ჭდე: ჟოზე მოურინიო

როგორც უკვე მოგახსენეთ, რუი ფარიასა და ჟოზე მოურინიოს 17-წლიან თანამშრომლობას წერტილი მიმდინარე სეზონის ბოლოს დაესმევა. მიუხედავად ამისა, პორტუგალიელი სპეციალისტი ახალი თანაშემწის არყოლაზე სულაც არ დარდობს.

“სამწვრთნელო შტაბს ისე მოვაწყობ, რომ დამხმარე მწვრთნელის პოსტი საერთოდ არ იარსებებს. ჩემს შტაბში კონკრეტული სპეციალიზაციის მქონე მწვრთნელები იმუშავებენ ანალიტიკოსებთან ერთად.

ამის მიზეზი ის არის, რომ ჩემს დამხმარე მწვრთნელად მხოლოდ მაიკლ კერიკის ხილვა მსურს და სანამ ის შესაბამის ლიცენზიას მოიპოვებს, ეს პოსტი გაუქმებული იქნება,” – აცხადებს მოურინიო.

კერიკი “იუნაიტედს” 2006 წელს შეუერთდა “ტოტენჰემიდან”. მას შემდეგ მან 460-ზე მეტი მატჩი ჩაატარა “წითელი ეშმაკუნების” მაისურით, მოიგო ჩემპიონთა ლიგა და პრემიერ ლიგის ხუთი ტიტული.

მიმდინარე სეზონის (2017/18) დასრულების შემდეგ ჟოზე მოურინიოს დამხმარე მწვრთნელი, რუი ფარია, კლუბს დატოვებს. ამ ინფორმაციას ინგლისური გრანდის ოფიციალური ვებ-გვერდიც ადასტურებს.

42 წლის სპეციალისტმა 17-წლიანი თანამშრომლობის დასრულების გადაწყვეტილება თავად მიიღო. ფარიასა და ჟოზეს თანამშრომლობა სათავეს 2002 წელს იღებს. მას შემდეგ ამ ადამიანებმა ერთად “პორტუში”, “ჩელსიში”, “ინტერში”, “რეალსა” და “მანჩესტერ იუნაიტედში” იმუშავეს.

“ძალიან ბევრი ვიფიქრე და გადავწყვიტე, რომ ეს სწორი დროა ცვლილებებისათვის. 17 წელი ძალიან დიდი დროა, ეს პერიოდი სულ მემახსოვრება, ეს გამოცდილება გაზრდაში დამეხმარა.

მინდა გულითადი მადლობა გადავუხადო ჟოზე მოურინიოს, რომელსაც სულ სჯეროდა ჩემი. ის ძალიან კარგი ადამიანი და მეგობარია, მინდა მას ყველაფერი საუკეთესო ვუსურვო თავის კარიერაში,” – აცხადებს რუი ფარია.

პრემიერ ლიგის 37-ე ტურში “მანჩესტერ იუნაიტედი” “ვესტ ჰემს” ეწვია და ლონდონიდან ერთი ქულის წამოღება შეძლო. შედეგად, ჟოზე მოურინიოს გუნდმა პრემიერ ლიგის მიმდინარე სეზონში მეორე ადგილი გაინაღდა.

“პრემიერ ლიგის რიგით მეორე საუკეთესო გუნდი ვართ. ინგლისს ბრწყინვალე ჩემპიონატი აქვს, სადაც ძალიან ბევრი ძლიერი გუნდი თამაშობს, თუმცა მეორე ადგილზე გასვლით ბედნიერი არ ვარ, ეს უბრალოდ ჩემს ბუნებაში არ ჯდება.

იმ მომენტიდან, როდესაც მივხვდით, რომ ჩემპინობისთვის ბრძოლას აზრი არ ჰქონდა, მეორე ადგილზე დავიწყეთ ფიქრი და გეგმა დღეს შევასრულეთ. ჩვენ ყოველ მატჩში საუკეთესოსთვის ვიბრძვით,” – აცხადებს პორტუგალიელი სპეციალისტი.

“მანჩესტერ იუნაიტედის” მთავარი მწვრთნელი, ჟოზე მოურინიო უკმაყოფილოა გუნდის ამჟამინდელი ფორმაციით და მზად არის ცვლილებებს პოლ პოგბა და ანტონი მარსიალიც შესწიროს.

პორტუგალიელი სპეციალისტი გუნდის წარუმატებლობაში რამდენიმე ფეხბურთლის ბრალეულობას ხედავს, მათ შორის მოწინავე ადგილებს პოგბა და მარსიალი იკავებენ. გარდა ამისა, როგორც იცით, მოურინიო განსაკუთრებით დაუნდობელია ძვირადღირებული ფეხბურთელების მიმართ.

შეგახსენებთ იმასაც, რომ პეპ გვარდიოლას სიტყვების თანახმად, მინო რაიოლამ უკვე შესთავაზა “მანჩესტერ სიტის” პოგბას ტრანსფერი, თუმცაღა “ქალაქელებმა” უარი განაცხადეს.