Fenerbahce – Fanebi.Com – ფეხბურთი, კალათბურთი, რაგბი, სხვა

პუტინის სახელის სკანდირებისთვის “ფენერბაჰჩეს” უეფასგან სასჯელი ელის

Posted on ივლისი 28, 2022 by ბექა დოგრაშვილი

უეფას სადისციპლინო კომიტეტმა თურქული “ფენერბაჰჩეს” წინააღმდეგ სამართალწარმოება დაიწყო.

ჩემპიონთა ლიგის მესამე საკვალიფიკაციო ეტაპზე “ფენერბაჰჩესა” და კიევის “დინამოს” შორის გამართული მატჩის მიმდინარეობისას თურქული გუნდის ფანებმა ოკუპანტი ქვეყნის პრეზიდენტის, ვლადიმირ პუტინის სახელის სკანდირება დაიწყეს, რითაც მეტოქის გაღიზიანება სცადეს. საბოლოო ჯამში, შეხვედრა უკრაინელთა გამარჯვებით, ანგარიშით 2:1 (პირველი მატჩი 0:0) დასრულდა და მომდევნო ეტაპზე თამაშის უფლება “დინამომ” მოიპოვა. კიეველთა მთავარი მწვრთნელი მირჩა ლუჩესკუ პროტესტის ნიშნად მატჩისშემდგომ პრესკონფერენციაზე არ გამოცხადდა.

უეფას გადაწყვეტილების შესახებ მოგვიანებით გახდება ცნობილი.

იოახიმ ლიოვის მომდევნო გუნდი ცნობილია

Posted on მარტი 17, 2022 by ბექა დოგრაშვილი

გერმანიის ეროვნული ნაკრების ყოფილი მთავარი მწვრთნელი იოახიმ ლიოვი კარიერას, სავარაუდოდ, თურქეთში გააგრძელებს.

თურქული გამოცემა A Spor-ი იუწყება, რომ 62 წლის გერმანელ სპეციალისტსა და “ფენერბაჰჩეს” შორის ზეპირი შეთანხმება უკვე მიღწეულია. წყაროს თანახმად, ლიოვი თურქულ კლუბს მომდევნო სეზონიდან უთავკაცებს.

“ფენერბაჰჩეში” ლიოვის მთავარი სატრანსფერო მიზანი მიუნხენის “ბაიერნის” ნიდერლანდელი თავდამსხმელი ჯოშუა ზირკზე იქნება, რომელიც დღესდღეობით “ანდერლეხტში” იჯარის წესით თამაშობს. 20 წლის ფეხბურთელს ბავარიელებთან კონტრაქტი 2023 წლის ზაფხულში ეწურება. მისი საბაზრო ღირებულება რვა მილიონ ევროდ ფასდება.

იოახიმ ლიოვს თურქეთში იწვევენ

Posted on დეკემბერი 25, 2021 by ბექა დოგრაშვილი

გერმანიის ეროვნული ნაკრების ყოფილ მთავარ მწვრთნელ იოახიმ ლიოვს შემოთავაზება თურქეთის სუპერლიგიდან აქვს. ავტორიტეტული ჟურნალისტი ნიკოლო სკირა იუწყება, რომ 61 წლის გერმანელ სპეციალისტს “ფენერბაჰჩე” ეპატიჟება.

თურქები ლიოვს კონტრაქტის 2024 წლამდე გაფორმებას სთავაზობენ და მისგან პასუხს უახლოეს პერიოდში ელიან.

შეგახსენებთ, რომ იოახიმ ლიოვი 2006-დან 2021 წლამდე გერმანიის ნაკრებს თავკაცობდა. მან ამ პერიოდის განმავლობაში მსოფლიოს ჩემპიონატი, კონფედერაციის თასი და ევროპის ჩემპიონატის ვერცხლის მედალი მოიგო.

ვან პერსი: “ყველაფერს გავაკეთებ, რომ “ფენერბაჰჩეს” ფანები გავახარო”

Posted on ივლისი 13, 2015 by ბექა დოგრაშვილი

“მანჩესტერ იუნაიტედის” თავდამსხმელი რობინ ვან პერსი კარიერას “ფენერბაჰჩეში” გააგრძელებს. ჰოლანდიელმა ფეხბურთელმა საზოგადოებას საკუთარი შთაბეჭდილება გაუზიარა.

“მოხარული ვარ, რომ სტამბულში ვიმყოფები. ფანტასტიური ფანების წინაშე ვითამაშებ.
ათი წლის განმავლობაში დირკ კიუიტთან ერთად ვთამაშობდი ნაკრებში. ჩვენ მეგობრები ვართ. სანამ აქ ჩამოვფრინდებოდი, მასთან ვისაუბრე. დირკმა მითხრა, რომ ეს დიდი კლუბია. იგი აქაური ქომაგების შესახებაც მესაუბრა.
ჩემთვის დიდი პატივია აქ ყოფნა. ყველაფერს გავაკეთებ, რომ ფანები გავახარო”, – ვან პერსის კომენტარი კლუბის ოფიციალურ ვებგვერდზე გამოქვეყნდა.

ჰოლანდიელი ფეხბურთელი სტამბულში ოჯახთან ერთად ჩაფრინდა. რობინ ვან პერსი “ფენერბაჰჩესთან” კონტრაქტს უახლოეს პერიოდში გააფორმებს.

ლუიშ ნანი “ფენერბაჰჩეში” გადავა

Posted on ივლისი 5, 2015ივლისი 5, 2015 by ბექა დოგრაშვილი

“მანჩესტერ იუნაიტედის” ნახევარმცველი ლუიშ ნანი კარიერას “ფენერბაჰჩეში” გააგრძელებს. 28 წლის პორტუგალიელი ფეხბურთელი სტამბულში უახლოეს საათებში ჩაფრინდება, სამედიცინო შემოწმებას გაივლის, რის შემდეგაც კლუბთან კონტრაქტს გააფორმებს.

ტრანსფერის დეტალები ჯერჯერობით არ ხმაურდება.

შეგახსენებთ, რომ ლუიშ ნანიმ გასული სეზონი იჯარის წესით ლისაბონის “სპორტინგში” გაატარა. ფეხბურთელმა პორტუგალიის ჩემპიონატში 27 მატჩი ჩაატარა, შვიდი გოლი გაიტანა და ექვსი საგოლე გადაცემა გააკეთა.

“ფენერბაჰჩეზე” მორიგი თავდასხმა განხორციელდა (ფოტოები)

Posted on აპრილი 25, 2015აპრილი 25, 2015 by ბექა დოგრაშვილი

“ფენერბაჰჩეს” ანკარის ფილიალზე თავდამსხმა მოხდა. თავდამსხმელებმა ოფისის მინის კარი ჩაამსხვრიეს, დააზიანეს კომპიუტერები და სხვა საოფისე ტექნიკა. გარდა ამისა, ჩამტვრეულია ოფისის ფანჯარაც. სამართალდამცველებს თავდამსხმელების ვინაობა ჯერ არ დაუდგენიათ.

შეგახსენებთ, რომ რამდენიმე დღის წინათ, რიზეს პროვინციაში თავს დაესხნენ “ფენერბაჰჩეს” ავტობუსსაც, რომლითაც პირველი გუნდის ფეხბურთელები ტრაპიზონის აეროპორტისკენ მიემართებოდნენ. მაშინ თავდამსხმელებმა ავტობუსი დაცხრილეს, რის შედეგადაც მძღოლი მძიმედ დაშავდა.

დირკ კიუიტი “ფეინოორდში” დაბრუნდება

Posted on აპრილი 11, 2015 by ბექა დოგრაშვილი

“ფენერბაჰჩეს” ჰოლანდიელი თავდამსხმელი დირკ კიუიტი კარიერას სამშობლოში გააგრძელებს. კერძოდ, 34 წლის ფეხბურთელი “ფეინოორდში” დაბრუნდება.

მხარეებს შორის ერთწლიანი კონტრაქტი გაფორმდა, რომელიც ძალაში ამა წლის ივლისში შევა.

შეგახსენებთ, რომ კიუიტი “ფეინოორდის” ღირსებას 2003-დან 2006 წლამდე იცავდა.

თურქეთის ჩემპიონატის მიმდინარე გათამაშებაში დირკ კიუტმა 25 მატჩში რვა გოლი გაიტანა.

“ფენერბაჰჩეს” უახლოესი მატჩები გადაიდო

Posted on აპრილი 6, 2015 by ბექა დოგრაშვილი

თურქეთის თასის მეოთხედფინალურ ეტაპზე “ფენერბაჰჩესა” და “მერსინ იდმანიუდრუს” შორის გასამართი მატჩი გადაიდო.

შეხვედრა 7 აპრილს უნდა გამართულიყო, თუმცა რიზეს პროვინციაში მომხდარი ინციდენტის გამო მატჩი გადაიდო.

გარდა ამისა, მოგვიანებით გაიმართება თურქეთის ჩემპიონატის 27-ე ტურში “ფენერბაჰჩესა” და “ბურსასპორს” შორის გასამართი შეხვედრაც. ქვეყნის ფეხბურთის ფედერაცია მატჩის ჩატარების თარიღს დღეს გადაწყვეტს.

შეგახსენებთ, რომ სტამბულური კლუბის ავტობუსს ორი დღის წინათ ცეცხლი გაუხნეს. ინციდენტი თურქეთის სუპერლიგის 26-ე ტურში “რიზესპორსა” და “ფენერბაჰჩეს” შორის გამართული მატჩის შემდეგ მოხდა, როდესაც გუნდი ტრაპიზონის აეროპორტისკენ გადაადგილდებოდა. მძიმედ დაშავდა ავტობუსის მძღოლი.

“ფენერბაჰჩეს” ავტობუსს ცეცხლი გაუხსნეს (ფოტოები)

Posted on აპრილი 5, 2015აპრილი 5, 2015 by ბექა დოგრაშვილი

შაბათს, რიზეს პროვინციაში სტამბულის “ფენერბაჰჩეს” ავტობუსზე შეიარაღებული თავდასხმა განხორციელდა. შემთხვევის შედეგად ავტობუსის მძღოლი მძიმედ დაშავდა.

თურქული გამოცემა Sabah-ი იუწყება, რომ ინციდენტი თურქეთის სუპერლიგის 26-ე ტურში “რიზესპორსა” და “ფენერბაჰჩეს” შორის გამართული მატჩის შემდეგ მოხდა. აღნიშნული შეხვედრა სტუმრების დამაჯერებელი გამარჯვებით, ანგარიშით 5:1 დასრულდა. ავტობუსი მაშინ დაცხრილეს, როდესაც “ფენერბაჰჩეს” ფეხბურთელები ტრაპიზონის აეროპორტისკენ მიემართებოდნენ.

ავტობუსის მძღოლი მძიმედ დაშავდა და საავადმყოფოშია გადაყვანილი. წინასწარი მონაცემებით, ფეხბურთელები დაზიანებებისგან გადარჩნენ. სამართალდამცველებმა გამოძიება უკვე დაიწყეს.

ოქროს სტამბული

Posted on აპრილი 20, 2014აპრილი 20, 2014 by ბექა დოგრაშვილი

ვგონებ, არაფერია იმაზე უკეთესი, ვიდრე დერბიში გამარჯვების შემდეგ საჩემპიონო ტიტულის დაბევება. სწორედ ასეთი შანსი აქვს სტამბულის „ფენერბაჰჩეს“, რომელსაც დღეს თანაქალაქელ „ბეშიქთასთან“ უწევს დაპირისპირება.

სეზონის ფინიშამდე ხუთი ტურით ადრე „ყვითელ-ლურჯები“ 12 ქულით უსწრებენ სლავენ ბილიჩის გუნდს და თითქმის გადაწყვეტილია საჩემპიონო ბედი, თუმცა მაინც სასიამოვნოა, როცა პრინციპული მეტოქის დამარცხების შემდეგ ინაღდებ ტიტულს. თუ მატჩს „ფენერბაჰჩე“ გამარჯვებით დაასრულებს, თურქეთის ჩემპიონის ვინაობას ოფიციალურად შევიტყობთ. შეხვედრის საყაიმო შედეგით დასრულების შემთხვევაში, „ბეშიქთაში“ თეორიულ შანსს ინარჩუნებს.

„ყვითელ-ლურჯებმა“ თურქეთის ჩემპიონატი უკანასკნელად 2010-11 წლების სეზონში მოიგეს. „ფენერბაჰჩეს“ თავკაცმა ერსუნ იანალმა, მართალია, სადებიუტო სეზონის სტარტზე სუპერთასისთვის ბრძოლა „გალათასარაისთან“ დათმო (0:1), თუმცა მისმა გუნდმა ჩემპიონატი ყინჩად გაიარა და ახლა ქვეყნის მთავარი ტიტულის დასაკუთრებას სულ ცოტა უკლია.

სტამბულის დერბი დღეს, ათათურქის ოლიმპიურ სტადიონზე, თბილისის დროით 20:00 საათზე დაიწყება.

ბექა დოგრაშვილი

„ტრაბზონსპორი“—„ფენერბაჰჩე“ გულშემატკივართა აგრესიული ქმედებების გამო შეწყდა

Posted on მარტი 11, 2014მარტი 11, 2014 by ბექა დოგრაშვილი

თურქეთის სუპერლიგის 24-ე ტურში „ტრაბზონსპორსა“ და „ფენერბაჰჩეს“ შორის გამართული მატჩი მეორე ტაიმში მასპინძელი გუნდის ქომაგების მხრიდან გამოვლენილი აგრესიული ქმედებების გამო შეწყდა.

მას შემდეგ, რაც სტუმართა თავდამსხმელმა ემანუელ ემენიკემ ანგარიში გახსნა, „ტრაბზონსპორის“ გულშემატკივრებმა მოედანზე სხვადასხვა საგნების სროლა დაიწყეს. მატჩის მთავარი არბიტრი იძულებული გახდა, თამაში გაეჩერებინა.

სავარაუდოდ, „ტრაბზონსპორს“ ტექნიკური მარცხი 0:3 ჩაეთვლება.

შოთა არველაძის „ქასიმფაშა“ ზედიზედ მესამედ დამარცხდა

Posted on თებერვალი 17, 2014თებერვალი 17, 2014 by ბექა დოგრაშვილი

კიდევ ერთი მარცხი იწვნია შოთა არველაძის „ქასიმფაშამ“, რომელიც თურქეთის სუპერლიგის 21-ე ტურში „ფენერბაჰჩეს“ ესტუმრა. მატჩის პირველი ნახევარი უგოლოდ გაილია, 64-ე წუთზე მასპინძელთა გამოცდილმა ნახევარმცველმა ემრე ბელიოზოღლუმ ლამაზი დარტყმით ანგარიში გახსნა, 79-ე წუთზე შეცვლაზე შემოსულმა სანჰარიბ მალკიმ წონასწორობა აღადგინა, თუმცა ორ წუთში ბექირ ირტეგიუნმა მასპინძლები კვლავ დააწინაურა და მათ 3 ქულა მოუტანა. აღსანიშნავია, რომ 57-ე წუთიდან „ქასიმფაშა“ მოედანზე 10 კაცით თამაშობდა, რადგან ნახევარმცველ ქერემ სერასს მეორე ყვითელი ბარათი უჩვენეს.

ამრიგად, „ქასიმფაშამ“ ზედიზედ მესამე შეხვედრა წააგო, მოუგებელი სერია კი 10 მატჩამდე გაიზარდა, შოთა არველაძის გუნდმა უკანასკნელად გასული წლის 9 ნოემბერს „გაზიანთეფი“ დაამარცხა (3:0). შედეგად, „ქასიმფაშას“ თუ ერთი პერიოდი სატურნირო ცხრილის მეორე ადგილი ჰქონდა დაკავებული, ახლა 30 ქულით მეშვიდე პოზიციაზეა. რაც შეეხება „ფენერბაჰჩეს“, გუნდი სატურნირო ცხრილს 47 ქულით ლიდერობს.