Europa League – გვერდი 3 – Fanebi.Com – ფეხბურთი, კალათბურთი, რაგბი, სხვა

ჩემპიონთა ლიგის ჰიმნი vs ევროპის ლიგის ჰიმნი

Posted on ნოემბერი 9, 2014ნოემბერი 9, 2014 by ბექა დოგრაშვილი

უეფას ჩემპიონთა ლიგის ჰიმნი გეორგ ფრიდრიხ ჰენდელის ცნობილი კომპოზიციის არანჟირებული ვერსიაა, რომელიც ინგლისელმა კომპოზიტორმა ტონი ბრიტენმა 1992 წელს გადააკეთა. ჰიმნი უეფას სამ ოფიციალურ ენაზე სრულდება — ინგლისურად, ფრანგულად და გერმანულად. ჰიმნის სრული ვერსია 3-წუთიანია, თუმცა ჩემპიონთა ლიგის მატჩების დაწყებამდე მისი მოკლე ვარიანტი სრულდება.

რაც შეეხება უეფას ევროპის ლიგის ჰიმნს, ის 2009 წლის მარტიდან მაისამდე პერიოდში პარიზის ოპერაში კომპოზიტორ იოან ცვეიგის ხელმძღვანელობით ჩაიწერა. სპეციალურად ამ ტურნირისთვის დაწერილი კომპოზიცია პირველად 2009 წლის 28 აგვისტოს, გრიმალდის ფორუმზე ააჟღერს.

ჰიმნი ევროპის ლიგის ყველა მატჩის დაწყებამდე ირთვება. ასევე, სატელევიზიო ტრანსლაციების დროს ტურნირის გახსნის მუსიკალურ გაფორმებად გამოიყენება.

იოან ცვეიგი იმედოვნებს, რომ აღნიშნული ჰიმნი საყოველთაო აღიარებას მოიპოვებს და ისეთივე წარმატებული გახდება, როგორიც ჩემპიონთა ლიგის ჰიმნია. მართალია, ევროპის ლიგა ჩემპიონთა ლიგასთან შედარებით ნაკლებად პრესტიჟული ტურნირია, თუმცა ზოგიერთი თვლის, რომ უეფას რანგით მეორე საკლუბო ტურნირს უკეთესი ჰიმნი აქვს. როგორც იტყვიან, გემოვნებაზე არ დაობენ. არჩევანი თქვენთვის მოგვინდია.

“ჩიხურა” — “ნეფთჩი”: მატჩი წუთიერი დუმილით დაიწყება

Posted on აგვისტო 6, 2014აგვისტო 6, 2014 by ბექა დოგრაშვილი

უეფას ევროპის ლიგის მესამე საკვალიფიკაციო ეტაპზე საჩხერის “ჩიხურასა” და ბაქოს “ნეფთჩის” შორის გასამართი მატჩი წუთიერი დუმილით დაიწყება. გუნდები პატივს მიაგებენ აზერბაიჯანული ფეხბურთის ვეტერან ალეკპერ მამედოვს, რომელიც გასულ კვირას 84 წლის ასაკში გარდაიცვალა.

“ნეფთჩი” თბილისში დღეს დილით ჩამოფრინდა.

მატჩზე დასასწრები ბილეთები მიხეილ მესხის სახელობის სტადიონის სალაროებში უკვე იყიდება და ფასი 4 ლარია.

შეხვედრას 35 წლის უნგრელი არბიტრი ტამაშ ბოგნარი განსჯის. ბოგნარი ქართული გუნდების ფეხბედნიერი მსაჯია. 2009 წელს ეს რეფერი სჯიდა ევროპის ლიგის პირველ საკვალიფიკაციო ეტაპზე ჩრდილოეთ ირლანდიის გუნდ “ლისბერნ დისტილერისა” და “ზესტაფონს” შორის გამართულ შეხვედრას, რომელიც ქართული გუნდის დამაჯერებელი გამარჯვებით, ანგარიშით 5:1 დასრულდა. ბოგნარი იყო გორის “დილასა” და სპლიტის “ჰაიდუკს” შორის შარშან გამართული მატჩის მთავარი მსაჯიც. ამ შეხვედრაში გორელებმა ანგარიშით 1:0 იმარჯვეს.

მატჩი “ჩიხურასა” და “ნეფთჩის” შორის 7 აგვისტოს, 21:00 საათზე დაიწყება.

“ჩიხურა” — “ნეფთჩი”: განრიგი, არბიტრი, ბილეთები

Posted on აგვისტო 4, 2014აგვისტო 4, 2014 by ბექა დოგრაშვილი

ხუთშაბათს, 7 აგვისტოს, მიხეილ მესხის სახელობის სტადიონზე საჩხერის “ჩიხურასა” და ბაქოს “ნეფთჩის” შორის უეფას ევროპის ლიგის მესამე საკვალიფიკაციო ეტაპის განმეორებითი მატჩი გაიმართება. როგორც მოგეხსენებათ, აზერბაიჯანის დედაქალაქში გამართული პირველი შეხვედრა უგოლოდ დასრულდა. “ნეფთჩი” თბილისში ოთხშაბათ დილას ჩამოფრინდება. იმავე დღეს გაიმართება გუნდების მატჩისწინა ვარჯიში და მთავარი მწვრთნელების პრესკონფერენციები.

მატჩზე დასასწრები ბილეთები მიხეილ მესხის სახელობის სტადიონის სალაროებში ხვალ დილიდან გაიყიდება. ბილეთის ფასი 4 ლარია.

მატჩი “ჩიხურასა” და “ნეფთჩის” შორის 7 აგვისტოს, 21:00 საათზე დაიწყება.

ბაქოში მომხდარ ინციდენტს საქართველოს შინაგან საქმეთა სამინისტრო ეხმაურება

Posted on აგვისტო 4, 2014აგვისტო 4, 2014 by ბექა დოგრაშვილი

უეფას ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის გამართულ მატჩში მომხდარ ინციდენტთან დაკავშირებით შინაგან საქმეთა სამინისტრომ სპეციალური განცხადება გამოაქვეყნა, რასაც აქვე გთავაზობთ:

“მიმდინარე წლის 31 ივლისს, აზერბაიჯანის დედაქალაქ ბაქოში გამართული – ბაქოს “ნეფჩთი”-სა და საჩხერის “ჩიხურა”-ს საფეხბურთო მატჩის დროს მომხდარი ინციდენტის შემდეგ, რომელშიც მონაწილეობდნენ “ქართული სპორტის ქომაგების” წარმომადგენლები, ვითარებაში გარკვევის მიზნით შინაგან საქმეთა სამინისტროს წარმომადგენლების მხრიდან მოხდა შეხვედრა და გასაუბრება აღნიშნულ ინციდენტში მონაწილე პირებთან, რომლებმაც განაცხადეს, რომ მათი საქციელი არ იყო პოლიტიკურად მოტივირებული და არ ისახავდა მიზნად არცერთი მეზობელი სახელმწიფოს სუვერენული უფლებების შელახვას ან შეურაცხყოფას.

“ქართული სპორტის ქომაგებმა” გააცნობიერეს თავიანთი ქმედებების პოლიტიკური შედეგები და აღნიშნეს, რომ მომავალში მათი მხრიდან მაქსიმალურად იქნება გააზრებული ყოველი ნაბიჯი, რათა სპორტულ ღონისძიებებზე მათი აქტიურობა არ იქცეს ორ მეგობარ-მეზობელ სახელმწიფოს შორის დაპირისპირების მიზეზად.

მოგეხსენებათ, რომ საფეხბურთო გუნდებს შორის განმეორებითი შეხვედრა მიმდინარე წლის 7 აგვისტოს, 21:00 საათზე, მ. მესხის სახელობის “ლოკომოტივის” სტადიონზე გაიმართება. შინაგან საქმეთა სამინისტრო მოუწოდებს ყველა გულშემატკივარს კორექტულობისაკენ და სტუმარი გუნდის გულშემატკივრების პატივისცემისაკენ. აქვე ხაზგასმით აღვნიშნავთ, რომ ყველა სამართალდამრღვევი პირი კანონის შესაბამისად მკაცრად დაისჯება”.

დავით ოდიკაძე: “ფრე ჩვენთვის სასურველი შედეგია”

Posted on აგვისტო 1, 2014აგვისტო 1, 2014 by ბექა დოგრაშვილი

უეფას ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის გამართული შეხვედრა ანგარიშით 0:0 დასრულდა. მატჩის შემდეგ კომენტარი გააკეთა “ჩიხურას” კაპიტანმა დავით ოდიკაძემ, რომელმაც ნულოვანი ფრე სასურველ შედეგად შეაფასა.

“პირველ შეხვედრაში ჩვენი ამოცანა არწაგება გახლდათ, რასაც მივაღწიეთ კიდეც. ჩვენთვის ეს კარგი შედეგია. მძიმე მატჩი გამოვიდა.

ახლა განმეორებითი შეხვედრა გველის, ჩვენი ტრიბუნების წინაშე. “ბურსასპორის” წინააღმდეგ გამართულ მატჩზე დაახლოებით 15 ათასი გულშემატკივარი მოვიდა. ამჯერად უფრო მეტნი ვიქნებით, დაახლოებით 20 ათასი”, – ციტირებს ოდიკაძის სიტყვებს azerisport-ი.

შეგახსენებთ, რომ “ჩიხურასა” და “ნეფთჩის” შორის განმეორებითი შეხვედრა 7 აგვისტოს, მიხეილ მესხის სახელობის სტადიონზე, 21:00 საათზე დაიწყება.

ბაქოში ქართველი გულშემატკივრები დააკავეს

Posted on ივლისი 31, 2014ივლისი 31, 2014 by ბექა დოგრაშვილი

azerisport-ის ცნობით, ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის გამართული მატჩის (0:0) დასრულების შემდეგ ქართველი გულშემატკივრები დააკავეს.

წყაროს ცნობით, შეხვედრის დასრულებისთანავე “ჩიხურას” ქომაგებსა და ადგილობრივი სამართალდამცავი ორგანოს წარმომადგენლებს შორის შეხლა-შემოხლა მოხდა, რაც ქართველი გულშემატკივრების დაკავებით დასრულდა.

შეგახსენებთ, რომ კონფლიქტი უშუალოდ მატჩის დროსაც მოხდა. სტადიონზე დამსწრე “ჩიხურას” გულშემატკივრებმა პირველი ტაიმის ბოლოს ტრიბუნაზე გამოფინეს რუკა, რომელზედაც ქალაქები კახი და ზაქათალა საქართველოს შემადგენლობაში იყვნენ შეყვანილნი, რასაც “ნეფთჩის” ქომაგთა მხრიდან აგრესია და ბოთლების სროლა მოჰყვა.

სოსო ფრუიძე: “სოფლის გუნდი გვიწოდეს?”

Posted on ივლისი 31, 2014ივლისი 31, 2014 by ბექა დოგრაშვილი

უეფას ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის გამართული შეხვედრა ფრედ, ანგარიშით 0:0 დასრულდა. მატჩის შემდეგ იმერელთა მთავარმა მწვრთნელმა სოსო ფრუიძემ განაცხადა, რომ დღეს იღბალი მათ მხარეს იყო.

“კარგი თამაში გამოვიდა, უშეღავათო ბრძოლაში წარიმართა. ვიცოდით, რომ “ნეფთჩი” ძლიერი გუნდია. მეტოქეს პატივს ვცემთ. მოწინააღმდეგე გუნდს ძალიან კარგი მწვრთნელი და შესანიშნავი ფეხბურთელები ჰყავს. იღბალი ჩვენ მხარეს იყო. განმეორებითი მატჩისთვის უფრო საფუძვლიანად მოვემზადებით.
სოფლის გუნდი გვიწოდეს? ვერ ვხედავ იმის აუცილებლობას, რომ ამ განცხადებას ვუპასუხო”, – ციტირებს ფრუიძის სიტყვებს azerisport-ი.

მატჩს “ჩიხურას” ქომაგებიც დაესწრნენ, რომელთაც სოსო ფრუიძემ მადლობა გადაუხადა:

“მადლობას ვუხდი საქართველოდან ჩამოსულ გულშემატკივრებს. ისინი გულმხურვალედ გვქომაგობდნენ. ამავე დროს, მოხარული ვარ, რომ “ნეფთჩის” ასეთი ქომაგები ვიხილე.
განმეორებით მატჩიც ვიბრძოლებთ და ვნახოთ, რა მოხდება. ჩვენ არ ვართ “ნეფთჩის” კალიბრის გუნდი და ეს კარგად გვესმის”, – განაცხადა ფრუიძემ.

“ჩიხურას” თავკაცმა მატჩის მიმდინარეობისაას მომხდარი ინციდენტის შესახებაც გააკეთა კომენტარი. როგორც azerisport-ი იუწყება, სტადიონზე დამსწრე “ჩიხურას” გულშემატკივრებმა პირველი ტაიმის ბოლოს ტრიბუნაზე გამოფინეს რუკა, რომელზედაც ქალაქები კახი და ზაქათალა საქართველოს შემადგენლობაში იყვნენ შეყვანილნი.

“ვწუხვარ, რომ ასეთი რამ მოხდა. აზერბაიჯანი ჩვენი მეგობარი და მეზობელი სახელმწიფოა. ისინი არ იყვნენ “ჩიხურას” ნამდვილი გულშემატკივრები”, – აღნიშნა სოსო ფრუიძემ.

მისივე თქმით, “ჩიხურა” განმეორებით შეხვედრაში უფრო ლაღად ითამაშებს:

“ვეცდებით, უფრო გახსნილი ფეხბურთი ვითამაშოთ, ვიდრე “ბურსასპორთან” მოხდა. საშინაო მატჩში უფრო მეტად შევუტევთ”.

შეგახსენებთ, რომ “ჩიხურასა” და “ნეფთჩის” შორის განმეორებითი შეხვედრა 7 აგვისტოს, მიხეილ მესხის სახელობის სტადონზე, 21:00 საათზე დაიწყება.

“ნეფთჩისა” და “ჩიხურას” შორის გასამართ მატჩს შენოლ გიუნეშიც დაესწრება

Posted on ივლისი 31, 2014 by ბექა დოგრაშვილი

azerisport-ის ინფორმაციით, უეფას ევროპის ლიგის მესამე საკვალიფიკაციო ეტაპზე ბაქოს “ნეფთჩისა” და საჩხერის “ჩიხურას” შორის დღეს გასამართ მატჩს თურქული “ბურსასპორის” მთავარი მწვრთნელი შენოლ გიუნეშიც დაესწრება. როგორც მოგეხსენებათ, სწორედ გიუნეშის გუნდის ბარიერი დაძლია “ჩიხურამ” ტურნირის მეორე საკვალიფიკაციო ეტაპზე.

“ნეფთჩისა” და “ჩიხურას” შორის გასამართი მატჩის პირდაპირ ტრანსლაციას საზოგადოებრივი მაუწყებლის პირველი არხი დღეს, 19:00 საათიდან შემოგთავაზებთ.

შეხვედრას კრისტიან ბალაჟის ხელმძღვანელობით რუმინელ მსაჯთა ბრიგადა განსჯის.

სოსო ფრუიძე: “ბაქოში საყაიმო შედეგიც დაგვაკმაყოფილებს”

Posted on ივლისი 30, 2014ივლისი 30, 2014 by ბექა დოგრაშვილი

უეფას ევროპის ლიგის მესამე საკვალიფიკაციო ეტაპზე საჩხერის “ჩიხურა” ბაქოს “ნეფთჩის” დაუპირისპირდება. იმერული გუნდის მთავარმა მწვრთნელმა სოსო ფრუიძემ დამდეგი შეხვედრის შესახებ ისაუბრა.

“დასაკარგი არაფერი გვაქვს. გავალთ მოედანზე და ვიბრძოლებთ. მოგებისთვის ყველაფერს გავაკეთებთ. წარმატების მოსაპოვებლად საკმარისი ძალა გვაქვს. ჩვენ ჩვენი სათამაშო სტილი გავქვს, რასაც კვლავ გამოვიყენებთ. ბაქოში საყაიმო შედეგიც დაგვაკმაყოფილებს. აქ ფავორიტი “ნეფთჩია”. მეტოქეს კარგად ვიცნობ, ვიცი, რაც შეუძლია. ის, რომ ხვალ სტადიონი გადავსებული იქნება, არ მაღელვებს. ჩვენ ამას მივეჩვიეთ“, – ციტირებს ფრუიძის სიტყვებს azerisport-ი.

“ნეფთჩისა” და “ჩიხურას” შორის გასამართი მატჩის პირდაპირ ტრანსლაციას საზოგადოებრივი მაუწყებლის პირველი არხი ხვალ, 19:00 საათიდან შემოგთავაზებთ. შეხვედრას კრისტიან ბალაჟის ხელმძღვანელობით რუმინელ მსაჯთა ბრიგადა განსჯის.

“ნეფთჩის” თავკაცი: “ქართველებს მუდამ ჰყავდათ ძლიერი ფეხბურთელები, თუმცა…”

Posted on ივლისი 30, 2014 by ბექა დოგრაშვილი

“ნეფთჩის” მთავარმა მწვრთნელმა ბეიუკაღა გაჯიევმა კიდევ ერთხელ გააკეთა კომენტარი უეფას ევროპის ლიგის მესამე საკვალიფიკაციო ეტაპზე საჩხერის “ჩიხურას” წინაღმდეგ ხვალ გასამართი მატჩის შესახებ.

“ჩიხურას” მატჩს ვუყურე. “კოპერის” (წინა ეტაპზე გამოთიშა “ნეფთჩიმ”) მსგავსი გუნდია. დაცვიდან თამაში უყვართ. მიუხედავად იმისა, რომ ქართველებს მუდამ ჰყავდათ დიდებული ფეხბურთელები, ჩვენ “ჩიხურას” ბარიერის დაძლევა შეგვიძლია“, – ციტირებს გაჯიევის სიტყვებს azerisport-ი.

კიდევ ერთხელ შეგახსენებთ, რომ ბაქოს “ნეფთჩისა” და საჩხერის “ჩიხურას” შორის გასამართი მატჩის პირდაპირ ტრანსლაციას საზოგადოებრივი მაუწყებლის პირველი არხი ხვალ, 19:00 საათიდან შემოგთავაზებთ. შეხვედრას კრისტიან ბალაჟის ხელმძღვანელობით რუმინელ მსაჯთა ბრიგადა განსჯის.

ბესიკ დეკანოიძე: “ნეფთჩისთან” გამარჯვებაზე ვფიქრობთ”

Posted on ივლისი 30, 2014 by ბექა დოგრაშვილი

უეფას ევროპის ლიგის მესამე საკვალიფიკაციო ეტაპზე საჩხერის “ჩიხურა” ბაქოს “ნეფთჩის” დაუპირისპირდება. იმერული გუნდის თავდამსხმელმა ბესიკ დეკანოიძემ azerisport-ის ჟურნალისტის კითხვებს უპასუხა.

— მზად ხართ ბაქოელებთან გასამართი მატჩისთვის?
— ჯერ მზადება არ დაგვისრულებია. მატჩს სრულად მომზადებულნი შევხვდებით.

— რას ფიქრობთ დამდეგ მატჩზე?
— “ნეფთჩი” ძალიან კარგი გუნდია, თუმცა ეს ჩვენ არ გვაშინებს, რადგან მომდევნო ეტაპზე გასვლა გვინდა.

— როგორ დაძლიეთ “ბურსასპორის” ბარიერი?
— ვიცით, რომ სენსაცია მოვახდინეთ. ბოლომდე ვიბრძოლეთ, რაც საბოლოო წარმატების განმსაზღვრელი ფაქტორი გახდა.

— ამ ზაფხულს ორჯერ შეხვდით “ნეფთჩის” მოსამზადებელი პერიოდის დროს, არცერთი მატჩი არ წაგიგიათ. ახლა უკვე ოფიციალური შეხვედრის დრო დადგა. რა შედეგი დაგაკმაყოფილებთ ბაქოში გასამართ მატჩში?
— ბუნებრივია, ჩვენ გამარჯვებაზე ვფიქრობთ. ვფიქრობთ იმაზე, თუ როგორ დავძლიოთ “ნეფთჩი” ბაქოში.

— თქვენი აზრით, ეს იოლი იქნება?
— რა თქმა უნდა, არა. “ნეფთჩი” ძლიერი მეტოქეა. ასეთი გუნდის წინააღმდეგ ბოლომდე უნდა ვითამაშოთ.

როგორც აქამდე მოგახსენეთ, ბაქოს “ნეფთჩისა” და საჩხერის “ჩიხურას” შორის ხვალ გასამართი მატჩის პირდაპირ ტრანსლაციას საზოგადოებრივი მაუწყებლის პირველი არხი 19:00 საათიდან შემოგთავაზებთ.

“ნეფთჩის” თავკაცი: “ზესტაფონი” “ჩიხურაზე” ძლიერია”

Posted on ივლისი 29, 2014 by ბექა დოგრაშვილი

როგორც მოგეხსენებათ, უეფას ევროპის ლიგის მესამე საკვალიფიკაციო ეტაპზე საჩხერის “ჩიხურა” ბაქოს “ნეფთჩის” დაუპირისპირდება. ეს აზერბაიჯანული გუნდი ქართველებისთვის კარგად ნაცნობია: ორი წლის წინათ, ჩემპიონთა ლიგის მეორე საკვალიფიკაციო ეტაპზე “ნეფთჩისა” და “ზესტაფონის” გზები გადაიყარა. პირველი შეხვედრა ბაქოელებმა შინ ანგარიშით 3:0 მოიგეს, მეორე კი ფრედ, 2:2 დასრულდა.

საგულისხმოა, რომ მიმდინარე წლის ივნისის თვეში “ჩიხურასა” და “ნეფთჩის” შორის ორი ამხანაგური მატჩი გაიმართა. პირველ შემთხვევაში სოსო ფრუიძის გუნდმა 3:2 იმარჯვა, მეორე მატჩი კი 1:1 დასრულდა.

“ნეფთჩის” თავკაცი ბეიუკაღა გაჯიევი თავს იმშვიდებს და azerisport-ისთვის მიცემულ ინტერვიუში ამბობს, რომ “ზესტაფონი” დღევანდელ “ჩიხურაზე” ძლიერია.

— რას იტყოდით “ჩიხურას” შესახებ?
— ამ გუნდთან საკონტროლო მატჩები ჩავატარეთ, თუმცა ამ შეხვედრებზე დაყრდნობით არაფრის თქმა არ შეიძლება. ჩვენთვის უფრო სასარგებლო იქნება “ბურსასპორის” წინააღმდეგ მათ მიერ ჩატარებული მატჩის ვიდეოჩანაწერის ხილვა. მეტოქეს პატივს ვცემთ.

— შესაძლოა თუ არა “ჩიხურას” შედარება “ზესტაფონთან”, რომელსაც თქვენი გუნდი შარშანწინ შეხვდა?
— რთული სათქმელია. მცირე ინფორმაცია მაქვს იმის შესახებ, თუ როგორ თამაშობს “ჩიხურა” ეროვნულ ჩემპიონატში. ვფიქრობ, რომ დასახელებული გუნდები თანაბარი ძალისანი არიან, “ზესტაფონ” უფრო ძლიერიც კია.