ჭდე: England Premier League

პრემიერლიგის მიმდინარე გათამაშების პარადოქსი

Posted on by ბექა დოგრაშვილი

ფეხბურთი იმით არის საინტერესო, რომ სპორტის ამ სახეობაში ყველაფერი ხდება. მოვლენები შეიძლება ისე პარადოქსალურად განვითარდეს, რომ წინასწარ ამის წარმოდგენა შეუძლებელი იყოს. შესაძლოა დიდი ხნის განმავლობაში გუნდს სატურნირო ცხრილში პირველი ადგილი ჰქონდეს დაკავებული, თუმცა შემდეგ საუკეთესო ოთხეულში შესვლა სანატრელი გაუხდეს. ამ მხრივ განსაკუთრებით ინგლისის პრემიერლიგა გამოირჩევა. მაგალითად, ლონდონის „არსენალი“ გათამაშების სატურნირო ცხრილს 128 დღე ლიდერობდა, თუმცა შემდეგ ქვემოთ დაეშვა და ერთი პერიოდი მისი საუკეთესო ოთხეულში შესვლა-არშესვლაზე იდგა საკითხი. მაშინ, როცა „მანჩესტერ სიტი“ მხოლოდ 15 დღის განმავლობაში ლიდერობდა გათამაშებას, თუმცა სტაბილურობის ხარჯზე დღეს „ქალაქელები“ კვლავ პირველ ადგილზე არიან და საჩემპიონო ტიტულს ერთი ნაბიჯი აშორებთ.

პარადოქსია, მაგრამ ფაქტია, რომ ინგლისის საუკეთესო ოთხი კლუბიდან ის გუნდი, რომელიც ყველაზე დიდი ხნის განმავლობაში ლიდერობდა სატურნირო ცხრილს ოთხეულში ბოლო ადგილზეა და პირიქით, რომელიც ყველაზე ნაკლებ ხანს ლიდერობდა, ახლაც პირველ პოზიციაზეა.

 

კლუბი: რამდენი დღე ლიდერობდა სატურნირო ცხრილს: რა პოზიცია უკავია ახლა:
„არსენალი“ 128 4
„ჩელსი“ 64 3
„ლივერპული“ 59 2
„მანჩესტერ სიტი“ 15 1

 

როჯერსი: „ამ დრომდე შოკში ვარ“

Posted on by ბექა დოგრაშვილი

„ლივერპული“ ინგლისის პრემიერლიგის მიმდინარე გათამაშების ბოლო ტურის მატჩისთვის ემზადება, რომელსაც „ნიუკასლ იუნაიტედის“ წინააღმდეგ გამართავს. მერსისაიდულ გუნდს ჩემპიონობის შანსი ჯერ კიდევ აქვს, თუმცა ძალიან მცირე. ამისთვის, პირველ რიგში, „მანჩესტერ სიტი“ შინ უნდა დამარცხდეს „ვესტ ჰემთან“ და თავად „ლივერპულმა“ „ნიუკასლი“ უნდა დაამარცხოს.

მერსისაიდული გუნდის მთავარი მწვრთნელი ბრენდან როჯერსი საკუთარ ფეხბურთელებს სეზონის დასასრულს ულოცავს და აცხადებს, რომ „წითლები“ მომავალ წელს უფრო მაღალი შედეგისთვის იბრძოლებენ. როჯერსის თქმით, ის ჯერ კიდევ არ გამოსულა წინა ტურში „კრისტალ პალასისგან“ მიღებული შოკიდან. შეგახსენებთ, რომ აღნიშნული მატჩის მიმდინარეობისას „ლივერპული“ ანგარიშით 3:0 იგებდა, თუმცა შეხვედრის ბოლო 10 წუთში 3 გოლი გაუშვა და მეტოქეს 3:3 დაუზავდა.

„ჩემს მოთამაშეებს სეზონის მიწურულს ვულოცავ. მათ „ლივერპული“ მსოფლიო დონეზე დააბრუნეს. ეს მხოლოდ დასაწყისია. მომავალ სეზონში უფრო მაღალ შედეგს ველით. სამჯერ ვუყურე „კრისტალ პალასის“ წინააღმდეგ გამართულ მატჩს და ამ დრომდე ვერ გამოვსულვარ შოკიდან“, – როჯერსის სიტყვებს „ბი ბი სი“ აქვეყნებს.

აქვე გეტყვით, რომ პრემიერლიგის 38-ე ტურის ათივე შეხვედრა ერთ დროს დაიწყება — 11 მაისს, 18:00 საათზე.

ბექა დოგრაშვილი

პრემიერლიგის აპრილის თვის საუკეთესონი

Posted on by ბექა დოგრაშვილი

ინგლისის პრემიერლიგის აპრილის თვის საუკეთესო ფეხბურთელი და მწვრთნელი დაასახელეს.

საუკეთესო მოთამაშედ „სანდერლენდის“ ახალგაზრდა თავდამსხმელი კონორ უიკჰემი დასახელდა, საუკეთესო მწვრთნელად კი – „კრისტალ პალასის“ უელსელი თავკაცი ტონი პიულისი

პრემიერლიგაში ადგილის შენარჩუნებაში „სანდერლენდს“ 21 წლის უიკჰემი ეხმარება, რომელმაც აპრილში გატანილი გოლით თავი ხუთჯერ გამოიჩინა, ორჯერ გაუტანა „მანჩესტერ სიტისა“ და „კარდიფს“, ერთხელ კი – ლონდონის „ჩელსის“.

რაც შეეხება პიულისს, მისი თავკაცობით „კრისტალ პალასმა“ აპრილში გამართული ხუთი მატჩიდან ოთხი გამარჯვებით დაასრულა. გუნდს ამ დროისთვის 43 ქულით სატურნირო ცხრილის მე-11 ადგილი უკავია და პრემიერლიგის მომდევნო სეზონში ადგილი განაღდებული აქვს.

ბექა დოგრაშვილი

პრემიერლიგის წლის საუკეთესო ფეხბურთელი და საუკეთესო ახალგაზრდა მოთამაშე დასახელდნენ

Posted on by ბექა დოგრაშვილი

პროფესიონალ ფეხბურთელთა ასოციაციამ ინგლისის პრემიერლიგის მიმდინარე გათამაშების საუკეთესო მოთამაშე და საუკეთესო ახალგაზრდა ფეხბურთელი დაასახელა. საუკეთესო მოთამაშედ „ლივერპულის“ თავდამსხმელი ლუის სუარესი დასახელდა, საუკეთესო ახალგაზრდა ფეხბურთელად კი – ლონდონის „ჩელსის“ ნახევარმცველი ედენ აზარი.

ურუგვაელმა ფორვარდმა პრემიერლიგის მიმდინარე გათამაშებაში 31 მატჩი ჩაატარა და 30 გოლი გაიტანა, რაც მერსისაიდულ გუნდს ლიდერობის დაბევებაში დიდად დაეხმარა.

წლის ჯილდოსთვის ბრძოლაში სუარესმა თანაკლუბელებს – დანიელ სტარიჯსა და სტივენ ჯერარდს, აგრეთვე ადამ ლალანას („საუთჰემპტონი“), იაია ტურეს („მანჩესტერ სიტის“) და ედენ აზარს აჯობა („ჩელსი“).

რაც შეეხება აზარს, 23 წლის ბელგიელი ფეხბურთელი ჟოზე მოურინიოს გუნდის ლიდერად მოგვევლინა. როგორც მოგახსენებთ, აზარი სეზონის საუკეთესო ახალგაზრდა მოთამაშედ დასახელდა. მეორე ადგილზე „ლივერპულის“ თავდამსხმელი დანიელ სტარიჯი გავიდა, მესამე პოზიციაზე კი – „საუთჰემპტონის“ ფეხბურთელი ლიუკ შოუ.

შეგახსენებთ, რომ შარშან ორივე ჯილდო „ტოტენჰემ ჰოთსპურის“ ნახევარმცველმა გარეტ ბეილმა მიიღო, რომელიც ამჟამად მადრიდის „რეალის“ ღირსებას იცავს.

ბექა დოგრაშვილი

პრემიერლიგის წლის სიმბოლური გუნდი

Posted on by ბექა დოგრაშვილი

პროფესიონალ ფეხბურთელთა ასოციაციამ ინგლისის პრემიერლიგის მიმდინარე სეზონის სიმბოლური ნაკრები შეადგინა. წლის გუნდში ყველაზე ჭარბად ლონდონის „ჩელსისა“ და „ლივერპულის“ ფეხბურთელები მოხვდნენ.

პრემიერლიგის წლის სიმბოლური გუნდი ასე გამოიყურება:

მეკარე: პეტრ ჩეხი;
მცველები: შეიმუს კოულმენი, გარი კეჰილი, ვენსან კომპანი, ლიუკ შოუ;
ნახევარმცველები: ადამ ლალანა, სტივენ ჯერარდი, იაია ტურე, ედენ აზარი;
თავდამსხმელები: დანიელ სტარიჯი, ლუის სუარესი.

ბექა დოგრაშვილი

ოთხმატჩიანი დისკვალიფიკაცია რამირესს

Posted on by ბექა დოგრაშვილი

ლონდონის „ჩელსის“ ნახევარმცველი რამირესი ინგლისის ჩემპიონატის მიმდინარე გათამაშებაში ვეღარ ითამაშებს.

ინგლისის ფეხბურთის ასოციაციის ოფიციალური ვებ-გვერდის ცნობით, პრემიერლიგის 35-ე ტურში „სანდერლენდის“ წინააღმდეგ გამართული მატჩის (1:2) მიმდინარეობისას ბრაზილიელმა ფეხბურთელმა სებასტიან ლარსონს სახეში ხელი გაარტყა, თუმცა მსაჯებმა ეს ეპიზოდი ვერ შენიშნეს. სადისციპლინო კომიტეტმა ინციდენტის ვიდეოჩანაწერი შეისწავლა და რამირესს ოთხმატჩიანი დისკვალიფიკაცია მიუსაჯა.

დისკვალიფიკაციას სამი მატჩი უნდა მოეცვა, თუმცა „ასტონ ვილასთან“ გამართულ მატჩში რამირესის გაძევებამ მისი ერთი შეხვედრით გაზრდა გამოიწვია.

ბექა დოგრაშვილი

„საუთჰემპტონი“ „ევერტონს“ ორიგინალურ მოედანზე მიიღებს

Posted on by ბექა დოგრაშვილი

ინგლისის პრემიერლიგის 36-ე ტური შაბათს, „საუთჰემპტონსა“ და „ევერტონს“ შორის გასამართი მატჩით გაიხსნება. „წმინდანები“ საკმაოდ კარგ სეზონს ატარებენ და დადებითი შედეგების გარდა, სანახაობრივი თამაშითაც გამოირჩევიან. გუნდი, დიდი ალბათობით, სეზონს ზედა ათეულში დაასრულებს, თუმცა „საუთჰემპტონი“ ყურადღებას მხოლოდ ამით არ იქცევს. კლუბის სტადიონ „სენტ მერის“ მოედნის მომვლელებმა თავის გამოჩენა გადაწყვიტეს და მინდვრის საფარი ორიგინალურად გაკრიჭეს. სწორედ ასეთი სახე ექნება „ევერტონის“ წინააღმდეგ გასამრთი მატჩისას „საუთჰემპტონის“ სტადიონის მოედანს. შეხვედრა შაბათს, თბილისის დროით 15:45 საათზე დაიწყება.

ბექა დოგრაშვილი

მოიესის ბოლოსიტყვაობა

Posted on by ბექა დოგრაშვილი

„მანჩესტერ იუნაიტედის“ ყოფილმა მთავარმა მწვრთნელმა დევიდ მოიესმა სერ ალექს ფერგიუსონს, კლუბის ხელმძღვანელობასა და „წითელი ეშმაკების“ ქომაგებს მადლობა გადაუხადა.

სამშაბათს კლუბის ხელმძღვანელობამ შოტლანდიელი სპეციალისტი მთავარი მწვრთნელის პოსტიდან გაათავისუფლა.

გასულ უქმეებზე „წითელი ეშმაკები“ მოიესის ყოფილ კლუბ „ევერტონთან“ ანგარიშით 0:2 დამარცხდნენ, რითაც „იუნაიტედმა“ სეზონის დასრულება ჩემპიონთა ლიგის ზონის მიღმა „გაინაღდა“. ასეთი რამ უკანასკნელი 19 წლის მანძილზე პირველად ხდება. ჩემპიონატის დასრულებამდე სამი ტურით ადრე „მანჩესტერ იუნაიტედს“ 57 ქულით სატურნირო ცხრილის მეშვიდე პოზიცია აქვს დაკავებული.

„ვთვლი, რომ მწვრთნელი მთელი კარიერის განმავლობაში სწავლობს. „მანჩესტერ იუნაიტედში“ გატარებული დრო ჩემთვის ფასდაუდებელი გამოცდილებაა. სერ ალექს ფერგიუსონის მადლიერი ვარ. მან შანსი მომცა და დიად კლუბში მიმიწვია.

ვამაყობ, რომ „მანჩესტერ იუნაიტედი“ ჩემპიონთა ლიგის პლეი-ოფში გავიყვანე. ვამაყობ, რომ ამ დიდებული კლუბის ნაწილი ვიყავი. ხანგრძლივი პროგრესისა და სტაბილურობის შემდეგ ახალი კლუბის ჩაბარება დიდი გამოწვევაა. „მანჩესტერ იუნაიტედის“ მწვრთნელობა განსაკუთრებული პოზიციაა, თუმცა მძიმე სამუშაოსი არ მეშინოდა. ეს ჩემს სამწვრთნელო შტაბსაც ეხება. ჩემი მწვრთნელების მადლიერი ვარ მთელი სეზონის განმავლობაში გამოვლენილი ერთგულებისა და ნდობისთვის. ჩვენ ფუნდამენტურ გარდაქმნაზე ვიყავით ორიენტირებულნი, ეს აუცილებელი იყო ძირითადი შემადგენლობისთვის. ამ რთულ პერიოდში ისეთ თამაშებს ვერ ვაჩვენებდით, როგორსაც „მანჩესტერ იუნაიტედის“ გულშემატკვრები იყვნენ მიჩვეულნი. მე მესმის მათი იმედგაცრუების.

ამ მოკლე პერიოდში გავაცნობიერე, როგორი განსაკუთრებული ადგილია „ოლდ ტრაფორდი“, ასევე კარინგტონში არსებული ბაზა. მადლობას ვუხდი ქომაგებს, რომლებიც მხარს მიჭერდნენ მთელი სეზონის განმავლობაში. კლუბს ყოველივე საუკეთესოს ვუსურვებ“, – განაცხადა მოიესმა.

შეგახსენებთ, რომ „წითელ ეშმაკებს“ ინგლისის ჩემპიონატის დამდეგ მატჩში კლუბის ვეტერანი ფეხბურთელი რაიან გიგზი უხელმძღვანელებს.

ბექა დოგრაშვილი

„ლივერპული“ ჩემპიონობას კიდევ უფრო მიუახლოვდა

Posted on by ბექა დოგრაშვილი

ინგლისის პრემიერლიგის 35-ე ტურში „ნორვიჩ სიტიმ“ გათამაშების ერთპიროვნული ლიდერი  „ლივერპული“ მიიღო. ბრენდან როჯერსის გუნდმა დღეს მიჯრით მე-11 გამარჯვება ჩაიწერა.

„წითლებმა“ ანგარიში მე-4 წუთზე, რაჰიმ სტერლინგის შორეული ძლიერი დარტყმით გახსნეს. უკვე მე-11 წუთზე მერსისაიდელები ანგარიშით 2:0 იგებდნენ, გოლი სტერლინგის მახვილგონივრული პასით ლუის სუარესმა გაიტანა. საერთოდაც, შეიძლება ითქვას, რომ სტერლინგი დღევანდელ შეხვედრაში ორივე გუნდის შემადგენლობიდან საუკეთესო იყო. მეორე ტაიმის დაწყებიდან 10 წუთის შემდეგ მეკარე სიმონ მინიოლეს შეცდომის შემდეგ გარი ჰუპერმა ერთი ბურთი გაქვითა, თუმცა 62-ე წუთზე სტერლინგმა ორბურთიანი სხვაობა აღადგინა. 77-ე წუთზე მასპინძელთა შოტლანდიელმა ნახევარმცველმა რობერტ სნოდგრასმა შეხვედრაში ბოლო გოლი გაიტანა და საბოლოო შედეგი დააფიქსირა — 2:3.

ამრიგად, „ლივერპულმა“ ლიდერობა გაიმყარა და სანატრელ ტიტულს კიდევ უფრო მიუახლოვდა. მერსისაიდულმა გუნდმა მადევარ „ჩელსისთან“ სხვაობა 5 ქულამდე გაზარდა. „ლივერპულსა“ და ჟოზე მოურინიოს გუნდს შორის მატჩი 27 აპრილს, „ენფილდზე“ შედგება.

ინგლისის პრემიერლიგა
35-ე ტური
„ნორვიჩ სიტი“ — „ლივერპული“ 2:3 (0:2)
გოლები: ჰუპერი 54′, სნოდგრასი 77′ — სტერლინგი 4′, 62′, სუარესი 11′.
გაფრთხილებები: სნოდგრასი 29′, თარნერი 45′, ჰაუსონი 72′ — შკრტელი 65′, ფლანაგანი 79′.
მთავარი მსაჯი: ანდრე მარინერი.

ბექა დოგრაშვილი

მაიკლ ოუენმა პრემიერლიგის წლის გუნდი შეადგინა

Posted on by ბექა დოგრაშვილი

ინგლისის ნაკრებისა და „ლივერპულის“ ყოფილმა თავდამსხმელმა, 2001 წლის „ოქროს ბურთის“ მფლობელმა მაიკლ ოუენმა პრემიერლიგის მიმდინარე გათამაშების სიმბოლური გუნდი შეადგინა. ოუენის ნაკრები ასე გამოიყურება:

მეკარე: დავიდ დე ხეა („მანჩესტერ იუნაიტედი“);
მცველები: პაბლო ზაბალეტა („მანჩესტერ სიტი“), ჯონ ტერი (ლონდონის „ჩელსი“), მარტინ შკრტელი („ლივერპული“), ლეიტონ ბეინსი (ლივერპულის „ევერტონი“);
ნახევარმცველები: ადამ ლალანა („საუთჰემპტონი“), სტივენ ჯერარდი („ლივერპული“), იაია ტურე („მანჩესტერ სიტი“), რაჰიმ სტერლინგი („ლივერპული“);
თავდამსხმელები: ლუის სუარესი („ლივერპული“), დანიელ სტარიჯი („ლივერპული“).
მთავარი მწვრთნელი: ბრენდან როჯერსი („ლივერპული“).

ბექა დოგრაშვილი

პრემიერლიგის წლის საუკეთესო ფეხბურთელის წოდებისთვის მებრძოლთა სია გამოქვეყნდა

Posted on by ბექა დოგრაშვილი

ინგლისის პროფესიონალ ფეხბურთელთა ასოციაციამ ოფიციალურად დაასახელა 2013-14 წლების სეზონის პრემიერლიგის საუკეთესო ფეხბურთელისა და წლის საუკეთესო ახალგაზრდა მოთამაშის წოდების მოპოვების პრეტენდენტები. ექვსი ფეხბურთელიდან სამი „ლივერპულის“ მოთამაშეა: ლუის სუარესი, სტივენ ჯერარდი და დანიელ სტარიჯი.

მათ გარდა სიაში მოხვდნენ იაია ტურე („მანჩესტერ სიტი“), ედენ აზარი (ლონდონის „ჩელსი“) და ადამ ლალანა („საუთჰემპტონი“).

სტარიჯი და აზარი აგრეთვე წლის საუკეთესო ახალგაზრდა ფეხბურთელის ჯილდოზე არიან წარდგენილნი. მათ გარდა ამ სტატუსის მოპოვებისთვის იბრძვიან: რაჰიმ სტერლინგი („ლივერპული“), აარონ რემსი (ლონდონის „არსენალი“), როს ბარკლი („ევერტონი“) და ლიუკ შო („საუთჰემპტონი“).

გამარჯვებულთა ვინაობა 27 აპრილს, ლონდონში გაირკვევა.

ბექა დოგრაშვილი

ზიდანი: „ჯერარდი პრემიერლიგის მოგებას იმსახურებს“

Posted on by ბექა დოგრაშვილი

ფიფას ვერსიით მსოფლიოს სამგზის საუკეთესო ფეხბურთელი, მადრიდის „რეალის“ მწვრთნელი ზინედინ ზიდანი თვლის, რომ „ლივერპულის“ კაპიტანი სტივენ ჯერარდი ინგლისის პრემიერლიგის მოგებას იმსახურებს. გარდა ამისა, ფეხბურთის ფრანგმა სპეციალისტმა პოლ სქოულზის შესახებაც თქვა ორიოდ სიტყვა.

„ჯერარდს დიდებული კარიერა აქვს, მრავალი ტიტული მოიგო, თუმცა გულდასაწყვეტი იქნება, თუ პრემიერლიგის მოგებას ვერ მოახერხებს. საიდუმლო არ არის, რომ ამ ფეხბურთელის საკუთარ რიგებში ხილვა „რეალსა“ და ლონდონის „ჩელსის“ სურდათ. მას ევროპის ნებისმიერ კლუბში თამაში შეეძლო, თუმცა ყველას უარი უთხრა. მან მთელი კარიერა „ლივერპულს“ მიუძღვნა და პრემიერლიგის მოგებაც დაიმსახურა.

პოლ სქოულზისა და სტივენ ჯერარდის სახით ინგლისმა მსოფლიოს, შესაძლოა,  ბოლო ოცწლეულის საუკეთესო ნახევარმცველები აჩუქა. იყო პერიოდი, როდესაც ჯერარდი პლანეტის საუკეთესო ნახევარმცველად ითვლებოდა. ხშირად ვერ ნახავთ სრულყოფილ ნახევარმცველს, რომელსაც ყველაფრის გაკეთება შეუძლია, თუმცა ჯერარდი სწორედ ასეთი იყო. მართალია, ახლა სტივენი ისე ვეღარ თამაშობს, როგორც 5-6 წლის წინათ თამაშობდა, მაგრამ გუნდში ის ფასდაუდებელ როლს ასრულებს“, – ციტირებს ზიდანის სიტყვებს ბრიტანული „დეილი მეილი“.

ბექა დოგრაშვილი