მადრიდის “რეალის” თავდამსხმელმა კარიმ ბენზემამ კლუბთან კონტრაქტი გაახანგრძლივა. ფრანგ ფეხბურთელსა და “ბლანკოსს” შორის ახალი ხელშეკრულება 2019 წლის 30 ივნისამდე იქნება ძალაში.
შეგახსენებთ, რომ ბენზემა “რეალის” ღირსებას 2009 წლიდან იცავს. 26 წლის თავდამსხმელს “სამეფო კლუბის” რიგებში ჩატარებულ 235 მატჩში 111 გოლი აქვს გატანილი და 70 საგოლე გადაცემა გაკეთებული.
“რეალთან” ერთად ბენზემამ ესპანეთის ჩემპიონატი და ორჯერ ქვეყნის თასი მოიგო, გახდა ჩემპიონთა ლიგის გამარჯვებულიც.
მადრიდის “რეალის” კიპერმა იკერ კასილასმა, რომელიც აქამდე გუნდიდან წასვლაზე ფიქრობდა, “სანტიაგო ბერნაბეუზე” დარჩენა გადაწყვიტა. ესპანელმა კიპერმა აღნიშნული გადაწყვეტილება ფერნანდო იეროსთან საუბრის შემდეგ მიიღო.
შეგახსენებთ, რომ იერო “რეალის” თავკაც კარლო ანჩელოტის თანაშემწედ დაინიშნა.
ფერნანდო იერომ შეძლო, დაერწმუნებინა კასილასი, რომ ის გუნდისთვის კვლავ საჭიროა. იერო და კასილასი ერთად წლების განმავლობაში იცავდნენ “რეალის” ღირსებას.
კოსტა რიკის ნაკრების მეკარე კეილორ ნავასი მადრიდის “რეალში” გადავიდა.
მხარეებს შორის 6-წლიან კონტრაქტს მოეწერა ხელი.
ნავასის ოფიციალური წარდგენა 5 აგვისტოს მოეწყობა.
შეგახსენებთ, რომ კეილორ ნავასი მანამდე “ლევანტეს” ღირსებას იცავდა. 27 წლის მეკარემ ესპანეთის ჩემპიონატის გასულ გათამაშებაში 37 მატჩი ჩაატარა და 39 გოლი გაუშვა.
ბრაზილიაში წელს გამართულ მსოფლიოს ჩემპიონატზე კოსტა რიკის ნაკრებმა მეოთხედფინალურ ეტაპამდე გააღწია. კეილორ ნავასმა მუნდიალზე ჩატარებულ ხუთ შეხვედრაში მხოლოდ ორი გოლი გაუშვა.
მადრიდის “რეალმა” აშშ-ში წინასასეზონო მოსამზადებელი პერიოდი დაასრულა და დღეს დილით ესპანეთის დედაქალაქში დაბრუნდა.
ფეხბურთელები სამშაბათამდე დაისვენებენ, შემდეგ კი ვარჯიშს შეუდგებიან. როგორც მოგეხსენებათ, 12 აგვისტოს “რეალსა” და “სევილიას” შორის უეფას სუპერთასის მატჩი გაიმართება.
აქვე ვრცელდება ინფორმაცია იმის შესახებ, რომ “სამეფო კლუბს” უახლოეს პერიოდში დატოვებს მეკარე დიეგო ლოპესი.
Todomercadoweb-ის თანახმად, ესპანელი კიპერი “მონაკოს” უახლოვდება. გავრცელებული ცნობით, დიეგო ლოპესი “წითელ-თეთრებთან” სამწლიან კონტრაქტს გაფორმებს და სეზონში ხელფასის სახით 5 მილიონ ევროს მიიღებს.
დიეგო ლოპესის შესაძლო ტრანსფერის ღირებულება 12 მილიონ ევროდ ფასდება.
წუხელ, საერთაშორისო ამხანაგურ ტურნირზე “მანჩესტერ იუნაიტედსა” და მადრიდის “რეალს” შორის გამართული შეხვედრა “წითელი ეშმაკების” გამარჯვებით, ანგარიშით 3:1 დასრულდა. მატჩი მიჩიგანის სტადიონზე გაიმართა და 109 318 მაყურებელი დაესწრო.
როგორც ტელერეპორტაჟიდან გამოჩნდა, სტადიონზე ინგლისური გუნდის ქომაგები იმდენად ჭარბობდნენ, რომ ტრიბუნები თითქმის მთლიანად გადაწითლებული იყო. უცხოური პრესის ცნობით, მადრიდულმა გამოცემა “მარკამ” არ ითაკილა ფოტოს რედაქტირება, რომელზედაც სტადიონის ტრიბუნები იყო აღბეჭდილი და კომპიუტერული პროგრამის მეშვეობით ისე გამოაჩინა, თითქოს მატჩზე დამსწრე საზოგადოების უმეტესობა სწორედ “რეალს” ქომაგობდა.
გთავაზობთ ორიგინალ და რედაქტირებულ ფოტოებს.
საერთაშორისო ამხანაგურ ტურნირზე “მანჩესტერ იუნაიტედსა” და მადრიდის “რეალს” შორის გამართული შეხვედრა ინგლისური გუნდის გამარჯვებით, ანგარიშით 3:1 დასრულდა. მატჩი მიჩიგანის 109 ათასიან სტადიონზე გაიმართა.
შეხვედრაში ანგარიში 21-ე წუთზე ეშლი იანგმა გახსნა. ექვსი წუთის შემდეგ გარეტ ბეილის მიერ შესრულებული ზუსტი თერთმეტმეტრიანი დარტყმის წყალობით მადრიდელებმა ანგარიში გაათანაბრეს, თუმცა “წითელმა ეშმაკებმა” შესვენებამდე იანგის კიდევ ერთი გოლით კვლავ დაწინაურება შეძლეს.
მეორე ტაიმში ერთი გოლი გავიდა და ისევ “რეალის” კარში: გოლი მე-80 წუთზე ხავიერ ერნანდესმა გაიტანა. ამ გამარჯვების წყალობით “მანჩესტერ იუნაიტედმა” A ჯგუფში პირველი ადგილი დაიკავა და ტურნირის ფინალში გავიდა. “რეალმა” კი სამივე შეხვედრა მარცხით დაასრულა (“ინტერთან”, “რომასთან” და “მანჩესტერ იუნაიტედთან”).
ესპანური Sport-ის ცნობით, “პარი სენ-ჟერმენმა” ანხელ დი მარიას შესაძლო ტრანსფერთან დაკავშირებით მადრიდის “რეალთან” შეთანხმებას მიაღწია.
წყაროს თანახმად, ტრანსფერის ღირებულება 80 მილიონ ევროდ ფასდება: პარიზელები 10 მილიონ ევროს მაშინვე გადაიხდიან, დანარჩენ 70 მილიონს კი – სეზონის ბოლოს.
შეგახსენებთ, რომ დი მარიამ „რეალის“ ფორმით გასულ სეზონში 52 მატჩი ჩაატარა, 11 გოლი გაიტანა და 24 საგოლე გადაცემა გააკეთა.
მადრიდის “რეალის” ფეხბურთელებმა თავიანთი შესაძლებლობები ამერიკულ ფეხბურთშიც მოსინჯეს.
მადრიდის „რეალის“ თავდამსხმელი ქარიმ ბენზემა კლუბთან ახალ კონტრაქტს გააფორმებს.
„El Confidencial“-ის ინფორმაციით, ფრანგის ახალი ხელშეკრულება 2018 წლამდე იმოქმედებს.
კონტრაქტის მიხედვით, ფორვარდის ხელფასი ყოველ წელს გაიზრდება: პირველ სეზონში იგი 6,5 მილიონ ევროს მიიღებს, ხოლო მეორეში – 7 მილიონს და ა.შ.
სავარაუდოდ, მადრიდული კლუბი ბენზემასთან ახალი კონტრაქტის გაფორმებას შემდეგ კვირას დაადასტურებს.
12 აგვისტოს, კარდიფში, მადრიდის “რეალსა” და “სევილიას” შორის გასამართ უეფას სუპერთასის მატჩს ინგლისელი არბიტრი მარკ კლატენბურგი განსჯის.
39 წლის რეფერი საერთაშორისო დონეზე 2006 წლიდან მსაჯობს, პროფესიით ელექტრიკოსია.
გასულ სეზონში კლატენბურგმა ჩემპიონთა ლიგის ხუთი მატჩი განსაჯა, მათ შორის მეოთხედფინალურ ეტაპზე “რეალსა” და დორტმუნდის “ბორუსიას” შორის გამართული შეხვედრაც.
ავტორიტეტული ესპანური გამოცემის „მარკას“ ცნობით, მიუნხენის „ბაიერნი“ მადრიდის „რეალის“ ნახევარმცველის სამი ხედირას შეძენას ეცდება. კლუბის ხელმძღვანელობა მზადაა, ფეხბურთელს ის ხელფასი გადაუხადოს, რომელსაც იგი მოითხოვს.
„ბლანკოსის“ მოთამაშეს გერმანიის ჩემპიონები ტონი კროოსის შემცვლელად მოიაზრებენ, რომელიც არც ისე დიდი ხნის წინ სწორედ „რეალში“ გადაბარგდა.
შეგახსენებთ, რომ ხედირას შეძენით აქტიურად ლონდონის „არსენალი“ ინტერესდებოდა, თუმცა მხარეებმა შეთანხმება ვერ შეძლეს.
მადრიდის “რეალისა” და ინგლისის ეროვნული ნაკრების ყოფილმა თავდამსხმელმა მაიკლ ოუენმა კრიშტიანუ რონალდუს მისამართით საქებარი სიტყვები არ დაიშურა და აღნიშნა, რომ პორტუგალიელი ფეხბურთელი ფეხბურთის ისტორიაში, ალბათ, ყველაზე სრულყოფილი მოთამაშეა.
“ჩემი აზრით, რონალდუ, ალბათ, ყველა დროის ყველაზე სრულყოფილი ფეხბურთელია. სწრაფია, გოლებს იტანს, ორივე ფეხით შეუძლია თამაში, თავით შესანიშნავად ურტყამს.
კრიშტიანუ ამტანია და ყველა მატჩს ატარებს. ისეთი რამ არ არსებობს, რისი გაკეთებაც მას არ შეუძლია“, – ოუენის სიტყვებს Goal.com-ი ციტირებს.
