ჭდე: რაგბი

წლეულს ლისაბონში 12 მაისიდან 24 მაისი ჩათვლით მსოფლიო ახალგაზრდული ალაფა იმართება (მეორე დონის მსოფლიო ახალგაზრდული ტურნირი), სადაც საქართველოს 20-წლამდელთა ნაკრების ჩათვლით, 8 მონაწილე გუნდი მსოფლიო ახალგაზრდული ჩემპიონატის ერთი საგზურისთვის იბრძოლებს.

20-წლამდე ბორჯღალოსნები ჯგუფში ფიჯის, ურუგვაისა და მასპინძელი პორტიგალიის თანატოლთა გუნდების წინააღდეგ იასპარეზებენ.

ალაფზე საუცხოო ფიზიკური ფორმით და მტკიცე მენტალობით

საქართველოს ახალგაზრდულმა ნაკრებმა ტურნირისთვის მზადება დაიწყო. სამწვრთნელო შტაბი ალაფამდე სამი შეკრების და რამდენიმე სპარინგ-მატჩის გამართვას გეგმავს, მაგრამ ტრადიციული მზადების პროცესს წელს ახალი კომპონენტი შეემატა:

მენტალური გამძლების შეკრება, რომელიც საქართველოს რაგბის კავშირის ინიციატივით და საქართველოს თავდაცვის სამინისტროს მხარდაჭერით 8-დან 11 იანვრის ჩათლის რეინჯერთა მომზადების ცენტრში გაიმართა.

„დიდი ხანია რაც მსგავსი შეკრების გამართვა გვინდოდა. ამის ორგანიზებაში დასახმარებლად საქართველოს თავდაცვის სამინისტროს მივმართეთ, რომელმაც ჩვენი თხოვნის შესაბამისად რეინჯერთა მომზადების ცენტრში ჩვენი ბიჭებისთვის ძალზე საინტერესო, რთული და ინტენსიური კურსი გამართა. ყველაფერი უმაღლეს დონეზე იყო ორგანიზებული, რისთვისაც თავდაცვის სამინისტროს და რეინჯერთა მომზადების ცენტრის მთელ შემადგენლობას დიდ მადლობას ვუხდი.“ განაცხადა 20-წლამდელების მთავარმა მწვრთნელმა, ილია მაისურაძემ – „ნანახმა ნამდვილად გადააჭარბა მოლოდინს!“ მან ასევე დასძინა.

“ბაზაზე” მისვლიდან კურსის დასრულებამდე, ახალგაზრდა ბორჯღალოსნებმა არ იცოდნენ თუ რა გამოცდა ელოდათ წინ. შეკრების განმავლობაში მათ ძალიან ცოტახანს ეძინათ, ხოლო ჭამისთვის მხოლოდ წუთნახევარი ეძლეოდათ. კურსის განმავლობაში მათ სტრესულ და რთულ გარემოში სხვადასხვა სიძნელეების და დაბრკოლებების გადალახვა უწევდათ. ასრულებდნენ გუნდურ თუ ინდივიდუალურ დავალებებს და თან ამ ყველაფერს მკაცრ კლიმატურ პირობებში, უძილობისა და შიმშილის ფონზე აკეთებდნენ.

ამასთან დაკავშირებით, ნაკრების მწვრთნელებმა ლადო კილასონიამ და ზურა ამონაშვილმა ისაუბრეს:

ლადო კილასონია – „ეს იყო მენტალური შეკრება, ანუ ხასიათის გამოცდის შეკრება, სადაც გვინდოდა გვენახა თუ როგორ ზემოქმედებს არანორმალური დატვირთვები მოთამაშეზე – დატვირთვები, რომლებსაც ფიზიკა ვეღარ უძლებს და მთლიანად მენტალური მდგრადობის გამოცდაზე გადადის.“

ზურა ამონაშვილი – „ჩვენ გვინდოდა გვენახა თუ რამდენის გაკეთებას შეძლებლდნენ მას შემდეგ რაც იფიქრებდნენ, რომ აღარაფერის გაკეთება შეეძლოთ. როგორც აღმოჩნდა მათ ბევრად მეტის გაკეთება შეძლებიათ. რათქმაუნდა ჩვენს მიზანს, მხოლოდ მოთამაშეების მაქსიმალური ფიზიკური დატვირთვა არ წარმოადგენდა, არამედ გვინდოდა გვენახა ამ დატვირთვების დროს თუ რამდენად შეინარჩუნებდნენ მენტალურ მდგრადობას.“

ლადო კილასონია: „სიტყვებით ნამდვილად რთული გადმოსაცემია თუ რა „ჯოჯოხეთში“ (იცინის) გაიარეს ბიჭებმა. მეც და ზურა ამონაშვილმაც ნაწილობრივ ეს თავზე გამოვცადეთ, ნაკრების ფიზ.მომზადების მწვრთნელმა, გიორგი ნადარეიშვილმა კი სრული კურსი გუნდთან ერთად გაიარა.“

საუბრის ბოლოს მათ დასძინეს, რომ შეკრება ძალიან კარგად იყო დაგეგმილი და ორგანიზებული ინსტრუქტორების მიერ, რისთვისაც საქართველოს რაგბის კავშირის სახელით რეინჯერთა მომზადების ცენტრს დიდ მადლობას ვუხდით!

72 საათით უჩვეულო გარემოში

„ახალგაზრდულმა ნაკრებმა რეინჯერთა მომზადების კურსის „შერჩევის“ ფაზა გაიარა, რომელიც სამ დღეს მოიცავდა. ამ პერიოდში მათ სულ 5 საათი ეძინათ და კვებაზე მხოლოდ წუთნახევარს ვაძლევდით. კურსის განმავლობაში მათ უწევდათ სხვადასხვა დაბრკოლებების და ფიზიკური სირთულეების გადაალხვა – იქნებოდა ეს წონით სირბილი, დიდ მანძილზე ლაშქრობები თუ მარშ-ნახტომები. ეს კურსი გათვლილი იყო ადამიანის მენტალურ გამძლეობაზე, საკუთარი ფიზიკური ძალების ლიმიტის აღმოჩენაზე და მის გადალახვაზე. ეს ყველაფერი მათ კრიტიკულ ვითარებაში დაეხმარებათ სწორი და დროული გადაწყვეტილების მიღებაში.

„გუნდმა ყველა დავალება წარმატებულად შეასრულა. მეც და ინსტრუქტორებმაც მათში შეჯიბრის მიმართ დიდი ინტერესი დავინახეთ – ყველა დავალებას, რომელიც გუნდურობასა და ყველას ჩართულობას მოითხოვდა, ისინი ზედმიწევნით კარგად ართმევდნენ თავს. ეხმარებოდნენ და ამხნევებდნენ ერთმანეთს, ცდილობდნენ საერთო ძალისხმევებით გვერდში მდგომისათვის საქმე გაეადვილებინათ და მოტივაცია აემაღლებინათ – თუმცა რუტინული დავალებების შესრულებას ნაკლები ენთუზიაზმით უდგებოდნენ. დიდი სტრესის, ფიზიკური დაღლიობის, უძილობისა და შიმშილის მიუხედავად, მორაგბეებმა კურსი წარმატებულად გაიარეს. მიმაჩნია, რომ მსგავსი კურსის გავლა ძალზე მნიშვნელოვანია ნებისმიერი ადამიანისთვის თუ გუნდისათვის, ვინაიდან მიუჩვეველ გარემოში, სტრესულ პირობებში ისინი დაინახავენ, რომ იმაზე მეტი შეუძლიათ, ვიდრე წარმოედგინათ. მე ასევე მადლობა მინდა გადავუხადო საქართველოს 20-წლამდელთა ნაკრების წევრებს და სამწვრთნელო შტაბს, ვინაიდან ამ ღონისძიებით მათ ასევე ქართული ჯარის პოპულარიზაცია აამაღლეს.“ განაცხადა რეინჯერთა მომზადების ცენტრის მეთაურმა, მაირომა გიორგი შერაზადაშვილმა.

Rugby.GE

7 თებერვალს სტარტს იღებს ევროპის ერთა თასის 2015 წლის გათამაშება. წლევანდელ ტურნირის პირველ შეხვედრას ბროჯღალოსნები გასვლაზე გერმანიის ნაკრების წინააღმდეგ ქალაქ ჰოიზენშტამში, ‘სპორტ ცენტრუმ’ სტადიონზე გამართავენ. მატჩი თბილისის დროით 17:00 საათზე დაიწყება.

პორტუგალიას და რუსეთს მესხზე დავუხვდებით

წელს ერთა თასზე ბორჯღალოსნებს შინ ორი მატჩი უწევთ. ორივე შეხვედრა თბილისში, ‘მიხეილ მესხის’ სტადიონზე გაიმართება.

სარაგბო სეზონის პირველი საშინაო მატჩი 14 თებერვალს გაიმართება, რომელშიც ჩვენი ნაკრები პორტუგალიის ეროვნულ გუნდს უმასპინძლებს (დასაწყისი: 17:00 სთ).

ერთ თვეში კი, 14 მარტს მეორე საშინაო შეხვედრაში „ქართველი ბორჯღალოსნები“ „რუს დათვებს“ ერკინებიან (დასაწყისი: 17:00 სთ).

ევროპის ერთა თასი 2015 – ბორჯღალოსნების მატჩების კალენდარი

გერმანია – საქართველო 07/02/15, ჰოიზენშტამი

საქართველო – პორტუგალია 14/02/15, მესხის სტადიონი

ესპანეთი – საქართველო 28/02/15, მადრიდი

საქართველო – რუსეთი 14/03/15, მესხის სტადიონი

რუმინეთი – საქართველო 21/03/15, ბუქარესტი

Rugby.GE

2014-ის ამოწურვამდე ერთ დღეზე ნაკლები დრო რჩება და ვიდრე საახალწლო მზადებას სრული სიძლიერით შევუდგებოდით გვუსრს 2014 წლის მნიშვნელოვანი მომენტების რუბრიკა ბორჯღალოსნების მიმდინარე წლის მატჩების მიმოხილვების მონტაჟით და წლევანდელი ნოემბრის ტესტ-სერიის ფოტოებით დავასრულოთ.

ფოტოები:

საქართველო-ტონგა გალერეა 1 >>> გალერეა 2>>>

ირლანდია-საქართველო >>>

საქართველო-იაპონია გალერეა 1 >>> გალერეა 2>>>

Rugby.GE

ბორჯღალოსანი მერაბ შარიქაძე 2014 წლის საუკეთესო მორაგბეა! “აკადემიის” აღზრდილი 21 წლის მორაგბე ეროვნულ გუნდში 2012 წლიდან გამოჩნდა და ასაკის მიუხედავად, ბოლო ორი სეზონია “ბორჯღალოსანთა” ერთ-ერთ საუკეთესო მოთამაშედ იქცა. განვლილ 3 წელიწადში მან 28 კეპი მოიხვეჭა და 7 ლელო დადო. ის გამორჩეული იყო ისეთ გუნდებთან თამაშში, როგორებიც სამოასა და იაპონიის ნაკრებები არიან. გასული სეზონი შარიქაძემ Pro D2-ის “ბურგ-ან-ბრესში” გაატარა, მიმდინარე სეზონში ამავე დივიზიონის “ორიაკში” გადავიდა და 9 მატჩში 1 ლელო გაიტანა. მას დამსახურებულად ერგო ეს ჯილდო!

საქართველოს ჩემპიონატის 2013/2014 წლების სეზონის საუკეთესო მორაგბე “ლელო სარასენსისა” და ეროვნული ნაკრების მგეზავი ლაშა ხმალაძე გახდა. მან უდიდესი წვლილი შეიტანა კლუბის ჩემპიონობაში და ამ პოზიციაზე ბორჯღალოსნების შემადგენლობაში 34 თამაშში 4 ლელო მიითვალა. ის ერთ-ერთი საუკეთესო იყო “თბილისის კავკასიელების” შემადგენლობაშიც და საუკეთესო ფაქტობრივად უკონკურენტოდ გახდა.

ჩემპიონი “ლელო სარასენსის” მთავარი მწვრთნელი ლევან მაისაშვილი გახდა სეზონის საუკეთესო მწვრთნელი.

გასული სეზონის საუკეთესო მსაჯი ნიკა ამაშუკელი გახდა, საუკეთესო ქალი მორაგბე ანა პოღოსიანი, 9 გატანილი ლელოთი მელელოვის ტირული არავის დაუთმო “არმიას” გარემარბმა ალექსი ტუჩაშვილმა (ტუჩაშვილი ღონისძიებაზე ვერ მოვიდა ამიტომ მისი პრიზი მის თანაგუნდელს, დავით გურგენაძეს გადაეცა).

ეს ყველაფერი დაჯილდოვების ცერემონიალის დასკვნით ნაწილში მოხდა, მანამდე კი, საქართველოს რაგბის კავშირის შემაჯამებელი ღონისძიება მამა ილიას დალოცვით დაიწყო, რომელმაც იქ შეკრებილები და სრულიად საქართველოს სარაგბო ოჯახი დალოცა. ამის შემდეგ იყო წუთიერი დუმილი “არმაზისა” და ახალგაზრდული ნაკრების მთავარი მწვრთნელის, დავით ვართანიანის გარდაცვალების გამო.

ამის შემდეგ სცენაზე 2014 წლის ევროპის ჩემპიონებს, 19-წლამდე ბორჯღალოსნებს უხმეს. ახალგაზრდულის ერთერთმა მწვრთნელმა ლადო კილასონიამ განაცხადა: “ძალიან რთულია ევროპის ჩემპიონობის მოპოვება, მაგრამ უფრო რთულია ამის შენარჩუნება! 19-წლამდელებმა ეს შეძლეს.”

შეგახსენებთ, რომ იმავე სპორტის სამინისტრომ საქართველოს რაგბის კავშირი წლის საუკეთესო ფედერაციად აღიარა და სიტყვაც სრკ-ს პრეზიდენტმა გიორგი ნიჟარაძემ აიღო:

“ესაა ყველა იმ ადამიანის ჯილდო, ვინც აღმოსავლეთიდან დასავლეთით და სამხრეთიდან ჩრდილოეთით ქართულ რაგბიში მოღვაწეობს. 2014 წელი კარგი იყო, ხოლო 2015 გარდამტეხი იქნება. სწორედ აქ უნდა გამოჩნდეს ჩვენი 4-წლიანი მუშაობის შედეგი. დარწმუნებული ვარ, საქართველოს ეროვნული ნაკრები ქართველ ხალხს მომავალი წლის ოქტომბერში (2015 წლის სექტემბერ-ოქტომბერში ინგლისში გაიმართება მსოფლიო თასი, რომელშიც საქართველოს ნაკრები ზედიზედ მეოთხედ მიიღებს მონაწილეობას) კიდევ ერთხელ გაახარებს”.

2014 წლის სანაკრებო თამაშების მოკლე მიმოხილვის ხილვის შემდეგ, დაჯილდოვების დრო დადგა და დაჯილდოვდნენ “ლელო სარასენსის” დუბლ შემადგენლობა, რომელიც წინა სეზონის ჩემპიონი გახდა; პირველი ლიგის გამარჯვებული “თიბიეს უნივერსიტეტი”, 7-კაცას საქართველოს ჩემპიონატის გამარჯვებული რუსთავის “ხარები”

ბოლო დროს ტრადიციად იქცა ვეტერანთათვის პატივის მიგება. წელს პირველად დაჯილდოვდა 80 წლის ვეტერანი მორაგბე – ნოდარ კაჭარავა, მის გარდა კი, მრგვალი თარიღი მიულოცეს 70, 60 და 50 წლის ვეტერანებს.

სულ ბოლოს გიორგი ნიჟარაძემ შეკრებილთ ერთი სამწუხარო ამბავი ამცნო – ნაკრებს ემშვიდობება “ბორჯღალოსანთა” კაპიტანი ირაკლი მაჩხანელი, რომელმაც თავად მიიღო ეს გადაწყვეტილება. მან ნაკრების კვართი 73-ჯერ მოირგო, 13-ჯერ იყო გუნდის კაპიტანი და ჯამში 24 ლელო დადო. გიორგი ნიჟარაძემ დადო პირობა, რომ ის აუცილებლად დასაქმდება საქართველოს რაგბის კავშირში და მაჩხანელს გადასცა წმინდა გიორგის მედალიონი, რომელზეც ირაკლი მაჩხანელის სახელი და გვარი, ასევე მის მიერ ჩატარებული მატჩების რაოდენობაა ამოტვიფრული. ქართველ მორაგბეთაგან მსგავსი საჩუქარი აქამდე მხოლოდ ირაკლი აბუსერიძეს ჰქონდა მიღებული და ახლა მას მეორე ირაკლი დაემატა.

მაჩხანელის ოფიციალური გაცილება 2015 წლის ერთა თასზე რუსეთთან მატჩისთვის იგეგმება, მანამდე კი, 33 წლის მორაგბემ განაცხადა: მივიღე გადაწყვეტილება და სანაკრებო კარიერა დავასრულე. უბედნიერესი ადამიანი ვარ, ამდენი ხნის განმავლობაში ეროვნული გუნდის მაისურით რომ ვთამაშობდი. მომავალ მსოფლიო თასზე “ბორჯღალოსნების” უდიდესი გულშემატკივარი ვიქნები – ბიჭებს წარმატებებს ვუსურვებ”.

2014 წლის შემაჯამებელი ღონისძიების ბოლოს დარბაზში შეკრებილებს, ქართული რაგბის მეგობარმა ანსამბლმა, “შვისკაცამ” უმღერა.

Rugby.GE

წელს ბორჯღალოსნების რიგებში ორი ახალი სახე გამოჩნდა. მურაზ გიორგაძე (არმაზი) და გიორგი აფციაური (აია) ბორჯღალოსნების დებიუტანტები არიან, რომლებმაც საქართველოს ყველა ასაკობრივი ნაკრები გამოიარეს.

მურაზ გიორგაძემ წელს მზარდი საქართველოს რიგებში ორი შეხვედრა გამართა ინგლისის საგრაფოთა ნაკრებთან, ხოლო მოგვიანებით მას ეროვნული ნაკრების სამწვრთნელო შტაბმა ივნისში ‘თბილისის თასისთვის’ ბორჯღალოსნების შეკრებაზე უხმო. პირველი სანაკრებო ბორჯღალი მურაზ გიორგაძემ გათამაშების პირველ წრეში, ესპანეთის ეროვნული ნაკრების წინააღმდეგ მატჩში მოიხვეჭა. იგი მოედანზე შეხვედრის მიწურულს ჩაერთო, ხოლო ქომაგს თავი ‘მზარდი იტალიის’ წინააღმდეგ გამართულ შეხვედრაში დადებული საუცხოო ლელოთი დაამახსოვრა. მილტონ ჰეიგმა გიორგაძე 2014 წლის ნოემბრის ტესტ-სერიის შეკრებაზეც გამოიძახა და ირლანდიის წინააღმდეგ, ‘ავივა სთედიუმზე’ შეცვლაზე ათამაშა.

გიორგი აფციაურმა ეროვნულში დიუბიუტამდე სექტემბერში, ევროპის დონით მეორე საკლუბო ტურნირის, ‘ჩელენჯ ქაპის’ შესარჩევს ეტაპზე ‘თბილისის კავკასიელების’ (უმაღლესი ლიგის საკლუბო სელექცია) შემადგენლობაში იასპარეზა. მანამდე იგი საქართველოს 20-წლამდე ნაკრების შემადგენლობაში მსოფლიო ახალგაზრდულ ალაფაზე ჰონკონგში გაემგზავრა, მაგრამ ვარჯიშზე მიღებული ფეხის ტრავმის გამო ტურნირში ვერ მიიღო მონაწილეობა.

ნოემბრის ტესტ-სერიის გაფართოებულ რაზმში წელს პირველად ვიხილეთ აფციაური, რომელიც იაპონიის ნაკრების წინააღდეგ, გიორგობას გამართული შეხვედრის სამატჩო რაზმში მარქაფაში შეიყვანა მილტონ ჰეიგმა. იგი შეხვედრაში მატჩის დაწყებიდან რამდენიმე წუთში, მას შემდეგ რაც ტრავმირებული დავით კაჭარავა შეცვალა და მატჩის ასრულებამდე წოტახნით ადრე მიღებული ტრავმა რომ არა, მსაჯის საფინალო სასტვენამდე ითამაშემდა.

FCDinamo.GE

2014 წლის აპრილში ერთმანეთის პარალერულად გაიმართა მსოფლიოს 20-წლამდელთა ალაფა (ჰონკონგი) და ევროპის 18-წლმადელთა ჩემპიონატის ელიტ დივიზიონის გათამაშება (პოლონეთი), რომლებშიც საქართველოს შესაბამისი ასაკის ნაკრებებმა მიიღეს მონაწილეობა.

20-წლამდელებმა მსოფლიო ალაფაზე მე-5 ადგილი დაიკავეს. მიზანს რათქმაუნდა ალაფის მოგება წარმოადგენდა და პირველივე შეხვედრაში ტონგას დამარცხებით (34:10) ყველაფერი თითქოს კარგად მიდიოდა, მაგრამ მეორე შეხვედრაში აშშ-ს ნაკრებთან ერთი ქულის სხვაობით მარცხმა (12:13) მდგომარეობა გაართულა. დანარჩენ შეხვედრებში ჰონკონგისა და ნამიბიის ძლევის მიუხედავად საპრიზოზე გასვლა ვერ მოვახერხეთ. მსოლფიო ახალგაზრდულ ალაფას, კი იაპონიის 20-წლამდელთა ნაკრები დაეუფლა, რომელმაც ფინალში ტონგას მოუგო და ამით 2015 წლის მსოფლიო ახალგაზრდულ ჩემპიონატზე ასპარეზობის უფლება მოიპოვა.

მსოფლიო ახალგაზრდულ ალაფაზე 20-წლამდე ბორჯღალოსნები წელს პორტუგალიაში იასპარეზებენ და ეხდებიან 2016 წლის ახალგაზრდული მსოფლიო ჩემპიონატის საგზურის მოპოვებას.

18-წლამდელებმა ევროპის ჩემპიონატის ელიტური დივიზიონის (8 ნაკრები: 6 ერი +2 რაგბი ევროპა) გათამაშებაში მიიღეს მონაწილეობა. წინა ორ გათამაშებაში პატარა ბორჯღალოსნებმა ზედიზედ იტალიის თანატოლთა ნაკრების ძლევით დივიზიონში მე-6 ადგილი და გათამაშებაში კვალიფიკაციის გარეშე ასპარეზობის უფლება მოიპოვეს. წლეულს 18-წლამდელები ირლანდიასთან (10:20) და იტალიასთან (13:15) დამარცხდნენ, ხოლო პორტუგალიას (26:3) მოუგეს, რითაც გათამაშებაში მე-7 ადგილი დაიკავეს.

დათოს გარეშე

2014 წელს სამწუხაროდ უტკივილოდ არ ჩაუვლია – 19 აგვისტოს ქართული სარაგბო თემს და ქართული რაგბის ვეებერთელა ოჯახს უეცრად გამოგააკლდა საღ-სალამათი წევრი, ალალი და უღალატო მეგობარი, ზნე-კეთილი ადამიანი, მზარდი სპეციალისტი, საქართველოს 20-წლამდე ნაკრებისა და რაგბის კლუბ „არმაზის“ მწვრთნელი დათო ვართანიანი, ვინაც ჩვენს წიაღში 30 სისხლ-სავსე წელი გაატარა.

FCDinamo.GE

წლეულს 19-წლამდელებმა ევროპულ ასპარეზზე შარშანდელი შედეგი გაიმეორეს და ზედიზედ მეორედ ევროპის ჩემიონის ტიტული მოიპოვეს. ‘რაგბი ევროპის’ 19 წლამდელთა კონტინენტის პირველობა 26 ოქტომბრიდან 1 ნოემბრის ჩათვლით ლისაბონში გაიმართა.

მოქმედი ევროპის ჩემპიონები ტიტულის დასაცავად ასპარეზობიხ მეოთხედფინალში ჰოლანდიის თანატოლთა ნაკრებ გუნდს დაუპირისპირდა და 55:3 დაამარცხეს. ნახევარფინალში ახალგაზრდა ბორჯღალოსნები თანატოლ ‘დათვებს’ შეხვდნენ და 41:5 სძლიეს რუსეთის 19-წლამდელთა ნაკრებს.

ასპარეზობის ფინალში ჩვენი ნაკრები მასპინძელ პორტუგალიის ახალგაზრდულ ნაკრებ გუნდს ერკინა, რომლის 44:14 დაამარცხა და ევროპის ჩემპიონის ტიტულს დაეუფლა.

ამ გამარჯვებით უმცროსმა ბორჯღალოსნებმა 2015 წლის მსოფლიო ახალგაზრდულ ალაფაზე მონაწილეობის უფლება მოიპოვეს, რომელიც ასევე პორტუგალიაში გაიმართება.

ევროპის ჩემპიონატზე ყველა მატჩის დიდი ანგარიშით მოგებისთვის და დამაჯერებლად გამარჯვებისთვის, საქართველოს 19-წლამდე ნაკრებმა და მთელმა სამწვრთნელო შტაბმა ბევრი იშრომა. მოსამზადებელ პერიოდში, უმცროსმა ბორჯღალოსნებმა ორ მატჩიანი სპარინგ-სერია გამართეს ინგლისის საგრაფოთა 20-წლამდელთა ნაკრებთან; მონაწილეობა მიიღეს ახლად დაარსებულ ტურნირში – „აკადემიები გამოწვევა“, რომელშიც ლესთერ თაიგერსის და მასპინძელი კლერმონის 20-წლამდელთა გუნდების დამარცხებით ახალგაზრდა ბორჯღალოსნებმა გაიმარჯვეს.

Rugby.GE

ახალ, 2015 წლამდე ორიოდ კვირა რჩება. 2014 წელს ქართულ სარაგბეთში მომხდარი უამრავი გამორჩეული თუ აღსანიშნავი მოვლენისა და მატჩის გასახსენებლად, საქართველოს რაგბის კავშირის ოფიციალურ სოც.მედია პლატფორმებზე დაიწყო რუბრიკა, რომლის ფარგლებში ამ მოვლენების ამსახველ ფოტო-ვიდეო მასალას მოგაწვდით.

2014 წლის 15 მარტს, მესხის სტადიონზე ევროპის ერთა თასის/2015 წლის მსოფლიო თასის შესარჩევი ეტაპის დამაგვირგვინებელ მატჩში ერთმანეთს ძველი მეტოქეები – საქართველოსა და რუმინეთის ეროვნული ნაკრები გუნდები დაუპირისპირდნენ. 2014 წლის ევროპის ერთა და ანთიმოზ ივერიელის თასის (ჯილდო, რომელიც საქართველოსა და რუმინეთის ნაკრებ გუნდებს შორის თამაშდება) მფლობელის გამოვლენის გარდა, ამ შეხვედრით ირკვეოდა ევროპის შესარჩევი პულიდან ეს ორი ნაკრები, რომელ ჯგუფებში მოხვდებოდნენ 2015 წლის მსოფლიო თასზე. ორივე ნაკრებს მატჩში გამარჯვება და C ჯგუფში მოხვედრა სურდა, ხოლო ამ მიზანს ‘ბორჯღალოსნებმა’ ‘მუხებზე’ გამარჯვებით მიაღწიეს.

ამ შეხვედრის დიდი მნიშვნელობიდან გამომდინარე და ქართული რაგბის ბოლოდროინდელი პროგრესისა და წარმატებების აღსანიშნავად, იმ დროს ‘რაგბის საერთაშორისო საბჭოდ’ ცნობილმა, ახლაკი ‘მსოფლიო რაგბმა’ (რაგბის საერთაშორისო ფედერაცია) ქართული რაგბის ქომაგი ‘უილიამ ვებ ელისის’ თასის (სარაგბო სამყაროში ყველაზე მნიშვნელოვანი და სანატრელი ჯილდო, რომელსაც მსოფლიო თასის გამარჯვებულ ნაკრებ გუნდს გადასცემენ) საქართველოში ჩამოტანით დააფასა. გთავაზობთ ‘ვებ ელისის’ თასის თბილისური ტურნეს ამსახველ ვიდეო და ფოტო მასალას:

Rugby.GE

მალე ახალი წელია! ორიოდ კვირაში 2015, მსოფლიო თასის წელი დადგება. მომავალი წლის მსოფლიო თასი, რომელზეც ბორჯღალოსნები ზედიზედ მეოთხედ გავიდნენ, სექტემბერსა და ოქტომბერში ინგლისში გაიმართება.

2014 წელს ქართულ რაგბში არაერთი მნიშვნელოვანი რამ მოხდა:

ერთა თასის 1 დივიზიონში გამარჯვებით მსლოფლიო თასის სასურველ, C ჯგუფში მოვხვდითთ; ‘მსოფლიო რაგბმა’ (ყოფ. რაგბის საერთაშორისო საბჭო) ამ თამაშის მნიშვნელობიდან გამომდინარე, ევროპაში მსოფლიო თასის საკვალიფიკაციო ეტაპის კულმინაციის აღანიშნავად თბილისში ‘ვებ ელისის თასი’ – სარაგბო სამყაროს ყველაზე მნიშვნელოვანი და სანატრელი ჯილდო ჩამოიტანა; წლევანდელი ‘ევროპის ერთა თასის’ მოპოვებით ირლანდიის ეროვნულ ნაკრებთან ნოემბრის ტესტ სერიაში თამაშის უფლებაც დავიმსახურეთ;

19-წლამდელები კვლავ ევროპის ჩემპიონები გახდნენ, მანამდე კი ინგლისში წარმატებული ტურნე ჩაატარეს, სადაც პირველ შეხვედრაში წააგეს ინგლისის საგრაფოთა 20-წლამდელთა ნაკრებთა, ხოლო მეორე შეხვედრაში კი სძლიეს მოწინააღმდეგეს; მოგვიანებით 19-წლამდე ბორჯღალოსნებმა წელს დაარსებულ„აკადემიების გამოწვევის“ ტურნირში ‘ლესთერ თაიგერსისა და მასპინძელი ‘კლერმონის’ 20 წლამდელთა გუნდების ძლევით გაიმარჯვეს;

წლეუს პირველად ‘თბილისის კავკასიელების’ სახელით მოასპარეზე ქართულმა სელექციამ, ევროპულ საკლუბო რაგბს გაუსინჯა გემო – სექტემბერში ‘კავკასიელები’ ‘ჩელენჯ ქაპის’ 2-მატჩა საკვალიფიკაციო რაუნდში ერკინენ იტალიურ ‘როვიგოს’, რომელშიც იტალიელებმა იმარჯვეს;

2014 წელს ორმა ახალგაზრდა მორაგბემ მოირგო პირველად ბორჯღალოსანთა კვართი: 2014 წლის თბილისის თასსზე ესპანეთის წინააღმდეგ პირველი სანაკრებო ბორჯღალი და საერთაშორისო ‘კეპი’ ‘არმაზელმა’ მურაზ გიორგაძემ მოიხვეჭა, ხოლო ‘აიელ’ გიორგი აფციაურს ეს პატივი ახლახან, ნოემბრის ტესტ-სერიის საქართველო-იაპონიის მატჩშზე ერგო;

ამ და სხვა მნიშვნელოვან მოვლენათა გასახსენებლად საქართველოს რაგბის კავშირის ვებ-გვერდზე და ჩვენს სხვა ოფიციალურ სოც.მედიის პლატფორმებზე დავდებთ შესაბამის ვიდეო და ფოტო მასალას.

ამ რუბრიკას 15 მარტს გამართული, ევროპის ერთა თასის ფინალის, საქართველო-რუმინეთის მატჩის ტრიბუტით დავიწყებთ:

Rugby.GE