი გააკეთებდა, ვინაიდან, როგორც წესი, ის ექცევა ხოლმე ყურადღების ცენტრში, თუმცა „ვილიარეალთან“ მატჩში ბანანი დანი ალვესს ესროლეს და ბანანის შეჭმაც ბრაზილიელ მცველს მოუწია.
„მოქმედება უფრო ღირებულია, ვიდრე ნებისმიერი სიტყვა. ჟესტს არ სჭირდება თარგმნა. როგორც დაინახეთ, ამ ქმედებამ მთელი მსოფლიო მოიცვა. ჩაფიქრებული იყო, რომ ბანანს ნეიმარი შეჭამდა, მაგრამ ეს ალვესმა გააკეთა. იდეამ მაინც იმუშავა. ჩვენ შევქმენით ჰეშთეგები #somostodosmacacos და #weareallmonkeys, რომლებმაც რასიზმის წინააღმდეგ სწორი ორიენტირი აიღო. იმედია, მსგავს ფაქტს ანალოგი აღარ ექნება“, – განაცხადა კომპანია Loducca-ს წარმომადგენელმა გუგა კეტცერმა.
საბოლოო ჯამში, რასისტული ქმედების მსხვერპლად თავად ბანანის მსროლელი იქცა. სტადიონის უსაფრთხოების სამსახურმა ხულიგანი რამდენიმე საათში ამოიცნო და მას მთელი სიცოცხლის განმავლობაში „ელ მადრიგალზე“ შესვლა აუკრძალა. თუმცა, მას მხოლოდ ეს არ აკმარეს. ესპანური გამოცემა „ელ პაისი“ წერს, რომ სამშაბათს ბანანის მსროლელი გულშემატკივარი პოლიციამ დააკავა. აქამდე დამნაშავის ვინაობას არ ასახელებდნენ, თუმცა ესპანურმა „მარკამ“ გაარკვია, რომ მას დავიდი ჰქვია, არის 25 წლის, ითვლება „ვილიარეალის“ ოფიციალური ფან-კლუბის წევრად. გარდა ამისა, გამოცემამ ფოტოც მოიპოვა, რომელზეც დავიდი „ვილიარეალის“ პრეზიდენტ ფერნანდო როიგ ალფონსოსთან ერთად არის გამოსახული.
ესპანეთის ნაკრების მთავარი მწვრთნელი ვისენტე დელ ბოსკე თვლის, რომ ფეხბურთში რასიზმი არ არსებობს.
„ფეხბურთში რასიზმი არ არის, საერთოდ არ არის“, – ციტირებს დელ ბოსკეს სიტყვებს Football Espana.
შეგახსენებთ, რომ გასულ უქმეებზე ესპანეთში სკანდალი მოხდა, როდესაც „ვილიარეალსა“ და „ბარსელონას“ შორის გამართულ მატჩში (2:3) კატალონიური გუნდის ბრაზილიელ მცველ დანიელ ალვესს ტრიბუნიდან ბანანი ესროლეს.
„ვილიარეალის“ უსაფრთხოების სამსახურმა დამნაშავე პირი ამოიცნო, მისი აბონემენტის ანულირება მოახდინა და სტადიონზე მთელი სიცოცხლის განმავლობაში აუკრძალა შესვლა.
„ამას ყველა არ აკეთებს. მინდა, მჯეროდეს, რომ ეს ერთეული შემთხვევებია. ფეხბურთში რასიზმი არ არსებობს“, – დაამატა დელ ბოსკემ.
აქვე გეტყვით, რომ დელ ბოსკე 25 მაისს სამუნდიალო განაცხადის გაფართოებულ ვერსიას გამოაქვეყნებს, რომელშიც 30 ფეხბურთელი იქნება შეყვანილი. საბოლოოდ, მსოფლიოს ჩემპიონატზე 23 მოთამაშე გაემგზავრება, რომელთა ვინაობაც 2 ივნისს გაირკვევა.
„ბარსელონა“ ჩემპიონთა ლიგის მიმდინარე გათამაშებას გამოეთიშა. კატალონიურმა გუნდმა მადრიდის „ატლეტიკოს“ ბარიერი ვერ დაძლია. წყვილის პირველი შეხვედრა, რომელიც „ნოუ კამპზე“ გაიმართა, ფრედ, ანგარიშით 1:1 დასრულდა. „ვისენტე კალდერონზე“ „ატლეტიკომ“ მე-5 წუთზევე დაწინაურდა და შემდეგ კარი მშრალად შეინახა. ამრიგად მადრიდულმა კლუბმა ორი მატჩის ჯამში მეტოქე 2:1 დაამარცხა. მეორე შეხვედრაში კატალონიელთა მხრიდან ერთ-ერთი (თუ არა ერთადერთი) სასიკეთო ფაქტი ის იყო, რომ ჩავი ერნანდესს მატჩის მიმდინარეობისას გაკეთებული ასი გადაცემიდან ასივე ზუსტი გამოუვიდა, რაც ამ სტატისტიკური მონაცემის არსებობის ისტორიაში პირველი შემთხვევაა.
როგორც ამბობენ, კატალონიელი ნახევარმცველი ფეხბურთს მიღმაც სამაგალითო პიროვნებაა. გთავაზობთ ინტერვიუს ჩავისთან, რომელშიც ის სწორედ არასაფეხბურთო კუთხით არის წარმოჩენილი.
— ვინ არის თქვენი კერპი სპორტში?
— ამასთან დაკავშირებით ჩემი აზრი უკვე დავაფიქსირე. ვფიქრობ, ბოლო 20-წლეულის საუკეთესო ნახევარმცველი პოლ სქოულზია. ის მისაბაძი ფიგურაა. რაც შეეხება „ბარსელონას“ ცენტრალურ ნახევარმცველებს, აქ ჩემი გმირი პეპ გვარდიოლა იყო.
— ვინ იქნებოდით, რომ არა სპორტსმენი?
— სხვა მრავალი ფეხბურთელის მსგავსად, თამაში „ლა მასიაში“, 11 წლის ასაკში დავიწყე. ვერ წარმომიდგენია, „ბარსელონას“ მოთამაშე რომ არ ვიყო. უფრო წარმოუდგენელია, საერთოდ ფეხბურთს რომ არ ვთამაშობდე. სხვაგან თამაშის სურვილი არც მაქვს.
— რომელია თქვენი კარიერის ყველაზე დასამახსოვრებელი მომენტი?
— თამაშის მნიშვნელობის თვალსაზრისით მსოფლიოს ჩემპიონატის მოგებულ ფინალურ მატჩზე უდიდესს ვერაფერს გეტყვით. რაც შეეხება ჩემს საუკეთესო თამაშს, ეს მადრიდის „რეალის“ წინააღმდეგ შეხვედრაში მოხდა, როცა მეტოქე ანგარიშით 5:0 დავამარცხეთ. მაშინ საოცარი გრძნობა დამეუფლა, გასახდელში ვიყავით და საკუთარ თავს აპლოდისმენტებით ვასაჩუქრებდით. ეს იყო სურეალისტური გამოცდილება.
— და ყველაზე ცუდი მომენტი?
— ეს ის მომენტი იყო, როცა გავიგეთ, რომ ერიკ აბიდალს ღვიძლის კიბო ჰქონდა. ამ ამბავმა ყველაფერი განზე გაწია. მახსოვს, ის ისევე გვამხნევებდა, როგორც ჩვენ ვამხნევებდით მას.
— თქვენს სახლში ხანძარი რომ იყოს, რომელ ერთ ნივთს გადაარჩენდით?
— მხოლოდ იმას, რისი ჩანაცვლებაც შეუძლებელია. ვერანაირი თანხა ვერ შეცვლის იმ მაისურს, რომელიც მეცვა მაშინ, როცა თავს ზემოთ მსოფლიოს თასი ავწიე.
— რომელი სიმღერა გიყვართ ყველაზე მეტად?
— “Losing My Religion”. R.E.M. – საერთოდ მომწონს ამ ჯგუფის შემოქმედება.
— რომელ სატელევიზიო გადაცემას არ ტოვებთ?
— საერთოდ, ტელევიზორს ხშირად არ ვუყურებ. ან ფილმებს ვუყურებ, ანდაც – ფეხბურთს. ინგლისის პრემიერლიგის მატჩებისთვის თვალ-ყურის მიდევნება ერთი სიამოვნებაა, ვუყურებ კინოფილმებსაც. აი, ასე ვისვენებ.
— სამ ცნობილ ადამიანთან შეხვედრის შესაძლებლობა რომ გქონდეთ, ვის შეხვდებოდით და რატომ მათ?
— ავირჩევდი რობერტ დე ნიროს, ბრიუს სპრინგსტინსა და დიეგო მარადონას. ეს არიან ადამიანები, რომელთაც სხვადასხვა ასპექტებით ვაფასებ.
— კერძების მომზადება თუ შეგიძლიათ?
— კულინარიულ საქმეში საკმაოდ ძლიერი ვარ, თუმცა რთულად მოსამზადებელ კერძებს არ ვეკარები. როგორც წესი, მაკარონს ვუმატებ შემწვარ ქათამს და ვასხამ მცირე ოდენობით ზეითუნის ზეთს.
— სად გიყვართ დასვენება?
— იბიცა ბევრი ესპანელი ფეხბურთელის საყვარელი დასასვენებელი ადგილია. თუ ამ ადგილს ზაფხულში ეწვევით, საკმაოდ ბევრ ცნობილ მსახიობსა და მუსიკოსს წააწყდებით. ასე რომ, იბიცაზე ფეხბურთელებისთვის არავის სცალია.
— თქვენი ცხოვრების ამსახველ ფილმში, ვის ისურვებდით თქვენი როლის შემსრულებლად?
— მაღალი ფეხბურთელი არ ვარ, ამიტომ ეს უნდა გავითვალისწინოთ. ალბათ, ვინმე მეთ დეიმონის მსგავსს ავარჩევდი.
— გვითხარით თქვენი რაიმე საიდუმლო…
— „ბერნაბეუზე“ ვთამაშობდით. მაშინ დაახლოებით 18 წლის ვიყავი. მატჩის მიმდინარეობისას ფეხბურთელებს შორის სიტუაცია დაიძაბა. ჩემთან რაული მოვიდა, ყურში მწვდა და დამშვიდებისკენ მომიწოდა. ახლა ის ჩემი დიდი მეგობარია, მაგრამ მაშინ ასეთი რამ მითხრა: „იცოდე შენი ადგილი, ბიჭო! აქ ჩვენი იერარქია გვაქვს“.
მადრიდის „ატლეტიკოს“ თავდამსხმელ დიეგო კოსტას გუშინ ესპანეთის ნაკრების რიგებში დებუტი ჰქონდა. წარმოშობით ბრაზილიელმა ფეხბურთელმა იტალიის ნაკრების წინააღმდეგ გამართული ამხანაგური მატჩი სრულად ჩაატარა. „ფურია როხამ“ მეტოქე პედროს კინკილა გოლის წყალობით დაამარცხა.
„ახლა მე და სერხიო რამოსი ძმებივით ვართ“, – აღნიშნა მატჩის შემდეგ დიეგო კოსტამ.
შეგახსენებთ, რომ „რეალსა“ და „ატლეტიკოს“ შორის გამართულ მატჩებში დიეგო კოსტასა და სერხიო რამოსს ხშირად ექმნებოდათ ურთიერთკონფლიქტური სიტუაციები.
ესპანეთში ფეხბურთის გულშემატკივარმა ორიგინალური ხერხით გამოხატა პროტესტი მსაჯის მიმართ, რის გამოც ახლა ცხოველის მიმართ გამოვლენილი სისასტიკის გამო მკაცრი სასჯელი ემუქრება.
9 თებერვალს, ალმერიაში, ორ რეგიონალურ კლუბს შორის გამართული მატჩის მიმდინარეობისას, შეხვედრის მთავარი არბიტრი ერთ-ერთი გუნდის სათადარიგოთა სკამთან მივიდა. ამით ისარგებლა 50 წლის ქომაგმა, რომლის სახელიც არ კონკრეტდება, და რამდენიმე მეტრის სიმაღლიდან მსაჯს პროტესტის ნიშნად თავისივე ცოცხალი ძაღლი ესროლა.
ამ ქმედებით გაღიზიანებულმა სხვა გულშემატკივრებმა ძაღლის პატრონს ცემა დაუწყეს, მალევე საქმეში პოლიცია ჩაერთო. წესრიგის მთავარ დამრღვევს ბრალად ედება ცხოველის მიმართ არასათანადო მოპყრობა. ტრიბუნიდან ნასროლი ძაღლის მდგომარეობა ჩვენთვის უცნობია.
ესპანეთის პრიმერადივიზიონის 23-ე ტურში „ბარსელონა“ „სევილიას“ ესტუმრა და მეტოქე ანგარიშით 4:1 დაამარცხა, თუმცა მატჩს მასპინძლები იგებდნენ. თამაში ძლიერი წვიმის თანხლებით მიმდინარეობდა.
ანგარიში მე-15 წუთზე „სევილიას“ მცველმა ალბერტო მორენომ გახსნა. კატალონიურმა გუნდმა თამაშში გარდატეხის შეტანა მოახერხა და საბოლოოდ, გამარჯვებაც მოიპოვა. სტუმრები პირველივე ტაიმი დაწინაურდნენ, ჯერ ალექსის სანჩესმა გაიტანა, შემდეგ კი ლიონელ მესიმ. აღსანიშნავია, რომ სანჩესმა გოლი თამაშგარე მდგომარეობიდან გაიტანა, თუმცა მსაჯებმა ეს ვერ შენიშნეს. მეორე ტაიმში „ბარსელონას“ არგენტინელმა ლიდერმა დუბლი გაიფორმა. საბოლოო შედეგი 88-ე წუთზე ფრანჩესკ ფაბრეგასმა დააფიქსირა — 4:1.
„ბარსელონამ“ აქტივში 57 ქულა მოაგროვა და მადრიდის „რეალთან“ და „ატლეტიკოსთან“ ერთად სატურნირო ცხრილს სათავეში ჩაუდგა. „სევილია“ 31 ქულით მეშვიდე პოზიციაზე დარჩა.
ესპანეთის პრიმერადივიზიონი 23-ე ტური „სევილია“—„ბარსელონა“ 1:4 (1:2)
გუშინ, ბარსელონაში საუკეთესო ესპანელი სპორტსმენები დააჯილდოვეს. გაზეთ „მუნდო დეპორტივოს“ მიერ ორგანიზებულ ღონისძიებაზე 2013 წლის საუკეთესო ესპანელ სპორტსმენად რაფაელ ნადალი დაასახელეს, რომელმაც გასული წლის ოქტომბრის თვეში ATP რეიტინგში პირველი ადგილი დაიბრუნა. დამდეგ კვირას, მსოფლიოს საუკეთესო ჩოგბურთელი ბუენოს-აირესში გასამართ ტურნირზე მონაწილეობის მიღებას აპირებს.
„არგენტინაში გამგზავრებას ვაპირებ, თუმცა ყველაფერი იმაზე იქნება დამოკიდებული, თუ რა მდგომარეობაში მექნება დაზიანებული ზურგი. თუ გამოჯანმრთელებას ვერ მოვასწრებ, ამით ტრაგედია არ მოხდება. მომდევნო ტურნირისთვის მოვემზადები.
გამოჯანმრთელების პროცესი ცოტა ჭიანურდება, თუმცა თავს კარგად ვგრძნობ“, – აღნიშნა გუშინდელ ღონისძიებაზე ნადალმა.
„ბარსელონას“ ნახევარმცველი ჩავი ერნანდესი ფეხბურთში მიღწეული წარმატებებისთვის დაჯილდოვდა. კატალონიელმა ფეხბურთელმა სიტყვით გამოსვლისას ახლახანს გარდაცვლილი ლუის არაგონესის შესახებ ისაუბრა.
„ვთვლი, რომ ლუის არაგონესი ესპანურ ფეხბურთში ყველაზე გამორჩეული ფიგურა იყო. მის წინაშე ვალდებული ვარ. ეს ადამიანი ჩემთვის ძალიან ბევრს ნიშნავდა. ის ჩემი საფეხბურთო მამაა, მან მე შანსი მომცა. არაგონესის წყალობით ესპანეთის ნაკრებში ვითამაშე“, – აღნიშნა ჩავიმ.
2013 წლის საუკეთესო ესპანელ მწვრთნელად ტიტო ვილანოვა დაასახელეს, თუმცა „ბარსელონას“ ყოფილი თავკაცი ღონისძიებას ვერ დაესწრო
