თურქეთის სუპერლიგის 33-ე ტურში “ბეშიქთაშმა” “გაზიანთესპორი” ანგარიშით 4:0 გაანადგურა და ჩემპიონობა ვადაზე ადრე გაინაღდა.
ლიდერს გათამაშების დასრულებამდე ერთი ტურით ადრე ოთხი ქულით ჩამორჩება “ისთანბულ ბაშაქშეჰირი” და შესაბამისად, მისთვის კონკურენციის გაწევის თეორიული შანსიც აღარ აქვს. ამრიგად, “ბეშიქთაში” თურქეთის ჩემპიონი ზედიზედ მეორედ, არსებობის განმავლობაში კი მე-15-ედ გახდა .
“ფიორენტინას” თავდამსხმელი მარიო გომესი კარიერას “ბეშიქთაშში” გააგრძელებს. ინფორმაცია თურქულმა კლუბმა უკვე ოფიციალურად დაადასტურა.
30 წლის გერმანელი ფეხბურთელი სტამბულში ხუთშაბათს ჩაფრინდება, სამედიცინო შემოწმებას გაივლის და კონტრაქტს ხელს მოაწერს.
არაოფიციალური ინფორმაციით, ტრანსფერის ღირებულება 8 მილიონი ევროა, ფეხბურთელი კი წელიწადში ჯამაგირის სახით 5 მილიონ ევროს მიიღებს.
იტალიის ჩემპიონატის გასულ სეზონში მარიო გომესმა 20 მატჩში ოთხი გოლი გაიტანა.
“ლივერპულის” თავდამსხმელმა მარიო ბალოტელიმ კარიერა შესაძლოა, თურქეთში გააგრძელოს. 24 წლის ფეხბურთელით “ბეშიქთაში” არის დაინტერესებული. თურქული გამოცემა Haberturk-ი იუწყება, რომ კლუბი იტალიელი ფორვარდის შესაძლო ტრანსფერის წინადადებით “ლივერპულს” უახლოეს პერიოდში მიმართავს.
წყაროს თანახმად, “ბეშიქთაშის” მესვეურები ბალოტელის დემბა ბას შემცვლელად მოიაზრებენ. როგორც მოგეხსენებათ, 30 წლის სენეგალელ ფეხბურთელს ინგლისის პრემიერლიგაში დაბრუნება აქვს გადაწყვეტილი.
მარიო ბალოტელიმ პრემიერლიგის გასულ გათამაშებაში 16 მატჩი ჩაატარა, ერთი გოლი გაიტანა და ხუთი ყვითელი ბარათი მიიღო.
“ბეშიქთაშის” მთავარი მწვრთნელი სლავენ ბილიჩი მიმდინარე სეზონის ბოლოს პოსტს დატოვებს. ამ ინფორმაციას თურქული კლუბის პრეზიდენტი ფიქრეთ ორმანი ადასტურებს.
“ერთმანეთს კარგი პირობებით ვშორდებით. მომავალი მთავარი მწვრთნელი იქნება ჩვენი სამომავლო წარმატებების არქიტექტორი, რომელიც ახალ დონეზე გადაგვიყვანს”, – ციტირებს ორმანის სიტყვებს “გარდიანი”.
ამავე წყაროს ცნობით, სლავენ ბილიჩმა შესაძლოა, “ვესტ ჰემ იუნაიტედი” ჩაიბაროს, რომლის ამჟამინდელი თავკაცი სემ ელერდაისი სეზონის ბოლოს დაკავებულ პოსტს დატოვებს.
უეფას ევროპის ლიგის მეთექვსმეტედფინალურ ეტაპზე “ბეშიქთაშსა” და “ლივერპულს” შორის გამართული განმეორებითი შეხვედრა 72-ე წუთზე თოლგაი არსლანის მიერ გატანილი გოლის წყალობით თურქებმა ანგარიშით 1:0 გაიმარჯვეს, რითაც ორი მატჩის ჯამში ანგარიში გათანაბრდა და დამატებითი ტაიმები დაინიშნა. დამატებულმა დრომ გამარჯვებული ვერ გამოავლინა და საქმე პენალტების სერიამდე მივიდა. თერთმეტმეტრიანი დარტყმა მხოლოდ მერსისაიდული გუნდის მცველმა დეიან ლოვრენმა გააფუჭა და “ბეშიქთაშმა” ასე მოიპოვა მერვედფინალის საგზური, “ლივერპულისთვის” კი წლევანდელი ევროსეზონი დასრულებულია.
უეფას ევროპის ლიგის მეთექვსმეტედფინალურ ეტაპზე “ლივერპულმა” “ბეშიქთაში” მარიო ბალოტელის მიერ გატანილი თერთმეტმეტრიანის წყალობით, ანგარიშით 1:0 დაამარცხა. აღსანიშნავია, რომ პენალტის დარტყმას თავდაპირველად ჯორდან ჰენდერსონი აპირებდა, რომელსაც სტივენ ჯერარდის არყოფნაში კაპიტნის სამკლავური ჰქონდა მორგებული, თუმცა იტალიელმა თავდამსხმელმა ინგლისელ ნახევარმცველს ბურთი გამოართვა და თერთმეტმეტრიანის შესრულება საკუთარ თავზე აიღო. ბალოტელის ქმედებამ თანაგუნდელების არაერთგვაროვანი რეაქცია გამოიწვია. დანიელ სტარიჯი და ჰენდერსონი მარიოს საქციელით უკმაყოფილონი დარჩნენ, ჯერარდმა კი იტალიელი ფეხბურთელი მატჩის შემდეგ გააკრიტიკა.
პრესაში გავრცელებული ინფორმაციის თანახმად, “მანჩესტერ სიტის” ხელმძღვანელობა კლუბის მთავარი მწვრთნელის პოსტზე თურქული “ბეშიქთაშის” თავკაცის, სლავენ ბილიჩის კანდიდატურას განიხილავს. ჟურნალისტებმა ფეხბურთის ხორვატ სპეციალისტს ამის შესახებ ჰკითხეს, რასაც ბილიჩმა იუმორნარევი პასუხი გასცა.
“დიახ, გიდასტურებთ, რომ “მანჩესტერ სიტისგან” შემოთავაზება მივიღე და ინგლისელებმა ისიც მითხრეს, რომ კლუბში ჩემ მისაწვევად ნასრის, კომპანისა და იაია ტურეს გაყიდიან.
სინამდვილეში, რა თქმა უნდა, არავითარი წინადადება არ ყოფილა. ჩემი ფიქრები ახლა მხოლოდ “ბეშიქთაშს” უკავშირდება”, – ბილიჩის სიტყვები Goal.com-ზე გამოქვეყნდა.
შეგახსენებთ, რომ ხვალ უეფას ევროპის ლიგის მეთექვსმეტედფინალური ეტაპი აიღებს სტარტს. “ბეშიქთაში” “ენფილდზე” “ლივერპულს” ესტუმრება. მატჩი ღამის 00:05 საათზე დაიწყება და მას შიმონ მარჩინიაკის ხელმძღვანელობით პოლონელ მსაჯთა ბრიგადა მოემსახურება. განმეორებითი შეხვედრა სტამბულში, 26 თებერვალს შედგება.
ხუთშაბათს უეფას ევროპის ლიგის მეთექვსმეტედფინალური ეტაპი აიღებს სტარტს. “ლივერპული” “ენფილდზე” თურქულ “ბეშიქთაშს” უმასპინძლებს. მერსისაიდული გუნდის მთავარმა მწვრთნელმა ბრენდან როჯერსმა განაცხადა, რომ შეხვედრას “წითლების” კაპიტანი სტივენ ჯერარდი გამოტოვებს. 34 წლის ნახევარმცველს მუხლქვედა მყესი აქვს დაზიანებული.
“გადაწყვეტით გეუბნებით, რომ ჯერარდი “ბეშიქთაშთან” ვერ ითამაშებს. ჩვენ მის მდგომარეობას ყოველდღიურად უნდა დავაკვირდეთ”, – ციტირებს როჯერსის სიტყვებს Sportsmole-ი.
მატჩი ღამის 00:05 საათზე დაიწყება და მას შიმონ მარჩინიაკის ხელმძღვანელობით პოლონელ მსაჯთა ბრიგადა მოემსახურება.
როგორც მოგეხსენებათ, დღეს უეფას ევროპის ლიგის მიმდინარე გათამაშების მეთექვსმეტედფინალური ეტაპის წილისყრა გაიმართა. ჩემპიონთა ლიგიდან გადმოსულ “ლივერპულს” მეტოქედ “ბეშიქთაში” ერგო.
თურქული კლუბის ხელმძღვანელები საკმაოდ ამბიციურად აფასებენ საკუთარ შესაძლებლობებს. მეტიც, “ბეშიქთაშის” დირექტორატის წევრი აჰმეთ ნურ ჩები პირდაპირ აცხადებს, რომ თურქული კლუბი 2007 წელს “ლივერპულთან” ანგარიშით 0:8 მარცხის გამო შურს იძიებს და მერსისაიდულ გუნდს ტურნირიდან გამოაგდებს.
“თურქული სპორტული საზოგადოება საინტერესო მატჩს ნახავს. გავიმეორებ იმას, რასაც ყოველთვის ვამბობ: შედეგზე “ლივერპული” უფრო უნდა ღელავდეს, ვიდრე ჩვენ.
ჩვენ მათ ტურნირიდან გამოვაგდებთ. “ლივერპულთან” ანგარიში გვაქვს გასასწორებელი. ანგარიშით 0:8 მარცხს ვგულისხმობ. წონასწორობა უნდა აღვადგინოთ. ისტორია ისტორიად რჩება, ჩვენ არ ვცხოვრობთ წარსულით. ეს შურისძიების შესაძლებლობაა”, – აჰმეთ ნურ ჩების სიტყვები უეფას ოფიციალურ ვებგვერდზე გამოქვეყნდა.
წყვილის პირველი მატჩი 19 თებერვალს, “ენფილდზე” გაიმართება, განმეორებით შეხვედრას კი სტამბული 26 თებერვალს უმასპინძლებს.
ლონდონის „ჩელსის“ თავდამსხმელი დემბა ბა კარიერას „ბეშიქთაშში“ გააგრძელებს. 29 წლის სენეგალელმა ფეხბურთელმა თურქულ კლუბში სამედიცინო შემოწმება უკვე გაიარა და კონტრაქტსაც მოაწერა ხელი, თუმცა ჩვენთვის ხელშეკრულების დეტალები ცნობილი არ არის.
„ბეშიქთაშში“ დემბა ბას უგო ალმეიდას შემცვლელად ხედავენ. როგორც მოგეხსენებათ, 30 წლის პორტუგალიელმა თავდამსხმელმა კლუბი თავისუფალი აგენტის სტატუსით დატოვა.
დემბა ბა „ბეშიქთაშში“ 9-ნომრიანი მაისურით ითამაშებს.
შოთა არველაძე „ქასიმფაშაში“ 2017 წლამდე დარჩება. როგორც მოგეხსენებათ, ფეხბურთის ქართველმა სპეციალისტმა თურქული კლუბი 2012 წლის ოქტომბერში ჩაიბარა. მაშინ მხარეებს შორის კონტრაქტი „1,5 + 3“ სქემით გაფორმდა. როგორც ჩანს, კლუბის ხელმძღვანელობა არველაძის მუშაობით კმაყოფილია და მასთან დამდეგი სამი წლის განმავლობაშიც აპირებს თანამშრომლობას.
შოთა არველაძემ ხელშეკრულება „ბეშიქთაშთან“ გამართულ მატჩამდე გაახანგრძლივა. „ათათურქზე“ შემდგარი მატჩი „ბეშიქთაშის“ გამარჯვებით, ანგარიშით 2:1 დასრულდა.
არველაძის „ქასიმფაშას“ სატურნირო ცხრილში 47 ქულით მე-6 ადგილი აქვს დაკავებული.
ბექა დოგრაშვილი
ვგონებ, არაფერია იმაზე უკეთესი, ვიდრე დერბიში გამარჯვების შემდეგ საჩემპიონო ტიტულის დაბევება. სწორედ ასეთი შანსი აქვს სტამბულის „ფენერბაჰჩეს“, რომელსაც დღეს თანაქალაქელ „ბეშიქთასთან“ უწევს დაპირისპირება.
სეზონის ფინიშამდე ხუთი ტურით ადრე „ყვითელ-ლურჯები“ 12 ქულით უსწრებენ სლავენ ბილიჩის გუნდს და თითქმის გადაწყვეტილია საჩემპიონო ბედი, თუმცა მაინც სასიამოვნოა, როცა პრინციპული მეტოქის დამარცხების შემდეგ ინაღდებ ტიტულს. თუ მატჩს „ფენერბაჰჩე“ გამარჯვებით დაასრულებს, თურქეთის ჩემპიონის ვინაობას ოფიციალურად შევიტყობთ. შეხვედრის საყაიმო შედეგით დასრულების შემთხვევაში, „ბეშიქთაში“ თეორიულ შანსს ინარჩუნებს.
„ყვითელ-ლურჯებმა“ თურქეთის ჩემპიონატი უკანასკნელად 2010-11 წლების სეზონში მოიგეს. „ფენერბაჰჩეს“ თავკაცმა ერსუნ იანალმა, მართალია, სადებიუტო სეზონის სტარტზე სუპერთასისთვის ბრძოლა „გალათასარაისთან“ დათმო (0:1), თუმცა მისმა გუნდმა ჩემპიონატი ყინჩად გაიარა და ახლა ქვეყნის მთავარი ტიტულის დასაკუთრებას სულ ცოტა უკლია.
სტამბულის დერბი დღეს, ათათურქის ოლიმპიურ სტადიონზე, თბილისის დროით 20:00 საათზე დაიწყება.
ბექა დოგრაშვილი
