ჩელსი – გვერდი 3 – Fanebi.Com – ფეხბურთი, კალათბურთი, რაგბი, სხვა

სიმეონე “ატლეტიკოსთან” კონტრაქტს გაახანგრძლივებს

Posted on იანვარი 22, 2019 by ბექა დოგრაშვილი

ესპანური გამოცემა “ასის” ცნობით, მადრიდის “ატლეტიკოს” მთავარი მწვრთნელი დიეგო სიმეონე კლუბთან კონტრაქტს კიდევ ერთი წლით გაახანგრძლივებს. მოქმედ ხელშეკრულებას ვადა 2020 წლამდე აქვს.

არგენტინელი სპეციალისტის ამ გადაწყვეტილების ერთ-ერთ მთავარ ფაქტორად ლონდონის “ჩელსიდან” ალვარო მორატას გადმობირება სახელდება. აღნიშნული ტრანსფერი ოფიციალურად მომდევნო საათების განმავლობაში უნდა დადასტურდეს. სიმეონეს უკვე დიდი ხანია, “ატლეტიკოს” შეტევითი ხაზის გაძლიერება სურს და მორატას დამატებით ფიქრობს, რომ გუნდს პრიმერადივიზიონისა და ჩემპიონთა ლიგის მოგების რეალური შანსი გაუჩნდება.

შეგახსენებთ, რომ დიეგო სიმეონე “ატლეტიკოში” 2011 წლის დეკემბრიდან მუშაობს. მან ამ პერიოდის განმავლობაში კლუბთან ერთად ესპანეთის ჩემპიონატი, ქვეყნის თასი და სუპერთასი მოიგო, ორ-ორჯერ დაისაკუთრა ევროპის ლიგა და უეფას სუპერთასი.

სიმეონეს არაერთხელ აქვს ნათქვამი, რომ მომავალში მილანის “ინტერის” გაწვრთნას აპირებს.

რონალდუ მარსელოს იტალიაში უხმობს

Posted on იანვარი 21, 2019 by ბექა დოგრაშვილი

ესპანური გამოცემა “ასი” წერს, რომ მადრიდის “რეალის” მცველი მარსელო, შესაძლოა, ტურინის “იუვენტუსში” გადავიდეს.

30 წლის ბრაზილიელმა ფეხბურთელმა ბოლო პერიოდში ძირითად შემადგენლობაში ადგილი სერხიო რეგილონს დაუთმო და მიუხედავად იმისა, რომ პროფესიული კარიერის მადრიდში დასრულების სურვილი არაერთი გამოუთქვამს, სიტუაცია, შესაძლოა, შეიცვალოს. უკანასკნელი თვეების განმავლობაში კრიშტიანუ რონალდუ არაერთხელ შეეხმიანა მარსელოს და ის იტალიაში სათამაშოდაც მიიწვია.

“იუვენტუსის” დაცვის მარცხენა ფლანგს ალექს სანდრო ამაგრებს. ამ პოზიციაზე მატია დე შილიოსაც შეუძლია თამაში, თუმცა კონკურენციის გასაძლიერებლად “ბებერმა სინიორამ” მარსელოს ტრანსფერზე მუშაობა, შესაძლოა, დაიწყოს.

ცნობისათვის, მადრიდის “რეალსა” და მარსელოს შორის გაფორმებულ მოქმედ შრომით ხელშეკრულებას ვადა 2022 წლის ზაფხულამდე აქვს.

იკარდიმ “ინტერს” მოთხოვნა წაუყენა

Posted on იანვარი 21, 2019 by ბექა დოგრაშვილი

მილანის “ინტერსა” და გუნდის თავდამსხმელ მაურო იკარდის შორის კონტრაქტის გახანგრძლივების თაობაზე მოლაპარაკება მიმდინარეობს. “კალჩომერკატოს” ცნობით, “ნერაძური” მზად არისმ 25 წლის ფეხბურთელს სეზონში ხელფასის სახით ექვსი მილიონი ევრო გადაუხადოს, თუმცა არგენტინელ ფორვარდს უფრო დიდი მოთხოვნები აქვს.

მაურო იკარდის წელიწადში სუფთა ანაზღაურების სახით 7,5 მილიონი ევროს მიღება სურს, რითაც ის სერია А-ს ყველაზე მაღალანაზღაურებად ფეხბურთელთა შორის კრიშტიანუ რონალდუს შემდეგ მეორე ადგილს დაიკავებს.

შეგახსენებთ, რომ მხარეებს შორის გაფორმებულ შრომით ხელშეკრულებას ვადა 2021 წლის 30 ივნისს ეწურება. ფეხბურთელის კონტრაქტის გამოსასყიდი თანხა 110 მილიონი ევროა.

მაურო იკარდიმ მიმდინარე სეზონში “ინტერის” ფორმით 24 მატჩი ჩაატარა, 14 გოლი გაიტანა და ორი შედეგიანი გადაცემა მიითვალა.

პეტრ ჩეხი კარიერას ასრულებს

Posted on იანვარი 15, 2019იანვარი 15, 2019 by ბექა დოგრაშვილი

ლონდონის “არსენალის” კიპერმა პეტრ ჩეხმა გადაწყვიტა, რომ მიმდინარე სეზონის ბოლოს პროფესიულ კარიერას დაასრულებს.

“ეს პროფესიონალი ფეხბურთელის რანგში ჩემი მეოცე სეზონია და ვფიქრობ, ახლა შესაბამისი დროა იმის სათქმელად, რომ სეზონის ბოლოს კარიერას დავასრულებ. ინგლისის პრემიერლიგაში 15 წელიწადი დავყავი და ყველა შესაძლო ტიტულის მოგებით ვგრძნობ, რომ დასახულ მიზნებს მივაღწიე. თავდაუზოგავ მუშაობას ვაგრძელებ იმისთვის, რომ “არსენალთან” ერთად კიდევ ერთი ტიტული დავისაკუთრო”, – დაწერა სოციალურ ქსელში ჩეხმა.

36 წლის ჩეხ მეკარეს კარიერის განმავლობაში მხოლოდ ხუთი კლუბის რიგებში უთამაშია: ჩეხური “ხმელი”, პრაღის “სპარტა”, ფრანგული “რენი”, ლონდონის “ჩელსი” და “არსენალი”. ჩეხს ინგლისის პრემიერლიგაში ოთხასზე მეტი მატჩი აქვს ჩატარებული და მათგან ორასზე მეტ შეხვედრაში კარი მშრალად შეინახა. მან პრემიერლიგა (ოთხჯერ), ქვეყნის თასი (ხუთჯერ), ლიგის თასი (სამჯერ), ქვეყნის სუპერთასი (სამჯერ), ჩემპიონთა ლიგა და ევროპის ლიგა მოიგო.

პეტრ ჩეხმა ჩეხეთის ნაკრების რიგებში 2004 წლის ევროპის ჩემპიონატზე მესამე ადგილი დაიკავა.

მარტინ ონილმა “ნოტინგემ ფორესტი” ჩაიბარა

Posted on იანვარი 15, 2019 by ბექა დოგრაშვილი

ინგლისის ჩემპიონშიფში მოასპარეზე “ნოტინგემ ფორესტმა” გუნდის მთავარი მწვრთნელის პოსტზე მარტინ ონილი დანიშნა.

მიუხედავად იმისა, რომ “მეტყევეები” ჩემპიონშიფის პლეი-ოფის ზონაში ადგილს ინარჩუნებენ, კლუბის ხელმძღვანელობა სეზონის სტარტით უკმაყოფილო იყო და გუნდის თავკაცის პოსტიდან აიტორ კარანკა დაითხოვა, რომელმაც გასულ ზაფხულს 14 ახალწვეული დაიმატა.

მარტინ ონილი 2011 წლის ივნისის შემდეგ “ნოტინგემ ფორესტის” მე-11 მთავარი მწვრთნელი გახლავთ. შეგახსენებთ, რომ 66 წლის სპეციალისტი ბოლოს ირლანდიის ნაკრებს თავკაცობდა, რომელიც ნოემბერში დატოვა.

მარტინ ონილი მოთამაშის რანგში “ნოტინგემ ფორესტის” ღირსებას 1971–1981 წლებში იცავდა და გუნდთან ერთად ორჯერ ევროპის ჩემპიონთა თასიც მოიგო.

მაურიციო სარი მსაჯის შეცდომის დასამტკიცებლად პრესკონფერენციაზე ნოუთბუქით მივიდა (ფოტო)

Posted on იანვარი 9, 2019 by ბექა დოგრაშვილი

ლონდონის “ჩელსის” მთავარი მწვრთნელი მაურიციო სარი მიიჩნევს, რომ “ტოტენჰემ ჰოთსპურის” წინააღმდეგ გამართული ინგლისის ლიგის თასის ნახევარფინალური მატჩის მიმდინარეობისას შეხვედრის არბიტრები შეცდნენ, რამაც შედეგზე გავლენა იქონია. “ლურჯების” თავკაცი ამის დასამტკიცებლად მატჩისშემდგომ პრესკონფერენციაზე ნოუთბუქით მივიდა.

შეხვედრის ერთადერთი გოლი “დეზების” თავდამსხმელმა ჰარი კეინმა თერთმეტმეტრიანი დარტყმით გაიტანა, რომელიც თვითონვე მოიპოვა, თუმცა “ჩელსის” იტალიელი დამრიგებელი თვლის, რომ იმ მომენტში ინგლისელი ფეხბურთელი თამაშგარე მდგომარეობაში იყო.

“მე ამ ეპიზოდს ჩვენი კამერით ვუყურე. თამაშგარე მდგომარეობა იყო. ჩვენი კამერა ზუსტად კეინის გასწვრივ იდგა. თამაშგარეში იყო თავი და მუხლი. არა მგონია, რომ ინგლისელ არბიტრებს ვიდეოგამეორების სისტემის გამოყენება შეეძლოთ. გვერდითი მსაჯი გაჩერდა და ბურთს არ მიჰყვა. თუ დარწმუნებული არ ხარ, გააგრძელე მომენტი, მიჰყევი ბურთს და მხოლოდ ამის შემდეგ მიიღე გადაწყვეტილება. ამ შეცდომამ შედეგზე გავლენა იქონია.

ინგლისელმა მსაჯებმა ვიდეოგამეორების სისტემას ალღო უნდა აუღონ. თავიდან იტალიაშიც უჭირდათ ამ ტექნოლოგიასთან მუშაობა”, – თქვა სარიმ “სქაი სპორტსისთვის” მიცემულ ინტერვიუში.

ვილიანი: “იმედი მაქვს, კვლავ შევძლებ მოურინიოსთან თანამშრომლობას”

Posted on აგვისტო 7, 2018 by იაკობ კაპანაძე

ლონდონის “ჩელსის” ბრაზილიელმა ნახევარმცველმა ვილიანმა, რომელმაც რამდენიმე დღის წინ გვაუწყა, რომ ლონდონში რჩება, აღიარა, რომ მომავალში ჟოზე მოურინიოს ხელმძღვანელობით სურს თამაში.

“მოურინიო საუკეთესო სპეციალისტია, რომელთანაც ოდესმე მიმუშავია. ჩვენ მშვენიერი ურთიერთობა გვაქვს, კარგი მეგობრები ვართ.ხშირად ვწერთ ხოლმე ერთმანეთს, ვესაუბრებით. მასთან მუშაობისას ყოველთვის დიდ სიამოვნებას ვიღებდი, იმედი მაქვს, კვლავ შევძლებ მოურინიოსთან თანამშრომლობას.

არ ვიცი, იყო თუ არა ოფიციალური წინადადება “მანჩესტერ იუნაიტედის” მხრიდან, მაგრამ ის ყოველთვის ესაუბრება ჩემს აგენტს და ეუბნება – “ჩემთან მოიყვანე, ჩემთან”.

ამაზე ბევრს, რა თქმა უნდა, არ ვფიქრობ. ლონდონი გასაოცარი ქალაქია და აქ მე და ჩემი ოჯახი თავს დიდებულად ვგრძნობთ. ასე რომ, დიახ, აქ დარჩენას ვაპირებ,” – განაცხადა ბრაზილიელმა ნახევარმცველმა.

ვილიანი: “ჩელსიში” ბედნიერი ვარ”

Posted on აგვისტო 6, 2018 by იაკობ კაპანაძე

ლონდონის “ჩელსის” ბრაზილიელმა ნახევარმცველმა ვილიანმა “მანჩესტერ სიტისთან” განცდილი მარცხის (2-0) შემდეგ პრესასთან საუბრისას აღნიშნა, რომ კლუბის დატოვებაზე არ ფიქრობს, როგორც ამას უცხოური გამოცემები გვარწმუნებენ.

“აქ თავს ბედნიერად ვგრძნობ, მიხარია “ჩელსის” ფეხბურთელი რომ ვარ. მოუთმენლად ველი მომავალი სეზონის დაწყებას და იმედი მაქვს, რომ ყველაფერს მოვიგებთ.

თავს მშვენივრად ვგრძნობ. სამი დღეა, რაც ვარჯიში განვაახლე და ბუნებრივია, რომ საუკეთესო ფორმაში არ ვარ. ყოველი მატჩისგან უნდა ვისწავლოთ გაკვეთილი და ასე ნამდვილად შევძლებთ წარმატების მიღწევას,” -აცხადებს “ბარსელონას” სამიზნე.

“ჩელსი” ედენ აზარს კვირაში 300 000 ფუნტს სთავაზობს

Posted on აგვისტო 5, 2018 by იაკობ კაპანაძე

ლონდონის “ჩელსის” ხელმძღვანელებს მკაცრად აქვთ გადაწყვეტილი ედენ აზარის შენარჩუნება. ამ მიზნის მისაღწევად, ლონდონელებმა უკვე შეიმუშავეს ახალი ხელშეკრულება ბელგიელი ვარსკვლავისთვის.

“არისტოკრატები” მზად არიან, 27 წლის ფეხბურთელს ხელფასი გაუზარდონ. ახალ კონტრაქტზე ხელის მოწერის შემთხვევაში, აზარი კვირაში 300 ათას ფუნტს მიიღებს ხელფასის სახით. ამჟამად ის კვირაში 220 ათასს იღებს.

როგორც ჩანს, ეს ყოველივე “ჩელსის” ახალი მთავარი მწვრთნელის მაურიციო სარის სურვილია. სწორედ მისი გეგმის ნაწილი იყო ნგოლო კანტესთვის გაზრდილი ხელფასის შეთავაზება (290 ათასი კვირაში), რათა მას “პარი სენ-ჟერმენში” გადასვლაზე უარი ეთქვა.

აგენტი: “ჩელსიმ” კურტუას “რეალში” გადასვლის უფლება უნდა მისცეს”

Posted on აგვისტო 4, 2018 by იაკობ კაპანაძე

ლონდონის “ჩელსის” მეკარის ტიბო კურტუას აგენტი ქრისტოფ ჰენროტეი საკმაოდ ხმაურიან განცხადებას აკეთებს, რომლის მიხედვითაც ტიბო კურტუამ უკვე განუცხადა “არისტოკრატებს”, რომ მადრიდის “რეალში” სურს კარიერის გაგრძელება.

“ყველა წერს, რომ ყველაფერი ტიბო კურტუას გადასაწყვეტია, მაგრამ ასე არ არის. ტიბო კურტუამ საკმაოდ ნათლად დააფიქსირა თავისი პოზიცია, რომლის თანახმადაც “რეალში” გადასვლა მისთვის საუკეთესო ვარიანტია.

მისთვის ეს ძალიან დიდი შანსია. კურტუას ძალიან უნდა თავისი ოჯახის სიახლოვეს ყოფნა. “ჩელსის” კი, თავის მხრივ, საკმაოდ კარგი წინადადება აქვს, რომელსაც უნდა დათანხმდეს.

ამბობენ, რომ კურტუა ფულის გამო მიდის. მართალია, მადრიდში ხელფასს გაუზრდიან, მაგრამ მან უკვე არაერთხელ უარყო გაცილებით უფრო სარფიანი წინადადება,” – აცხადებს აგენტი.

მორატა “ჩელსიში” 9-ნომრიანი მაისურით აღარ იასპარეზებს

Posted on აგვისტო 3, 2018 by იაკობ კაპანაძე

ლონდონის “ჩელსის” ესპანელმა თავდამსხმელმა ალვარო მორატამ 9-ნომრიანი მაისურის ტარებაზე უარი განაცხადა და ამიერიდან 29-ნომრიანი მაისურით იასპარეზებს.

საქმე ის არის, რომ ალვარო მორატასა და მის მეუღლე ალისას 29 ივლისს ტყუპები შეეძინათ. სწორედ ალესანდროსა და ლეონარდოს პატივსაცემად აირჩია “რეალის” ყოფილმა თავდამსხმელმა 29 ნომერიც.

“ამ დღეს არასოდეს დავივიწყებ, როდესაც ჩემი ტყუპები ქვეყანას მოევლინენ. ოჯახი ჩემთვის ყოველთვის ყველაფერზე მნიშვნელოვანი იყო. მინდა სულ მახსოვდეს ეს დღე, მოედანზე ყოფნის დროსაც და ამიტომაც გადავწყვიტე მაისურზე ორიანის დამატება,” – აცხადებს მორატა ოფიციალურ ვებ-გვერდთან საუბრისას.

კარიკატურა: ჟოზე მოურინიოს ახალგაზრდა ფეხბურთელებზე ალერგია აქვს

Posted on ივლისი 31, 2018 by კახა ყიფიანი

ჟოზე მოურინიომ ლონდონის “ჩელსიში” მუშაობის დროს მოჰამედ სალაჰი, რომელუ ლუკაკუ და კევინ დე ბრუინი დაიწუნა. უკვე “მანჩესტერ იუნაიტედში” მუშაობის დროს, პორტუგალიელი ისევ არ წყალობს ახალგაზრდა ფეხბურთელებს. ამაზე ომარ მომანი კარიკატურას გვთავაზობს.