Atletico Madrid – გვერდი 2 – Fanebi.Com – ფეხბურთი, კალათბურთი, რაგბი, სხვა

“კრილია სოვეტოვს” ლორიას სასარგებლოდ 20 მილიონ რუბლზე მეტის გადახდა დაეკისრა

Posted on თებერვალი 1, 2019 by ბექა დოგრაშვილი

საქართველოს ეროვნული ნაკრების კიპერმა გიორგი ლორიამ “კრილია სოვეტოვს” სასამართლო მოუგო. პროცესი ექვსი თვის განმავლობაში მიმდინარეობდა. “სპორტ-ექსპრესის” ცნობით, სამარულ კლუბს ქართველი ფეხბურთელის სასარგებლოდ 20 მილიონ რუბლზე (დაახლოებით 300 ათასი აშშ დოლარი) მეტის გადახდა დაეკისრა.

გიორგი ლორიამ განმარტა, რომ “კრილია სოვეტოვმა” ხელფასის გარდა საშვებულებო თანხის გადახდაც დაუგვიანა. ის სამარული კლუბის რიგებში 2015-დან 2018 წლამდე ირიცხებოდა.

შეგახსენებთ, რომ გიორგი ლორიას მსგავსი შემთხვევა მახაჭკალის “ანჟისთანაც” ჰქონდა. მაშინ დაღესტნურ კლუბს ქართველი მეკარის სასარგებლოდ 4,5 მილიონი რუბლის გადახდა დაეკისრა.

მაურიციო სარი: “ედენ აზარი გუნდის ლიდერი არ არის”

Posted on იანვარი 24, 2019 by ბექა დოგრაშვილი

ლონდონის “ჩელსის” მთავარმა მწვრთნელმა მაურიციო სარიმ “ლურჯების” ნახევარმცველი ედენ აზარი შეაქო, თუმცა იქვე დასძინა, რომ მას გუნდის ლიდერად არ თვლის.

“დღესდღეობით აზარი ინდივიდუალურად ძლიერი მოთამაშე უფრო არის, ვიდრე – გუნდის ლიდერი. ის ძალზედ მნიშვნელოვანი ფიგურაა და თავის პოზიციაზე ერთ-ერთი საუკეთესო ფეხბურთელია. ედენს მატჩის მიმდინარეობის შეცვლა ორ წუთში შეუძლია, ზოგჯერ კი ამისთვის ერთი წუთიც ჰყოფნის, თუმცა მას ლიდერად ვერ ჩავთვლი.

მისგან ნებისმიერი მწვრთნელი უფრო მეტს მოითხოვდა. მეც ვფიქრობ, რომ მას გაცილებით დიდი პოტენციალი აქვს, ვიდრე ეს დღეს ჩანს. მან საკუთარი თავი უნდა დააფასოს და სრულყოფისთვის მუშაობა გააგრძელოს.

რაც შეეხება მომავალს, ვფიქრობ, მას ჯერ კიდევ არ აქვს გადაწყვეტილი, აქ დარჩეს თუ ახალი გამოცდილების მისაღებად სხვა კლუბს მიაშუროს. ედენი ამ საკითხში ჯერ კიდევ არ არის ჩამოყალიბებული”, – ციტირებს მაურიციო სარის სიტყვებს “სქაი სპორტსი”.

სიმეონე “ატლეტიკოსთან” კონტრაქტს გაახანგრძლივებს

Posted on იანვარი 22, 2019 by ბექა დოგრაშვილი

ესპანური გამოცემა “ასის” ცნობით, მადრიდის “ატლეტიკოს” მთავარი მწვრთნელი დიეგო სიმეონე კლუბთან კონტრაქტს კიდევ ერთი წლით გაახანგრძლივებს. მოქმედ ხელშეკრულებას ვადა 2020 წლამდე აქვს.

არგენტინელი სპეციალისტის ამ გადაწყვეტილების ერთ-ერთ მთავარ ფაქტორად ლონდონის “ჩელსიდან” ალვარო მორატას გადმობირება სახელდება. აღნიშნული ტრანსფერი ოფიციალურად მომდევნო საათების განმავლობაში უნდა დადასტურდეს. სიმეონეს უკვე დიდი ხანია, “ატლეტიკოს” შეტევითი ხაზის გაძლიერება სურს და მორატას დამატებით ფიქრობს, რომ გუნდს პრიმერადივიზიონისა და ჩემპიონთა ლიგის მოგების რეალური შანსი გაუჩნდება.

შეგახსენებთ, რომ დიეგო სიმეონე “ატლეტიკოში” 2011 წლის დეკემბრიდან მუშაობს. მან ამ პერიოდის განმავლობაში კლუბთან ერთად ესპანეთის ჩემპიონატი, ქვეყნის თასი და სუპერთასი მოიგო, ორ-ორჯერ დაისაკუთრა ევროპის ლიგა და უეფას სუპერთასი.

სიმეონეს არაერთხელ აქვს ნათქვამი, რომ მომავალში მილანის “ინტერის” გაწვრთნას აპირებს.

“ბარსელონამ” “ატლეტიკო” დაამარცხა და ერთპიროვნულად გალიდერდა (ვიდეო)

Posted on იანვარი 30, 2016იანვარი 30, 2016 by ბექა დოგრაშვილი

ესპანეთის პრიმერადივიზიონის 22-ე ტურში “ბარსელონამ” უშუალო კონკურენტი მადრიდის “ატლეტიკო” მიიღო და მეტოქე ანგარიშით 2:1 დაამარცხა.

შეხვედრის მე-10 წუთზე სტუმრები კოკემ დააწინაურა. ნახევარი საათის თავზე ლიონელ მესიმ ანგარიში გაათანაბრა, ხოლო 38-ე წუთზე ლუის სუარესმა კატალონიელები სულაც წინ გაიყვანა. ტაიმის მიწურულს სტუმრები რიცხობრივ უმცირესობაში დარჩნენ, ვინაიდან მთავარმა არბიტრმა ფილიპე ლუისს მესის წინააღმდეგ უხეში თამაშისთვის პირდაპირ წითელი ბარათი უჩვენა.

65-ე წუთზე მოედნიდან “ატლეტიკოს” მეორე ფეხბურთელი დიეგო გოდინი გააძევეს.

ამრიგად, “ბარსელონა” პრიმერადივიზიონის სატურნირო ცხრილს 51 ქულით სათავეში ჩაუდგა. გარდა ამისა, კატალონიელებს ერთი მატჩით ნაკლები აქვთ ჩატარებული. “ატლეტიკო” 48 ქულით მეორე პოზიციაზეა.

ესპანეთის პრიმერადივიზიონი
XXII ტური
“ბარსელონა” — “ატლეტიკო” 2:1 (2:1)

გოლები: მესი 30′, სუარესი 38′ — კოკე 10′.
გაფრთხილებები: გოდინი 24′, გაბი 25′, ხუანფრანი 41′, პარტეი 90+2′.
გაძევებები: ფილიპე ლუისი 44′, გოდინი 65′.

“რეალსა” და “ატლეტიკოს” 2016 წლის ზაფხულში ტრანსფერების განხორციელება შეეძლებათ

Posted on იანვარი 30, 2016 by ბექა დოგრაშვილი

მადრიდის “რეალმა” და “ატლეტიკომ” ფიფასგან უახლოესი ორი სატრანსფერო პერიოდის განმავლობაში დაწესებული დისკვალიფიკაცია გაასაჩივრეს.

მსოფლიო ფეხბურთის მმართველმა ორგანომ ეს სანქცია დროებით შეაჩერა. შესაბამისად, კლუბებს 2016 წელს ახალი ფეხბურთელების დამატება შეეძლებათ იმ შემთხვევაში, თუ სააპელაციო კომიტეტი პირველ ივლისამდე ახალ გადაწყვეტილებას არ გამოიტანს.

აღსანიშნავია, რომ საბოლოო ვერდიქტის გამოტანამდე იმ მოთამაშეებს, რომელთა გამოც მიმდინარეობს გამოძიება, ყველა ტურნირზე შეეძლებათ თამაში.

შეგახსენებთ, რომ 2014 წელს ფიფამ ანალოგიური დისკვალიფიკაცია “ბარსელონას” მიუსაჯა.

“ატლეტიკო” ტრანსფერებზე დაწესებულ დისკვალიფიკაციას ასაჩივრებს

Posted on იანვარი 26, 2016 by ბექა დოგრაშვილი

მადრიდის “ატლეტიკო” ტრანსფერებზე ფიფასგან დაწესებულ დისკვალიფიკაციას ასაჩივრებს. მსოფლიო ფეხბურთის მმართველმა ორგანომ ესპანური კლუბი ახალგაზრდა ფეხბურთელების დამატებისთვის გათვალისწინებული წესების დარღვევის გამო დასაჯა.

“ჩვენმა კლუბმა ფიფაში საჩივარი გააგზავნა, ვინაიდან ჩვენ ამ გადაწყვეტილებას არ ვეთანხმებით. ვთვლით, რომ ყველა ტრანსფერი წესების სრული დაცვით განვახორციელეთ. გარდა ამისა, გვსურს, რომ საბოლოო გადაწყვეტილების მიღებამდე სანქცია შეჩერდეს”, – ნათქვამია “ატლეტიკოს” ოფიციალურ განცხადებაში.

შეგახსენებთ, რომ ფიფამ “ატლეტიკოსა” და “რეალს” უახლოესი ორი სატრანსფერო პერიოდის განმავლობაში ახალი ფეხბურთელების დამატება აუკრძალა. გარდა ამისა, “ატლეტიკო” 900, ხოლო “რეალი” 360 ათასი შვეიცარიული ფრანკით დაჯარიმდა.

“ატლეტიკომ” სატიტულო სპონსორი შეიცვალა

Posted on ივნისი 24, 2015ივნისი 24, 2015 by ბექა დოგრაშვილი

მადრიდის “ატლეტიკომ” სატიტულო სპონსორი შეიცვალა.

კლუბმა საერთაშორისო სავაჭრო კომპანია Plus500-სთან ორწლიანი კონტრაქტი გააფორმა. ხელშეკრულება ჯერ კიდევ მიმდინარე წლის დასაწყისში გაფორმდა, თუმცა ძალაში მაშინ შევიდა, როდესაც ყოფილ სპონსორთან კონტრაქტის ვადა ამოიწურა. შეგახსენებთ, რომ “ატლეტიკოს” წინა სატიტულო სპონსორი აზერბაიჯანის ტურიზმის ადმინისტრაცია იყო.

დამდეგი ორი წლის განმავლობაში მადრიდული კლუბის მაისურზე გამოსახული იქნება Plus500-ის გერბი.

მირანდა “ინტერში” მიდის

Posted on ივნისი 17, 2015ივნისი 17, 2015 by ბექა დოგრაშვილი

მადრიდის “ატლეტიკოს” მცველი მირანდა მილანის “ინტერში” გადასვლასთან ახლოს არის.

“სპორტ მედიასეტის” ცნობით, მხარეებს შორის შეთანხმება უკვე მიღწეულია. “ნერიაძური” მირანდასთან სამწლიან კონტრაქტს გააფორმებს. 30 წლის ბრაზილიელი ფეხბურთელი ჯამაგირის სახით წელიწადში 2,5 მილიონ ევროს მიიღებს.

გასულ სეზონში მირანდამ 36 მატჩი ჩაატარა, სამი გოლი გაიტანა და ერთი საგოლე გადაცემა გააკეთა.

მომდევნო სეზონში ჩემპიონთა ლიგაზე ხუთი ესპანური კლუბი ითამაშებს

Posted on მაისი 28, 2015 by ბექა დოგრაშვილი

უეფას ჩემპიონთა ლიგის 2015/16 წლების გათამაშებაში ხუთი ესპანური კლუბი მიიღებს მონაწილეობას. ეს მას შემდეგ გახდა ცნობილი, რაც ევროპის ლიგის ფინალურ მატჩში “სევილიამ” უკრაინული “დნიპრო” ანგარიშით 3:2 დაამარცხა.

როგორც მოგეხსენებათ, ახალი სეზონიდან ევროპის ლიგის გამარჯვებულ გუნდს ავტომატურად ენიჭება ჩემპიონთა ლიგის საგზური. აქედან გამომდინარე, მართალია, “სევილია” ესპანეთის პრიმერადივიზიონში მეხუთე ადგილზე გავიდა, თუმცა ევროპის ლიგის მოგებისთვის ჩემპიონთა ლიგის ჯგუფურ ეტაპზე მაინც ითამაშებს.

ესპანეთიდან “სევილიას” გარდა ჩემპიონთა ლიგას ჯგუფური ეტაპიდან შეუერთდებიან “ბარსელონა”, მადრიდის “რეალი” და “ატლეტიკო”. “ვალენსია” ტურნირზე პლეიოფიდან ჩაერთვება.

“ბარსელონა” ესპანეთის ჩემპიონია!

Posted on მაისი 17, 2015 by ბექა დოგრაშვილი

ესპანეთის პრიმერადივზიონის 37-ე ტურში “ბარსელონამ” მადრიდის “ატლეტიკო” ანგარიშით 1:0 დაამარცხა და მიმდინარე გათამაშების დასრულებამდე ერთი ტურით ადრე ქვეყნის ჩემპიონის ტიტული გაინაღდა. ეს ერთადერთი გოლი შეხვედრის 65-ე წუთზე ლეო მესიმ გაიტანა.

“ბარსელონამ” 93 ქულას მოუყარა თავი. კატალონიურ გუნდს უახლოესი მადევარი მადრიდის “რეალი” 4 ქულით ჩამორჩება, რაც ნიშნავს იმას, რომ “სამეფო კლუბს” ბოლო ტურში “ბლაუგრანასთან” გათანაბრების თეორიული შანსიც აღარ აქვს. მესამე პოზიციაზე 77 ქულით “ატლეტიკო” გახლავთ.

ამრიგად, “ბარსელონა” ისტორიაში 23-ედ გახდა ქვეყნის ჩემპიონი.

ესპანეთის პრიმერადივიზიონი
37-ე ტური
“ატლეტიკო” — “ბარსელონა” 0:1 (0:0)

გოლი: მესი 65′.
გაფრთხილებები: გოდინი 32′, კოკე 53′, გაბი 75′, ხიმენესი 89′, სიკეირა 90+4′ — პედრო 29′, ნეიმარი 90+2′, მესი 90+4′.

“ჩელსი” კოკეს სანაცვლოდ 61 მილიონს იხდის

Posted on აპრილი 1, 2015 by ბექა დოგრაშვილი

ბრიტანული “მეტროს” ცნობით, ლონდონის “ჩელსი” მზადაა, მადრიდის “ატლეტიკოს” კოკეს სანაცვლოდ 61 მილიონი ევრო შესთავაზოს. 23 წლის ესპანელი ნახევარმცველი შესაძლოა, ზაფხულის სატრანსფერო პერიოდში “სტემფორდ ბრიჯზე” გადაბარგდეს. მანამდე გავრცელებული ინფორმაციის თანახმად, კოკეს მიმართ ინტერესს “ბარსელონაც” იჩენდა.

ესპანეთის პრიმერადივიზიონის მიმდინარე გათამაშებაში კოკემ 24 მატჩი ჩაატარა, ორი გოლი გაიტანა და ცხრა საგოლე გადაცემა გააკეთა. ჩემპიონთა ლიგაზე ჩატარებულ შვიდ შეხვედრაში ესპანელ ფეხბურთელს ორი გოლი და ოთხი საგოლე პასი აქვს გაკეთებული.

ოფიციალურად: სიმეონემ “ატლეტიკოსთან” კონტრაქტი გაახანგრძლივა

Posted on მარტი 24, 2015მარტი 24, 2015 by ბექა დოგრაშვილი

როგორც გაუწყეთ, მადრიდის “ატლეტიკოს” მთავარმა მწვრთნელმა დიეგო სიმეონემ კლუბთან კონტრაქტი გაახანგრძლივა. ინფორმაცია უკვე ოფიციალურად დადასტურდა. განცხადება “ვისენტე კალდერონის” VIP-დარბაზში გაკეთდა.

მხარეებს შორის გაფორმებული ახალი შრომითი ხელშეკრულება ძალაში 2020 წლის ივნისამდე იქნება.

შეგახსენებთ, რომ ფეხბურთის არგენტინელი სპეციალისტი “ატლეტიკოს” 2011 წლის დეკემბრიდან თავკაცობს. ამ დროის განმავლობაში გუნდმა ესპანეთის ჩემპიონატი, ქვეყნის თასი და სუპერთასი, ასევე ევროპის ლიგა და უეფას სუპერთასი მოიგო, გუნდი შარშან ჩემპიონთა ლიგის ფინალშიც გავიდა.