ლონდონის “არსენალის” ყოფილმა ფეხბურთელმა ჯეკ უილშირმა, რომელიც დღესდღეობით “ბორნმუთის” ღირსებას იცავს, ამბობს, რომ სამი წლის წინ “მეთოფეების” დატოვებით შეცდომა დაუშვა.
“მაშინ მეგონა, რომ “არსენალის” დატოვებით სწორი გადაწყვეტილება მივიღე, მაგრამ ახლა ვთვლი, რომ შეცდომა დავუშვი. რას ვიზამთ?!
მიკელ არტეტას ხელმძღვანელობით გუნდი სწორ გზას ადგას. ფეხბურთელებს ეტყობათ, რომ ცდილობენ. თუ სტაბილურობას შეინარჩუნებენ, მათ დიდი წარმატება ელით, ვინაიდან მწვრთნელს სწორი ფილოსოფია აქვს და მოთამაშეები მას პატივს სცემენ. მართებული მიმართულებით მიდიან, თუმცა – ნელა.
ახლა “მეთოფეთა” რიგითი ქომაგი ვარ და ამ სტატუსის ტარება რთულია. გარშემო “არსენალის” უამრავი ფანი მყავს და როდესაც ამ გუნდში ვთამაშობდი, ისინი მეუბნებოდნენ: “რთულია “არსენალის” ფანობა”. ახლა ვხვდები, რას გულისხმობდნენ ისინი. უცნაურია, მაგრამ “არსენალს” დღემდე ჩემს ნაწილად ვთვლი. რთული მათი ამ მდგომარეობაში ცქერა, მაგრამ ოპტიმისტურად ვარ განწყობილი”, – უილშირის კომენტარი “გარდიანმა” გამოაქვეყნა.
გაუთავებელი ტრავმებით გატანჯულმა ფეხბურთელმა 2018 წელს “არსენალთან” კონტრაქტის გახანგრძლივებაზე უარი თქვა და თავისუფალი აგენტის სტატუსით “ვესტ ჰემ იუნაიტედს” მიაშურა. მას შემდეგ უილშირს კარიერული რეგრესი აქვს. 29 წლის ნახევარმცველი “არსენალთან” კავშირს ინარჩუნებს, თუმცა მხოლოდ გულშემატკივრის რანგში.
