ჭდე: Monaco

“რეალი” მადრიდში დაბრუნდა, დიეგო ლოპესი კი გუნდიდან წასასვლელად ემზადება

Posted on by ბექა დოგრაშვილი

მადრიდის “რეალმა” აშშ-ში წინასასეზონო მოსამზადებელი პერიოდი დაასრულა და დღეს დილით ესპანეთის დედაქალაქში დაბრუნდა.

ფეხბურთელები სამშაბათამდე დაისვენებენ, შემდეგ კი ვარჯიშს შეუდგებიან. როგორც მოგეხსენებათ, 12 აგვისტოს “რეალსა” და “სევილიას” შორის უეფას სუპერთასის მატჩი გაიმართება.

აქვე ვრცელდება ინფორმაცია იმის შესახებ, რომ “სამეფო კლუბს” უახლოეს პერიოდში დატოვებს მეკარე დიეგო ლოპესი.

Todomercadoweb-ის თანახმად, ესპანელი კიპერი “მონაკოს” უახლოვდება. გავრცელებული ცნობით, დიეგო ლოპესი “წითელ-თეთრებთან” სამწლიან კონტრაქტს გაფორმებს და სეზონში ხელფასის სახით 5 მილიონ ევროს მიიღებს.

დიეგო ლოპესის შესაძლო ტრანსფერის ღირებულება 12 მილიონ ევროდ ფასდება.

 

ოფიციალურად: ხამეს როდრიგესი „რეალის“ ფეხბურთელია

Posted on by ბექა დოგრაშვილი

კოლუმბიელი ნახევარმცველი ხამეს როდრიგესი ოფიციალურად გამოცხადდა მადრიდის „რეალის“ ფეხბურთელად. მხარეებს შორის ექვსწლიანი კონტრაქტი გაფორმდა.

„ოცნება რეალობად იქცა. მოხარული ვარ, რომ მსოფლიოს საუკეთესო კლუბის ნაწილი ვხდები“, – აღნიშნა როდრიგესმა.

ხამეს როდრიგესის წარდგენა დღეს, თბილისის დროით 22:00 საათზე მოეწყობა.

არაოფიციალური ინფორმაციის თანახმად, „რეალმა“ 23 წლის კოლუმბიელი ნახევარმცველის სანაცვლოდ 80 მილიონი ევრო გაიღო, რაც საფრანგეთის ჩემპიონატის ყველა დროის ყველაზე ძვირადღირებული ტრანსფერი გახლავთ.

 

„მონაკოს“ სნეიდერი სურს

Posted on by ბექა დოგრაშვილი

ფრანგული გამოცემა L’Equipe-ი იუწყება, რომ „გალათასარაის“ ნახევარმცველი უესლი სნეიდერი „მონაკოს“ მთავარ სატრანსფერო მიზნად იქცა.

წყაროს ცნობით, „მონაკოს“ ხელმძღვანელობა სწორედ ჰოლანდიელ ფეხბურთელს მოიაზრებს ხამეს როდრიგესის შემცვლელად. მოგეხსენებათ, კოლუმბიელი ფეხბურთელი მადრიდის „რეალში“ გადადის.

სნეიდერის შესაძლო ტრანსფერი 20 მილიონ ევროდ ფასდება.

 

„მონაკო“ კასილასით დაინტერესდა

Posted on by ბექა დოგრაშვილი

როგორც მოგეხსენებათ, მადრიდის „რეალი“ „მონაკოსთან“ კოლუმბიელ ნახევარმცველ ხამეს როდრიგესის შესაძლო ტრანსფერთან დაკავშირებით მოლაპარაკებებს აწარმოებს. ვრცელდება ინფორმაცია, რომ მოლაპარაკების პროცესში „თეთრ-წითლებმა“ იკერ კასილასზე ჩამოაგდეს სიტყვა და მისი დამატების სურვილიც გამოთქვეს.

შეგახსენებთ, რომ „მონაკოს“ ვიქტორ ვალდესის დამატება სურდა, თუმცა ესპანელმა მეკარემ სამედიცინო შემოწმება ჩააგდო და კონტრაქტის გაფორმებაზე უარი ეთქვა.

იკერ კასილასთან დაკავშირებით ურთიერთგამომრიცხავი ცნობებია: ერთნი ამბობენ, რომ ესპანელი კიპერი ამ სეზონსაც „რეალში“ გაატარებს, მეორენი კი ამტკიცებენ, რომ „სამეფო კლუბი“ მზად არის, გამოცდილ მეკარეს ამ ზაფხულსვე შეელიოს.

 

ოფიციალურად: „ნიუკასლმა“ ფრანგი თავდამსხმელი გაიფორმა

Posted on by ბექა დოგრაშვილი

„მონაკოს“ თავდამსხმელი ემანუელ რივიერი კარიერას ინგლისურ „ნიუკასლ იუნაიტედში“ გააგრძელებს.

24 წლის ფეხბურთელმა „კაჭკაჭებთან“ გრძელვადიანი კონტრაქტი გააფორმა. ტრანსფერის ღირებულება არ ხმაურდება.

„ბედნიერი ვარ, რომ „ნიუკასლში“ გადმოვედი. როდესაც კლუბი ამ შემოთავაზებით დამიკავშირდა, მყისიერად განვაცხადე თანხმობა. ეს ადვილი გადასაწყვეტი იყო, რადგან „ნიუკასლი“ დიდი კლუბია, დიდებული ქომაგები ჰყავს, კარგი სტადიონი აქვს. ყოველთვის ვოცნებობდი პრემიერლიგაში თამაშზე, „ნიუკასლმა“ კი ამის შესაძლებლობა მომცა“, – რივიერის სიტყვები ინგლისური კლუბის ოფიციალურ ვებგვერდზე გამოქვეყნდა.

ემანუელ რივიერმა საფრანგეთის ჩემპიონატის გასულ გათამაშებაში 30 მატჩი ჩაატარა და 10 გოლი გაიტანა.

 

ვიქტორ ვალდესმა „მონაკოში“ სამედიცინო შემოწმება წარმატებით ვერ გაიარა

Posted on by ბექა დოგრაშვილი

ესპანელმა კიპერმა ვიქტორ ვალდესმა „მონაკოში“ სამედიცინო შემოწმება წარმატებით ვერ გაიარა. ფეხბურთელი “თეთრ-წითლების“ რიგებში არ ითამაშებს. ამის შესახებ „მონაკოს“ ვიცე-პრეზიდენტმა ვადიმ ვასილიევმა განაცხადა.

„ვალდესი ტრავმირებულია, ის „მონაკოში“ ვერ გადმოვა“, – აღნიშნა ვასილიევმა.

შეგახსენებთ, რომ ვიქტორ ვალდესმა მიმდინარე წლის მარტში მუხლის სერიოზული ტრავმა მიიღო, რის გამოც მსოფლიოს ჩემპიონატის გამოტოვებაც მოუხდა.

ვალდესი თავისუფალი აგნეტის სტატუსით სარგებლობს, ამიტომ მის ასაყვანად კლუბებს თანხის გადახდა არ მოუწევთ.

 

ნიკო როსბერგს მონაკოს კვალიფიკაციაზე გზა აერია?

Posted on by ბექა დოგრაშვილი

ფორმულა 1-ში მონაკოს გრანპრის დღევანდელი კვალიფიკაციის ბოლო წუთებზე საინტერესო რამ მოხდა. „მერსედესის“ პილოტმა ნიკო როსბერგმა, რომელიც პოულ-პოზიციისთვის პარტნიორ ლუის ჰემილტონს ეცილებოდა, ტრეკზე ნებსით თუ უნებლიედ, შეცდომა დაუშვა და „მირაბოს“ მოსახვევში არ შევიდა, რის შემდეგაც ყვითელი ალმები ააფრიალეს. როგორც მოგეხსენებათ, ფორმულა 1-ში ყვითელი ალმების აფრილების დროს გასწრება იკრძალება. შესაბამისად, ჰემილტონმა ბოლო ცდაზე შედეგი ვერ გააუმჯობესა და რბოლის პოულ-პოზიციიდან დაწყების უფლება როსბერგმა მოიპოვა.

როგორც მოგეხსენებათ, მონტე-კარლოს ტრეკი საქალაქო გამოყენებისაა და არა სპეციალურად ავტორბოლისა. ამიტომ, რბოლების დროს ქალაქის ამ მონაკვეთზე გზა იკეტება. სწორედ ამიტომ ითვლება მონაკოს გრანპრი ფორმულა 1-ში ერთ-ერთ ყველაზე კოლორიტულ რბოლად.

ცნობისთვის, მონაკოს გრანპრი 25 მაისს, ჩვენი დროით 16:00 საათზე აიღებს სტარტს.

აქვე გთავაზობთ როსბერგის განზრახ თუ უნებლიედ დაშვებული შეცდომის ამსახველ ვიდეომასალას.

ბექა დოგრაშვილი

რანიერი „მონაკოს“ დატოვებს

Posted on by ბექა დოგრაშვილი

ფრანგული გამოცემები ერთ ხმაში იუწყებიან, რომ სეზონის დასრულების შემდეგ კლაუდიო რანიერი „მონაკოს“ მთავარი მწვრთნელის პოსტს დატოვებს. გავრცელებული ინფორმაციის თანახმად, მხარეებმა ურთიერთშეთანხმების საფუძველზე კონტრაქტის გაწყვეტის გადაწყვეტილება მიიღეს. გუნდის ახალი თავკაცის ვინაობა მომავალ კვირაში უნდა გახდეს ცნობილი.

შეგახსენებთ, რომ რანიერი „მონაკოს“ ბოლო ორი წელია, ხელმძღვანელობს და კლუბთან ერთად 2012-13 წლებში საფრანგეთის მეორე ლიგა მოიგო. აღსანიშნავია ისიც, რომ ფრანგ ფეხბურთელთა და მწვრთნელთა პროფესიულმა კავშირმა იტალიელი სპეციალისტი საფრანგეთის ჩემპიონატის მიმდინარე გათამაშების საუკეთესო თავკაცის წოდებაზე წარადგინა.

ბექა დოგრაშვილი

ვალდესი „მონაკოში“ გადავა

Posted on by ბექა დოგრაშვილი

„ფრანს ფუტბოლის“ ცნობით, „ბარსელონას“ მეკარე ვიქტორ ვალდესი სიტყვას შეასრულებს და ტრავმის მოშუშების შემდეგ „მონაკოსთან“ ოთხწლიან კონტრაქტს მოაწერს ხელს.

მანამდე გავრცელებული ინფორმაციის თანახმად, კატალონიელმა კიპერმა „მანჩესტერ სიტისგანაც“ მიიღო შემოთავაზება, ვალდესს „ბარსელონამაც“ შესთავაზა ხელშეკრულების გახანგრძლივება, თუმცა 32 წლის მეკარემ საფრანგეთის ჩემპიონატი აირჩია.

ვალდესი „ბარსელონას“ ღირსებას 2002 წლიდან იცავს და კატალონიურ გუნდში მეკარეებს შორის ჩატარებული მატჩების რაოდენობით რეკორდსმენია. ვალდესი ესპანეთის ექვსგზის ჩემპიონი და ჩემპიონთა ლიგის სამგზის გამარჯვებულია.

ბექა დოგრაშვილი

ბერბატოვს ერიკ კანტონას გზის არჩევა სურს

Posted on by ბექა დოგრაშვილი

„მონაკოს“ ბულგარელი თავდამსხმელი დიმიტარ ბერბატოვი, რომელიც თავის დროზე „მანჩესტერ იუნაიტედის“ ღირსებას იცავდა, აცხადებს, რომ კარიერის დასრულების შემდეგ ერიკ კანტონას გზის არჩევა სურს. 33 წლის ფეხბურთელის მხრიდან საუბარია სამსახიობო კარიერის დაწყებაზე.

„რა თქმა უნდა, კმაყოფილი ვარ იმით, რასაც კარიერის განმავლობაში მივაღწიე, თუმცა ძალისხმევას არც ახალი კლუბისთვის არ ვიშურებ. როდესაც ბუცებს ლურსმანზე დავკიდებ, თვითკმაყოფილი ღიმილით შემეძლება უკან გახედვა, რადგან ბევრ რამეს მივაღწიე.

ერიკ კანტონასთან ჩემი შედარება არასამართლიანია. ის „მანჩესტერ იუნაიტედის“ დიდებული ფეხბურთელი იყო. მის მიერ გატანილი გოლები საფირმო ნიშნებად იქცა. შესანიშნავი მოთამაშე იყო. შემდეგ კინოებში მონაწილეობის მიღება დაიწყო.

თავად მეც კინემატოგრაფიის დიდი მოყვარული გახლავართ. როდესაც კარიერას დავასრულებ, კინოში გადაღებაზე უარს მეც არ ვიტყვი“, – განაცხადა ბერბატოვმა „ევროსპორტის“ ეთერში.

იქვე ბულგარელი თავდამსხმელი აღნიშნავს, რომ მოთამაშის კარიერის დასრულებას ჯერ არ აპირებს.

ბექა დოგრაშვილი

„პსჟ“ „მონაკოს“ დაუზავდა

Posted on by ბექა დოგრაშვილი

საფრანგეთის ჩემპიონატის 24-ე ტურის ცენტრალური მატჩი მონაკოს „ლუი მეორის“ სტადიონზე შედგა, სადაც ადგილობრივმა კლუბმა გათამაშების ლიდერი „პარი სენ-ჟერმენი“ მიიღო.

ანგარიში პარიზელებმა გახსნეს. მე-8 წუთზე სტუმართა შემტევმა ნახევარმცველმა ხავიერ პასტორემ ზუსტი დარტყმით „პსჟ“ წინ გაიყვანა. ლორამ ბლანის გუნდს დიდი ხნის განმავლობაში ჰქონდათ უპირატესობა, თუმცა მატჩის დასრულებამდე დაახლოებით 15 წუთით ადრე ტიაგო სილვამ ბურთი საკუთარ კარში ჩაჭრა და ანგარიშიც გათანაბრდა. საბოლოოდ, მატჩი ფრედ, ანგარიშით 1:1 დასრულდა.

მასპინძელთა რიგებში დებიუტი ჰქონდა ბულგარელ თავდამსხმელ დიმიტარ ბერბატოვს, რომელიც მოედანზე 64-ე წუთზე შევიდა.

გუნდებმა სატურნირო ცხრილში პოზიციები შეინარჩუნეს. „პარი სენ-ჟერმენი“ გათამაშებას 55 ქულით ლიდერობს, მადევარ „მონაკოს“ 50 ქულა აქვს.

საფრანგეთის ჩემპიონატი
24-ე ტური
„მონაკო“—„პარი სენ-ჟერმენი“ 1:1 (0:1)

გოლები: ტიაგო სილვა 74′ (ა.გ.) — პასტორე 8′.
გაფრთხილებები: რიკარდუ კარვალიუ 36′, როდრიგესი 38′ — ვერატი 40′.

ბექა დოგრაშვილი

„პარი სენ-ჟერმენის“ ფეხბურთელებმა ტურის ცენტრალურ მატჩამდე მონაკოს პორტში გაისეირნეს

Posted on by ბექა დოგრაშვილი

საფრანგეთის ჩემპიონატის 24-ე ტურის ცენტრალური მატჩი მონაკოში შედგება, სადაც ადგილობრივი კლუბი „პარი სენ-ჟერმენს“ მიიღებს. მოგეხსენებათ, ტიტულისთვის ბრძოლაში ეს ორი გუნდი ეცილება ერთმანეთს. პარიზელებს 54 ქულა აქვთ და სატურნირო ცხრილს ზევიდან დაჰყურებენ, მეორეადგილოსანი „მონაკო“ ლიდერს 5 ქულით ჩამორჩება და დღეს სხვაობის შემცირების შანსი ეძლება.

„პარი სენ-ჟერმენის“ ფეხბურთელები უკვე მონაკოში არიან და პორტში გასეირნებაც მოასწრეს.

მატჩი „მონაკოსა“ და „პსჟ“-ს შორის დღეს, თბილისის დროით 00:00 საათზე აიღებს სტარტს.

ბექა დოგრაშვილი