დღეს ქალაქ მცხეთაში “ვიტ-ჯორჯია” “ზუგდიდს” მასპინძლობდა, ტრაგედია კი, მატჩის დაწყებამდე დატრიალდა.
ზუგდიდელთა მეკარე შოთა მამინაშვილი მოთელვისას შეუძლოდ გახდა და მოედანზე უგონოდ დაეცა. ექიმები თავდაუზოგავი მცდელობის მიუხედავად ვერაფერს გახდნენ და 31 წლის კიპერი გარდაიცვალა.
ჩვენი საიტი ღრმა მწუხარებას გამოთქვავს, როგორც გარდაცლილის ოჯახის, ასევე ს.კ.”ზუგდიდის” მიმართ.
დღეს უმაღლესი ლიგის მე-13 ტურის შეხვედრები გაიმართა.
ერთ-ერთ მატჩში წითელი ჯგუფის გუნდები “საბურთალო” და “ზუგდიდი” დაუპირისპირდნენ ერთმანეთს. მატჩში ანგარიში 35-ე წუთზე საბურთალოს ფრანგმა ლეგიონერმა, გონსალვესმა გახსნა.
მეორე ნახევარში, 54-ე წუთზე ზოზულიამ გაათანაბრა. თუმცა, ამის შემდეგ თბილსურმა კლუბმა კიდევ ორი გოლი გაიტანა: ხარაიშვილმა და ესპანელმა ჯარამ, შესაბამისად, 81-ე და 89-ე წუთებზე შეაგდეს. საბოლოოდ, მატჩი, ანაგრიშით, 3:1 დასრულდა.
ამ გამარჯვების შემდეგ “საბურთალოს” 16 ქულა დაუგროვდათ და მე-4 ადგილზეა. რაც შეეხება “ზუგდიდს”, მეგრელებს 6 ქულა აქვთ და ბოლო ადგილზე იმყოფებიან. ბოლოს წინა ადგილოსან “სიონს” 11 ქულა აქვს. აქედან გამომდინარე, “ზუგდიდი” უმაღლეს ლიგას უკვე დაემშვიდობა.
დღეს სტარტი აიღო უმაღლესი ლიგის მეხუთე ტურმა. შაბათ დღეს წთელი ჯგუფის სამივე შეხვედრა გაიმართა.
ბოლნისის “სიონი” – ზუგდიდის “ზუგდიდი”
ამ ტურში “სიონმა” “ზუგდიდს” უმასპინძლა. შეხვედრა მთლიანად ბოლნისლების უპირატესობით წარიმართა. 30-ე წუთზე ძარიამ შეძლო “სიონის” დაწინაურება. პირველი ტაიმის მესამე დამატებთ წუთზე სუშკინმა ორამდე გაზარდა ანგარიში.
ბოლნისური კლუბი არც მეორე ტაიმში გაჩერდა. 61-ე წუთზე მათ მესამე გოლის გატანაც მოახერხეს – ეს კობახიძემ გააკეთა. ნარმანიამ 73-ეზე ერთი ბურთი გაქვითა. 90-ეზე კი ბოლნისელმა ჯანელიძემ საბოლოო ანგარიში – 4-1 დააფიქსირა.
ლანჩხუთის “გურია” – ქუთაისის “ტორპედო”
კიდევ ერთი მატჩი, რომელიც ამ ტურში გაიმართა, “გურიასა” და “ტორპედოს” დაპირისპირებაა. აქაც მასპინძლები დომინირებდნენ – ანგარიშის გახნსა 27-ე წუთზე სწორედ “გურიამ” შეძლო; ეს ლეგიონერმა მოროზენკომ გააკეთა.
მეორე ტაიმში, 55-ე წუთზე კვერნაძემ გაათანაბრა. “გურიამ” მაინც მოიგო – 68-ე წუთზე ჩადუნელმა აიღომ მეტოქის კარი და მის გუნდს 2-1 გაამარჯვებინა.
ცხინვალის “ცხინვალი” – თბილისის “ლოკომოტივი”
“ცხინვალმა” “ლოკომოტივის” წინააღმდეგ გააგორა ბურთი. მთელი მატჩის მანძილზე სტუმრები დომინირებდნენ. “ლოკომოტივმა” პირველი გოლი მე-11 წუთზე გაიატანა – ეს დიასამიძემ გააკეთა. თბილისლებმა მეორე გოლის შეგდება მესამოცე წუთზე შეძლეს – დუბლი დიასამიძემ შეასრულა.
ერთი გოლის გაქვითვა “ცხინვალის” მხრიდან ჯაბა დვალმა მოახერხა და, საბოლოოდ, ეს შეხვედრა 1-2 დასრულდა.
13 აგვისტოს, შაბათს სტარტს აიღებს უმაღლესი ლიგის მეორე ტური.
Fanebi.Com-ი გთავაზობთ საქართველოს ჩემპიონატის ნახსენები ტურის პრევიუს.
“შუქურა” – “ჩიხურა”
შაბათის ერთ-ერთი პირველი შეხვედრა ქობულეთის “შუქურასა” და საჩხერის “ჩიხურას” შორის გაიმართება. აღნიშნული მატში “ჩელე არენაზე” 17:30 საათზე აიღებს სტარტს. აჭარლებმა პირველი თამაში ქუთაისში, ადგილობრივ “ტორპედოსთან” ჩაატარეს და უგოლო ფრეს მიაღწიეს. “შუქურა” ამ მომენტისთვის წითელი ჯგუფის მეხუთე ადგილზე იმყოფება ერთი ქულით. ქულების იგივე რაოდენობა აქვს “ჩიხურას”, რომელმაც წინა მატჩი საკუთარ კედლებში “ივანწმინდა არენაზე” გამართა თბილისის “დინამოს” წინააღმდეგ და საქართველოს მოქმედ ჩემპიონებთან 0-0 ითამაშა. გამომდინარე იქედან, რომ ამ ჯგუფში ყველა შეხვედრა ფრედ დასრულდა, საჩხერული კლუბი, მხოლოდ და მხოლოდ, 1 ქულით პირველ ადგილს იკავებს. მოკლედ, შაბათს გასამართ თამაშში ორივე კლუბი მიმდინარე სეზონის პირველი სამი ქულის მოპოვებას შეეცდება.
“ლოკომოტივი” – “ტორპედო”
უმაღლესი ლიგის კიდევ ერთი მატჩი, რომელიც იმავე დღესა და საათზე გაიმართება, “ლოკომოტივისა” და “ტორპედოს” დაპირისპირებაა. წინა ტურში თბილისლებს უქმობამ მოუწიათ და, შესაბამისად, ისინი თეთრი ჯგუფის ბოლო პოზიციაზე იმყოფებიან. საინტერესოა, როგორ ჩაერთვება ეს გუნდი ახალ სეზონში. ხოლო, “ტორპედომ”, როგორც უკვე ვთქვით, პირველ მატჩში “შუქურასთან ფრედ ითამაშა და ეს კლუბი მეექვსე პოზიციაზეა. ვნახოთ, მოიპოვებს თუ არა იმერული ფეხბურთის ფლაგმანი გამარჯვებას აღნიშნულ თამაშში.
“დინამო” (თბ) – “გურია”
შაბათის დღის დასკვნითი შეხვედრა თბილისის “დინამოსა” და ლანჩხუთის “გურიას” შორის 20:00 საათზე გაიმართება. დედაქალაქურმა კლუბმა პირველ ტურში უგოლო ფრე ითამაშა სტუმრად “ჩიხურასთან” და 1 ქულით თეთრი ჯგუფის მეორე ადგილზეა. აღსანიშნავია, რომ ლანჩხუთლებთან დაპირისპირებიდან 5 დღეში, 18 აგვისტოს “დინამო არენაზე” თბილისური გუნდი პაოკ-ს უნდა შეხვდეს. აქედან გამომდინარე, შესაძლოა, “დინამოელთა” მთავარმა მწვრთნელმა, იურაი იარაბეკმა რამდენიმე ფეხბურთელი დაასვენოს. სწორედ ეს აძლევს გურულებს იმის შანსს, რომ მინიმუმ ფრისთვის იბრძოლონ. “გურიამ” წინა ტურში “ცხინვალის” წინააღმდეგ იასპარეზა საკუთარ მოედანზე. ეს მატჩიც 0-0 დასრულდა. ამ მომენტისთვის ლანჩხუთის გუნდი მეოთხე პოზიციაზე იმყოფება მას 1 ქულა აქვს.
“დილა” – “ზუგდიდი”
გადავიდეთ წითელ ჯგუფში გასამართ შეხვედრებზე, რომლებიც კვირას ჩატარდება. ერთ-ერთ მათგანში გორის “დილა” ზუგდიდის “ზუგდიდს” დაეჯახება 17:30 საათზე. გორელებმა წინა ტურში დაისვენეს და, შესაბამისად, 0 ქულით მეხუთე ადგილზე არიან. რაც შეეხებათ მეგრელებს, ისინი პირველ ტურში თავიანთ მოედანზე ფოთის “კოლხეთთან” დამარცხდნენ. სწორედ იმ თამაშში გავიდა 2016/2017 წლების სეზონის უმაღლესი ლიგის პირველი გოლი, რომლის ავტორი ფოთელთა ფეხბურთელი, გოგონაიაა. მან 26-ე წუთზე პენალტით მოახერხა “ზუგდიდის” კარის აღება. მოკლედ, ამ გუნდს 0 ქულა აქვს და წითელ ჯგუფში მეშვიდე პოზიციაზე იმყოფება. საინტერესოა, მოახერხებს თუ არა “ზუგდიდი” პირველი სამი ქულის მოპოვებას მიმდინარე სეზონში.
“სამტრედია” – “სიონი”
ეს მატჩი კვირას, 17:30 საათზე სამტრედიაში, ეროსი მანჯგალაძის სახელობის სტადიონზე ჩატარდება. მასპინძლებმა წინა თამაში სტუმრად “ჩელე არენაზე”, ბათუმის “დინამოს” წინააღმდეგ ჩაატარეს. იმ შეხვედრაში გუნდებმა თითო-თითო ბურთი გაცვალეს და, საბოლოოდ, ტაბლოზე 1-1 დააფიქსირეს. ამჟამად, სამტრედიული კლუბი ერთი ქულით წითელი ჯგუფის მესამე პოზიციაზე იმყოფება. რაც შეეხება “სიონს”… ბოლნისლები პირველ დაპირისპირებაში თამაზ სტეფანიას სახელობის სტადიონზე “საბურთალოსთან” ანგარიშით – 1-2 დამარცხდნენ და 0 ქულით მეექვსე ადგილს იკავებენ. ერთი სიტყვით, რომელმა კლუბმაც არ უნდა გაიმარჯვოს, ეს მისი პირველი სამი ქულა იქნება მიმდინარე სეზონში.
“კოლხეთი” – “დინამო” (ბთ)
ბოლო მატჩი, რომელიც უმაღლესი ლიგის მეორე ტურში გაიმართება, “კოლხეთისა” და ბათუმის “დინამოს” დაპირისპირებაა. ეს თამაშიც 17:30 საათზე აიღებს სტარტს. როგორც უკვე ვთქვით, “კოლხეთმა” პირველი მატჩი სტუმრად ზუგდიდში მოიგო და ამჟამად მეორე ადგილზე იმყოფება. ხოლო, ბათუმურმა კლუბმა წინა კვირაში, ქობულეთში 1-1 ითამაშა “სამტრედიასთან” და მეოთხე პოზიციას იკავებს. ეს შეხვედრაც, ნამდვილად, საინტერესო უნდა გამოვიდეს.
გელა ინაშვილის ზუგდიდურმა “ზუგდიდმა” უკრაინელი ინვესტორები დააინტერესა. ადგილობრივი გამოცემის, Livepress-ის მიერ გავრცელებული ინფორმაციის თანახმად, მხარეებს შორის მოლაპარაკებები უკვე მიმდინარეობს და ის 10 აგვისტომდე დასრულდება.
კლუბის დირექტორის, გელა ინაშვილის თქმით, ის არ აპირებს გუნდის მთლიანად გასხვისებას – “ვფიქრობ 50-50-ზე იქნება. ჩაიდება პირობებიც გასხვისების სანაცვლოდ, გუნდის და ქვეყნის ინტერესებიდან გამომდინარე. მინიმუმ 5 წელიწადზე მოხდება გათვლა. ინვესტორი ვალდებული იქნება თანხა ჩადოს და მიხედოს გუნდს. ალბათ ქალაქსაც ეშველება, რადგან ქალაქის ბიუჯეტიდან მიდოდა თანხა“.
მისი თქმით, კლუბს, გუნდს, ფინანსებს ინვესტორები უკვე აკვირდებიან, რის შემდეგაც გადაბარების პროცესი დაიწყება.
„ზუგდიდი“ უკვე წლებია ქალაქის ბიუჯეტიდან ფინანსდება. კლუბისთვის მიმდინარე წელს მილიონ 200 ათასზე მეტი გამოიყო, რაზეც არასამთავრობო სექტორის ნაწილმა უკმაყოფილება არაერთხელ გამოთქვა, მით უმეტეს იმ შედეგების ფონზე, რაც გუნდს ქონდა და აქვს. მათი განმარტებით, კლუბისთვის თანხა ადგილობრივი თვითმმართველობის ბიუჯეტიდან არ უნდა იხარჯებოდეს.
ფოთში „ზუგდიდსა“ და ხობის „კოლხეთს“ შორის უმაღლესი ლიგის ადგილისთვის მატჩში გამარჯვება ზუგდიდელებმა იზეიმეს. უმაღლესი ლიგის განვლილი სეზონის მეთოთხმეტეადგილოსანმა პირველი ლიგის მესამეადგილოსანი ანგარიშით 2:1 დაამარცხა
29-ე წუთზე ხობელები ზურაბ ჭანტურიძის გოლით დაწინაურდნენ, პირველი ტაიმის ბოლოს კი წონასწორობა ლევან წურწუმიამ აღადგინა. მეორე ტაიმის მეექვსე წუთზე „ზუგდიდი“ გურამ სამუშიას გოლით დაწინაურდა. სათქმელია, რომ 52-ე წუთზე გოლის ავტორმა ყვითელი ბარათი მიიღო, ექვს წუთში კი მეორე ყვითელითაც „დასაჩუქრდა“. ზუგდიდელები კაცნაკლულნი 74-ე წუთამდე იყვნენ, რის შემდეგ „კოლხეთის“ რიგებიდან ასევე მეორე ყვითელი გიგა წურწუმიამ მიიღო.
ამ გამარჯვებით „ზუგდიდმა“ შემდეგ სეზონისთვის უმაღლეს ლიგაში ადგილი შეინარჩუნა.
„ზუგდიდი“ – „კოლხეთი“ (ხობი) 2:1
გოლები: წურწუმია 45′, გურამ სამუშია 51′ – ჭანტურიძე 29′
გაფრთხილებები: თუთბერიძე 23′, გურამ სამუშია 52′, 58′, ცოტნე სამუშია 78′ – ფიფია 30′, წურწუმია 58′, 74′, ონიანი 88′
გაძევება: სამუშა 58′ – წურწუმია 74′
საფეხბურთო კლუბი „ზუგდიდი“ მიმდინარე ეროვნულ ჩემპიონატში გასამართ საშინაო მატჩებს საკუთარ მოედანზე ჩაატარებს. ზუგდიდის მუნიციპალიტეტის მერიის ბალანსზე არსებული ზედაეწერის სტადიონს, მერიის დაფინანსებით, ეფექტური სარეაბილიტაციო სამუშაოები ჩაუტარდა. მთლიანად შეიცვალა და ახლებურად გაკეთა, გასახდელები, საშხაპეები და სველი წერტილები, ხოლო ტრიბუნებზე ინდივიდუალური სკამები დამონტაჟდა. გარდა ამისა, კეთილმოეწყო საპრესკონფერენციო დარბაზი, მსაჯთა და დელეგატთა მისაღები ოთახები.
საქართველოს ფეხბურთის ფედერაციის წარმომადგენლები მეორედ იმყოფებოდნენ „ზედაეწერი“-ს სტადიონის დასათვალიერებლად და აქ ჩატარებულ სამუშაოებს საკმაოდ მაღალი შეფასება მისცეს. მართალია, ფეხბურთის მმართველი ორგანო საბოოლოო გადაწყვეტილებას „ზედაეწერი“-ს სტადიონზე თამაშების დაშვება-არდაშვებაზე მიმდინარე კვირას მიიღებს, თუმცა კლუბის ხელმძღვანელობამ და ადმინისტრაციის თანამშრომლებმა სრულად გაითვალისწინეს სფფ-ს რეკომენდაციები და მათი წარმომადგენლების, პირველადი შეფასებებით თუ ვიმსჯელებთ, ეს საკითხი გადაწყვეტილია.
ზუგდიდელები კი პირველი საშინაო მატჩს 10 აპრილს გამართავენ და თუ გაუთვალისწინებელი რამ არ მოხდა, ისინი „ზედაეწერი“-ს სტადიონზე ქობულეთის „შუქურა“-ს მიიღებენ.
შეგახსენებთ, რომ საგაზაფხულო სეზონზე ს.კ. „ზუგდიდმა“ ორი საშინაო მატჩი სამტრედიის „ე.მანჯგალაძის“ სახელობის სტადიონზე ჩაატარა.
“ზუგდიდში” მატებაა. გუნდმა უკრაინელი ლეგიონერი იური შეველი დაიმატა. 28 წლის ფეხბურთელი შემტევის პოზიციაზე თამაშობს.
შეველი ლანჩხუთის “გურიაში” ირიცხებოდა, თუმცა მას ქართულ კლუბში მას დიდხანს არ უთამაშია.
“ზუგდიდი” მიმდინარე სეზონში უმაღლეს ლიგაში დარჩენისთვის იბრძვის და კლუბში იმედს გამოთქვამენ, რომ ირაკლი ქობალიასთან იური შეველის შეწყვილება გაამართლებს, რაც გუნდის შედეგზეც იქონიებს დადებით გავლენას.
მხარეებს შორის გაფორმებული შრომითი ხელშეკრულება მიმდინარე წლის ივნისის ჩათვლით იქნება ძალაში.
საფეხბურთო კლუბ „ცხინვალის“ პრესსამსახურმა „ზუგდიდთან“ საქართველოს უმაღლესი ლიგის მე-18 ტურის გუშინდელი მატჩის გოლების ამსახველ ვიდეო გამოაქვეყნა.
შეხვედრა, ფრედ, 1:1 დასრულდა – 58-ე წუთზე ანგარიში ევგენი კოვალენკომ გახსნა, ექვს წუთში კი ირაკლი ლექვთაძემ წონასწორობა აღადგინა.
ამჟამად „ცხინვალი“ 35 ქულით მე-4 ადგილს იკავებს, „ზუგდიდი“ 9 ქულით ბოლოსწინა პოზიციაზეა.
24 წლის გარემარბი თორნიკე თუხარელი კარიერას ფოთის „კოლხეთში“ გააგრძელებს. ტრანსფერი ფოთური კლუბის პრესსამსახურმა დაადასტურა.
მიმდინარე სეზონის პირველ ნახევარში თორნიკემ „ზუგდიდში“ ჩაატარა, რომლის მაისურით მხოლოდ ოთხ შეხვედრაში ითამაშა.
2009/10 წლების სეზონნში ტუხარელი „გაგრას“ შემადგენლობაში ირიცხებოდა. 2010 წლიდან 2014 წლამდე თორნიკე „ცხინვალის“ ფეხბურთელი იყო და ამ პერიოდში, ჯამში, 12 გოლი გაიტანა. გასულ სეზონში ის ქობულეთის „შუქურაში“ თამაშობდა და უმაღლესი ლიგის 19 მატჩში 3 გოლი მიითვალა.
„ბაიას“ ბაზაზე ბოლნისის „სიონთან“ უმაღლესი ლიგის მე-8 ტურის გადატანილი მატჩის ანგარიშით 1:3 წაგების შემდეგ „ზუგდიდის“ მთავარი მწვრთნელის ბესიკ შეროზიას გათავისუფლების შესახებ ინფორმაცია გავცელდა. კერძოდ, ის sportall.ge-მ გაავრცელა.
დღეს „ზუგდიდის“ ოფიციალურმა საიტმა განცხადება გამოაქვეყნა, რომელშიც მიუთითა, რომ ეს ინფორმაცია სიმართეს არ შეესაბამება და მის ოფიციალურად დადასტურებამდე, შეროზია გუნდის თავკაცად რჩება (იხილეთ დაწვრილებით).
ცნობისთვის, 11 ტურის შემდეგ ზუგდიდელები 5 ქულით უმაღლესი ლიგის ბოლოსწინა ადგილზე იმყოფებიან და მარტვილის „მერანს“ 2 ქულით უსწრებენ. უახლოეს მატჩს გუნდი 21 ნოემბერს გამართავს – „ზუგდიდი“ „საბურთალოს“ უმასპინძლებს.
ხვალ, „ბაიას„ ბაზაზე „ზუგდიდსა“ და „სიონს“ შორის უმაღლესი ლიგის გადატანილი მატჩის ჩატარება იგეგმება. დღეს „ფეისბუქზე“ გავრცელდა ინფორმაცია, რომ ფინანსური პრობლემების გამო დღეს გუნდს არ უვარჯიშია. როგორც ზუგდიდური კლუბი ოფიციალური ვებსაიტი წერს, აღნინული ინფორმაცია სიმართლეს არ შეესაბამება. აღნიშნულ ინფორმაციას „ზუგდიდის|“ თავკაცი ბესიკ შეროზიაც გამოეხმაურა.
„მიუხედავად იმისა, რომ სატურნირო მდგომარეობა არასახარბიელო გვაქვს, ფეხბურთელები მაქსიმალურად ემზადებიან ხვალინდელი შეხვედრისათვის და ეს ერთ-ერთი პრინციპული თამაში იქნება. რაც შეეხება დღეს გავრცელებულ ინფორმაციას, რომ ფეხბურთელებს მერიის, მხრიდან „საბოტაჟი“ მოუწყვეს და ისინი უფინანსობის გამო პროტესტის ნიშნად თითქოს სავარჯიშოდ არ გასულან, ყოველგვარ სინამდვილეს მოკლებულია. იმ პერიოდში, როცა თითოეულ ქულას გუნდისთვის გადამწყვეტი მნიშვნელობა აქვს, ვფიქრობ, რომ თითოეულ ადამიანს, გულშემატკივარს მართებს გუნდთან ერთად დადგეს. რაც შეეხება ფინანსებს – კლუბის მხრიდან არსებულმა ტექნიკურმა მხარემ, რამაც ორდღიანი გაუგებრობა გამოიწვია – ამოწურულია. მერიის მისამართით გაკეთებული განცხადებები კი საფუძველს მოკლებული, რადგან მერიის მხრიდან თანხის გადარიცხვის დაგვიანება, თავად კლუბში შექმნილმა ტექნიკურმა ხარვეზმა განაპირობა. ვაცხადებ, რომ არსებული პრობლემა მოგვარებულია და ხელფას-პრემია ფეხბურთელებზე გაცემულია. ყოველგვარი პათეტიკის გარეშე, პირდაპირ ვიტყვი და მადლობას ვეუბნები ქ.ზუგდიდის მუნიციპალიტეტის მერიას და მის ხელმძღვანელს, ირაკლი გოგოხიას, რომელიც ერთ-ერთი დიდი გულშემატკივარია ჩვენი გუნდის. ხვალინდელი შეხვედრისთვის კი ჩვენ ოპტიმალურად ვემზადებით“, – ციტირებს შეროზიას კლუბის ოფიციალური ვებსაიტი.
