ჭდე: სკუდეტო

„მილანის“ ყოფილი მცველი ალესანდრო ნესტა იტალიური კლუბის ხელმძღვანელობას გუნდის განვითარებისთვის მსხვილი ინვესტირებისკენ მოუწოდებს. მისი თქმით, იტალიური ფეხბურთი სუსტი ფინანსირების გამო უკვე მნიშვნელოვნად ჩამორჩება ინგლისურს.

„მილანის“ პრეზიდენტი სილვიო ბერლუსკონი მთელი თავისი გრძნობებითა და გამოცდილებით კვლავ უნდა ჩაერთოს კლუბის მუშაობაში. ძლიერი ფეხბურთელების მოსაზიდად საჭიროა დიდი ინვესტიციები, როგორც ეს წარსულში ხდებოდა. ინგლისში მსხვილი კაპიტალის გაჩენამ პრემიერლიგა გააძლიერა. ასე რომ, ინვესტირება აუცილებელია. დამამცირებელია იმის ხილვა, რომ ჩვენი გუნდები ევროთასების პირველ რაუნდსაც ვერ ლახავენ.

რაც შეეხება საჩემპიონო რბოლას, „სკუდეტოს“ კვლავ „იუვენტუსი“ მოიგებს. „ბებერი ქალბატონი“ ძალიან ძლიერია. „რომა“ საფრთხეს წარმოადგენს, არც „ნაპოლი“, „ინტერი“ და „ფიორენტინა“ ჩამოუშვებენ ხელებს, თუმცა „იუვენტუსს“ მხოლოდ საკუთარი თავი თუ დააკარგვინებს ტიტულს“, – ნესტას სიტყვები იტალიურმა „კორიერე დელო სპორტმა“ გამოაქვეყნა.

ბექა დოგრაშვილი