მადრიდის “რეალის” ლიდერმა კრიშტიანუ რონალდუმ თანაკლუბელებთან ლუის ფელიპე სკოლარის პაროდია გააკეთა, რომელიც თავის დროზე პორტუგალიისა და ბრაზილიის ნაკრებებს ედგა სათავეში. კაზემირო და დანილუ მალევე მიხვდნენ, ვის იმიტირებას ცდილობდა რონალდუ, მარსელოს კი ახსნა დასჭირდა. შეგახსენებთ, რომ სკოლარი დღესდღეობით ჩინურ “გუანჩჟოუ ევერგრანდს” თავკაცობს.
ჭდე: Luiz Felipe Scolari
სკოლარი გადასახადების გადაუხდელობისთვის დააჯარიმეს
“პუბლიკოს” ცნობით, ჩინური “გუანჩჟოუს” მთავარი მწვრთნელი ლუიშ ფელიპე სკოლარი გადასახადების გადაუხდელობისთვის 3 მილიონი დოლარით დააჯარიმეს.
პორტუგალიის პროკურატურაში სისხლის სამართლის საქმე 2003-დან 2007 წლამდე პერიოდში გადასახადების გადაუხდელობის გამო აღიძრა. შეგახსენებთ, რომ 2002 წელს სკოლარიმ ბრაზილიის ნაკრებთან ერთად მსოფლიოს ჩემპიონატის მოგების შემდეგ პორტუგალიის ეროვნული გუნდი ჩაიბარა.
ლუიშ ფელიპე სკოლარის თავკაცობით პორტუგალიის ნაკრებმა 2004 წლის ევროპის ჩემპიონატის ფინალში ითამაშა, 2006 წლის მუნდიალზე ნახევარფინალამდე გააღწია, ევრო-2008-ზე კი ტურნირს მეოთხედფინალურ სტადიაზე გამოეთიშა.
კანავარო სკოლარიმ შეცვალა (ფოტო)
“გუანჩჟოუ ევერგრანდის” ახალი მთავარი მწვრთნელი ბრაზილიის ნაკრების ყოფილი თავკაცი ლუიშ ფელიპე სკოლარი გახდა.
ფეხბურთის ბრაზილიელმა სპეციალისტმა ამ პოსტზე ფაბიო კანავარო შეცვალა, რომელიც ჩინურ გუნდს 2014 წლის პირველი დეკემბრიდან ხელმძღვანელობდა.
მხარეებს შორის 2-წელიწადნახევრიანი კონტრაქტი გაფორმდა.
ოფიციალურად: სკოლარი საკლუბო ფეხბურთში დაბრუნდა
ბრაზილიის ნაკრების ყოფილი მთავარი მწვრთნელი ლუიშ ფელიპე სკოლარი, რომელმაც “სელესაო” 2014 წლის მსოფლიოს ჩემპიონატის შემდეგ დატოვა, საკლუბო ფეხბურთში დაბრუნდა.
ფეხბურთის ბრაზილიელმა სპეციალისტმა “გრემიო” ჩაიბარა. კონტრაქტის დეტალები ჯერჯერობით არ ხმაურდება.
აღსანიშნავია, რომ სკოლარი “გრემიოს” 1987 და 1993-დან 1996 წლამდე თავკაცობდა. ამ ხნის განმავლობაში მან ბრაზილიის ჩემპიონატი, ქვეყნის თასი და ლიბერტადორესის თასი მოიგო.
ბრაზილიის სერია А-ს XII ტურის შემდეგ აღნიშნულ გუნდს სატურნირო ცხრილში მე-10 ადგილი აქვს დაკავებული და ლიდერ “კრუზეიროს” 9 ქულით ჩამორჩება.
სკოლარიმ ბრაზილიის ნაკრები დატოვა
მსოფლიოს ჩემპიონატის დასრულების შემდეგ ბრაზილიის ნაკრების მთავარმა მწვრთნელმა ლუიშ ფელიპე სკოლარიმ ქვეყნის ფეხბურთის კონფედერაციაში გადადგომის შესახებ განცხადება აფრინა.
მანამდე ბრაზილიელი სპეციალისტი აცხადებდა, რომ მის მომავალს ქვეყნის ფეხბურთის ხელმძღვანელობა გადაწყვეტდა.
სამშობლოში გამართულ მსოფლიოს ჩემპიონატზე „სელესაომ“ ნახევარფინალურ ეტაპამდე უწია, სადაც გერმანიის ნაკრებთან ანგარიშით 1:7 განადგურდა. მესამე ადგილისთვის მატჩში კი, ბრაზილიელები ჰოლანდიელებთან განადგურდნენ – 0:3.
შეგახსენებთ, რომ ლუიშ ფელიპე სკოლარი ბრაზილიის ნაკრების მთავარი მწვრთნელის პოსტზე 2012 წლის ნოემბრიდან მუშაობდა. 2013 წელს მისი თავკაცობით „სელესაომ“ კონფედერაციის თასი მოიგო. სკოლარი ბრაზილის ნაკრების მთავარი მწვრთნელის პოსტზე მანამდეც მუშაობდა. 2002 წელს სწორედ მისი ხელმძღვანელობით გახდა გუნდი მსოფლიოს ჩემპიონი.
სკოლარი: „ეს არ ნიშნავს სამყაროს აღსასრულს“
ბრაზილიის ნაკრების მთავარმა მწვრთნელმა ლუიშ ფელიპე სკოლარიმ წინასამატჩო პრესკონფერენციაზე „სელესოას“ შანსები შეაფასა.
„როდესაც დახურულ ვარჯიშს ვატარებ, მაკრიტიკებთ. როდესაც ღია ვარჯიშს ვატარებ, მაინც მაკრიტიკებთ. ჩვენც არ მოგვწონს ნაჩვენები შედეგი, თუმცა მსოფლიოს საუკეთესო გუნდების ოთხეულში შევდივართ და ეს არ ნიშნავს სამყაროს აღსასრულს.
ვთვლი თუ არა, რომ ანგარიშით 1:7 მარცხის შემდეგ იმიჯი გავიფუჭე? შედეგი კატასტროფული იყო, თუმცა ანგარიშის გარდა არაფრის მრცხვენია. საკმაოდ პროდუქტიული სამუშაო გავწიეთ“, – განაცხადა სკოლარიმ.
შეგახსენებთ, რომ ბრაზილიის ნაკრები ბრინჯაოს მედლებისთვის ჰოლანდიის ეროვნულ გუნდს დაუპირისპირდება.
სკოლარიმ 4-4-2 სქემა მოსინჯა
ბრაზილიის ნაკრები მსოფლიოს ჩემპიონატის ნახევარფინალურ ეტაპზე გერმანიის ნაკრების წინააღმდეგ გასამართი მატჩისთვის ემზადება. ნეიმარის ტრავმამ ლუიშ ფელიპე სკოლარის გეგმები მნიშვნელოვნად შეცვალა. ფეხბურთის ბრაზილიელმა სპეციალისტმა დამდეგ შეხვედრაში გუნდი შესაძლოა 4-4-2 სქემით ათამაშოს.
გუშინდელ ვარჯიშზე ნახევარდაცვის ხაზი ლუის გუსტავომ, პაულინიომ, ფერნანდინიომ და ოსკარმა შეავსეს, წინ კი ფრედი და ჰალკი მოქმედებდნენ. თუ სკოლარი ამ განლაგებას მიმართავს, მიმდინარე ტურნირზე პირველად მოხდება, რომ „სელესაო“ 4-2-3-1 სქემით არ ითამაშებს.
საწვრთნელი პროცესის დროს სკოლარიმ ტრადიციული ტაქტიკური სქემაც მოსინჯა და პაულინიოს ნაცვლად ვილიანი შეუშვა.
გარდა ამისა, ვარჯიშისას ვილიანის ადგილას ბერნარდმა, ფერნანდინიოს ადგილას კი ერნანესმა ითამაშეს.
მატჩი ბრაზილიისა და გერმანიის ნაკრებებს შორის 9 ივლისს, თბილისის დროით 00:00 საათზე დაიწყება. შეხვედრას მექსიკელი არბიტრი მარკო როდრიგესი მოემსახურება. სხვათა შორის, სწორედ მსაჯთა ამ ბრიგადას გამოეპარა ლუის სუარესსა და ჯორჯო კიელინის შორის მომხდარი ინციდენტი.
რობერტო კარლოსმა სკოლარის გუნდი დაუწუნა
„სელესაოს“ ყოფილმა მცველმა რობერტო კარლოსმა მიმდინარე მსოფლიოს ჩემპიონატზე ბრაზილიის ნაკრების პრობლემების შესახებ ისაუბრა.
„ალბათ, იმ ფეხბურთელებზე არ უნდა ვსაუბრობდეთ, რომლებსაც ლუიშ ფელიპე სკოლარიმ ნაკრებში არ უხმო, თუმცა მე გუნდში კაკას, რონალდინიოს და რობინიოს გამოვიძახებდი. სკოლარის საკუთარი სტილი და შეხედულება აქვს.
აშკარაა, რომ ბრაზილიის ნაკრები ნახევარდაცვაში უკეთ უნდა თამაშობდეს. გუნდს აკლია ისეთი ფეხბურთელები, რომლებსაც საკუთარ თავზე პასუხისმგებლობის აღება, ნაკრების გაძღოლა, ბურთის ფლობა და უკან ჩამოსვლა შეუძლიათ. ისიც სათქმელია, რომ თითოეულ გუნდს რაღაც აკლია“, – განაცხადა რობერტო კარლოსმა.
შეგახსენებთ, რომ A ჯგუფს სათავეში ბრაზილიისა და მექსიკის ნაკრებები 4-4 ქულით უდგანან, მესამე ადგილზე ხორვატიის ნაკრებია, რომელსაც 3 ქულა აქვს, ბოლო პოზიცია კი უქულოდ დარჩენილ კამერუნს უკავია.
თითოეული ჯგუფის სატურნირო მდგომარეობის გასაცნობად გადადით გვერდზე: ცხრილი
სკოლარი: „კარგი თამაში ვიხილე, თუმცა ფრით კმაყოფილი არ ვარ“
2014 წლის მსოფლიოს ჩემპიონატის ჯგუფურ ეტაპზე ბრაზილიისა და მექსიკის ნაკრებებს შორის გამართული შეხვედრა უგოლოდ დასრულდა. მატჩის შემდეგ „სელესაოს“ მთავარმა მწვრთნელმა ლუიშ ფელიპე სკოლარიმ განაცხადა, რომ ბრაზილიის ნაკრებმა კარგი თამაში აჩვენა, თუმცა ფრე დამაკმაყოფილებელი შედეგი არ არის.
„საკმაოდ კარგი ფეხბურთი ვიხილე. რამდენიმე საგოლე მომენტი შევქმენით, თუმცა ვერ გამოვიყენეთ. უკანასკნელი თორმეტი მატჩია, შეუცვლელი სისტემით ვთამაშობთ. არ უნდა დაგავიწყდეთ, რომ საკმაოდ ძლიერი მეტოქეები გვყავს. საყაიმო შედეგით კმაყოფილი არ ვარ, რადგან გამარჯვების შემთხვევაში, ჯგუფის ერთპიროვნული ლიდერები გავხდებოდით“, – განაცხადა სკოლარიმ.
A ჯგუფს სათავეში ბრაზილიისა და მექსიკის ნაკრებები 4-4 ქულით უდგანან, კამერუნისა და ხორვატიის ნაკრებები უქულოდ არიან.
სკოლარი: „ამჟამინდელი და 2002 წლის გუნდები ერთი და იგივეა“
ბრაზილიის ნაკრების მთავარი მწვრთნელი ლუიშ ფელიპე სკოლარი თვლის, რომ „სელესაოს“ ამჟამინდელი შემადგენლობა არაფრით არ ჩამოუვარდება 2002 წლის გუნდს, რომელმაც მსოფლიოს ჩემპიონატი მოიგო.
„მე ვიტყოდი, რომ ახლანდელი შემადგენლობა და 2002 წლის გუნდი საერთო ჯამში ერთი და იგივეა. ჩემი ფეხბურთელების შესაძლებლობები საშუალებას მაძლევს, რომ თამაშის ტაქტიკური სურათი შევცვალო. ამ გუნდში არიან მოთამაშეები, რომლებსაც გუნდის სასარგებლოდ შეუძლიათ, რომ სათამაშო სტილი შეიცვალონ. მაგალითად, თუ საჭირო გახდება, ნეიმარი მეტოქე გუნდის მოთამაშეებს დაფარავს“, – სკოლარის სიტყვებს Goal.com-ი აქვეყნებს.
მსოფლიოს ჩემპიონატი ბრაზილიისა და ხორვატიის ნაკრებთა შორის გასამართი მატჩით გაიხსნება.
ბექა დოგრაშვილი
სკოლარიმ ემისარი ევროპაში სპეციალური დავალებით წარგზავნა
ბრაზილიის ნაკრების მთავარმა მწვრთნელმა ლუიშ ფელიპე სკოლარიმ ევროპაში თავისი წარმომადგენელი გააგზავნა, რომელსაც ორმაგი მოქალაქეობის მქონე ფეხბურთელებთან მოლაპარაკებების გამართვა დაევალა.
ასეთი ნაბიჯებით აპირებენ ბრაზილიელები, დიეგო კოსტას მსგავსი ისტორიის გამეორება თავიდან აიცილონ. შეგახსენებთ, რომ ბრაზილიელმა თავდამსხმელმა ესპანეთის ნაკრებში თამაში აირჩია.
სკოლარის მიერ წარგზავნილი ემისრის პირველი საქმე „პორტუს“ ტალანტ კელვინთან მოლაპარაკებების გამართვა იქნება. კელვინი „დრაკონთა“ ერთ-ერთ ყველაზე პერსპექტიულ ფეხბურთელად ითვლება. გარდა ამისა, შეხვედრები დაგეგმილია კარლოს როჩასთან („რეალი“), ლუკას ვეგასთან („ბარსელონა“), ანდრეას პერეირასთან („მანჩესტერ იუნაიტედი“) და მარკოს ლოპესთან („მანჩესტერ სიტი“).
ბექა დოგრაშვილი
სკოლარი: ,,მოურინიო სპეციალურად ამხედრებს საზოგადოებას ნეიმარის წინააღმდეგ”
ბრაზილიის ეროვნული ნაკრების მთავარმა მწვრთნელმა ლუიშ ფელიპე სკოლარიმ ,,სელესაოს’’ თავდამსხმელი ნეიმარი დაიცვა, რომელსაც ლონდონის ,,ჩელსის’’ თავკაცმა ჟოზე მოურინიომ სიმულანტი უწოდა.
,,მოურინიო მედიას თავისი ინტერესების სასარგებლოდ იყენებს. მას ეს ძალიან კარგად გამოსდის. მოურინიო ხვდება, რომ ნეიმარმა თითქმის უკვე მიაღწია ლეო მესისა და კრიშტიანო რონალდუს დონეს. შესაძლოა, ,,ჩელსის’’ ჩემპიონთა ლიგაზე ,,ბარსელონა” შეხვდეს და პორტუგალიელი ამისთვის უკვე ემზადება, საზოგადოებაში მცდარ წარმოდგენებს ავრცელებს. მოურინიო სპეციალურად ამხედრებს საზოგადოებას ნეიმარის წინააღმდეგ. რას ვიზამთ, ეს მისი სტილია”, – ციტირებს სკოლარის სიტყვებს ,,გარდიანი”.
ბექა დოგრაშვილი